मत्ती 8 - जिरेलयेशूकी जेबोला ठाक्पा खाबाते ( मर्कूस १:४०-४५ ; लूका ५:१२-१६ ) 1 थेरूई येशू बोमनेई थुल्ला फाप्सुङ। थे थेनेकी फाप्जीनराङ ङोला ङ्वा मुथुप्च्याज्यीक मि थे तिङ ङ्याकीन ख्याम्सुङ। 2 थेमे थे बेलालाराङ जेबोज्यीक थे दोन्दु ख्योल्गीन मान खिन खोबुकला देत्कीनकामा थेला “खुई ङाला ठाक्पा खिता चाल्सीन ङा ठाक्च्या ओतान आङ प्रभु,” सिन सासुङ। 3 थेकी थोक खाबा थोङगीन येशूकी लाक्पेकी थेला दोइनकामा “ङा खोल्ला ठाक्पा खिओ। लो खो ठाक्स्यीत,” सिन सिदुक। थोक सिराईताङ थे मिते जे तोरगीन थे दाक ठाक्सुङ। 4 थेमे येशूकी थेला “खुई फार छुर गाल्ला दि बात सुङलाङ मासेर याङ। था खो दुरूकी सरासर पूजारी ओत्सादु खोरोङ ठाक्पाते तेन्दाला ग्युक। थेमे थे ओत्सादु गाल्ला मोशेकी टिबाते परमेश्वर नियमला जे खोबाते मिकी ठाक्नामेई च्यि च्यि चढे खिता फाप्क्यो साबा ओते थे परमेश्वरला चढे खि। थोक खानामेई खुई जे ठाक्तुक सिन ज्येनगी छ्या स्येक्यो,” सिन साकीन थेरूई ताङसुङ। येशूकी मिल्टेरी क्याप्टेनते काम खित्कान्ते मिला ठाक्पा खाबाते ( लूका ७:१-१० ) 5 थेमे येशू कफर्नहुमदु ख्योल्सुङ। थेरू ख्योल्नामेई मिल्टेरी क्याप्टेनज्यीक मद्धत नाङ सिराला थे ओत्सादु लेप्सुङ। थे मि यहूदी मेतान। 6 थेकी येशूला “प्रभु, ङेते खाम्बादु काम खित्कान्ते मि नाकीन कुजा गाल्गीन याकयोकराङ खिता मुथुप्च्या गाल्गीन थला परे खाबा ओत। थेला ठाक्पा खाला नाङना ओर्च्ये,” सिन सासुङ। 7 थोक सानामेई येशूकी “ओङगो ओङगो, ङे गाल्ला ठाक्पा खाला बिनगी,” सिन सिदुक। 8 थोक सिरजीन थेकी “मेन मेन प्रभु, खो च्योक्ते छ्ये मि ङा च्योक्ते मि खाम्बादु ड्वा सोई मिक्किओ। प्रभु खुई थे ठाक्स्यीत सिनकामा साला नाङ। थोस्यिक सानामेई थे दाक ठाइओ। 9 च्यिला सासीन ङा ङाराङोङ छ्ये छ्ये मिकी कोताते ङेन्कान्ते मि ईन। ईन्सीनोङ ङात्ताङोङ ज्येनला कोत्च्येते अधिकार ओत। थोगी ङे चावादु मिल्टेरीओनगी ङे कोताते ङेन्ग्यो। थेबा ङे ग्युक सिरजीन डुइओ थेमे स्योक सिरजीन ओङगो। थोकराङ खाला ङे ङाराङ योक्पोला दोक खि सासीन थेकीङ थोकराङ खिओ,” सिन सासुङ। 10 थेकी थोक सिरजीन येशूला आउदी अचम्ब लासुङ। थेमे थे खोरोङ तिङ ङ्याकीन ख्याम्बा ओताते मिओनला “लो तो, दि छेत ङाला विश्वास खित्कान्ते मिनी ङे ख्योकोन इस्राएली नाङोङ थातासाक सुङ थोङा मेत। 11 ङा ख्योकोनला च्यि सिते सासीन पूर्व, पश्चिम गाङेपे मि स्वर्गे राज्यने स्यूला थेरू ख्योकोन ज्युज्यु पुर्खा अब्राहाम, इसहाक थेमे याकूबताङ देत्ला भोज सा ङेत्क्यो। 12 तर परमेश्वर राज्यदु देता ङेत्च्येते हक ओताते ख्योकोनलाचेन मुन्दाकला देताला नरककुण्डमाका क्युरग्यो। थेमाचेन गाङेराङ स्येदाङगी सा थागीन खोक्पो खाला ङुइन देत्क्यो,” सिन सिदुक। 13 मिओनला दोक सानामेई थेकी थे क्याप्टेनला “लो था खो खाँपा ग्युक, खुई ङाला विश्वास खाबा च्योकराङ ओङगो,” सिन सिदुक। थेकी थोक साबे बेलालाराङ थेते काम खित्कान्ते मि दाक ठाक्पा ओतान। येशूकी नाबाते मि काल्बेईला ठाक्पा खाबाते ( मर्कूस १:२९-३४ ; लूका ४:३८-४१ ) 14 थेरूई येशू पत्रुस खाम्बापा गाल्सुङ। थेरू लेप्नामेकी थेकी पत्रुसबे आबी ठास्युमगी नाकीन थला परे खाबा ओताते छ्या स्येसुङ। 15 थेमे थे ठाक्स्यीत सिन येशूकी थे लाक्पाला दोसुङ। दोक खिताईताङ थेते ठास्युम दाक छ्याक्सुङ। थेमे थेकी लाकीन येशूला सिन साप जोकीन बिन्सुङ। 16 थे छोमु नाम स्योनामेकी मिओनगी ल्हन्डीक स्यिन्डीप खोबाते मि काल्बेई येशू ओत्सादु क्याल्सुङ। थेमे थेकी मिओनला खोबाते ल्हन्डीकओनला थेन्ला ग्युक सिनकामा तेन्गीन ताङसुङ, स्यिन्डीप खोबातेबालाङ ठाक्पा खासुङ। थोकराङ खाईन थेरू खुलाबाते नाबाते ज्येन मिलाङ थेकी गाङेला ठाक्पा खासुङ। 17 थेकी थोक खाबेकी थाङबो परमेश्वर बात खित्कान्ते यशैयेकी “थेकी ङुरूङला रोगताङ नाचादुकी ठाक्पा खाईन बिन्सुङ,” सिन साबाते बात साबा च्योकराङ ओङसुङ। येशूताङ ख्याम्बाला चुक खिता फाप्कीते ( लूका ९:५७-६२ ) 18 थे खोरोङ फेरोला झन काल्बेई मि जम्मा ओङा थोङनामेई येशूकी चेलातेबाला समुन्द्रे फारकेनपा डुइ सिन सासुङ। 19 थेमे थेजीनराङ थेरू धर्मे गुरूज्यीगी वाकीन “गुरू, ङाङ खुई चेला ओङला खो जता गाल्सीनोङ खोत्ताङराङ ख्याम्ग्यो,” सिन सिदुक। 20 थोक सिरजीन थेकी “तर दि बात छ्या स्येबा खि। च्यि सासीन किप्च्याङते देत्च्येते ठाउँ ओङगो। थोकराङ खाला छ्योज्युङमेतेङ छाङ ओङगो। तर परमेश्वर ओत्सादुई वाबाते मि ङेतेनी थेबेते च्योक खाला देत्च्येते ठाउँ छारीनी गोःज्यीक रिल्ला देत्च्येते ठाउँओङ मेत,” सिन सिदुक। 21 थेरूई थेत्ताङराङ ख्याम्कान्ते मिज्यीगीङ “प्रभु, ङा गोमा ङे आबे रो दिला ओङामीन। थेमे खोत्ताङ ड्वाप,” सिन सिरजीन 22 थेकी “मेन मेन, खो थाल्लाराङ ङात्ताङ ख्योम। रो दिक्च्येतेनी परमेश्वरगी खि साबाते माङेन्गीन थे लाईदु स्याप छेतराङ गालाते मिओनगीङ खिता थुप्क्यो,” सिन सिदुक। येशूकी ल्हाबाताङ समुन्द्रे छाल तोर च्युताते ( मर्कूस ४:३५-४१ ; लूका ८:२२-२५ ) 23 थेमे येशूताङ थे चेलाओन डुङ्गाज्यीकला जेकीन समुन्द्रे फारकेनपा ड्वाप्ला स्यूसुङ। 24 दोक खाला डुइन डुइनला चुक ओङसुङा सासीन आउदी छ्येज्यीक ल्हाबा चले खाईन समुन्द्रदु ज्यीबा लाङच्येतेन्दे छाल लाकीन छ्यु स्यूकीन डुङ्गा नुपा नुपा खाईन सिन्दा ओतान। थेजीन येशूचेन ङिक गाला ओतान। 25 थोगी ज्यीबेकी आते खिन चेलातेबेकी “ए प्रभु, ल्वाना ल्वा,” सिन थेला ङिक चेत्कीनकामा “लो तो डुङ्गा नुपा खाईन सिन्सुङ, ङुरूङ स्यिच्या ओङसुङ। था च्यि खित्च्ये?” सिन छेरा खासुङ। 26 थोक खित्जीन थेकी “ख्योकोनबरी च्यिला दोक खाला ज्यीबा खिते? ङे ख्योकोनला जोए खिता थुप्क्यो सिन ख्योकोनगी ङाला विश्वास खाबाते खोइ?” सिन सिदुक। थोक साकीन च्याकीन खोक लाकीन थेकी ल्हाबाताङ समुन्द्रे छालला “गोगे देत,” सिन सासुङ। थेकी थोक सानामेई ल्हाबा चले खिता ताङसुङ, समुन्द्रे छालोङ तोरसुङ। 27 थोक थोङगीन चेलातेबा छकदाङ परे खासुङ। थेमे “आबिई, दि मि चुक अचम्बज्यीक ईन्दाका। दिकी कोतातेनी ल्हाबाताङ समुन्द्रे छालगी समेदोङ ङेन्गीदुक,” सिन सासुङ। येशूकी मेन्दा ङि मिदुकी ल्हन्डीक तेन्गीन ताङाते ( मर्कूस ५:१-२० ; लूका ८:२६-३९ ) 28 थेरूई येशू समुन्द्रे फारकेनपा गदरिनी सिराते मिओन देत्च्येते लुङबादु ख्योल्सुङ। थेमे थेरू ल्हन्डीक खोबाते मेन्दा ङि मिकी रो ज्य्वाच्येते फुगी नाङलेकी थेन्गीन वाकीन थेला ठेता खासुङ। ल्हन्डीक खोबेकी थे मिओन आउदी ज्यीबा लाङच्या गाला ओतान। थेबे ज्यीबेकी खित्सादु ज्येनगी थेपेकी खाला डोच्येते लाम समेदोङ ख्याम्बा ताङा ओतान। 29 थेला ठेतासात्तु थेबेकी ल्हन्डीक खानापेई “हजूर, खो परमेश्वर फुज्युङ ईन सिन ङ्योकोनला छ्या ओत। च्यि परमेश्वरगी सजाय तेरच्येते दिन मालेपालाराङ खो दुरू ङ्योकोनला सजाय तेराला वाबाप, ना चुक?” सिन छेरा खासुङ। 30 थे बेलाला टिक्पी फजेक नाङपा फाक्पा काल्बेई चरन खिन ओतान। 31 थेमे थे ल्हन्डीकओनगी “ङ्योकोनला दि मिओन नाङदुकी तेन्ला तोङगोतराङ सासीन ओर्च्ये उथे फाक्पाओन नाङ देताला थोङ,” सिन सिरजीन 32 थेकी “ओङगो ग्युक,” सिन सिदुक। थोक सानामेकी थे ल्हन्डीकओन थे मि ङिबोला ताङगीन फाक्पाओनला खोबाला गाल्सुङ। थेमे थेरू च्यि ओङसुङा सासीन फाक्पा गाङे ङ्योबाच्योक गाल्गीन बोमगी नाङमा छ्योङगीन डोजीन ठाःकनामा रिल्गीन गाल्गीन समुन्द्रे नाङमा स्यूकीन नुप्कीन स्यिसुङ। 33 थोक ओङा थोङगीन थे फाक्पे गोठालाओन ज्यीबेकी सारगी नाङपा छ्य्वाकीन गाल्गीन फाक्पा स्याप्ते थेमे थे ल्हन्डीक खोबाते मि ङिबोला ओङाते बात गाङे मिओनला लाःप्सुङ। 34 दि बातओन थोनामेकी थेरू सारगी मि गाङेराङ येशूला ठेता खित लिच्युङ। थेमे वाकीन थेबेकी थेला “हजूर खो ओर्च्ये दुरू मादेत, दुरूकी दाक ग्युक,” सिन सासुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.