छ्या स्ये च्युताते बात 16 - जिरेलपरमेश्वर स्येदाङगी खाङाते कचौरा दुईनगी बात 1 थेमे ङे याङराङ परमेश्वर मन्दिरदुकी थे परमेश्वर दूत दुईनबोला “लो ग्युक, परमेश्वरगी स्येदाङगी चूर गाल्ला तेरच्येते सजायकी खाङाते थे कचौरा दुईनकाराङ खेरला पृथ्वीमा पु,” सिन कस्स्ये खाईन साबा थोसुङ। 2 थेमे गाल्गीन गोमे पालो दूतकी थे खोरोङगी खुराते कचौरा पृथ्वीमा पुसुङ। थोक खानामेई थे जन्तु मिनगी छाप देक च्युता ओत्कानताङ थे जन्तु मूर्तिला माने खित्कान्ते मि गाङेला जीउ खाङ आउदी कस्स्ये खाला सुक खित्च्येते कुमुकताङ मा थेन्सुङ। 3 थेरूई पालो ङिकी बाजि दूतकी थे खोरोङगी खुरा ओताते कचौरा खेरगीन समुन्द्रदु पुसुङ। थोक खानामेई समुन्द्रे छ्यु गाङे स्याप्ते मि ठाक च्योक नाक्पो गाल्सुङ। थेमे समुन्द्रे नाङ ओताते ङेपाक ओताते जति खराप खुरूप स्यिसुङ। 4 थोकराङ खाईन पालो सुमगी बाजि दूतकीङ थे खोरोङगी खुराते कचौरा ओताते जति चाङबोताङ छ्युई मोनगी नाङ पुसुङ। थोक खिताईताङ छ्यु जति गाङे ठाकराङ ठाक गाल्सुङ। 5 दोक ओङनामेकी छ्युई लाक अधिकार खित्कान्ते छ्येते दूतकी “प्रभु परमेश्वर, खो गोमाराङ ओतान, थरिङोलाङ ओत। सेमला पाप सिराते छ्याःङ मेताते खोकामा ईन। खुई सुङलाङ काका पाका मिक्किता खाईन न्याय खाईन दि सजाय बिन्दाते ठीक ईन। 6 च्यिला सासीन थेबेकी खोरोङ सन्तान थेमे खोरोङ बात खित्कान्ते मिओनला सेतेकी खुई थेबाला ठाकराङ थुङा बिन्सुङ। थेबेकी खोपरोङगी ङेता फाप्च्येते सजायराङ ङेत्सुङ,” सिन साबाते ङे थोसुङ। 7 थोक साकीन सिन्नामेकी “ईन ईन, गाङे भन्दा छ्येज्यीक शक्ति ओताते प्रभु परमेश्वर, खोचेन सुङलाङ काका पाका मिक्किता खाला सु सुला च्यि सजाय तेरा फाप्च्येते ईन्दे थे सजायराङ बिन्ला न्याय खित्कान्ते ईन,” सिन साबातेङ थोसुङ। दि ङोरोचेन थे थानदुकी थेन्दा ओतान। 8 थेमे पालो स्यी बाजि दूतकी थे खोरोङगी खुराते कचौरा ङीमे लाक पुसुङ। थोक खानामेई मिला छिक्स्यीत सिन ङीमा आउदी छिक्च्या गाल्सुङ। 9 ङीमे रापकी थोक खाईन छिक्पेकी खित्सादु होदि दुक्पातेबा ओङ ज्युत्कान्ते परमेश्वर ईन सिन थे मिन तेन्गीन मिओनगी थेला मोता खासुङ। तर खोपरोङगी खिन ओताते मेलेबा काम खिता ताङला परमेश्वर छ्य्वापा लै खाला थेला छ्ये जोच्येते कामचेन थेबेकी माक्यासुङ। 10 पालो ङे बाजि दूतकीचेन थे खोरोङगी खुराते कचौरा थे जन्तु सिंहासन लाकनामाराङ पुसुङ। थेमे थे जन्तु राज्य खाङ गाङेपा मुन्दाक जिङी गाल्सुङ। मिबरीचेन खपे खिता मुथुप्च्या दुक्पेकी खित्सादु सा थाक्पाला स्यूसुङ। 11 खोपरोङला कुमुकताङ मा थेन्साला आउदी सुक खाबेकी खित्सादु दुक्पा ङेत्कीन थेबेकी स्वर्गने देत्कान्ते परमेश्वरला मोता खासुङ। ईन्सीनोङ खोपरोङगी खिन ओताते मेलेबा काम खिता थेबेकी ताङराङ माताङसुङ। 12 थेमे पालो ठुगी बाजि दूतकी थे खोरोङगी खुराते कचौरा यूफ्रेटिस सिराते जोदाते चाङबोदु पुसुङ। थोक खानामेई थे चाङबो छ्यु जति काम्गीन पूर्वे छ्य्वापेकी ओङकान्ते गेल्बोओन ख्याम्बाला लाम थोत्सुङ। 13 थेमे ङे बाल्बाक च्योक्तेन्दे ल्हन्डीक सुम फुत्त फुत्त थेन्दाते थोङसुङ। थेबाचेन थे डुक थेमे थे जन्तु थेमे थे डुगी सिर च्युताते बात खित्कान्ते सादुकी थेन्दाते जन्तु खानामेकी थेन्दा ओतान। 14 थे ल्हन्डीक सुमबोचेन शैतान छ्य्वापेकी अचम्ब अचम्बते काम खाला तेन्कान्ते ल्हन्डीक ईन। थेबा सुमबोकी गाङे भन्दा छ्येज्यीक शक्ति ओताते परमेश्वरगी तोके खाबाते छ्येते दिनगी छोमु परमेश्वरताङ लडाइँ खिताला सा लुङबा खाङ ओताते गेल्बोओनला ठाउँज्यीकराङ जम्मा खित्च्येते कामोङ खिओ। 15 “दि बात ङेन, ङा चोर च्योक थाहाराङ मेछ्येता खाला ओङगो। ङा ओङगो सिन च्याङबो खाला देत्ला खोपरोङ खोलाक खोन्ला सधैँ ठीक खाला देत्कान्ते मिओन भाग्यमानी ईन। थोक खासीन थेबेकी मि दोन्दु पेर्दुङबाराङ ख्याम्बा माफाबो, ङोचाङ खिता माफाबो।” 16 थेमे होथे ल्हन्डीक सुमबोकी गेल्बो गाङेला ठाउँज्यीक्तुराङ जम्मा खासुङ। हिब्रू भाषाला थे ठाउँला आर-मागेड्डोन सिओ। 17 पालो दुईनगी बाजि दूतकीचेन थे खोरोङगी खुराते कचौरा नामदुराङ पुसुङ। थोक खिताईताङ परमेश्वर मन्दिर सिंहासनदुकी आउदी कस्स्ये खाईन “जे ओङा फाप्च्या ओतान था थे ओङगीन सिन्सुङ,” सिन सिरा ङे थोसुङ। 18 थेमे थेरू चिलाम खासुङ। नामज्योक बुराङ साच्याज्यीक ङोरो थोसुङ। नाम गाराङताङ गुरूङ खासुङ। थेमे आउदी ज्यीबा लाङच्याज्यीक सेदेर्मु गाल्गीन गाङे सा नामराङ लीक्सुङ। दोक ज्यीबा लाङच्याज्यीक सेदेर्मुनी दि सा लुङबादु मि जोबा छुरला नोमुङ गाला मेतान। 19 थे सेदेर्मुकी खित्सादु थे जोदाते सार टुक्रा सुम गाल्सुङ। थोकराङ खाईन लुङबा लुङबे सारतेबाङ राम्गीन गाङे नाश गाल्सुङ। दि जोदाते सार बेबिलोनला परमेश्वरगी टोक ज्येता मेतान। थोगी थेकी बेबिलोनला कचौराला लुक्पाते अंगूर छ्याङ थुङ च्युत्सुङ। थे कचौरे छ्याङ थुङच्या सिरातेचेन परमेश्वरगी स्येदाङगी चूर गाल्ला तेरच्येते सजाय ईन। 20 थेमे समुन्द्रे किल्दु ओताते लुङबातेबा तोक तोक तोरसुङ। थोकराङ खाईन थोम्बो थोम्बोते बोमोङ गाङे तोरसुङ। 21 थेमे घट्टे लाकोर छेतराङ जोदातेताङ ज्यीबा लाङच्येतेन्दे सरे नामनेकी मिओन लाकनामा ङीम्बाला स्यूसुङ। थोक ज्यीबा लाङच्येतेन्दे सरे ग्यापेकी खित्सादु मिओनगी परमेश्वरला मोता खिताला स्यूसुङ। साँच्चीराङ थे सरे आउदी ज्यीबा लाङच्येतेन्दे ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.