Biblia Todo Logo
Bìoball air-loidhne

- Sanasan -


छ्या स्‍ये च्‍युताते बात 18 - जिरेल


बेबिलोन सार नाश गालाते

1 थेमे दि तिरी ङे स्‍वर्गनेकी परमेश्‍वर दूतज्‍यीक ओङगीन ओताते थोङसुङ। थेत्ताङ छ्येज्‍यीक शक्ति ओतान। थेमे थे शक्तिकी खित्‍सादु गाङे दि पृथ्‍वीराङ नाम्‍दाक छ्याङे गाल्‍सुङ।

2 थेमे थेकी आउदी कस्‍स्‍ये खाला छेरा खिन “था खतम गाल्‍सुङ, थे जोदाते सार बेबिलोन खतम गाल्‍सुङ। था थेरू ओताते जति ल्‍हन्‍डीक स्‍यिन्‍डीप थेमे परमेश्‍वरला चले मिक्‍किच्‍येते छ्योज्‍युङमाओनकामा देत्‍क्‍यो।

3 च्‍यिला सासीन गाङे लुङबा लुङबे मि बेबिलोनगी खि साबा च्‍योकराङ खाईन खिता मेङच्‍येते ङोचा लाङच्‍येते काम खाईन आउदी खाईन अंगूर छ्याङगी जाप च्‍योकराङ गाला ओतान। दि सा लुङबे गेल्‍बोओनगी थेत्ताङ डिगीन थेकी खिन ओता च्‍योकराङ खिता मेङच्‍येते ङोचा लाङच्‍येते काम खाबा ओतान। दि सा लुङबे बेपारीओन थेरू मोज मज्‍जा खिताला गोच्‍येते सामानओन च्‍वाकीनराङ आउदी छ्युक्‍पु गालाते ईन,” सिन ओतान।

4 दि तिरी ङे याङराङ स्‍वर्गनेकी “ङे मिवे, ख्‍योकोन गाङेराङ बेबिलोनदुकी थेन्‍ला स्‍योक। थेरू देत्‍ला मेलेबा काम माकेत। था थेरू ज्‍यीबा लाङच्‍या मेलेबा ओङे बेलाला ख्‍योकोन थेरू देता माफाप्‍स्‍यीत।

5 बेबिलोनगी दोस्‍यिक पाप खासुङ सिन साँधीराङ मेत। थे सारदु खाबाते मेलेबाते कामतेबा परमेश्‍वरगी दोक्‍पोईओङ टोक ज्‍येता मेत।

6 बेबिलोनगी जस्‍तो मेलेबा खाला दुक थे सजाय थेला तेरा फाप्‍क्‍यो। थेकी ङेता फाप्‍च्‍येते सजाय भन्‍दाङ छ्येज्‍यीक सजाय थेला तेरा फाप्‍क्‍यो। थेकी ज्‍येनला थुङ च्‍युताते छ्याङ भन्‍दाङ कन्‍देते छ्याङ थेला थुङ छ्युत।

7 जति थेकी ङा छेतते सु ईन्‍दे, ङात्ताङ छेत सम्‍पत्ति सुङताङ मेत सिन छ्ये खिन किम्‍मु खिन देता ओतान थोस्‍यिकराङ था थेला सुक देक छ्युत, था थेला नोमुङ सेम सन्‍तो खाला देत माज्‍युत। च्‍यिला सासीन थेकी थे मोरोङ सेमगी नाङ ‘ङानी गेल्‍मुका ईन, ङा नोमुङ ख्‍योबो स्‍याप्‍ते फेम्‍मे मि च्‍योक ओङा माफाबो, दुक्‍पाताङ पीर सिराते च्‍यि ईन्‍दे सिन ङे नोमुङ थोङा माफाबो,’ सिन छ्ये खिदुक।

8 थोगी ङीमाईलाराङ थेला कालगी घेरे खिओ, थेकी आउदी खाला पीर खिता फाप्‍क्‍यो थेमे थेरू आउदी अनिकाल लाङगो। थेमे थे मेकी छिक्‍ला दाक खतम डुइओ। थेला न्‍याय खाला सजाय तेरकान्‍ते प्रभु परमेश्‍वरताङ छ्येज्‍यीक शक्ति ओत,” सिन सिरा ङे थोसुङ।

9 थोक खाला थे सार छिगीन थेन्‍दाते थुता थोङला थेत्ताङ डिक्‍ला थेकी खिन ओता च्‍योकराङ खिता मेङच्‍येते ङोचा लाङच्‍येते काम खित्‍कान्‍ते दि सा लुङबे गेल्‍बोओन पीर खिन झ्‍याउँ झ्‍याउँ ङुइओ।

10 थेरू थोक मेलेबा ओङा थोङला खोपरोङगीङ थे सजाय मेङेत्‍स्‍यीत सिन ज्‍यीबेकी थेबाचेन थारीलाराङ देत्‍ला “आबिई थे जोदाते सार बेबिलोन, जेसुकैकी दाङा ख्‍योपा ओताते थोक छ्येते सार। ङिङज्‍ये तो, रकस्‍यिकलाराङ चुक मेलेबाज्‍यीक सजाय ङेत्‍सुङा,” सिन सिओ।

11 थोकराङ खाला लुङबा लुङबे बेपारीओनोङ थे सार थोक खाईन खतम गालाते थोङला पीर खिन झ्‍याउँ झ्‍याउँ ङुइओ। च्‍यिला सासीन था थेबेकी छोङच्‍येते चीजओन सुङगीङ छ्याःङ मोङ्योओ।

12 च्‍यि सासीन सेर, चाँदी, आउदी महँगो महँगोते युओन, मोती, आउदी लेमुते कार्मुते खोलाक, मोर्मुते रंग ग्‍यापाते आउदी दामीते खोलाक, सिलिक खोलाक, बास्‍ना चले खित्‍च्‍येते थरी थरी स्‍यिङ, हात्ती दारादुकी जोबाते सामानओन, पित्तल, च्‍याताङ सिङ्गमरमर दोईकी जोबाते स्‍यीओन सुङगीङ मोङ्योओ।

13 थेमे दालचिनी, थरी थरी मसाला, धूप, मूर्र, स्‍यीम्‍बुज्‍यीक बास्‍ना चले खित्‍च्‍येते धूप, अंगूर छ्याङ, मोर्गु, मैदा, ठा सुङगीङ मोङ्योओ। थोकराङ खाला लुकओन, रा ठोन्‍डो, घोडा, घोडेकी ठुत्‍च्‍येते बग्‍गीओन, योक्‍पो योङमु थेमे ज्‍येन मि समेदोङ सुङगीङ मोङ्योओ।

14 थेमे थे बेपारीओनगी थे सारला “था खोल्‍ला गा लाङच्‍येते चीजतेबा खुई नोमुङ थोङा मेङेदो। थेमे आउदी स्‍यीम्‍बु स्‍यीम्‍बुताङ छोङजीन आउदी खाला ज्‍वाच्‍येते चीजतेबाङ था नोमुङ मेङेदो। था मिओनगी होदिबा छ्याःङ नोमुङ मेङेदो,” सिन सिओ।

15 थे सारदु ङेत्‍च्‍येते जेसुकै च्‍वाकीन छ्युक्‍पु गालाते बेपारीओनोङ थेकी थोक छ्येज्‍यीक सजाय ङेता थोङला पीर खिन झ्‍याउँ झ्‍याउँ ङुइनकामा खोपरोङगीङ थे सजाय मेङेत्‍स्‍यीत सिन ज्‍यीबेकी थारीलाराङ लाला देत्‍क्‍यो।

16 थारीलाराङ देत्‍ला थेबेकी “आबिई, आबिई थे जोदाते सार। आउदी लेमुते कार्मुते खोलाक, मोर्मुते रंग ग्‍यापाते आउदी दामीते खोलाक थेमे मोर्मुते खोलाक थेमे झिलिमिली डोच्‍या खाला जीउ खाङ सेर, आउदी दामी दामी युईकी जोबाते गहनाताङ मोती खोन्‍ला देत्‍कान्‍ते फेम्‍मे मि च्‍योकराङ लेमु ओतान। तो, थे चुकराङ मेलेबा गाल्‍सुङा।

17 थेते ओताते जति सम्‍पत्ति गाङे रकस्‍यिकला स्‍वाहा गाल्‍सुङ,” सिन सिओ। थेमे पानीजहाज क्‍याप्‍टेनओन, पानीजहाजला जेला ख्‍याम्‍कान्‍ते मिओन, पानीजहाजला काम खित्‍कान्‍ते मिओन, डुङ्गा चले खाला ङ्या सेत्‍ला जीउ पाला खित्‍कान्‍ते मि गाङेराङ थारीलाराङ लाला देत्‍ला

18 थे सार छिक्‍पाते थुता थोङला “तो, थे च्‍योक लेमुते सार ज्‍येन खाङ ओतानेरो?” सिनकामा छक्‍क परे खिओ।

19 थेमे थेबाबरी खोपरोङ गोःला थाला कोन्‍ला पीर खिन झ्‍याउँ झ्‍याउँ ङुइनकामा “आबिई, आबिई, थे जोदाते सार। थेरू जोबातेताङ ङेत्‍च्‍येते चीजओन छोङ खाईनराङ समुन्‍द्रदु पानीजहाज ओत्‍कान्‍तेबा आउदी छ्युक्‍पु गाला ओतान। थोक जोदाताङ लेमुते सार फाबा रकस्‍यिकलाराङ गाङे खतम गाल्‍सुङ,” सिन सिओ।

20 “था स्‍वर्गने ओत्‍कान्‍तेबा गाङेराङ, परमेश्‍वर सन्‍तानओन, येशू ख्रीष्‍टकी खटे खाबाते मिओन थेमे परमेश्‍वर बात खित्‍कान्‍तेबा ख्‍योकोन गाङेराङ थे सार थोक खाईन छिगीन गाला थोङजीन गा खि। च्‍यिला सासीन थेकी ख्‍योकोनला मेलेबा खाबेकीराङ परमेश्‍वरगी थेला थोक छ्येज्‍यीक सजाय बिन्‍सुङ।”

21 थेमे छ्येज्‍यीक शक्ति ओताते परमेश्‍वर दूतज्‍यीगी घट्टे लाकोर छेतज्‍यीकराङ जोदाई दो जेन तेक्‍ला समुन्‍द्रे नाङमा क्‍युरगीनकामा “जोदाते सार बेबिलोनोङ दोकराङ खाला युक युला क्‍युरग्‍यो। थेरूईचेन थे सार था नोमुङ मोथोङो।

22 थानामेईचेन थे सारदु वीणा सिराते बाजा दुबाते, लु लाबाते थेमे मुरलीताङ बिकुल फुबा नोमुङ मोथोओ, जेसुकै जोकानताङ ल्‍हाकान्‍ते सीप ओताते मिओनोङ था थेरू सुङ मेङेदो थेमे था थेरू लाकोर ताबे ङोरोङ नोमुङ मोथोओ।

23 थोकराङ खाला था थेरू बत्ती नाम्‍दाकोङ नोमुङ मोथोङो। थेमे फाङमा खित्‍च्‍येते सिरातेङ था थेरू नोमुङ मेङगो। थेरू जोबाते चीजओन छोङकान्‍ते बेपारीओनला लुङबा लुङबे मिकीराङ छ्या स्‍येबा ओतान। थेबाचेन दि पृथ्‍वीते छ्ये छ्ये मि ओतान। थे सारगी झिलिमिली थोङगीन गाङे सा लुङबे मि छक्‍के खाबा ओतान।

24 परमेश्‍वर बात खित्‍कान्‍ते मिओन, परमेश्‍वर सन्‍तानओन थेमे दि सा लुङबा खाङ सेताते मि गाङेला थेरूराङ सेता ओतान,” सिन सिदुक।

© 1992 Wycliffe Bible Translators Inc. All rights reserved.

Wycliffe Bible Translators, Inc.
Lean sinn:



Sanasan