छ्या स्ये च्युताते बात 17 - जिरेलजन्तु लाक देता ओताते रन्डी बात 1 थेमे दि तिरी थोङला थे कचौरा दुईन खुरा ओताते परमेश्वर दूत दुईनबो नाङ दोक्पोईकी छेउदु वाकीन ङाला “खो देपा तार स्योक, छ्याःङ ङोचा मेताते रन्डीकी चुक खाला सजाय ङेत्कीते सिन ङा खोल्ला तेन्ला तेरग्यो। थे रन्डीचेन चाङबो काल्बेई छेउदु जोबाते छ्येते सार ईन। 2 दि सा लुङबे गेल्बोओनगी थेत्ताङ डिगीन थेकी खिन ओता च्योकराङ ङोचा लाङच्येते काम खाबा ओतान। थेमे लुङबा लुङबे मिकीङ थे रन्डीकी खि साबा च्योकराङ खिता मेङच्येते ङोचा लाङच्येते काम खाईन छ्याङगी जाप च्योकराङ गाला ओतान,” सिन सिदुक। 3 थेरूई परमेश्वर आत्मेकी जुम जुम्बालाराङ थे परमेश्वर दूतकी ङाला काल्बा च्योक ठाःकताङ बालुवाकामा ओत्से नाङला खेरसुङ। थेरू ङे मोर्मुज्यीक जन्तु लाक्तु जेकीन देताते फेम्मे मिज्यीकला थोङसुङ। थे जन्तुते गोः दुईनताङ रोज्यो च्युताम्बा ओतान। थेमे थेते जीउ खाङ परमेश्वर विरोध खित्च्येते खुदुक खुदुक मिनकामा टिबा ओतान। 4 थे फेम्मे मिकीचेन मोर्मुते रंग ग्यापाते आउदी दामीते खोलाक थेमे मोर्मुते खोलाक खोन्दा ओतान। थेमे झिलिमिली डोच्या खाईन जीउ खाङ सेर, आउदी दामी दामी युईकी जोबाते गहनाताङ मोती खोन्दा ओतान। लाःक्तुचेन थेकी सेरगी कचौराज्यीक खुरा ओतान। थे कचौरा खाङ परमेश्वरगी खिताराङ मेङगो साबाते आउदी मेलेबा काम थेमे थे फेम्मे मिकी खाबाते रन्डीबाजीताङ होदि च्योक्ते खिता मेङच्येते कामराङ कामकामा ओतान। 5 थे फेम्मे मि टाले लाक्तु सजिलो खाला खोबा मुथुप्च्याज्यीक अर्थ ओताते मिनज्यीक दोक सिन टिबा ओतान। च्यि सासीन “दि जोदाते सार बेबिलोन ईन। दि सा लुङबा खाङ रन्डीबाजीताङ होदि च्योक्ते खिता मेङच्येते काम खित्कान्ते थेमे आउदी मेलेबा मेलेबा काम खित्कान्तेबे आमा दिराङ ईन” सिन टिबा ओतान। 6 थे फेम्मे मिचेन परमेश्वर सन्तानओनला सेत्कीन थेबे ठाक थुकीन जा ओतान। थेबाचेन जति दुक्पा ओङजीनोङ येशू ख्रीष्ट सु ईन्दे, थेकी च्यि खिते सिन लोप्कीनराङ देत्कान्ते मि ओतान। थे फेम्मे मिला थोङजीन ङाला आउदी अचम्ब लासुङ। 7 ङा छक्क परे खाबा थोङगीन थे दूतकी ङाला “खो च्यिला थोक खाईन छक्क परे खाबे?” सिन ठिसुङ। थेमे थेकी याङराङ ङाला “थे फेम्मे मि थेमे थेला खुरकान्ते गोः दुईनताङ रोज्यो च्युताम्बा खाबाते जन्तु अर्थ च्यि ईन्दे सिन ङे खोल्ला लाःप्ला बिनगी। 8 खुई थोङाते दि जन्तु गोमा पालोई ओतान, थाल्ला मेत। थे था तिरी खापान खापान तीङ ओताते डालुममेकी थेन्ला ओङगो। तर थेन्गीन वानामेकी थे सजाय ङेत्ला नरककुण्डमा ड्वा फाप्क्यो। दि सा नाम ज्वा भन्दा गोमामेकीराङ नोमुङ मिसिन्च्येते जुनी ङेत्कान्ते मिओन मिन टिबा ओताते किताबला खोपरोङ मिन टिबा मेताते मिबरीचेन थे जन्तुला थोङजीन छक्क परे खिओ। च्यिला सासीन थे जन्तु गोमा ओतान, थाल्ला मेत थेमे था ङीमाई याङराङ थे दुरू ओङगो। 9 दि बातओन खोबाला आउदी बुद्धि गोक्यो। थे जन्तु गोः दुईनगी अर्थचेन दि फेम्मे मि देत्च्येते बोम दुईन ईन। दिकामा मेन, थे अर्थचेन गेल्बो दुईनोङ ईन। 10 थे गेल्बोओन नाङ मेन्दा ङा खतम गाल्गीन सिन्दा ओत। दोक्पोईकी थरिङोला राज्य खिनराङ ओत। थेमे दोक्पोईचेन ओङा बाँकीराङ ओत। वानामेई थेकी टिक्पी दिनकामा राज्य खिता ङेत्क्यो। 11 थेमे थे जन्तु गोमा पालोईनी ओतान, थरिङोला मेत। थेचेन गेल्बो गेतबो ईन। ईन्सीनोङ थेङ थे गेल्बो दुईनबो नाङराङ फाप्क्यो। थेमे थे थेन्गीन वानामेई सजाय ङेत्ला नरककुण्डमा ड्वा फाप्क्यो। 12 थेमे खुई थोङाते रोज्यो च्युताम्बे अर्थचेन गेल्बो च्युताम्बा ईन। थेबेकी थोरूमसाक राज्य ङेता मेत। थेबा गाङेकी रकस्यिक रकस्यिककामा थे जन्तुताङ गेल्बो ओङला राज्य खिता ङेत्क्यो। 13 थे गेल्बो च्युताम्बा गाङेराङ सेमज्यीकराङ खाला डिक्ला खोपरोङते राज्य खित्च्येते अधिकार थे जन्तुलाराङ तेरग्यो। 14 थेबा गाङेराङ ङ्योम्बुराङ डिक्ला लुई रीउताङ लडाइँ खिओ। लडाइँ खित्जीन लुई रीउकी थेबाला ग्याल्ग्यो। च्यिला सासीन लुई रीउचेन गाङे छ्येतेबेतेङ छ्येते थेमे गेल्बोओनतेङ गेल्बो ईन। परमेश्वरगी थे खोरोङ दोन्दु स्योक सिन काताङाते मिओनचेन लुई रीउताङ ङ्योम्बु देत्क्यो। थेबाचेन परमेश्वरगी छाने खाबाते थेमे जस्तो ओङसीनोङ थेला विश्वास खिन देत्कान्ते मिओन ईन,” सिन सिदुक। 15 लोईन थे दूतकी ङाला “खुई थोङाते थे रन्डी देताते चाङबोचेन जात जातकीते, थर थरगीते, लुङबा लुङबेते थेमे खुदुक खुदुक भाषे मि ईन। 16 खुई थोङाते थे रोज्यो च्युताम्बाताङ थे जन्तु थे रन्डीताङ माडिक्ला थेला विरोध खिओ। थेबेकी थेते ओताते जति जेसुकै ठ्वाला थेला पेर्दुङबा टोले जोइओ। थेमे थेते स्या सोला सोकीन मासिन्दाते स्यातेबाङ मे नाङमा लुक्ला थेते मिन छेनराङ तोर ज्युत्क्यो। 17 दोक च्यिला ओङगीते सासीन परमेश्वरगी खिओ सिन साबाच्योक गाङे खाईन मासिनथुप थेबेकी दोक खाला दाक्पोन राज्य खित्च्येते अधिकार थे जन्तुला तेरग्यो। थेबा गाङेराङ डिक्ला दोकराङ खित्स्यीत सिन परमेश्वरगी थेबे सेम दोकराङ जोकीन बिन्दा ओत। 18 थेमे खुई थोङाते थे फेम्मे मिचेन चाङबो काल्बेई छेउदु जोबाते छ्येते सार ईन। लुङबा लुङबे गेल्बो गाङे थे अधीनला ओत,” सिनोङ सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.