मर्कूस 7 - जिरेलपरमेश्वर नियमताङ मि रीतिथिति ( मत्ती १५:१-९ ) 1 ङीमाई फरिसी पाटी मिओन थेमे यरूशलेमपेई वाबाते कोई कोई धर्मे गुरूओन येशू ओत्सादु जम्मा ओङसुङ। 2 थेमे थेरू थेबेकी च्यि थोङसुङा सासीन साप सा बेलाला लाक्पा ठुत्जीन येशू चेला कोई कोईकी यहूदी रीतिथितिला खि साबा च्योकराङ खाईन लाक्पा मुठुता खाईन साप सा थोङसुङ। 3 फरिसी पाटी मिओनचेन खोपरोङ ज्युज्यु पुर्खे पालोमेई चले खिन वाबाते रीतिथितिला साबा च्योकराङ खाला लाक्पा टुलाकामा साप सेइन ओतान। थेबेकीकामा मेन, काल्बा च्योक्ते यहूदी गाङेकी दि रीतिथिति माने खिन ओतान। 4 थेबा फार छुर हाट बजारला गाल्गीन वानामेकीङ खोपरोङ चोके माक्याबाला छ्याःङ सेइन मेतान। थेबेते दोक्ते रीतिथिति ज्येनोङ काल्बेई ओतान। कचौराओन, लोटाओन थेमे पित्तल स्यीओनोङ रीतिथितिला साबा च्योकराङ खाला ठुता फाप्कीन ओतान। 5 येशू चेलाओनगी रीतिथितिला खि साबा च्योकराङ खाईन लाक्पा मुठुता खाईन साप सा थोङगीन होथे फरिसी पाटी मिओनताङ धर्मे गुरूओनगी येशूला “खुई चेलाओन लाक्पा ठुत्जीन च्यिला ज्युज्यु पुर्खे पालोमेई चले खिन वाबाते रीतिथितिला खि साबा च्योकराङ खाला लाक्पा मुठुता खाला साप सेइका?” सिन सासुङ। 6 थोक सिरजीन थेकी “च्यि यशैयेकी थाङबो साबाते बात ख्योकोनगी खिन ओताते कामताङ मिडिक्तुकरो? ख्योकोन चुक्तेन्दे ईन्दाका। यशैयेकीचेन परमेश्वरगी साबाते बात दोक सिन टिबा ओतान। चुक सासीन ‘दि मिओनगी ङाला खेकीकामा परमेश्वर सिन माने खिदुक। ङाला माने खित्जुमकामा खाला दिबेकी छ्याःङ वास्ता मिक्किदुक। 7 दिबेकी ङे नियमराङ ईन्दाच्योक खाला खोपरोङ बातका ज्येनला लोप्कीदुक। थोगी दिबेकी ङाला माने खिताला सिन खाबाते कामनी छ्याःङ काम लै मिक्किओ,’ सिन साबा ओतान। 8 यशैयेकी टिबा ओता च्योकराङ खाईन ख्योकोनगी परमेश्वर नियम ङेन्दा ताङगीन मिकी जोबाते रीतिथितिका माने खिदुक,” सिन सिदुक। 9 थोरूमोङ बात खिन थेकी “खेराङ रीतिथिति माने खिताला ख्योकोनगी च्याङबो खाईन परमेश्वरगी खि साबाते नियमओन ङेन्दा ताङला दुक। 10 चुक खाईन सासीन परमेश्वर नियमला मोशेकी ‘आबा आमाला मान खि। दाक्पोन आबा आमाला मेलेबा वचन लै खित्कान्ते मिला सेता फाप्क्यो,’ सिन साबा ओत। 11 परमेश्वर नियमला आबा आमाला मान खिता फाप्क्यो सिन साबा ओत्सीनोङ ख्योकोनचेन चुक खिका सासीन सुइँदेकी थे खोरोङ सम्पत्ति परमेश्वरला चढे खाबाप सानामेई थे खेराङ आबा आमाला ङे ख्योकोनला बुढेसकालला ता फाप्च्येते सम्पत्ति परमेश्वरला चढे खाबाप। थोगी ङा ख्योकोनला ता मुथुबो सिन सासीनोङ परमेश्वर नियम ङ्ये च्युताते मेन सिन खिदुक। 12 दोक खाला ख्योकोनगी मिओनला दाक्पोन आबा आमाला बुढेसकालला तार मुज्युत्तुक। 13 खेराङगी जोबाते रीतिथिति माने खित्सादु ख्योकोनगी होदोक खाईन परमेश्वर नियम ङेन्दा ताङला दुक। आबा आमाला मान खि सिन साबातेकामा मेन, ज्येनोङ परमेश्वर नियम काल्बेई ख्योकोनगी ङेन्दा ताङला दुक,” सिन सिदुक। च्यिकी मिला पा फोइते ( मत्ती १५:१०-२० ) 14 थेरूई येशूकी थेरू जम्मा ओङाते मिओनला याङराङ थे खोरोङ दोन्दु काताङगीन “लो ख्योकोनबरी ङे साबाते बात ङेन्ला च्यि साबाते ईन्दे सिन खोबा खि। 15 च्यि सासीन ङुरूङगी दि सा ओङच्येते, थे सा मेङच्येते थेमे लाक्पा चोके खालाकामा सा ओङगो सिरच्येते छ्याःङ मेत। साप सोला पा मोफोगो। मि खानामेकी थेन्च्येते बातकीका मिला पा फोइओ। 16 ङेन्दा सेम ओत्कान्ते मिकी दि बातओन लेमु खाला ङेन,” सिन सिदुक। 17 थेमे येशू थे मिओनताङ ठाल्गीन खाम्बाज्यीक्तु स्यूनामेई चेलातेबेकी दोन्दु वाकीन “गुरू, खुई आनाङका साबाते बात च्यि साबाते ईन्दे? ङ्योकोनला लाःप्ला नाङना,” सिन सिदुक। 18 थोक सिरजीन थेकी “च्यि ख्योकोनगीङ ज्येनगी च्योकराङ थोरूमसाक छ्याःङ मोखोदुक? थे बातनी ख्योकोनगी खोबा फाप्च्येतेराङ ईन। चुक खाईन माखोसुङा? च्यि सासीन साच्येते जेराङ सोसीनोङ मिला पा मोफोगो। 19 साप सोनामेई सुबे नाङमा गाल्ला तिरी थेरूकीङ थेन्ला डुइओ। साप मि सेमगी नाङ मुस्यूगो,” सिन सिदुक। थोक सिरजीन थेकी साच्येते जे सोसीनोङ ओङगो, खइँदा साप सोला मिला पा फोक्च्येते मेन सिन साबा ओतान। 20 दि बात खिन खिनला थेकी “थोक ईन्देकी मिला पा फोक्च्येतेचेन सेमदुकी खानामा च्यि थेन्गीका थेकीराङ ईन। 21 च्यिला सासीन मि सेम मेलेबा ओतेकीराङ मिकी मेलेबा मेलेबा विचार खित्च्येते, रन्डीबाजी खित्च्येते, कुच्येते, मि सेत्च्येते, मि ख्यावा फेम्मेताङ ङ्याल्च्येते 22 थेमे लोभ खित्च्येते ईन। दोस्यिककामा मेन, ज्येनोङ मेलेबा मेलेबा काम खित्च्येते, मिला ठगे खित्च्येते, ङोचा लाङच्येते कामओन खित्च्येते, मिला डार खित्च्येते, ज्येनला मोत्च्येते, ङा ङाराङ ईन सिराच्योक खित्च्येते थेमे विचार मिक्किता खाला कामताङ बात खित्च्येते ईन। 23 मिला होदोक्ते कामताङ बात गाङे खिता सेम लाङगो। होदोक्ते कामताङ बात खानामेई मिला पा फोइओ,” सिन सिदुक। ज्येन जातकी फेम्मे मिज्यीगी येशूला मद्धत नाङ खाबाते ( मत्ती १५:२१-२८ ) 24 थेरूई येशू टायरताङ सीदोन सिरसे नाङपा गाल्सुङ। थेपा लेप्नामेई थे मिज्यीक खाम्बादु स्यूसुङ। थे खोरोङ थेरू लेप्सुङ सिन मिओनगी छ्या मेस्येस्यीत सिरच्येते थे सेम ओतान। ईन्सीनोङ थे लेपाते बात मिओनगी दाक छ्या स्येसुङ। 25 थे ख्योलाते बात छ्या स्येबाईताङ फेम्मे मिज्यीगी थे खादु वाकीन काम्बाला से खासुङ। थेते फुमुतेला ल्हन्डीक खोबा ओतान। 26 थे फेम्मे मि ग्रीक ओतान। थे सिरिये लुङबे फोनिसिया सिरसादु केबा ओतान। थेकी येशूला “ङे फुमुला खोबाते ल्हन्डीक तेन्ला नाङ,” सिन बिन्ती खासुङ। 27 थेकी थोक खित्जीन येशूकी “गोमा फिजाओनला साप तेरा फाप्क्यो। फिजाला साबाते साप किला तेरा मेङगो,” सिन सिदुक। 28 थोक सिरजीन थे फेम्मे मिकी “ईन प्रभु, खुई साबाते ठीकराङ ईन। तर फिजातेबेकी सोकीन लूबातेनी किकीङनी सा ङेत्क्यो मेन ओना?” सिन सिदुक। 29 थेकी थोक सिरजीन येशूकी “खुई लेमु बात खासुङ। खो खाँपा गाल्सीन ओङगो, खोले खोले ग्युक। खुई फुमुला खोबाते ल्हन्डीक थेन्गीन गाल्गीन सिन्दा ओत,” सिन थेरूकी ताङसुङ। 30 थेमे थे फेम्मे मि खाँपा ग्युरगीन गाल्सुङ। थेरू लेप्जीन फुमुते ङ्याल्गीनराङ देता ओता थोङसुङ। थेला खोबाते ल्हन्डीकचेन थेन्गीन गाला ओतान। येशूकी ओन्बाते मिला ठाक्पा खाबाते 31 थेमे येशू टायरदुकी ख्याम्गीन सीदोन सारनापा खाईन गालील समुन्द्रे छेउदु फाप्च्येते डेकापोलिस सिराते सार च्युताम्बे नाङपा गाल्सुङ। 32 थे थेरू ख्योल्नामेई मिओनगी ओन्बाते मिज्यीकला थे ओत्सादु क्याल्सुङ। थे मिचेन लाटाज्यीक ओतान। थेमे थेबेकी येशूला “गुरू, दि मिला खुई लाक्पा ज्याक्ला नामज्योककी थोच्या थेमे बात खिता थुप्च्या जोला नाङ,” सिन सिदुक। 33 थोक सानामेकी थेकी थे मिला हूलदुकी टिक्पी फजेकपा खेरगीन थे नामज्योक ङिकारला लाक्पे जु लुक्सुङ। थेरूई थे खोरोङ जुला थुक खाईन थे जुकी थे मि च्येलाला दोसुङ। 34 थेमे नामने ताकीन हुईरा खाईन “इफ्फाता,” सिन सिदुक। इफ्फाता साबाते फेत्स्यीत साबाते ईन। 35 थेकी थोक सिराईताङ थे मि दाक नामज्योककी थोच्या गाल्सुङ, बात खिता थुप्च्याङ गाल्सुङ। 36 थेमे थेकी थेरू ओताते मिओनला “ङे दि मिला नामज्योककी थोच्याताङ बात खिता थुप्च्या जोबाते सुङलाङ मासेर याङ,” सिन सिदुक। थेकी थोक सासीनोङ थे मिओनगी थेकी खाबाते कामगी बात झन गाङेपा फैले खासुङ। 37 थेमे थे बात थोकान गाङेराङ अचम्ब माने खिन “आबिई, थेकी जेसुकै काम चुक लेमु खित्च्या ईन्दाका। थेकीनी ओन्बातेबाला थोच्या थेमे लाटातेबाला बात खिता थुप्च्या जोच्याक्वा,” सिन सिराला स्यूसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.