छ्या स्ये च्युताते बात 11 - जिरेलपरमेश्वर बात खित्कान्ते मि ङिबो बात 1 थेरूई थापाला सिन ङाला डन्डीज्यीक बिन्सुङ। थेमे “लो गाल्ला परमेश्वर मन्दिरताङ थेरू ओताते थान थोप। थेमे थेरू परमेश्वरला छ्ये जोकान्ते मि मेरा थोई दुका सिन ङोला तो। 2 मन्दिर फिनामा ओताते स्याङका च्योक्ते ठाउँचेन थापा माफाबो। थे ठाउँचेन ज्येन ज्येन जातकी मि लाईदु सिन टाल्गीन ज्याक्पाते ईन। ज्येन ज्येन जातकी मिकी दावा खाल ङिताङ ङिसाक परमेश्वर सार सिरच्येते यरूशलेम नाङ देत्ला थे सार आउदी मेलेबा जोइओ। 3 थेमे ङा सु ईन्दे, ङे च्यि खिते सिन बात खित्कान्ते मेरा ङिला ङा शक्ति बिन्ला ङे बात खिताला तोङगो। थेबेकी पीर लाबे बेलाला च्योकराङ खाला भाङ्रे खोलाक खोन्ला ङीमा सय च्युन्ङीताङ खाल सुमसाक ङे सिर च्युताते बात खिओ,” सिन ङाराङला साबाते बात थोसुङ। 4 थेबा ङिबोचेन दि सा लुङबा खाङ राज्य खित्कान्ते प्रभु परमेश्वर दोन्दु ओताते जैतुन दोङबो ङिबोताङ बत्ती पारला ज्य्वाच्येते सामदान ङिबो ईन। 5 सुइँदेकी थेबा ङिबोला खइँदा मेलेबा खिता चाल्सीन थोक खिता छोल्कान्ते मिओनचेन थेबे खानामेकी थेन्दाते मे ज्वालेकी छिक्ला स्यिइओ। थेबाला मेलेबा खिता छोल्कान्तेबा होथोक खाला स्यिइओ। 6 परमेश्वरगी खोपरोङला सिर च्युताते बात खाईन मासिनथुप थेबा ङिबोकी छ्यार्बे थोपोईओङ थिक माच्युत्ला खडेरी थेन ज्युता थुप्क्यो। थेमे छ्युला ठाक डोर ज्युता थुप्क्यो। दोस्यिककामा मेन, खिता चाल्सुङ सासीन थेबेकीनी जुन बेलालाङ दि सा लुङबा खाङ आउदी मेलेबा मेलेबा रोगताङ अनिकाल लाङ ज्युत्क्यो। 7 थेबा ङिबोकी खिता फाप्च्येते काम खाईन सिन्नामेकी ताजीनराङ ज्यीबा लाङच्याज्यीक जन्तुज्यीक खापान खापान तीङ ओताते डालुमदुकी थेन्ला वाला थेबा ङिबोताङ जीङगो। थेमे जीला ग्याल्ला थेबा ङिबोला सेत्क्यो। 8 थेमे थेबा ङिबो रोचेन थे जोदाते सारगी लामगी नाङला क्युरग्यो। थे सारलाचेन सदोमताङ मिश्रे लुङबा सिन मिन ज्याक्पा ओत। थे सारदुराङ थेबे प्रभु येशूलाङ स्यिङगी थामला टाँए खाईन सेता ओतान। 9 थेमे ङीमा सुमताङ फेस्याकसाक जात जातकीते, थर थरगीते, खुदुक खुदुक भाषेते थेमे लुङबा लुङबे मि थेबा ङिबो रो ताप्ला ओङगो। तर सुङलाङ थेबे रो दिक मुज्युदो। 10 थेबा ङिबो स्यिदुक सिन दि सा लुङबे मि गाङेराङ गा खिओ। थेमे दाक्पोन दाक्पोन नाङ भोज सोला केका तेररीङ खाला आउदी खुशी माने खिओ। च्यिला सासीन परमेश्वरगी सिर च्युताते बात खित्कान्ते थेबा ङिबोकी दि सा लुङबे मिओनला तेरासम्म दुक्पा बिन्दा ओतान। 11 थेमे ङीमा सुमताङ फेस्याक तिरी परमेश्वरगी ङेपाक लुगीन थेबाला सोन च्युत्सुङ। थेमे थेबा ठाङे ठाङे लासुङ। थोक खाईन थेबा लाबा थोङकान्ते मि गाङे ज्यीबेकी थरावरी गाल्सुङ। 12 थेमे स्वर्गनेई आउदी कस्स्ये खाईन “देने स्योक,” सिन साबाते थेबा ङिबोकी थोसुङ। थेमे थेबा ङिकाराङ मुक्पे नाङ खाईन दाक स्वर्गने गाल्सुङ। थोक ओङाते थेबे शत्रु गाङेकी थोङसुङ। 13 थेबा थोक खाला ड्वापज्यीकताङ आउदी ज्यीबा लाङच्याई सेदेर्मु गाल्सुङ। थेमे थे जोदाते सारगीते खण्ड च्युताम्बे नाङ खण्डज्यीक गाङे राम्सुङ। हजार दुईन मिङ स्यिसुङ। थेरू थोक ओङजीन थाराते मि गाङेराङ आउदी खाईन ज्यीबा खासुङ। थेमे थेबेकी स्वर्गने देत्कान्ते परमेश्वरराङ छ्ये ईन सिन थेला छ्ये जोसुङ। 14 दि ज्यीबा लाङच्येते पालो ङिकी बाजि छ्येते दुक्पाचेन सिन्सुङ। था पालो सुमगी छ्येते दुक्पाङ होत्ता ओङगो। पालो दुईनगी बाजि बिकुल फुबाते 15 थेमे पालो दुईनगी बाजि परमेश्वर दूतकीङ थे खोरोङ बिकुल फुसुङ। थेमे ङे स्वर्गने आउदी कस्स्ये खाईन “थानामेई दि सा लुङबा गाङे ङुरूङ प्रभु परमेश्वर थेमे थेकी छाने खाबाते ख्रीष्टकी राज्य ओङा ओत। था थेबेकी सधैँभरि राज्य खिनराङ देत्क्यो,” सिन साबाते ङोरो काल्बेई थोसुङ। 16 थेमे परमेश्वर फेरोला दाक्पोन दाक्पोन सिंहासनदु देताते थे मेरा खालज्यीकताङ स्यीबो छ्ये छ्येतेबेकी खोबुकला देत्कीन दोक सिन परमेश्वरते जय जय खासुङ। 17 थेबेकी “गाङे भन्दा छ्येज्यीक शक्ति ओताते प्रभु परमेश्वर, खो गोमा ओतान, थरिङोलाङ ओत। था खुई खोरोङ छ्येज्यीक शक्तिकी गाङेपा गाङेला राज्य खिताला स्यूसुङ। थोगी ङ्योकोन खोल्ला धन्यवाद सिओ। 18 लुङबा लुङबे मि खोत्ताङ स्येदाङ खासुङ। थाचेन खुई स्येदाङगी चूर गाल्ला सजाय तेरच्येते थेमे स्याप्ते मिओन न्याय खित्च्येते बेला लेप्सुङ। था परमेश्वर खुई काम खिन खोरोङ बात खित्कान्ते मिओन, खोरोङ सन्तान थेमे ज्येनोङ खोल्ला मान खित्कान्ते छ्ये टेक्टे मि गाङेला खोरोङगी तेरच्येते इनाम तेरच्ये बेला लेप्सुङ। थेमे दि सा लुङबाला मेलेबा जोला नाश तोङकान्ते मिओनला सजाय बिन्ला सेत्च्ये बेलाङ लेप्सुङ,” सिन सासुङ। 19 थेरूई स्वर्गने ओताते परमेश्वर मन्दिर गो फेत्सुङ। थेमे गोमा परमेश्वर इस्राएलीओनताङ ङ्योम्बु ओत सिन सम्झे खिताला जोबाते जमान बाकसोङ थे नाङ थोङसुङ। थेमे थेरू चिलाम खासुङ, नामज्योक बुराङ साच्याज्यीक ङोरो थोसुङ, नाम गाराङताङ गुरूङ खासुङ, ज्यीबा लाङच्याई सेदेर्मु गाल्सुङ थेमे जोदा जोदातेन्दे सरेङ ग्याप्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.