फिलेमोन 1 - जिरेल1 दि चिट्ठी टिक्कान्ते ङा पावल थेमे ङुरूङ न्वा तिमोथी ईन। येशू ख्रीष्टकी खि साबाते काम खिन ओतेकी ङा जेलदु देता ओत। ङ्योकोन दि चिट्ठी ङेत्ताङ डिक्ला गा लाङच्येते बात लोप्कान्ते ङिङज्येते र्वा फिलेमोन खोल्ला टिगीन ओत। 2 खोल्लाकामा मेन, ङ्योकोन नुमु अप्फिया, ङेराङ च्योकराङ दुक्पा खाला येशू ख्रीष्टकी खि साबाते काम खित्कान्ते अर्खिप्पस थेमे खुई खाम्बादु जम्मा ओङकान्ते येशू ख्रीष्ट मिओनला ङ्योकोन दि चिट्ठी टिगीन ओत। 3 ङुरूङ आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। परमेश्वरला धन्यवाद तेरच्येते थेमे प्रार्थना खित्च्येते बात 4 ङे माने खिन ओताते परमेश्वरला प्रार्थना खित्जीन खोल्ला सम्झे खिन खुई लाईदु ङा जहिलेङ थेला धन्यवाद तेरग्यो। 5 च्यिला सासीन प्रभु येशूला खुई लेमु खाला विश्वास खिदुक्लो थेमे परमेश्वर सन्तान गाङेला ङिङज्ये खिदुक्लो सिन ङे थोसुङ। 6 प्रभु येशूला खुई दोक लेमु खाला विश्वास खिन ओतेकी थेमे परमेश्वरगी ङुरूङला आशी बिन्गीन लेमु खाबाते बात गाङे खुई लेमु खाईन छ्या स्येबा ओतेकी परमेश्वर सन्तान गाङेकी ख्रीष्टला झन छ्ये जोरस्यीत सिन खुई थोरूमसाक खिन ओता च्योकराङ खिन देता थुप्स्यीत सिन ङा प्रार्थना खिओ। 7 खुई थोक खाईन परमेश्वर सन्तानला ङिङज्ये खाबेकी थेबा आउदी खुशी ओङला दुक। दि बातकी खित्सादु ङालाङ फामगी सामा सोबा च्योकराङ ओङगीन आउदी गा लाबा ओत। पावलगी ओनेसिमस बात खाबाते 8 ख्रीष्टकी ङाला कोत्च्येते अधिकार बिन्दा ओतेकी खुई चुक खिता फाप्कीते सिन ङा खोल्ला कोता थुप्च्या ओतान। ईन्सीनोङ ङा थोक मिक्किओ। 9 बरू परमेश्वर सन्तान गाङेला खुई ङिङज्ये खिओ सिन ङाला छ्या ओतेकी खुई चुक खासीन लेमु ईन्दे सिन ङा खोल्ला बातज्यीक खितामीन। खोल्ला दि बात खित्कान्ते ङा पावल था चुक गान्दा गाल्गीन सिन्दा ओते सिन थेमे येशू ख्रीष्टकी खि साबाते काम खितेकी थरिङोला जेलदु देता फापाते ईन सिन खोल्ला छ्याराङ ओत। 10 ङेचेन खोल्ला मिज्यीक लाईदु बात खिता चालाते ईन। थे मिचेन ओनेसिमस ईन। ङा दुरू जेलदु ओत्जीनराङ ङे खित्सादु दिकी येशू ख्रीष्टला विश्वास खिताला स्यूबेकी दि ङेते ङाराङ फुज्युङ च्योकराङ ओङा ओत। 11 खुई लाईदु गोमा ओनेसिमस बिना कामगी मि ओतान। थानी दि ङालाङ खोल्लाङ ङिकारला गोच्येते मि ओङा ओत। 12 था ङा दिला खो ओत्सापा ग्युरला तोङगीन ओत। ङाराङला भन्दाङ दिला ङाला काल्बेई ङिङज्ये लाङगीदुक। 13 गा लाङच्येते बात लापेकी खित्सादु ङा दुरू जेलदु फापा ओत। ईन्दानी दि बेलाला ङाराङताङ र्वा खिताला ङे दिला दुरू ङ्योम्बुराङ ज्य्वाबा चालाप। थोक खाईन दि दुरू देत्कीन ङात्ताङ र्वा खासीन खुई मद्धत खाबा छेतराङ ओङच्या ओतान। 14 ईन्सीनोङ खोल्ला माठिबाला ङाला दिला दुरू ज्य्वाबा सेम मालासुङ। खुई ङाला खइँदा मद्धत बिन्सीन करला फाप्कीन खिता फापाच्योक मेन्देकी खोरोङ राजी खुशीकी थोक खासीन ङाला गा लाङगीदुक। 15 था दि नोमुङ खोत्ताङ माठाला खाला देता थुप्स्यीत सिनराङ दि दोक खाईन टिक्पी दिन खोत्ताङ ठाल्गीन देता फापाते ओङा थुप्क्यो। 16 थाचेन दि खुई लाईदु योक्पोकामा मेन, खोरोङ ङिङज्येते न्वा छेतराङ ईन। ङा दिला आउदी ङिङज्ये खिओ। था दि प्रभु येशूला विश्वास खित्कान्ते मिकामा मेन्गीन खोरोङ योक्पोङ ईन्देकी ङाला भन्दाङ दिते खोल्ला झन ङिङज्ये मालाङोतरो? 17 बात दोक दोक ईन्देकी खुई ङाला ङा खोत्ताङ डिक्ला काम खित्कान्ते मि ईन सिओ सासीन ङा थेपा वासीन ङाला लेमु खिता च्योकराङ खाला खुई दिला लेमु खि। 18 दिकी खुईते खइँदा ङ्ये च्युता ओत्सीन कि दिला खइँदा लिन्दा फाप्च्या ओत्सीन थे ङात्ताङ लोङ। 19 खुईते दिला खइँदा लिन्दा फाप्च्या ओत्सीन ङाराङ ज्येल्ग्यो सिन ङा पावल ङाराङराङ टिगीन ओत। ङे खित्सादुराङ खुई प्रभु येशूला विश्वास खाबाते ईन्देकी ङे खोल्ला थोई गुन खाबा ओते सिन ङा छ्याःङ मिसिरो। 20 खो प्रभु येशू ख्रीष्टला विश्वास खित्कान्ते ईन्देकी ओर्च्ये ङे छ्येत ताला खुई ओनेसिमसला ङे साबा च्योकराङ खि। ख्रीष्टताङ जीउज्यीकराङ ओङाते मिकी खिता फापाच्योक खाईन भाइ खुई थोक खासीन ङाला ढुक्क ओङगो। 21 ङे खि साबा छेतकामा मेन, खुई थे भन्दाङ लेमु खिओ सिन ङाला छ्या ओतेकी ङे दोक खाईन दि चिट्ठी टिबाते ईन। 22 थोरूमोङ बातज्यीक च्यि सासीन ख्योकोनगी ङे लाईदु प्रार्थना खाबा च्योकराङ खाला था परमेश्वरगी ङाला जेलदुकी तेन्ला ख्योकोनला ठेत ज्युत्क्यो सिराच्योक लाङगीदुक। थोगी खुई ङे लाईदु डेराज्यीक ठीक खाला स्योक। 23 येशू ख्रीष्टकी खि साबाते काम खिन ओतेकी ङात्ताङराङ जेलदु ओताते इपाफ्रासते ख्योकोनला नमस्ते ओत्लो। 24 थोकराङ खाला दुरू ङात्ताङ डिक्ला गा लाङच्येते बात लोप्कान्ते मर्कूस, अरिस्तार्खस, डेमास थेमे लूकेतेङ ख्योकोनला नमस्ते ओत्लो। 25 प्रभु येशू ख्रीष्ट ख्योकोनला दया खिन ख्योकोनताङ ङ्योम्बुराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.