मर्कूस 10 - जिरेल

फेम्‍मे तोङच्‍येते बात

¹ थेमे येशूबा थेरूकी यर्दन चाङबो फारकेनपा यहूदिये अञ्‍चलपा गाल्‍सुङ। थेरूङ ङोला ङ्वा मुथुप्‍च्‍या मि थे ओत्‍सादु ख्‍योल्‍सुङ। थेमे सधैँ च्‍योकराङ खाईन थेकी थेबाला परमेश्‍वर बात लोपाला स्‍यूसुङ।

² थेमे कोई कोई फरिसी पाटी मि येशू ओत्‍सादु लेप्‍सुङ। वाकीन थेबेकी थे सेम तेइनकामा “सुइँदेकी फेम्‍मेतेला तोङा परमेश्‍वर नियमताङ डिगीताना मिडिक्‍ते?” सिन सासुङ।

³ थोक सिरजीन थेकी “मोशेकी परमेश्‍वर नियमला चुक खिता फाप्‍क्‍यो सिन साबा ओते?” सिन सिदुक।

⁴ थेमे थेबेकी “मोशेकीनी फर्स्‍ये टिकीन बिन्‍नामेई ताङसीन ओङगो सिन साला दुक,” सिन सिदुक।

⁵ थोक सानामेई थेकी “ख्‍योकोन परमेश्‍वर बात ङेन्‍दा सेम मिक्‍किकान्‍ते मि ईन्‍देकीराङ मोशेकी फर्स्‍ये टिकीन बिन्‍नामेकी तोङा ओङगो सिन साबाते ईन।

⁶ परमेश्‍वरगी दि सा नाम जेसुकै जोजीनमेईराङचेन दोक्‍ते बात मेतान। मि जोजीनराङ परमेश्‍वरगी ख्‍योओ मिज्‍यीकताङ फेम्‍मे मिज्‍यीक खाईन जोबाते ईन।

⁷ थोगीराङ मि दाक्‍पोन आबा आमाताङ ठाल्‍ला फेम्‍मेतेताङ ङ्योम्‍बुराङ देताला डुइओ।

⁸ थेमे थेबा ङिबो जीउज्‍यीकराङ ओङगो। थोगी ख्‍योओ मिताङ फेम्‍मे मिचेन जीउ ङि च्‍योक मेन, जीउज्‍यीकराङ ईन।

⁹ थोक खाईन परमेश्‍वरगीराङ ख्‍योओ मिताङ फेम्‍मे मिला जीउज्‍यीकराङ ओङला ङ्योम्‍बुराङ देताला जोबाते ईन्‍देकी थेबा ठाला मेङगो, ज्‍येनगी डेलाङ मेङगो,” सिन सिदुक।

¹⁰ थेमे खोपरोङकामा खाम्‍बादु ओते बेलाला चेलातेबेकी थेला “गुरू, दि फेम्‍मे तोङा ओङच्‍येतेताङ मेङच्‍येते बात ङ्योकोनला टिक्‍पी लेमु खाला लाप्‍ला नाङना,” सिन सिदुक।

¹¹ थोक सिरजीन थेकी “बात चुक ईन्‍दे सासीन सुइँदेकी दाक्‍पोन फेम्‍मे ताङगीन ज्‍येन खुला लिच्‍युङ सासीन थेकी रन्‍डीबाजी खाबाते ईन।

¹² थोकराङ खाला सुइँदा फेम्‍मे मिकी ख्‍योबोतेला ताङगीन ज्‍येनताङ गाल्‍सुङ सासीन थेकीङ रन्‍डीबाजी खाबाते ईन,” सिन सिदुक।

येशूकी फिजाओनला आशी बिन्‍दाते

¹³ थेमे कोई कोई मिकी येशूकी खोपरोङ फिजाओनला लाक्‍पा ज्‍याक्‍ला आशी तेरस्‍यीत सिन थे ओत्‍सादु क्‍याल्‍सुङ। थेरू फिजाओन खुलाङा थोङगीन चेलातेबेकीचेन “फिजाओनते दुरू छ्याःङ काम मेत। थेबाला दुरू खुला माङ,” सिनकामा थाप्‍सुङ।

¹⁴ चेलातेबेकी थोक खाबाते येशूला लेमु मालाकीन स्‍येदाङ लासुङ। थेमे थेकी थेबाला “फिजाओनला दुरू खुला माङ सिन माङार। थेबाला ङा ओत्‍सादु ओङ छ्युत। दि फिजाओन थेमे होदिबा च्‍योकराङ ङा ङाराङ ईन सिराच्‍योक मिक्‍किकान्‍ते मिओनराङ परमेश्‍वर राज्‍यने स्‍यूक्‍पा ङेत्‍क्‍यो।

¹⁵ फिजाओन च्‍योक मिक्‍किता खाला ङा ङाराङ ईन सिराच्‍योक खित्‍कान्‍ते मिचेन सुङ परमेश्‍वर राज्‍यने स्‍यूक्‍पा मेङेदो। दि बात ख्‍योकोनगी टोक माज्‍येत,” सिन सिदुक।

¹⁶ थोक साकीन सिन्‍नामेई थेकी थे फिजाओनला फाङदु लिन्‍गीन थेबे लाक्‍तु लाक्‍पा ज्‍याक्‍ला आशी तेरगीन खासुङ।

सम्‍पत्तिताङ नोमुङ मिसिन्‍च्‍येते जुनी बात

¹⁷ थेमे येशू थेरूई ख्‍याम्‍बा खाबा ओते बेलाला मिज्‍यीगी छ्य्‌वाकीन वाकीन थे काम्‍बाला से खिन “गुरू, खो लेमु मि ईन सिन ङाला छ्या ओत। थोगी नोमुङ मिसिन्‍च्‍येते जुनी ङेताला ङे च्‍यि खिता फाप्‍कीते, लाप्‍ला नाङना,” सिन सिदुक।

¹⁸ थोक सिरजीन थेकी थेला “खो ङाला लेमु मि सिन मासेर। परमेश्‍वरकामा लेमु ईन सिन सिरा फाप्‍क्‍यो।

¹⁹ परमेश्‍वरगी बिन्‍दाते छ्ये छ्ये नियमला च्‍यि च्‍यि साबा ओते सिन खोल्‍ला छ्याराङ ओतासीन। थे नियमलाचेन ‘मि सेता मेङगो, रन्‍डीबाजी खिता मेङगो, क्‍वा मेङगो, मेन्‍दे बातला सुङलाङ दोष लै खिता मेङगो, सुङलाङ ठगे खिता मेङगो, आबा आमाला मान खिता फाप्‍क्‍यो,’ सिन साबा ओत। खुई होदि नियमओनराङ ङेन,” सिन सिदुक।

²⁰ थोक सिरजीन थेकी “गुरू, दि नियमओननी ङे ङा च्‍याक फिजा ओत्‍जीनमेईराङ गाङे ङेन्‍गीन ओत,” सिन सिदुक।

²¹ थेकी थोक सिरजीन येशूला ङिङज्‍ये लासुङ। थेमे थेकी थेला “नोमुङ मिसिन्‍च्‍येते जुनी ङेता सेम लासीन थोरूमोङ खुई खिता फाप्‍च्‍येते कामज्‍यीक ओत। था खुई गाल्‍ला खोरोङते ओताते जति जेसुकै च्‍वाला पैसाचेन दुक्‍पा ङेताते मिओनला गोला बिन। थोक खासीन खुई मिनला स्‍वर्गने नोमुङ सिन्‍ला तोरला मोन्‍डोच्‍येते स्‍वर्गे सम्‍पत्ति जम्‍मा ओङला देत्‍क्‍यो। ङे थाल्‍ला साबाच्‍योक खाला खोरोङचेन ङात्ताङ ख्‍योम,” सिन सिदुक।

²² थेकी थोक सानामेई थे मिकी सेम सेत्‍सुङ। थेमे छ्येतराङ सेत्‍कीन थेरूई गाल्‍सुङ। थे आउदी छ्युक्‍पु ओतेकी थोक खाईन थेरूई गाला ओतान।

²³ थे मि थोक खाईन गाल्‍नामेई थेकी चेलातेबा ओत्‍सापा ग्‍युरगीन थेबाला “छ्युक्‍पुते मिओनला परमेश्‍वर राज्‍यने स्‍यूक्‍पाला आउदी दुक्‍पा ओङगो,” सिन सिदुक।

²⁴ थेकी दोक सिरजीन चेलातेबाला आउदी अचम्‍ब लासुङ। लोक्‍ला थेकी थेबाला “ईन फिजावे, परमेश्‍वर राज्‍यने स्‍यूक्‍पाला आउदी दुक्‍पा ईन।

²⁵ छ्युक्‍पुते मिओनला परमेश्‍वर राज्‍यने स्‍यूक्‍पा भन्‍दानी बरू ऊँट जोदाई ओत्‍सीनोङ थेला खापकी मिकनापेकी ज्‍युरा सजिलो ओङोङ,” सिन सिदुक।

²⁶ थेकी थोक सानामेई चेलातेबा झन छक्‍क परे खिन “थोक ईन्‍सीनका परमेश्‍वर राज्‍यने सु स्‍यूक्‍पा थुप्‍कीते ओना?” सिन खोपरोङ नाङ बात खिताला स्‍यूसुङ।

²⁷ थोक खित्‍जीन थेकी थेबा ओत्‍सापाला ताकीन “मि छ्युक्‍पु ओङला कि धर्म खाला परमेश्‍वर राज्‍यने स्‍यूक्‍पा मुथुबो। मिकी खिता मुथुप्‍च्‍येते दि काम परमेश्‍वरगी सजिलो खाला खिओ। थेकी खिता मुथुप्‍च्‍येते छ्याःङ मेत,” सिन सिदुक।

²⁸ दि बाततेबा थोनामेई पत्रुसकी “गुरू, खुई चेला ओङला ख्‍याम्‍बे लाईदु ङ्योकोनगीनी ङेराङते ओताते जति गाङे ताङाप। दि बात खोल्‍ला छ्याराङ ओत,” सिन सिदुक।

²⁹ थेकी थोक सिरजीन येशूकी चेलातेबा गाङेला “ईन ईन, ख्‍योकोनगी च्‍यि खाबा ओते सिन ङाला गाङे छ्या ओत। ङा ख्‍योकोनला चुक सिते सासीन ङे बात ङेन्‍ला ङात्ताङ ख्‍याम्‍बे लाईदु थेमे गा लाङच्‍येते बात लोपे लाईदु खाम्‍बा कि आबा आमा कि आज्‍यो न्‍वा आज्‍यी नुमु कि फुज्‍युङ फुमु कि जग्‍गा जिमीन तोङकान्‍तेबाला

³⁰ परमेश्‍वरगी दि जुनीलाङ आबा आमा, आज्‍यो न्‍वा आज्‍यी नुमु, फुज्‍युङ फुमु च्‍योक्‍तेताङ खाम्‍बा थेमे जग्‍गा जिमीन ज्‍येनोङ झन काल्‍बेई तेरग्‍यो। ईन्‍दानी थेबाला किम्‍मु मेङगो। ज्‍येनगी थेबाला दुक्‍पा तेरग्‍यो। था ओङच्‍येते सत्‍य जुग वानामेई थेबेकी नोमुङ मिसिन्‍च्‍येते जुनीङ ङेत्‍क्‍यो।

³¹ थेमे दि बादोङ ङेन। थरिङोला ज्‍येनगी दिङ सु ईन्‍देरो सिराच्‍योक ठाने खाबाते मिओन थेजीन छ्ये ओङगो। थरिङोला छ्ये ओतातेबाचेन तिरी छ्ये मेङगो,” सिन सिदुक।

येशूकी थे खोरोङ स्‍यिच्‍येते बात याङराङ खाबाते

³² येशू थेमे थेत्ताङ ख्‍याम्‍गीन ओताते मि गाङेराङ यरूशलेमने डुइन ओतान। येशूचेन थेबे गोमा गोमा ख्‍याम्‍बा ओतान। मि गाङेराङ आउदी खाईन आते खाबा ओतान। थेमे था थेने लेप्‍नामेई च्‍यि ओङगीताना सिन चेलातेबाचेन आउदी ज्‍यीबा खिन ओतान। थोक खाला डुइन डुइनला थेकी थे खोरोङ चेला च्‍युन्‍ङीला याङराङ मि नाङदुकी टिक्‍पी फजेकपा खेरगीन था थे खोरोङला चुक चुक ओङगीते सिन दोक सिन लाःपाला स्‍यूसुङ।

³³ थेकी थेबाला “लो दि बात ङेन। ङुरूङ यरूशलेमने डुइन ओत। थेने लेप्‍नामेकी परमेश्‍वर ओत्‍सादुई वाबाते मि ङाला मिज्‍यीगी धोका बिन्‍ला छ्ये छ्ये पूजारीताङ धर्मे गुरूओन लाःक्‍तु सोम्‍पे खिओ। थेबेकीचेन ङाला सजाय बिन्‍ला सेता फाप्‍क्‍यो सिन लोक्‍ला ज्‍येन ज्‍येन जातकी मि लाःक्‍तु सोम्‍पे खिओ।

³⁴ ज्‍येन ज्‍येन जातकी मि लाःक्‍तु सोम्‍पे खानामेकी थेबेकी ङाला हेपे खाला ईन्‍दा मेन्‍दा सिओ, छ्यिम्‍तोर देइओ, कोर्रा लै खिओ थेमे सेत्‍क्‍योदोङ। तर सेत्‍नामेकी ङीमा सुम तिरी ङा सोम्‍बो लोइओ,” सिन बात खासुङ।

छ्ये ओङा छोल्‍कानगी चुक खिता फाप्‍कीते

³⁵ थेमे थे तिरी जब्‍दी फुज्‍युङ याकूबताङ यूहन्‍नेकी येशू दोन्‍दु गाल्‍गीन “गुरू, ङ्योकोन खोल्‍ला बातज्‍यीक खितामीन। खुई दि बात मेङगो सिन मासेर,” सिन सिदुक।

³⁶ थोक सानामेई थेकी “ङे ख्‍योकोन लाईदु च्‍यि खिता फाप्‍सुङा?” सिन सिरजीन

³⁷ थेबा ङिबोकी “गुरू, था तिरी खो गेल्‍बो ओङला राज्‍य खित्‍जीन ङ्योकोन ङिबो खुई फारताङ छुरला देता ङेत्‍स्‍यीत,” सिन सिदुक।

³⁸ थोक सिरजीन थेकी “ख्‍योकोनचेन परमेश्‍वर राज्‍यने छ्ये ओङला देता छोल्‍गीदुक। थेने छ्ये ओङला देत्‍च्‍येते चुक ईन्‍दे सिन ख्‍योकोनला छ्या मिन्‍दुक। च्‍यि ङे भोगे खिता फाप्‍च्‍येते दुक्‍पा ख्‍योकोनगीङ भोगे खिता थुप्‍क्‍यो? थेमे ङा च्‍योकराङ खाईन स्‍या फाप्‍सीनोङ स्‍याप्‍ला नाइँ मिसिरो?” सिन सिदुक।

³⁹ थोक सिरजीन थेबा ङिबोकी “दुक्‍पा भोगे खिता फाप्‍सीन थेमे स्‍या फाप्‍सीनोङ ङ्योकोन ज्‍यीबा मिक्‍किओ,” सिन सिदुक। थेमे याङराङ थेकी थेबाला “ईन्‍दाका ख्‍योकोनगीङ ङे च्‍योकराङ दुक्‍पा भोगे खिता फाप्‍क्‍यो। थेमे स्‍याङ फाप्‍क्‍यो।

⁴⁰ ईन्‍सीनोङ तिरी सु सुला थोक छ्येज्‍यीक मान बिन्‍ला ङाराङ फारताङ छुरला ज्‍य्‌वाच्‍ये सिरच्‍येते अधिकारचेन ङात्ताङ मेत। परमेश्‍वरगी ङे फारताङ छुरला देताला छाने खाबाते मिओनराङ थोक खाला ङात्ताङ देत्‍क्‍यो,” सिन सिदुक।

⁴¹ याकूबताङ यूहन्‍नेकी थोक साबा थोनामेई ज्‍येन चेलातेबा च्‍युताम्‍बा थेबा ङिबोताङ स्‍येदाङ खासुङ।

⁴² चेलातेबा गाङेकी खालि छ्ये ओङा छोल्‍च्‍येते बातकामा खिता थोङगीन येशूकी थेबा गाङेला दोन्‍दु काताङगीन “दि बात ङेन। च्‍यि सासीन लुङबा लुङबे गेल्‍बोओनगी जनताला लेमु मेलेबा चुक ओङगीते सिन विचार मिक्‍किता खाला खोपरोङ खुशीकीकामा राज्‍य खिओ। गेल्‍बो चावादु छ्ये छ्ये मिकीङ गेल्‍बोओनगी खाबा च्‍योकराङ खिओ, मेनरो?

⁴³ तर ख्‍योकोनगीचेन थे गेल्‍बोओनगी खिताच्‍योक माकेत। ख्‍योकोन नाङ छ्ये ओङा छोल्‍कान्‍ते मिकीचेन छ्ये खिता साटोला सुइँदे खाम्‍बादु काम खित्‍कान्‍ते मि च्‍योक ओङला काम खिता फाप्‍क्‍यो।

⁴⁴ झन ज्‍येन ज्‍येनला कोत्‍कान्‍ते मि ओङा छोल्‍कान्‍तेकीनी ज्‍येनला दुक्‍पा मेतेरा खाला थे खोरोङराङ ज्‍येनगी कोताते ङेन्‍कान्‍ते योक्‍पो च्‍योक ओङा फाप्‍क्‍यो।

⁴⁵ परमेश्‍वर ओत्‍सादुई वाबाते मि ङाङ छ्ये मि च्‍योक खाला गाङेला दि खि, थे खि सिन कोताला वाबाते मेन। बरू मि नरककुण्‍डमा स्‍यूक्‍पा माफाप्‍स्‍यीत सिन थेबेकी ङेता फाप्‍च्‍येते पापकी सजाय ङाराङगीराङ भोगे खाला स्‍याप्‍ला दुरू वाबाते ईन,” सिन सिदुक।

येशूकी बारतिमैला थोङा थुप्‍च्‍या जोबाते

⁴⁶ थेमे ख्‍याम्‍गीन ख्‍याम्‍गीन येशूताङ थे चेलाओन थेमे थेबाताङ ख्‍याम्‍बाते मिओन यरीहो सारदु लेपा ओतान। थेमे थेबा थे सारदुकीङ ख्‍याम्‍सुङ। थेरू लामगी खादुराङ अन्‍धज्‍यीक देता ओतान। थेचेन थे लाम ख्‍याम्‍कान्‍ते मिओनला नाङ खित्‍कान्‍ते ओतान। थे तिमै फुज्‍युङ बारतिमै सिराते ओतान।

⁴⁷ येशू थोक खाला डोजीन थेकी नासरतपे येशू थेपेई खाला ओङगीन दुक्‍लो सिरा थोकीन “ए दाऊद सन्‍तान येशू, ङे दुक्‍पा थोङला नाङ,” सिन आउदी खाईन छेरा खिताला स्‍यूसुङ।

⁴⁸ थोक खित्‍जीन येशूताङ ख्‍याम्‍बा ओताते मिओनगी थेला “खो दोक खाला छेरा माकेत, खाराक्‍पा देत,” सिन ङारसुङ। थेबेकी ङारसीनोङ थेकी “ए दाऊद सन्‍तान येशू, ङे दुक्‍पा थोङला नाङ,” सिन झन कस्‍स्‍ये खाईन छेरा खासुङ।

⁴⁹ थेकी छेरा खाबाते थोकीन येशू रकस्‍यिक थेरूराङ गुकीन थे खोरोङ दोन्‍दु ओताते मिओनला “थे मिला देपा स्‍योक सि,” सिन लिन ताङसुङ। थेमे थे मिओनगी गाल्‍गीन बारतिमैला “लो था गा खि, ल्‍वा। खोल्‍ला स्‍योक्‍लो,” सिन सिरजीन

⁵⁰ थे खोरोङगी खोन्‍दाते गाङ क्‍युरगीन थे खोक लाकीन येशू ओत्‍सापा गाल्‍सुङ।

⁵¹ थेमे येशूकी थेला “ङाला च्‍यिला काताङे? ङे च्‍यि खिता फाप्‍सुङा,” सिन ठिसुङ। थेमे थेकी “ङे मिगी थोङा ङेत्‍स्‍यीत गुरू,” सिन सासुङ।

⁵² थेमे येशूकी थेला “लो लेमु खाला ग्‍युक। ङे खोल्‍ला थोङा थुप्‍च्‍या जोइओ सिन खुई ङाला विश्‍वास खाबेकी खो थोङच्‍या गालाते ईन,” सिन सिदुक। थेकी थोक सिराईताङ थे मिक दाक थोङच्‍या गाल्‍सुङ। थोक ओङनामेई थेङ येशूताङराङ ख्‍याम्‍सुङ।