छ्या स्ये च्युताते बात 12 - जिरेलफेम्मे मिज्यीकताङ डुगी बात 1 थेमे ङे नामने खइँदा अचम्बे जाज्यीक थेन्दा थोङसुङ। थेचेन फेम्मे मिज्यीक ओतान। थे फेम्मे मि ङीमे नाङ ओतान। थेते काम्बे चावादु दागार ओतान। थेमे थेकी गोःकी लाक कार्मा च्युन्ङी खाबाई श्रीपेज खोन्दा ओतान। 2 थेकी फुज्यीमा खुरगीन सुत्केरी ओङच्ये बेला लेपा ओतेकी फिजे सुक ग्याप्कीन थे छेरा खिन ओतान। 3 लोईन नामने ज्येनज्यीक अचम्बे जाज्यीक थेन्सुङ। थेचेन आउदी जोदाई मोर्मुज्यीक डुक ओतान। थेते गोः दुईनताङ रोज्यो च्युताम्बा ओतान। थेकी गोः रेरेला श्रीपेज रेरे खोन्दा ओतान। 4 थे डुगी ङामा योम्गीन खण्ड सुमला खण्डज्यीक नामगी कार्मा नामनेकी ठुत्कीन पृथ्वीमा ङिम्गीन ताङसुङ। थे फेम्मे मिकी फिजा क्यापज्यीकताङ खामज्यीकला साप सिन थेचेन थे फेम्मे मि दोन्दुराङ गुकीन देता ओतान। 5 थेमे थे फेम्मे मिकी फुज्युङज्यीक केसुङ। थेकी केबाते फुज्युङगी लुङबा लुङबे मिला आउदी कडा खाला राज्य खिओ। थे फेम्मे मिकी केबाते फिजाला क्यासात्तु सिंहासन लाक्तु देत्कान्ते परमेश्वर दोन्दु खेरसुङ। 6 थेमे थे फेम्मे मिचेन री नाङपा छ्य्वासुङ। ङीमा सय च्युन्ङीताङ खाल सुमसाक थे फेम्मे मिला गोच्येते जति बिन्ला च्याला ताप्ला परमेश्वरगी थे ठाउँ ठीक खाबा ओतान। 7 थोक थोक ओङनामेई स्वर्गने लडाइँ शुरू ओङसुङ। परमेश्वर दूत मिखाएलताङ थे दूतओनगी थे डुकताङ लडाइँ खासुङ। डुकताङ थे दूतओनगीङ थे परमेश्वर दूतओनताङ लडाइँ खासुङ। 8 लडाइँला डुकताङ थे दूतओन हारे खासुङ। थेमे थेबा स्वर्गने देताराङ माङेत्सुङ। 9 दोक खाईन थे जोदाते डुकला स्वर्गनेकी पृथ्वीमा ङिल्गीन ताङसुङ। थेचेन गोमामेई ओताते रूल ईन। थे मिन शैतान दैंता ईन। खालि मेलेबा कामकामा खाला सा लुङबा खाङगी मिला छक्के खित्कान्ते थेराङ ईन। थेत्ताङ थे दूत गाङेला स्वर्गनेकी पृथ्वीमा युकीन क्युरसुङ। 10 थेमे स्वर्गने कस्स्ये खाला दोक दोक सिन ओता ङे थोसुङ। च्यि सासीन “था ईन्सीन ङुरूङ परमेश्वरगी मिओनला पूरो खाला पापदुकी टाल्ला स्वर्गने देत ज्युत्च्येते काम खाईन सिन्दा खासुङ। थेकी थे खोरोङ छ्येज्यीक शक्तिकी गाङेपा गाङेला राज्य खिताला स्यूसुङ। थेकी छाने खाबाते ख्रीष्टकीते था गाङेपा गाङेला अधिकार लै खिओ। च्यिला सासीन ङीन नुप परमेश्वर खादु वाला ङुरूङ आज्यो न्वाला थेबानी दोक दोक गल्ती खित्कान्ते मिका ईन सिन सिरकान्ते शैतानला स्वर्गनेई युकीन क्युरा ओत। 11 ङुरूङ लाईदु स्यिजीन लुई रीउ जीउदुकी थेन्दाते ठागी खित्सादु थेमे थे लुई रीउ सु ईन्दे, थेकी च्यि खिते सिन थे बात ज्येनला लापेकी खित्सादु ङुरूङ आज्यो न्वाकी थोक खाला खोपरोङला दोष लै खित्कान्तेला ग्याल्सुङ। सेता छोल्जीन थेबेकी खोपरोङ ज्यानगी मायाङ खाबा मेतान। 12 थोगी था स्वर्गदु ओतातेबरी गाङेराङ आउदी खाला गा खि। तर सा लुङबाताङ समुन्द्रदु ओताते जति गाङेलाचेन ज्यीबा लाङच्ये बात ईन। च्यिला सासीन थे खोरोङगी जेसुकै खिता ङेत्च्येते समय था टिक्पीस्यिककामा ओत सिन छ्या स्येकीन शैतान आउदी खोक्पो खाईन स्येदाङ खाईन ख्योकोन ओत्सामा गाला ओत,” सिन ओतान। 13 थेमे थे डुगी थे खोरोङला स्वर्गनेकी पृथ्वीमा युकीन क्युरसुङ सिन छ्या स्येकीन थे ख्योओ फिजा केकान्ते फिजे आमाला दुक्पा तेराप सिन उराला स्यूसुङ। 14 थेमे थे फेम्मे मिला थे मोरोङला देते लाईदु परमेश्वरगी रीला ठीक खाबाते ठाउँसाक लेपाला फुरला ड्वा थुप्स्यीत सिन आउदी जोदाज्यीक खोकालीङ स्योक्पा बिन्सुङ। थे रूलगी थेला छ्याःङ मेलेबा खिता मुथुप्स्यीत सिन लो सुमताङ दावा ठुकसाक थेला गोच्येते जति बिन्ला च्याला ताप्ला परमेश्वरगीराङ री नाङपा ठाउँ ठीक खाबा ओतान। 15 थेमे थे फेम्मे मिला उरला खेरस्यीत सिन थे रूलगी खानामेकी ज्यीबा लाङच्याई छ्युई भल तेन्सुङ। 16 थेकी थोक खासीनोङ थे फेम्मे मिला थे छ्युई भलगी छ्याःङ खिता माथुप्सुङ। थेला सोन ज्युताला साराङ खाकीन थे डुगी तेन्दाते गाङे छ्यु से चावामा बास्ये खित च्युत्सुङ। 17-18 थोक ओङनामेईनी थे डुक थे फेम्मे मित्ताङ झन आउदी खाईन स्येदाङ खासुङ। थेमे थे डुक थे फेम्मे मि सन्तानताङ जीला थेबाला दुक्पा तेराला गाल्सुङ। थे फेम्मे मि सन्तानचेन परमेश्वरगी कोताते खिन येशू सु ईन्दे, थेकी च्यि खिते सिन लोप्कीनराङ देत्कान्ते मिओन ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.