मर्कूस 13 - जिरेलपरमेश्वर मन्दिर राम्ला डोच्येते बात ( मत्ती २४:१-२ ; लूका २१:५-६ ) 1 दि गाङे बात खाईन सिन्नामेकी येशू थेरूकी ख्याम्सुङ। मन्दिरदुकी फिनामा थेन्दा खाला चेलातेबे नाङ दोक्पोईकी “गुरू, तोना चुक जोदातेन्दे दोईकी दि मन्दिर जोला दुका। दि मन्दिर थोई लेमु दुका,” सिन सासुङ। 2 थोक सिरजीन थेकी “खुई दि मन्दिर दोक लेमु खाईन जोबा ओता थोङसुङ मेन? दि मन्दिरनी था तिरी ङीमाई बराङ बुरूङ रोम्ग्यो। थेजीन दिते गारो दोज्यीगोङ बाँकी मोज्योओ,” सिन सिदुक। दि जुग सिन्दे खाला चुक चुक ओङगीते ( मत्ती २४:३-२८ ; लूका २१:७-२४ ) 3 येशू परमेश्वर मन्दिर फारकेनपा जैतुन बोमदु देता ओते बेलाला पत्रुस, याकूब, यूहन्ना थेमे अन्द्रियासकी खोपरोङकामा थे दोन्दु गाल्गीन 4 “गुरू, खुई आनाङ साबाच्योक नाम ओङगीते? थेजीन चुक चुक ओङगीते? था दि जुग सिन्दे बेला लेपा खादुक सिन चुक खाला छ्या स्येकीते?” सिन ठिसुङ। 5 थोक सिरजीन थेकी “च्याङबो खाला देत। सुङगीङ ख्योकोनला छक्के खाला ङे छ्य्वापेई मेडेल्स्यीत। 6 परमेश्वरगी मिओनला जोए खिताला तोङगो साबाते मि ङाराङ ईन सिरकान्ते मि था काल्बेई ओङगो। थेबा वाला थोक्ते बात खाला मि काल्बेईला छक्के खिओ। 7 ख्योकोनगी लुङबा लुङबाला लडाइँ ओङाते थेमे दि दि लुङबादु लडाइँ ओङगीन दुक्लो सिरा थोक्यो। थोक्ते बात थोजीन था च्यि ओङोङा, चुक ओङोङा सिन ख्योकोन ज्यीबा माकेत। थोक थोकनी ओङाराङ फाप्क्यो। ईन्सीनोङ थोक थोककामा ओङला दि जुग सिन्च्येते मेन। 8 थेजीन जात जातकी मि जीङगो, लुङबा लुङबे गेल्बोओन नाङदुङ लडाइँ ओङगो, ठाउँ ठाउँला सेदेर्मु डुइओ थेमे छ्ये छ्ये अनिकाल लाङगो। ठाउँ ठाउँला लडाइँ ओङच्येते, सेदेर्मु डोच्येते थेमे अनिकाल लाङच्येतेनी दि जुग सिन्दे खाला ओङच्येते मेलेबाते दुक्पा शुरू ओङातेकामा ईन। 9 दि बातओन छ्या स्येला ख्योकोन च्याङबो खाला देत। थेजीन ज्येनगी ख्योकोनला जुम्ला मिटिङ खित्च्येते खाम्बादु ओताते अड्डे छ्ये छ्ये मि दोन्दु केल्ग्यो। थेरू क्याल्ला ख्योकोनला दुङगो। दोस्यिककामा मेन, ख्योकोनला रोमी गेल्बो हाकिमओन थेमे गेल्बोओन दोन्दुङ केल्ग्यो। ङे मि ईन्देकीराङ ख्योकोनला दोक दोक खिओ। थेजीन ख्योकोनगी थेबाला खेराङ च्यिला ङाला विश्वास खिते सिन लाःपा ङेत्क्यो। 10 दि जुग सिन्दा गोमाचेन मि गाङेकी छ्या स्येस्यीत सिन गा लाङच्येते बात सा लुङबा खाङराङ गाङेपा लोपा फाप्क्यो। 11 खेराङला मुद्धा कोन्गीन छ्ये छ्ये मि थेमे गेल्बोओन दोन्दु क्याल्नामेकी बात ठिजीन च्यि सिरच्ये, चुक सिरच्ये सिन ज्यीबा माकेत। थे बेलाला च्यि सिरा फाप्कीते सिन थेजीनराङ परमेश्वरगी ख्योकोनला छ्या स्ये ज्युत्क्यो। च्यिला सासीन खेराङगी मेन्दाला थेजीन परमेश्वर आत्मा थे खोरोङगीराङ ख्योकोन खानापेई बात खिओ। 12 थेमे मिओनगी दिङ येशूला विश्वास खित्कान्ते ईन सिन छ्ये छ्ये मिला लाःप्ला दाक्पोन आज्यो न्वालाराङ सेत ज्युत्क्यो। आज्यो न्वाकी नाङदुकामा मेन, आबातेकी फुज्युङ फुमुला सेत ज्युत्क्यो। थोकराङ खाला फुज्युङ फुमुतेबेकीङ आबा आमातेबाला विरोध खाला सेत ज्युत्क्यो। 13 ङे मि ईन्देकीराङ मि गाङेकी ख्योकोनला मिगी थोङसार्मु खिओ। थोक थोक दुक्पा ओङजीनोङ सेम मेसेता खाला ङाला विश्वास खिन देत्कान्ते मिलाचेन परमेश्वरगी गाङे दुक्पादुकी डेल्ग्यो। 14 थेमे परमेश्वर बातला ‘था परमेश्वर विरोध खिताला ङीमा लेनज्यीक आउदी किक्टो लाङच्याज्यीक खइँदा ज्य्वाबा मेङच्येते ठाउँला ज्याक्पा थोङगो,’ सिन साबा ओत। दि बात पढे खित्कान गाङेकी च्यि साबाते ईन्ताका सिन खोबा खि। परमेश्वर बातला साबा च्योकराङ होथोक ओङा थोङनामेई यहूदिये अञ्चलदु देत्कान्ते मि गाङेराङ दाक्पोन ज्यान जोए खिताला बोम बोमला छ्योङा फाप्क्यो। 15 थेमे खाम्बे लाकने कौसीदु देता ओताते मिओन सम्पत्ति थेन्दाप सिन खाम्बे नाङ स्यूकराङ मुस्यूक्पा खाला छ्योङा फाप्क्यो। 16 थोकराङ खाला स्यीङदु काम खिन ओताते मिओनोङ खाँपा ज्येन खोलाक लिन मेङा खाला थोकराङ छ्योङा फाप्क्यो। 17 फुज्यीमा खुरा ओताते मिओन थेमे नुमा थुङकान्ते फिजा ओत्कान्तेबाला थेजीन आउदी दुक्पा ओङगो। 18 थोक खाला छ्योङा फाप्च्येते दिन गुनगी खेबे बेलाला माफाप्स्यीत सिन ख्योकोनगी परमेश्वरला प्रार्थना खि। 19 च्यिला सासीन थे बेलाला ओङच्येते च्योक्ते ज्यीबा लाङच्येते दुक्पानी परमेश्वरगी दि साताङ नाम जोबा छुरला नोमुङ ओङा मेत, था तिरीङ नोमुङ मेङगो। 20 थे खोरोङ सन्तान सिन छाने खाबाते मिओनगी थे दुक्पा खपे खिन देता माफाप्स्यीत सिन प्रभु परमेश्वरगी थोक दुक्पा ओङच्येते दिन घटे खाबा ओत। थोक माक्याबा ईन्सीन थेजीन सुङ मि सोन्ला देता मुथुबो। 21 थोक ओङे बेलाला ख्योकोनला सुइँदेकी ख्रीष्टनी वादुक, थे दुरू दुक, थेरू दुक सिन सासीन थोक्ते बातला नामज्योक मासेत। 22 थेजीन मिओनला छक्के खित्कान्ते मि काल्बेई ओङगो। थेबा कोईकी खोपरोङला ख्रीष्ट ईन सिओ। थेमे कोईकी परमेश्वर बात खित्कान्ते मि ईन साला मेन्दे बात लोप्क्यो। थेबेकी अचम्ब लाङच्येतेन्दे छ्ये छ्ये काम खाला थुपासम्म परमेश्वरगी छाने खाबाते मिओनलाङ छक्के खिता छोल्ग्यो। 23 थोगी च्याङबो खि याङ, ङे थोक्ते मिओन ओङगो सिन ख्योकोनला थरिङराङ लाःपा ओत। परमेश्वर ओत्सादुई वाबाते मि ग्युरला ओङच्येते बात ( मत्ती २४:२९-३६ ; लूका २१:२५-३३ ) 24 थेमे थे दुक्पे समय सिन्नामेई चुक ओङगीते सासीन ङीमे नाम्दाक तोरला ङीमा नाक्पो डुइओ। दागार मास्यारो। 25 नामगी कार्मातेबा गाङे नामनेकी ङील्ग्यो। दोक खाला नामने ओतातेबरी जेसुकै खराप खुरूप नाश डुइओ। 26 थोक थोक ओङनामेई परमेश्वर ओत्सादुई वाबाते मि ङा छ्येज्यीक शक्ति ङेत्ला मिगी ताराङ मुथुप्च्या नाम्दाककी झिलिमिली गाल्ला मुक्पे नाङ देत्ला स्वर्गनेकी देमा ओङगीन ओताते मि गाङेकी थोङगो। 27 थेरूई ङा ङाराङ दूतओनला गाङेपा ताङला ङाराङगी छाने खाबाते मिओनला पृथ्वी सुर स्यीकारपेकी रूला खुलाङ ज्युत्क्यो। 28 नेभारे दोङबोला च्यूली बुरगीन पालुवा फेरे खिताला स्यूनामेई था यार स्यूक्पा खादुक सिन छ्या स्येक्यो। 29 थोकराङ खाला ङे आनाङका था तिरी चुक चुक ओङगो सिन साबा ओताने थोक थोक ओङाला स्यूनामेकीचेन था परमेश्वर ओत्सादुई वाबाते मि ओङा खाबाक्वा, थे ओङच्ये बेला लेप्तुक सिन ख्योकोनगी छ्या स्येबा खि। 30 दि बात ङेन। च्यि सासीन दि पुस्तालाराङ ङे ओङगो साबाच्योक गाङे ओङगो। 31 दि साताङ नाम नाश गाल्ला तोरला डुइओ। तर ङे साबाते बातचेन फरकराङ परे मिक्किओ। 32 तर ङे ओङगो साबाच्योक ओङच्येते च्यि छोमु, नाम खजो बेलाला ओङगीते सिनचेन परमेश्वर दूतओनला थेमे परमेश्वर फुज्युङलाङ छ्या मेत। दि बात खालि आबालाकामा छ्या ओत। 33 ङे ओङगो साबाच्योक नाम, च्यि बेलाला ओङगीते सिन छ्या मेत्सीनोङ ङीमा लेनज्यीक थे बेला दाक ओङगो सिन टोक मेज्येता खाला ख्योकोन च्याङबो खाला देत। परमेश्वरला प्रार्थना खिन देता मातोङ। 34 थाल्लासाक ङे साबाते बातचेन सुइँदा खाम्बे धनीकी थे खोरोङ खाम्बा ताङला ज्येन लुङबाला डोजीन चुक खिते होथे बात च्योक्ते ईन। थे खोरोङ ड्वा भन्दा गोमा थे मिकी खाम्बादु काम खित्कान्तेबाला दाक्पोन दाक्पोनगी खिता फाप्च्येते काम लेमु खाला खि सिन जिम्मा तेरग्यो। थेमे खाम्बे चौकीदारला जागोराङ देत्ला लेमु खाला तोसा सिन साला ख्याम्ग्यो। 35 थे मिकी खाबा च्योकराङ खेराङ मालिक था नाम ग्युरला ओङगीते सिन ख्योकोनला छ्या मेतेकी ङाङ ख्योकोनला थे नाम ओङगीताना सिन थेला गुलाराङ देत सिन सिओ। ख्योकोन मालिक नाम स्योबे खालाङ ओङा थुप्क्यो, नुप फेतलाङ ओङा थुप्क्यो, ङोमु छ्योबो फोते बेलालाङ ओङा थुप्क्यो कि नाम लानामेकीकामा ओङगो। 36 थानी मालिक मेङतासीन सिन ङ्याला मेङगो। थे ग्युरला ओङजीन थेकी ख्योकोनला ङिक गाल्गीन देता थेप्सीन चुक सारोङा। 37 ङे खेराङ मालिक नाम ओङगीताना सिन गुला देत साबाते ख्योकोनलाकामा साबाते मेन। दि बात ङे ज्येन गाङेलाङ साबाते ईन,” सिन सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.