छ्या स्ये च्युताते बात 13 - जिरेलसमुन्द्रताङ सादुकी थेन्दाते जन्तु बात 1 थेरूई थे डुक समुन्द्रे छेउदु गाल्गीन लाकीन देत्सुङ। थेमे दि तिरी ङे समुन्द्रे नाङदुकी जन्तुज्यीक थेन्गीन वाबा थोङसुङ। थेते रोज्यो च्युताम्बाताङ गोः दुईन ओतान। थे जन्तुकी रोज्यो रेरेला श्रीपेज रेरे खोन्दा ओतान। थे गोःओनलाचेन गोः रेरेला परमेश्वर विरोध खित्च्येते मिन टिबा ओतान। 2 थे जन्तु दोक ताजीन चितुवा च्योकस्यिक ओतान। थेते ठेक्पा थोमगीते च्योक्तेन्दे थेमे खाचेन सिंहेते च्योक खाबाई ओतान। थे डुगी थे खोरोङ अधिकार जति थे जन्तुला बिन्गीन थे खोरोङ सिंहासन लाक्तु देत च्युत्सुङ। दोक खाईन थे डुगी थे जन्तुला राज्य खित च्युत्सुङ। 3 थे जन्तुते गोःओन नाङ दोक्पोईलाचेन स्यिच्याराङ खाईन मा थोता ओताच्योक थोङगीन ओतान। थोक ईन्सीनोङ थे मा ठाक्सुङ। थे मा ठाक्पा थोङगीन दि सा लुङबे मि गाङेराङ छक्क परे खिन थे जन्तु छ्य्वापाराङ लै खासुङ। 4 थे डुगी थे खोरोङ अधिकार जति गाङे थे जन्तुला बिन्गीन राज्य खित च्युतेकी खित्सादु मिओनगी थे डुकला मान खिन छ्ये जोसुङ। थे मिओनगी “दि छेत छ्येते सु ओते? थेमे सुई दिला जीला ग्याला थुप्कीते?” सिन थे जन्तुलाङ मान खाईन छ्ये जोसुङ। 5 थेमे थे जन्तुला गाङे भन्दा छ्येते थे खोरोङराङ ईन सिरच्येते थेमे मेलेबा मेलेबा बात खाला परमेश्वर विरोध खित्च्येते मौका परमेश्वरगी बिन्सुङ। मि नाङ दोक खिताला थेला खालि दावा खाल ङिताङ ङिसाककी समयकामा बिन्दा ओतान। 6 थोगी थेकी परमेश्वर विरोध खिताला स्यूसुङ। थेकी परमेश्वर मिन तेन्गीन थे देत्च्येते ठाउँला थेमे स्वर्गने देत्कान्तेबा गाङेला मोताला स्यूसुङ। 7 थेला परमेश्वर सन्तानओनताङ जीला थेबाला ग्याल्च्येते अधिकार परमेश्वरगी बिन्दा ओतान। थेमे थेकी थर थरगीते, जात जातकीते, खुदुक खुदुक भाषेते थेमे लुङबा लुङबे मिला राज्य खिता ङेता ओतान। 8 थेमे दि सा लुङबे मि गाङेकी थे जन्तुला मान खाला छ्ये जोइओ। खालि दि सा नाम ज्वा भन्दा गोमाराङ नोमुङ मिसिन्च्येते जुनी ङेत्कान्ते मिओन मिन टिबाते किताब नाङ खोपरोङ मिन ओताते मिओनगीकामा थे जन्तुला मान खाला छ्ये मोजोओ। थे मिन टिबाते किताबचेन लुई रीउते ईन। 9 ङेन्दा सेम ओत्कान्ते मिकी दि बातओन लेमु खाला ङेन। 10 चुक सासीन परमेश्वर सन्तान नाङ सुइँदा जेलला ड्वा फाप्च्या ओत्सीन थे पक्काराङ जेलला डुइओ। थेमे तरवारगी तुप्ला सेत्च्या दुक सासीन थेला तरवारगीराङ तुप्ला सेत्क्यो। दोक ओङसीनोङ परमेश्वर सन्तानओनगी सेम मेसेता खाला दुक्पा खपे खिन देता फाप्क्यो, येशूला विश्वास खिन देता तोङा मेङगो। 11 थेरूई तिरी ङे याङराङ से नाङदुकी ज्येनज्यीक जन्तुज्यीक थेन्गीन वाबा थोङसुङ। लुई रीउते च्योकराङ थेतेङ रोज्यो ङि ओतान। दोक ईन्सीनोङ थे डुगी च्योकराङ स्याँरा खाला बात खिन ओतान। 12 दि जन्तुकीचेन गोमा समुन्द्रे नाङदुकी थेन्दाते जन्तु छ्य्वापेई अधिकार ङेत्सुङ। अधिकार ङेत्नामेई दि जन्तुकी दि सा लुङबा खाङगी मिला गोमा समुन्द्रदुकी थेन्गीन वाबाते गोःला स्यिच्याराङ खाईन मा थोत्कीन ठाक्पाते जन्तुला मान खाला छ्ये जोर च्युत्सुङ। 13 दि सादुकी थेन्दाते जन्तुकी आउदी अचम्बतेन्दे काम खाईन तेन्सुङ। मिओनगी थोङच्या खाईन थेकी नामनेकी सानामा मे समेदोङ ङील च्युत्कीन तेन्सुङ। 14 थे गोमे जन्तुला छ्ये ज्वाप्ला दोक्ते अचम्बते काम खाला तेन्च्येते शक्ति बिन्दा ओतेकी दि सादुकी थेन्दाते जन्तुकी होथोक्ते काम खाईन सा लुङबे मि गाङेला छक्के खासुङ। थेकी मि गाङेला होथे गोमे जन्तुला मान खिता फाप्क्यो सिन थे जन्तु मूर्ति जोर च्युत्सुङ। थे जन्तुचेन स्यिच्या खाईन तरवारगी तुप्कीन मा थोता ओत्सीनोङ सोन्दा ओतान। 15 थे मूर्ति जोनामेई थेला ङेपाक लुच्येते शक्ति होदि तिरी जन्तुला बिन्दा ओतान। थेकी ङेपाक लुक्नामेई थे गोमे जन्तु मूर्तिकी बात खिताला स्यूसुङ। थेमे थे खोरोङला मान खाला छ्ये मोजोओ सिरकान गाङेला सेत च्युत्सुङ। 16 थोक ओङनामेई थेकी छ्ये टेक्टे, धनी गरीब, मालिकतेबा ईन्स्यीत योक्पो योङमु ईन्स्यीत, जोराङ ईन्सीनोङ मि गाङेला कि सामे लाक्पाला कि टाले लाक छाप देक च्युत्सुङ। 17 थे जन्तु मिनगीते कि थे मिनगी नम्बर छाप मेताला सुङलाङ छ्याःङ छोङच्या ङ्योच्या खित माच्युत्सुङ। 18 दि बात खोबालाचेन आउदी बुद्धि गोक्यो। दि बात खोबा थुप्च्येते बुद्धि ओत्कानगी थे जन्तु नम्बर ङोला तारस्यीत। दि मि नम्बर ईन। दि नम्बरचेन ६६६ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.