छ्या स्ये च्युताते बात 1 - जिरेल1 दि किताबला ओताते बातओनचेन परमेश्वरगी येशू ख्रीष्टला तेन्गीन बिन्दाते बात ईन। था होत्ता ओङगीन ओताते दि बातओन थे खोरोङ काम खित्कान्ते मिओनला छ्या स्ये ज्युताला परमेश्वरगी येशू ख्रीष्टला तेन्गीन बिन्दा ओतान। थेमे दि बातओन लाःपाला येशू ख्रीष्टकी थे खोरोङ दूतज्यीकला थे खोरोङ काम खित्कान्ते यूहन्ना ओत्सादु ताङा ओतान। 2 थेमे यूहन्नेकीचेन थे खोरोङगी थोङातेताङ थोबाते परमेश्वर बात थेमे येशू ख्रीष्टकी छ्या स्ये च्युत्कीन बिन्दाते गाङे बात ईन्दातेराङ ईन सिन साबा ओत। 3 परमेश्वरगी छ्या स्ये च्युताते दि किताब नाङ टिबाते था तिरी ओङच्येते बातओन पढे खित्कान्ते थेमे थोला दुरू खि साबा च्योकराङ खित्कान्ते मि भाग्यमानी ईन। च्यिला सासीन दुरू साबाते दि गाङे बात था होत्ता साबा च्योकराङ ओङगीन ओत। सार दुईनदु जम्मा ओङकान्ते येशू ख्रीष्ट मिओनला साबाते बात 4-5 एशिये अञ्चलदु फाप्च्येते सार दुईनकारदु जम्मा ओङकान्ते येशू ख्रीष्ट मिओन ख्योकोन गाङेला ङा यूहन्ना दि बातओन टिगीन ओत। परमेश्वर थेमे थे खोरोङ सिंहासन दोन्दु ओताते परमेश्वर आत्मा दुईनबोताङ येशू ख्रीष्टकी ख्योकोनला दया खाला लेमु खिनराङ देत्स्यीत। परमेश्वर थरिङोलाङ ओत, गोमामेकीराङ ओतान थेमे सधैँभरि देत्कान्तेङ थेराङ ईन। परमेश्वर सु ईन्दे सिन थेमे थेकी खित्च्येते कामगी बात लेमु खाला लाप्ला तेरकान्ते येशू ख्रीष्ट ईन। स्याप्ते मिओन नाङ गाङे भन्दा गोमा नोमुङ मिस्यिच्या खाला सोम्बो लोक्कान्तेचेन थेराङ ईन। थेचेन दि लुङबा मुलुक गेल्बोओनतेङ गेल्बो ईन। येशूचेन ङुरूङला आउदी ङिङज्ये खित्कान्ते ईन। ङुरूङ लाईदु स्यिजीन थे खोरोङ जीउदुकी थेन्दाते ठागी खित्सादु थेकी ङुरूङला पापदुकी टाल्सुङ, 6 थेकी ङुरूङला थे खोरोङताङराङ राज्य खित्कान्ते मि जोसुङ थेमे ङुरूङगी थे खोरोङ आबा परमेश्वरला माने खित्स्यीत सिन थेकी ङुरूङला परमेश्वर पूजारी जोसुङ। थेते सधैँभरि जय जय ओङस्यीत, थेकी राज्य खिनराङ देत्स्यीत। आमेन। 7 लो दि बात टोक माज्येत। च्यि सासीन येशू ख्रीष्ट था मुक्पे नाङ खाला देमा ओङगीन ओत। थे दोक खाला ओङगीन ओताते सा लुङबे मि गाङेकी थोङगो। थेला बार्सा रोपे खित्कान्ते मिओन समेतकीङ खोपरोङ मिगीराङ थोङगो। थे थोक खाला दुरू ओङजीन सजाय ङेत्क्यो सिन ज्यीबेकी खित्सादु दि सा लुङबे मि गाङेराङ झ्याउँ झ्याउँ ङुइओ। दोकराङ ओङस्यीत। आमेन। 8 गाङे भन्दा छ्येज्यीक शक्ति ओताते प्रभु परमेश्वरगी “अल्फा थेमे ओमेगा शुरूलाराङ ओताते थेमे तिरीसाकराङ देत्कान्ते ङाराङ ईन,” सिन साबा ओत। थेचेन थरिङोलाङ ओत, गोमामेकीराङ ओतान थेमे सधैँभरि देत्कान्तेङ थेराङ ईन। यूहन्नेकी येशू ख्रीष्टला थोङाते 9 ङा ख्योकोन आज्यो यूहन्नाङ ख्योकोन च्योकराङ येशूताङ जीउज्यीकराङ ओङाते मि ईन। थोगी ङेङ ख्योकोनगी च्योकराङ खाईन दुक्पा ङेता ओत। थेमे ङाङ परमेश्वर राज्यदु ख्योकोनताङ ङ्योम्बुराङ देता ङेत्क्यो। जस्तो दुक्पा ङेत्सीनोङ ङाङ ख्योकोन च्योकराङ खपे खाईन देता ओत। ज्येनला परमेश्वर बात लापेकी थेमे येशू ख्रीष्ट सु ईन्दे, थेकी च्यि खिते सिन लापेकी खित्सादु ङाला समुन्द्रे किल्दु ओताते पत्मोस लुङबापा उरगीन ताङा ओतान। 10 थेमे थेरू ङीमाई आदेरी छोमु च्यि ओङसुङा सासीन परमेश्वर आत्मेकी ङाला जुम्सुङ। थेमे ङे ङाराङ ल्हाकनापा सुइँदेकी ङाराङताङ बात खिन ओताते थोसुङ। थे ङोरो आउदी कस्स्ये खाईन फुबाते बिकुल ङोरो च्योक ओतान। 11 थेकीचेन “खुई च्यि च्यि थोङगीका थे गाङे बात स्यिउला टिला च्याला एफिसस, स्मर्ना, पर्गामम, थिआटीरा, सार्डिस, फिलाडेल्फियाताङ लाओडिसिया होदि सार दुईनकारदु जम्मा ओङकान्ते येशू ख्रीष्ट मिओनला थोङ,” सिन सिदुक। 12 दोक खाला ङाराङताङ बात खित्कान्ते सु ईन्दाका सिन ल्हाकनापा ग्युरला ताजीन ङे बत्ती पारला ज्य्वाच्येते सामदान सिराते दुईन थोङसुङ। थे सामदानतेबा सेरगीते ओतान। 13 थेमे थे सामदान किल्दुचेन परमेश्वर ओत्सादुई वाबाते मि च्योकस्यिक थोङसुङ। थेकी काम्बासाकराङ लेप्च्याई रीम्बुज्यीक खोलाक खोन्दा ओतान। थेकी ठाङनापा सेरगी पेटी च्यिबा ओतान। 14 थेमे थे गोःताङ टाचेन ओमे थोपो च्योकराङ आउदी कार्मुज्यीक ओतान। थे मिक मे च्येला च्योकराङ आउदी चम्के खित्च्याज्यीक ओतान। 15 थेते काम्बातेबा आरनला लुगीन खारे खाईन टल्के खित च्युताते पित्तल च्योक थेमे ङोरोचेन छ्युई छहरे स्य्वाँरा च्योक ओतान। 16 थेमे थेते सामे लाक्पे नाङ कार्मा दुईन ओतान। थे खानामेकी आउदी नोम्बोई धार ङि खाबाई तरवार थेन्दा ओतान। थेते छ्येतचेन ता मुथुप्च्या ङीमा च्योकराङ चम्के खित्च्याज्यीक ओतान। 17 थेला थोङासात्तु ङा स्याप च्योकराङ गाल्गीन थे काम्बे खानापा रिल्दुक। थेमे थेकी ङे लाक थे खोरोङ सामे लाक्पा ज्य्वाकीन “ज्यीबा माकेत, ङा गाङे भन्दा गोमामेई ओताते थेमे तिरी तिरीसाकराङ देत्कान्ते ईन। 18 ङा सोन्लाराङ देत्क्यो। ङा पालोई स्यापनी ओतान, थाचेन ङा याङराङ नोमुङ मिस्यिओ। स्यिच्येते कालला ङे ग्याला ओत। थेमे सुइँदाला सजाय बिन्ला नरककुण्डमा लुबा फाप्सीन थोक खित्च्येते अधिकारोङ ङात्ताङ ओत। 19 लो था खुई खोरोङगी थोङगीन सिन्दाते, थाल्ला थोङगीन ओताते थेमे था तिरी ओङच्येते बातओन गाङे टि। 20 ङे सामे लाःक्तु खुई थोङाते कार्मा दुईनबोताङ बत्ती पारला ज्य्वाच्येते सेरगी सामदान दुईनबो अर्थ ङा खोल्ला लाःपामीन। दि कार्मा दुईनबो अर्थचेन येशू ख्रीष्ट मिओनला ताकान्ते परमेश्वर दूत दुईनबो ईन। थेमे सेरगी सामदान दुईनबोचेन थे सार दुईनदु जम्मा ओङकान्ते येशू ख्रीष्ट मिओन ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.