छ्या स्ये च्युताते बात 14 - जिरेललुई रीउताङ थे मिओन बात 1 थेमे दि तिरी ताजीन ङे लुई रीउला सियोन बोमदु लाकीन देता ओता थोङसुङ। थेत्ताङ लाखज्यीकताङ हजार खाल ङिताङ स्यी मि ङ्योम्बु ओतान। थे मिओन टालालाचेन लुई रीउताङ थे आबे मिन टिबा ओतान। 2 थेमे स्वर्गनेकी छ्युई छहरे स्य्वाँरा च्योक थेमे नामज्योक बुराङ साच्या खाईन नाम गुरूङ खाबाच्योक ङे थोसुङ। थे ङोरोचेन आउदी काल्बेई वीणा सिराते बाजा दुबाते ङोरो च्योक ओतान। 3 थेमे थे मिओनचेन परमेश्वर सिंहासन, थे ङेपाक ओताते थरी स्यीबो थेमे थे मेरा खालज्यीकताङ स्यीबो छ्ये छ्येतेबे दोन्दु देत्ला गोमा नोमुङ मालाबाते साम्बाते लुज्यीक लिन्गीन ओतान। दि सा लुङबे मिओन नाङदुकी परमेश्वरगी पापकी सजायदुकी टालाते होथेबेकी बाई दि लु ज्येन सुङगीङ लिन्दा थुप्कीन मेतान। 4 थेबेकी नोमुङ थे जन्तु छ्य्वापा लै खित्च्येते थेमे मेलेबा काम खित्च्येते माक्यासुङ। थेबाचेन कर्नेते फेम्मे फिजा च्योकराङ चङगेते ईन। लुई रीउ जता जता डुइदुक थेबा थे तिङ ङ्याला ख्याम्गीन देत्क्यो। मि नाङदुकी पापकी सजायदुकी टालाते होदिबाचेन परमेश्वरताङ लुई रीउला चढे खाबाते साम्बाते बाली च्योक्ते ईन। 5 थेबेकी नोमुङ सुङलाङ छ्याःङ ढाँर खाबा मेतान। थेबाला सुङगीङ दिबेकी दोक दोक गल्ती खाबा ओत सिन सिरा मुथुबो। परमेश्वर दूत सुमबो बात 6 थेरूई याङराङ ङे नामगी चेनापा फुरगीन ओताते परमेश्वर दूतज्यीकला थोङसुङ। थेचेन दि सा लुङबा खाङ ओताते लुङबा लुङबेते, थर थरगीते, खुदुक खुदुक भाषेते थेमे जात जातकी मिला गा लाङच्येते बात सिराला ओङगीन ओतान। दि गा लाङच्येते बातचेन नोमुङ खुदुक मोन्डोओ, सधैँभरि थोकराङ देत्क्यो। 7 थेमे थे दूतकी कस्स्ये खाला छेरा खिन “परमेश्वरताङ ज्यीबा खि। थेला मान खाला छ्ये जो। था थेकी मि गाङेते न्याय खित्च्येते समय ख्योल्गीन सिन्सुङ। दि सा नाम, समुन्द्र थेमे छ्युई मोनतेबा गाङे जोकान्ते परमेश्वरते जय जय ओङस्यीत सिन सि,” सिन सिदुक। 8 थेमे याङराङ दि तिरी ज्येनज्यीक परमेश्वर दूतोङ दोक सिनकामा लिच्युङ। थेकीचेन “था खतम गाल्सुङ, जोदाते सार बेबिलोन खतम गाल्सुङ। बेबिलोनगी लुङबा लुङबे मिला आउदी जिच्या खाईन अंगूर छ्याङ थुङ च्युता ओतान। च्यि सासीन बेबिलोनगी लुङबा लुङबे मिला थेकी खित्च्येते च्योकराङ खिता मेङच्येते ङोचा लाङच्येते काम खित च्युता ओतान,” सिन ओतान। 9 थेबा ङिबो तिरीङ ज्येन परमेश्वर दूतज्यीक कस्स्ये खाला छेरा खिनकामा दोक सिन थेबे तिरी तिरी लिच्युङ। थेकीचेन “थे जन्तु थेमे थे मूर्तिला माने खिन थे जन्तु मि ईन सिन दाक्पोन टालाला कि सामे लाक्पाला थे छाप देक ज्युत्कान्ते 10 मिकीङ परमेश्वरगी कचौराला लुक्पा ओताते कन्देते अंगूर छ्याङ थुङा फाप्क्यो। थे कचौरे छ्याङ थुङच्या सिरातेचेन परमेश्वरगी स्येदाङगी चूर गाल्ला तेरच्येते सजाय ईन। थोक्ते मिकीचेन सधैँभरि परमेश्वर दूतओन थेमे लुई रीउ दोन्दु गन्धक बारसादु छिगीन देता फाप्क्यो। 11 थेमे थे गन्धक बारसादुई थुता थेन्गीन देत्च्येते नोमुङ मोतोरो। दोक ओङला थे जन्तु, थे मूर्ति थेमे थे मिनगी छाप देक च्युता ओताते मिकी ङीन नुप थे दुक्पे नाङ देता फाप्क्यो। थेकी नोमुङ थे दुक्पादुकी ठाल्ला ङा स्वा मेङेदो,” सिन ओतान। 12 परमेश्वरगी कोताते खिन येशूला विश्वास खिन देत्कान्ते परमेश्वर सन्तानओनगी जस्तो दुक्पा ओङसीनोङ सेम मेसेता खाला थोक्ते दुक्पा खपे खिन देता फाप्क्यो। 13 थेमे दि तिरी स्वर्गनेकी “लो दि बात टि। थानामेकी उसो प्रभु येशूला विश्वास खिन खिनला स्यिकान्ते मिओन भाग्यमानी ईन,” सिन सिरा ङे थोसुङ। थेमे परमेश्वर आत्मेकी “ईन, साँच्चीराङ दोकराङ ईन। था थेबेकी पीरताङ दुक्पे छ्य्वापेई ठाल्ला ढुक्क खाला देता ङेत्क्यो। पीरताङ दुक्पालाङ लेमु काम खिनराङ देतेकी था थेबाला लेमु ओङगो,” सिन सिदुक। परमेश्वरगी दि सा लुङबे मिओनला सजाय तेरच्येते बात 14 थेमे दि तिरी ताजीन ङे मुक्पा कार्मुज्यीक लाक परमेश्वर ओत्सादुई वाबाते मि च्योकस्यिक देता ओताते थोङसुङ। थेकी सेरगी श्रीपेज खोन्दा ओतान। थेमे लाःक्तुचेन आउदी नोम्बोज्यीक स्वारेक खुरा ओतान। 15 याङराङ ज्येनज्यीक परमेश्वर दूत परमेश्वर मन्दिर नाङनेकी थेन्गीन वाकीन थे मुक्पे लाक्तु देतातेला कस्स्ये खाईन छेरा खाईन “था खुई स्वारेककी बालीनालीतेबा ङ्वा। पृथ्वीदु ओताते बालीनाली गाङे छोकीन ङाक्च्ये बेला लेप्कीन सिन्सुङ,” सिन सिदुक। 16 थेमे थे मुक्पे लाक देता ओतातेकी थे खोरोङ लाःक्तु ओताते स्वारेककी पृथ्वीदु ओताते जति बालीनाली ङासुङ। 17 दि तिरीङ याङराङ ङे स्वर्गने ओताते परमेश्वर मन्दिरदुकी परमेश्वर दूतज्यीक थेन्दा थोङसुङ। थेकी लाःक्तु स्वारेक नोम्बोज्यीक खुरा ओतान। 18 थेरूई लोईन मे लाक अधिकार खित्कान्ते परमेश्वर दूत थे थानगी खादुकी थेन्गीन वाबाते ङे थोङसुङ। थेमे थेकी गोमा स्वारेक खुरगीन वाबाते दूतला कस्स्ये खाईन छेरा खाईन “था दि नोम्बोते स्वारेककी पृथ्वीदु ओताते अंगूर स्यीङगी अंगूर झुप्पातेबा ठेला जम्मा खि। थेबा गाङे छोकीन सिन्सुङ,” सिन कोत्सुङ। 19 थेमे कोता च्योकराङ खाईन थे दूतकी थे खोरोङ लाःक्तु ओताते स्वारेककी पृथ्वीदु ओताते अंगूर झुप्पातेबा गाङे ठेकीन जम्मा खासुङ। थेमे थेकी थे जम्मा खाबाते अंगूरचेन अंगूर छिरच्येते जोदाज्यीक कोलनामा क्युरसुङ। थे कोलदु अंगूर छिरच्येते साबातेचेन परमेश्वरगी स्येदाङगी चूर गाल्ला सजाय तेरच्येते ईन। 20 थेमे सारदुकी फिनामा ओताते थे कोलला अंगूर छिरजीन थेरूकी घोडे गोः टिक्पीस्यिककामा मुनुप्च्याज्यीक तीङ थेमे कोस सयज्यीकजो थारीसाक लेप्च्याई ठागी भल थेन्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.