छ्या स्ये च्युताते बात 15 - जिरेलकचौरा दुईनबोताङ ओङच्येते सजाय बात 1 थेमे याङराङ ङे स्वर्गने ज्येनज्यीक छ्येज्यीक थेमे अचम्बज्यीक च्यि थोङसुङा सासीन गाङेकी आउदी मेलेबा मेलेबा रोगताङ अनिकाल लाङ ज्युत्च्येते थेमे ज्यीबा लाङच्या दुक्पा ओङ ज्युत्च्येते जिम्मा खुराते परमेश्वर दूत दुईनला थोङसुङ। परमेश्वरगी स्येदाङगी चूर गाल्ला तेरच्येते सजाय था होथे दुईनकामा बाँकी ओतान। 2 थे दूतओनला थोङनामेई लोक्ला ङे मे ज्वाला स्येबाज्यीक सिसा च्योकराङ टल्के खित्च्याज्यीक समुन्द्र च्योकस्यिक थोङसुङ। थेमे ङे थे समुन्द्रे छेउदुराङ लाकीन देताते मिओन थोङसुङ। थेबाचेन होथे जन्तुला ग्याल्गीन वाबा ओतान। थेबेई नोमुङ थे जन्तुताङ थे मूर्तिला माने माक्याकीन थेमे थे मि ईन सिन थे मिनगी नम्बर छाप देक माच्युत्कीन थे जन्तुताङ थे मूर्तिला ग्याला थुपा ओतान। थेबेकी परमेश्वरगी बिन्दाते वीणा सिराते बाजाओन लाःक्तु खुरा ओतान। 3 थेमे थेबाचेन परमेश्वर काम खित्कान्ते मोशेकी थे खोरोङ पालोला परमेश्वरते जय जय खिन लाबाते लु लिन्गीन ओतान। थेमे दोक सिन लुई रीउला छ्ये जोच्येते लुङ लिन्गीन ओतान। चुक सासीन “गाङे भन्दा छ्येज्यीक शक्ति ओताते प्रभु परमेश्वर, खुई खाबाते कामओन चुक छ्ये छ्येताङ अचम्ब लाङच्या ईन्दाका। खो सधैँभरि सोन्ला राज्य खिन देत्कान्ते गेल्बो ईन। खुई खित्च्येते काम गाङे लेमुतेकामा ईन। 4 प्रभु, खोत्ताङ ज्यीबा मिक्किकान्तेताङ खोल्ला छ्ये मोजोकान्ते सु ओतेरो? सेमला पाप सिराते छ्याःङ मेताते खोकामा ईन। लुङबा लुङबे मि गाङेकी खुई दोन्दु वाला गुर्बु खाला से खिनकामा खोल्ला छ्ये जोइओ। च्यिला सासीन खुई खाबाते गाङे लेमुते कामतेबा गाङेकी थोङा ओत,” सिन ओतान। 5 थेमे दि तिरी ताजीन ङे स्वर्गने ओताते परमेश्वर मन्दिर गो फेता थोङसुङ। दिचेन ङे च्यि थोङा ओताने सासीन थाङबो परमेश्वर इस्राएलीओनताङ ङ्योम्बु ओत सिन सिराला जोबाते पालगी गो फेता थोङा ओतान। 6 थेमे थे मन्दिर नाङनेकीचेन आउदी मेलेबा मेलेबा रोगताङ अनिकाल लाङ ज्युत्च्येते थेमे ज्यीबा लाङच्या दुक्पा ओङ ज्युत्च्येते जिम्मा खुराते होथे परमेश्वर दूत दुईनबो थेन्सुङ। थेबेकी टल्के खित्च्याज्यीक ओमे थोपो च्योकराङ आउदी कार्मुज्यीक खोलाक खोन्दा ओतान। थेमे ठाङलाचेन सेरगी पेटी च्यिबा ओतान। 7 थेमे थे ङेपाक ओताते थरी स्यीबो नाङ दोक्पोईकी सधैँभरि सोन्ला देत्कान्ते परमेश्वरगी स्येदाङगी चूर गाल्ला तेरच्येते सजायकी टाम टाम खाङाते सेरगी कचौरा रेरे थे परमेश्वर दूत दुईनबोला बिन्सुङ। 8 छ्येज्यीक शक्ति ओताते परमेश्वर थे मन्दिरदु मिगी ताराङ मुथुप्च्या झिलिमिली नाम्दाकला देता ओतान। थोगी खित्सादु थेरू मे बारा च्योकराङ ओङगीन थे मन्दिर थुतेकी खाङसुङ। थे दूत दुईनबोकी जिम्मा खुराते थे आउदी मेलेबा मेलेबा रोगताङ अनिकाल लाङ ज्युत्च्येते थेमे ज्यीबा लाङच्या दुक्पा ओङच्येते सजाय दुईनबो मासिनथुप सुङ थे मन्दिर नाङ स्यूक्पा माथुप्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.