मत्ती 26 - जिरेलयेशूला सेताला ठो खाबाते ( मर्कूस १४:१-२ ; लूका २२:१-२ ; यूहन्ना ११:४५-५३ ) 1 थोक खाईन येशूकी दि बातओन साकीन सिन्नामेकी चेलातेबाला 2 “था ङीमा ङि तिरी निस्तार चाड ओङगो सिन ख्योकोनला छ्याराङ ओत। थे चाडगी बेलालाराङ परमेश्वर ओत्सादुई वाबाते मि ङाला स्यिङगी थामला टाँए खाला सेताला मिओन लाःक्तु सोम्पे खिओ,” सिन सिदुक। 3 थेमे थे बेले नाङपाराङ छ्ये छ्ये पूजारीताङ यहूदीओन छ्ये छ्ये मि कैयाफा सिराते गाङे भन्दा छ्येते पूजारी खाम्बादु जम्मा ओङसुङ। 4 थेमे थेबेकी थेरू चुक खाला मि सुङगीङ थाहा मेछ्येता खाला येशूला जुम्ला सेता थुबोङा सिन ठो खिताला स्यूसुङ। 5 ठो खिन थेबेकी “दि चाडगी बेलाला ङुरूङगी थेला सेता मेङगो। चाडगी बेलाला थोक खासीन मिओनगी हूलदङ्गा खाओङ,” सिन सासुङ। फेम्मे मिज्यीगी येशूला मान खाबाते ( मर्कूस १४:३-९ ; यूहन्ना १२:१-८ ) 6 थेमे येशू बेथानीदु शिमोन सिराते जेबो खाम्बादु देत्ला साप सेइन ओतान। 7 थे बेलालाराङ फेम्मे मिज्यीक सिसी खाङ आउदी स्यीम्बु बास्ना चले खित्च्येते मोर्गु खुरगीन थे छेउदु लिच्युङ। थे आउदी महँगोते मोर्गु ओतान। येशू थोक खाला सेइन ओते बेलालाराङ थेकी थेला मान खिन थे मोर्गु जति गाङे थे गोःनामा पुकीन बिन्सुङ। 8 थेकी थोक खाबा थोङगीन चेलातेबा थेत्ताङ स्येदाङ खिन “फाबा थोक महँगो जा दिकी च्यिला दोक खाईन नाश ताङसुङा? 9 दि च्वाबा ईन्सीन आउदी काल्बेई पैसा ङेत्च्या ओतान। थेमे थे पैसा दुक्पा ङेताते मिओनला गोकीन बिन्दा ईन्सीन लेमु ओङच्या ओतान,” सिन सासुङ। 10 चेलातेबा थोक खाईन थे फेम्मे मित्ताङ स्येदाङ खाबा थोङगीन येशूकी “ख्योकोन दिला च्यिला दोक खाला थाप्कीते? दिकी ङाला खिता सोई खित्च्येते कामराङ खाबाते ईन। 11 दुक्पा ङेताते मिओननी सधैँ ओत्कीन ओत। थेमे थेबाला ख्योकोनगी जहिलेङ मद्धत तेरा थुप्क्यो। तर ङानी था काल्बासाक ख्योकोनताङ देत्च्येते मेन। 12 ङा स्यिनामेई ङे रोला कुता फाप्च्येते मोर्गु दि फेम्मे मिकी थरिङराङ कुकीन बिन्गीन ङाला सासगास खिताला ठीक खाबाते ईन। 13 ङा ख्योकोनला च्यि सिते सासीन था दि सा लुङबा खाङ मिओनला गा लाङच्येते बात लोप्जीन दि फेम्मे मिलाङ सम्झे खिन दिकी थरिङ खाबाते काम लेमुते काम ईन सिनोङ गाङेपा लोप्क्यो,” सिन सिदुक। यहूदा इस्करियोतकी चुक खासुङा ( मर्कूस १४:१०-११ ; लूका २२:३-६ ) 14 थेमे येशू चेला च्युन्ङी नाङ यहूदा इस्करियोत सिराते छ्ये छ्ये पूजारी ओत्सादु गाल्सुङ। 15 थेमे थेकी थेबाला “ङे येशूला ख्योकोन लाःक्तु सोम्पे खासीन ख्योकोन ङाला च्यि तेरगीते?” सिन बात खासुङ। थोक खासीन थेला चाँदी डबल खालज्यीकताङ च्युताम्बा तेरग्यो सिन बात डिक्पा खाईन थेबेकी थोस्यिक पैसाङ बिन्सुङ। 16 थोक खानामेकी थेकी था च्यि छोमु येशूला जिन ज्युता थुप्कीका सिन मौका तेइनराङ देत्सुङ। निस्तार चाडगी भोज ठीकठाक खाबाते ( मर्कूस १४:१२-१६ ; लूका २२:७-१३ ) 17 थेमे सोडा मुलुबा खाला स्योबेन स्येला साच्येते चाड लेपा ओतान। थे चाडगीते गोमे दिनगी छोमु चेलातेबेकी येशू दोन्दु वाकीन “गुरू, ङ्योकोनगी खोल्ला सिन निस्तार चाडगी भोज खापा गाल्ला ठीक खिसे, ङ्योकोन खापा ग्युगे?” सिन ठिसुङ। 18 थेमे थेकी चेलातेबाला खापा ड्वा फाप्कीते सिन मिज्यीगी मिन लाःप्कीन “लो ख्योकोन दुरूकी सारनापा ङे थाल्ला साबाते मि खाम्बापा ग्युक। गाल्ला थेला ङ्योकोन गुरूते था दुरू देत्च्येते समय काल्बा मेत्लो। थोगी थेकी ङ्योकोनताङ खुई खाम्बादुराङ दि चाडगी भोज साच्यालो सि,” सिन थेरूकी ताङसुङ। 19 थेमे थेकी साबा च्योकराङ खाईन गाल्गीन थेबेकी थे चाडगी भोज ठीकठाक खासुङ। येशूकी प्रभु भोज साच्येते शुरू खाबाते ( मर्कूस १४:१७-२६ ; लूका २२:१४-२३ ) 20 थेमे नाम स्योनामेकी येशूताङ थे चेलातेबा मेरा च्युन्ङी भोज साप्ला देत्सुङ। 21 सेइन सेइनलाराङ थेकी थेबाला “ङा ख्योकोनला बातज्यीक सिओ। च्यि सासीन ख्योकोन नाङ दोक्पोईकी था ङाला धोका तेरग्यो,” सिन सिदुक। 22 खोपरोङ नाङ दोक्पोईकी थेला थोक खिओ सिरजीन थेबाला आउदी मेलेबा लासुङ। थेमे थोक खित्कान्ते खोपरोङ नाङ सु ईन्ताका सिन “प्रभु, खोल्ला थोक खित्कान्ते ङानी मेन्दाना?” सिन रेरे रेरे खाईन ठाप्ला स्यूसुङ। 23 थोक खित्जीन थेकी “थाल्ला भर्खर ख्योकोन नाङ दोक्पोईकी ङात्ताङराङ पालोईला छाप्टो नाङमा स्योबेन पाबा ओतानना, ङाला थोक खित्कान्तेचेन होथेराङ ईन। 24 परमेश्वर ओत्सादुई वाबाते मि ङानी परमेश्वर बातला टिबा ओताच्योक खाला स्यापराङ फाप्क्यो। थोक ईन्सीनोङ ङाला धोका तेरकान्ते मिकी ज्यीबा लाङच्याई सजाय ङेत्क्यो। बरू थेनी केराङ माकेबा ईन्सीन लेमु ओङच्या ओतान,” सिन सिदुक। 25 थोक सानामेई थेला धोका तेरकान्ते यहूदा इस्करियोतकीङ “गुरू, खोल्ला थोक खित्कान्ते ना ङा ईन्दे,” सिन ठिजीन थेकी “खुई खोरोङगीराङ ईन सिन लाःप्सुङ,” सिन सिदुक। 26 थेबाबरी गाङेराङ सेइनराङ ओतान। थेजीनराङ येशूकी स्योबेनज्यीक लाःक्तु लाकीन थे लाईदु परमेश्वरला धन्यवाद बिन्सुङ। थोक खानामेई थेकी थे स्योबेन च्यागीन “लो या, दि सो। दिचेन ङे जीउ ईन,” सिनकामा चेलातेबाला गोकीन बिन्सुङ। 27 थोकराङ खाईन अंगूर छ्याङ लुक्पाते कचौराज्यीक लाःक्तु लाकीन थेकी थे लाईदुङ परमेश्वरला धन्यवाद बिन्सुङ। थेमे थेङ थेबाला तेरगीन “लो या, दिङ ख्योकोन गाङेकी पालो खाला थुङ। 28 दिचेन ङे ठाक ईन। काल्बेई मिओनगी खाबाते पाप माफ ओङस्यीत सिन थेबे लाईदु स्यिजीन ङे जीउदुकी थेन्दाते ङे ठागी खित्सादु परमेश्वरगी मिओनताङ तिरी खिओ साबाते जमान पूरो खित्च्येते ईन। 29 दि बात ङेन। आबे राज्य पूरो मायाङथुपचेन ङा याङराङ नोमुङ अंगूर छ्याङ मुथुङो। थे राज्य पूरो ओङनामेकीकामा ङा ख्योकोनताङ थे राज्यदु याङराङ अंगूर छ्याङ थुङगो,” सिन सिदुक। 30 थेरूई परमेश्वरला छ्ये जोच्येते भजन लाकीन च्याकीन थेबाबरी जैतुन बोमनापा गाल्सुङ। येशूकी पत्रुसकी थे खोरोङला चुक खिते सिन साबाते ( मर्कूस १४:२७-३१ ; लूका २२:३१-३४ ; यूहन्ना १३:३६-३८ ) 31 थेमे येशूकी चेलातेबाला “थरिङ ग्वाका मिओनगी ङाला जिन्दा थोङला ख्योकोन गाङेराङ ङाला ताङला छ्योङगो। थोक ओङगो सिन परमेश्वर बातला परमेश्वरगी ‘ङा गोठालाला सेत्क्यो, थेला सेत्नामेई लुकओनचेन जतासुकैपा छरपुट्ट डुइओ,’ सिन साबा ओत। 32 थोक ईन्सीनोङ ख्योकोन ज्यीबा माकेत। ङा स्यिसादुकी सोम्बो लोक्नामेकी याङराङ ख्योकोनला ठेताला ख्योकोन भन्दाङ गोमा गालील अञ्चलपा डुइओ,” सिन सिदुक। 33 गाङेकी ताङला छ्योङगो सिरजीन पत्रुसकीचेन “गुरू, खोल्ला मिओनगी जिन्दा थोङला ज्येन गाङेकी ताङगीन छ्य्वासीनोङ ङाचेन खोल्ला तोङराङ मोतोङो,” सिन सासुङ। 34 पत्रुसकी थोक सिरजीन थेकी “पत्रुस, खो दोक छ्ये खाला बात माकेत। था ङोमु पाखे छ्योबो फोत फोतसाकला पालो सुम ज्येन मि दोन्दु खुई ङाला ङोराङ मेस्येओ सिन सिओ,” सिन सिदुक। 35 थोक सिरजीन झन फिरगीनकामा थेकी “मेन मेन गुरू, ङा खोत्ताङ स्यापराङ फाप्सीनोङ खोल्ला ङो मेस्येओ सिनचेन नोमुङ मिसिरो,” सिन सिदुक। ज्येन चेलातेबेकीङ गाङेकी पत्रुसकी साबा च्योकराङ सासुङ। येशूकी गेतसमनीदु खाबाते प्रार्थना ( मर्कूस १४:३२-४२ ; लूका २२:३९-४६ ) 36 थेमे येशू चेलातेबाताङराङ जैतुन बोमदु गेतसमनी सिरसादु लेप्सुङ। थेरू लेप्नामेकी थेकी थेबाला “लो ख्योकोन दुरूराङ देत, ङाचेन फजेकपा गाल्ला परमेश्वरला प्रार्थना खितामीन,” सिन सिदुक। 37 थोक खाला डोजीन थेकी पत्रुस थेमे जब्दी फुज्युङबा ङिबोलाचेन ङ्योम्बुराङ खेरसुङ। थे खोरोङला था चुक दुक्पा ओङगीते सिरच्ये पीरगी खित्सादु थेजीन थेते सेमोङ स्यिइन सिन्दा ओतान। 38 थेमे थेकी थेबा सुमबोला “था ङाराङला चुक दुक्पा ओङगीते सिरच्ये पीरगी खित्सादु ङे सेम छोकीन सिन्सुङ। ख्योकोन ङात्ताङ र्वा खिन दुरू जागोराङ देत,” सिन साकीन थे खोरोङचेन टिक्पी फजेकपा गाल्सुङ। 39 थेमे खोबुकला देत्कीन “आबा, थुप थुपला दि ओङा खाबाते दुक्पा ङे भोगे खिता माफाप्सीन ओङच्या ओतान। ईन्सीनोङ ङे थोक माक्याबाला मेङगो सासीन ङे साबाच्योक मेन्दाला आबा खुई साबा च्योकराङ ओङस्यीत,” सिन प्रार्थना खासुङ। 40 प्रार्थना खाला चेलातेबा सुमबो ओत्सादु ग्युरजीन थेबाचेन ङिक गाला ओता थोङसुङ। थेमे थेकी पत्रुसला “च्यि ख्योकोनबरी ङात्ताङ र्वा खिन घण्टाज्यीगोङ लाकीन देता माथुप्सुङ? 41 ख्योकोन च्याङबो खाला देत। था दि दुक्पे बेलाला खेराङगी ङाला विश्वास खिनराङ देता थुप्स्यीत सिन परमेश्वरला प्रार्थना खि। ख्योकोन लेमु खिता छोल्गीदुक तर खेराङगी खिता चालाच्योक खिता मुथुप्तुक,” सिन सिदुक। 42 थेमे थे याङराङ गाल्गीन “आबा, ङे दि दुक्पा भोगे माक्याबाला ओङराङ मेङगो सासीन खुई साबा च्योकराङ ओङस्यीत,” सिन प्रार्थना खासुङ। 43 लोक्ला थे थेरू ग्युरला ओङजीनोङ थेबा सुमबो ङिकराङ गाल्गीन देता ओतान। ङिगी जाप्की खित्सादु थेबेकी मिगोङ बेता थुपा मेतान। 44 याङराङ थे थेरूकी ग्युरगीन गाल्गीन तिरी बाजिला खाबाते प्रार्थनाराङ खासुङ। 45 थेमे चेलातेबा ओत्सादु ग्युरला ओङजीन थोरूमोङ थेबा सुमबो ङ्याल्गीनराङ देता ओता थोङगीन थेकी “च्यि ख्योकोन थोरूमोङ ङ्याल्गीनराङ देता ओत? लो थाचेन ख्योकोन ङ्याल्ला देत्सीनोङ देत। थानी ङेते दुक्पे बेलाङ लेपा खासुङ। था परमेश्वर ओत्सादुई वाबाते मि ङा पापीओन लाःक्तु फाप्कीन सिन्सुङ। 46 लो ल्वा, था डुइ। उ थोङसुङ? ङाला धोका तेरकान्ते मि देपा ओङगीनराङ दुक,” सिन सिदुक। येशूला पक्रे खाबाते ( मर्कूस १४:४३-५० ; लूका २२:४७-५३ ; यूहन्ना १८:३-१२ ) 47 दि बात खिन खिनलाराङ थे खोरोङ चेला च्युन्ङी नाङ यहूदाचेन तरवार जेरातेताङ फेर्का खुराते मि काल्बेई टीकीन थेबे गोमा गोमा थेरू ख्योल्सुङ। थेत्ताङ ओताते मिओनला छ्ये छ्ये पूजारीताङ यहूदीओन छ्ये छ्ये मिकी ताङा ओतान। 48 थोक खाला थेला धोका तेरकान्ते यहूदेकी थे खोरोङताङ डोकान्ते मिओनला गोमाकाराङ “ङे गाल्गीन पुक खाबाते मिलाराङ ख्योकोनगी जुम, येशू थेराङ ईनो,” सिन साबा ओतान। 49 थोगी थेकी ज्येनतोक बात छ्याःङ मिक्किता खाईन येशू खादु गाल्गीन “नमस्ते गुरू,” सिनकामा थेला पुक खासुङ। 50 थोक खित्जीन थेकी थेला “ए होइ, खोरोङ दुरू च्यि खिताला वाबाते ईन्दे थेकामा दाक खि,” सिन सिदुक। थेमे थे मिओनगी येशूला दाक जुम्सुङ। 51 थेला थोक खाला जिन्जीन येशूताङ ओतातेबे नाङ दोक्पोईकीचेन तरवार ओक थेन्गीन छ्येते पूजारी योक्पोला ग्याप्कीन थेते नामज्योकराङ बेत च्येत्कीन ताङसुङ। 52 थोक खित्जीन येशूकी थेला “खो दोक खाला तरवार चले माकेत, थे स्योक। च्यिला सासीन तरवार चले खित्कान्ते मिओनला तरवारगीराङ तुप्ला सेत्क्यो। 53 च्यि खुई ङे आबाला ङाला दिबे लाःक्तुकी जोए खाला नाङ सिन सासीन थेकी ङे लाईदु थाल्लाराङ ङोला ङ्वा मुथुप्च्याई थे खोरोङ दूतओन तोङा मुथुबो साबाप? 54 ङे थोक खासीन च्यि ङाला दोक दोकराङ ओङा फाप्क्यो सिन परमेश्वर बातला टिबाते बात साबा च्योकराङ ओङगोतरो?” सिन सिदुक। 55 थेला थोक साकीन च्याकीन थे खोरोङला जिन ओङकान्ते मिओनला “ङाला जिन्दाला च्यिला तरवार जेरगीन थेमे फेर्का खुरगीन ओङा फाप्सुङारो? च्यि ङा डाँका ईनरो? ङीमे ठाङमा ङानी ख्योकोनताङराङ परमेश्वर मन्दिर नाङला देत्ला मिओनला लोप्कीन ओतान, मेन? थेजीनराङ ख्योकोनगी ङाला जिन्दा थुप्च्या ओतान तर माजुम्सुङ। 56 परमेश्वर बात खित्कान्तेबेकी टिबाते बात साबाच्योक ओङालाराङ दि गाङे दोक दोकराङ ओङाते ईन,” सिन सिदुक। थेकी दि बात साकीन सिन्नामेई चेलातेबाचेन गाङे थेला ताङगीन छ्य्वासुङ। येशूला गाङे भन्दा छ्येते पूजारी दोन्दु क्यालाते ( मर्कूस १४:५३-६५ ; लूका २२:६६-७१ ; यूहन्ना १८:१३-१४ , १९-२४ ) 57 थेमे येशूला जिन्कान्ते मिओनगी थेला गाङे भन्दा छ्येते पूजारी कैयाफे खाम्बादु क्याल्सुङ। थेरू धर्मे गुरूओनताङ यहूदीओन छ्ये छ्ये मि जम्मा ओङगीन देता ओतान। 58 थोक खाला येशूला थेपा खेरजीन पत्रुसोङ थेबेकी मोथोङा खाईन थेबे तिङ ङ्योगीन गाल्गीन थे खाम्बासाकराङ लेप्सुङ। थेमे येशूला नाङने चुक चुक खिका सिन छ्या स्येबाला थेचेन थे खाम्बादु देता ओताते पालेओनताङ थेरू स्याङकादुराङ देत्सुङ। 59 थेमे थेरू रूबाते छ्ये छ्ये पूजारी, धर्मे गुरूओन थेमे यहूदी छ्ये छ्ये मि गाङेकी येशूला सेता फाप्च्येते खइँदा गल्ती थेप्कीता सिन ईनराङ मेन्दाते बात खिताला मेरा काल्बेईला साक्षी बके खित च्युत्सुङ। 60 साक्षी बके खित्कान्ते मिओनगी दिकी दोक दोक खाबाते ईन सिन येशूकी खाराङ माक्याबाते बात काल्बेई खासीनोङ थेबेकी थेते छ्याःङ गल्ती देन्दा माथुप्सुङ। थोक खित्जीनोङ छ्याःङ लै माक्याबेई मेरा ङिकीचेन गाङे दोन्दु लाकीन 61 “दिकी परमेश्वर मन्दिर राम्ला च्याला लोक्ला ङीमा सुमलाराङ ज्वा थुप्क्यो सिन साबाते बात ङ्योकोनगी थोबाप,” सिन सिदुक। 62 थेबेकी थोक सानामेकी गाङे भन्दा छ्येते पूजारीकी जुरूक्क लाकीन येशूला “ए खो च्यिला खाराक्पा देत्कीते? दिबेकी खुई थोक थोक खासुङ सिन साबाते बात पक्काराङ ईन्दाना च्यिन्दे?” सिन ठिसुङ। 63 थेकी थोक सिरजीनोङ थे खाराक्पाराङ देत्सुङ। लोईनराङ थेकी “लो खो सोम्बोते परमेश्वर दोन्दु ना क्याल्ला दि बात सि। च्यि खो परमेश्वरगी तोङगो साबाते ख्रीष्टराङ ईन? थोक ईन्सीन खो परमेश्वर फुज्युङ ईन्दासीन, मेन?” सिन ठिसुङ। 64 थेमे येशूकी “ईन, ङा खुई साबाच्योक थेराङ ईन। था ङा ख्योकोन गाङेला च्यि सिते सासीन थानामेकीचेन ख्योकोनगी परमेश्वर ओत्सादुई वाबाते मि ङाला छ्येज्यीक शक्ति ओताते परमेश्वर सामे छ्य्वापा देताते थेमे था तिरी स्वर्गनेकी मुक्पे लाक्तु देत्ला दुरू ग्युरगीन वाबातेङ थोङगो,” सिन सिदुक। 65 थोक सिराईताङ गाङे भन्दा छ्येते पूजारीकी येशूकी परमेश्वर विरोध खासुङ सिन तेन्दाला थे खोरोङगी लाक्तु खोन्दाते खोलाक रोल्गीन “मि ईन्गीनोङ दि खोरोङला परमेश्वर फुज्युङ ईन साकीन दिकी परमेश्वर विरोध खासुङ। था दि दोषीराङ ईन सिराला ज्येनतोक बयानका च्यि गोसुङारो? दिकी थाल्ला च्यि सिका सिन ख्योकोनगीङ दाक थोसुङ, मेन? 66 लो था ख्योकोनराङ सि, दिला च्यि सजाय तेरा फाबोङा?” सिन सासुङ। थोक सिरजीन थेरू जम्मा ओङा ओताते मिओनगी “दिलाचेन सेताराङ फाप्क्यो,” सिन सिदुक। 67 थेमे ईन्सीन थेबेकी येशूला छ्येतकी नाङपा छ्यिम्तोर देइनकामा दुङाला स्यूसुङ। कोई कोईकीचेन मोथोङा खाला ल्हाकनापेकी डाम्पे लाई नाङपा देइनकामा 68 “खो ख्रीष्ट ईन साबाते मेन? थोक ईन्सीन थाल्ला खोल्ला देक्कान्ते सु ईन्दे ओना, सिते?” सिन सिराला स्यूसुङ। पत्रुसकी येशूला ङो मेस्येओ सिन साबाते ( मर्कूस १४:६६-७२ ; लूका २२:५४-६२ ; यूहन्ना १८:१५-१८ , २५-२७ ) 69 नाङने थोक थोक ओङजीन पत्रुसचेन स्याङकादुराङ ओतान। थेमे थेरू काम खित्कान्ते फेम्मे मिज्यीगी दोन्दु गाल्गीन थेला “खोङ थे गालीलपे येशूताङराङ ओतान, मेनरो?” सिन सासुङ। 70 थोक सिरजीन थेकी थेरू ओताते मि गाङे ङोन्दु “खुई सुई बात खाबाते ईन्दे सिन ङेनी छ्याःङ माखोसुङ,” सिन सिदुक। 71 थोक साकीन थे टिक्पी फजेकपा गाल्गीन देत्सुङ। लोईन ज्येनज्यीक फेम्मे मिकी थेला थोङगीन “दि मिङ नासरतपे येशूताङराङ ओतान,” सिन थेरू ज्येनतेबाला लाःप्सुङ। 72 थेमे थेकी लोईन “खुई साबाते मिलानी ङा ङोराङ मेस्येओ,” सिन ना क्याल्सुङ। 73 टिक्पी तिरी याङराङ थेरू ओताते मिओनगी थेला ह्रुप रूप्कीन “खो च्यिला मेन सिते? थेत्ताङ ख्याम्कान्तेबे नाङ दोक्पोई पक्काराङ खोङ ओङा फाप्क्यो। खुई बोलीदुकीराङ खोङ गालीलपे मिराङ ईन सिन दाक छ्या स्येकीदुक,” सिन सिदुक। 74 थोक सिरजीनोङ थेकीचेन “ख्योकोनगी साबाते मिलानी ङे ङोराङ मेस्येओ साबाप,” सिन ना केल्गीन “ङे ढाँर खाबाते ईन्सीन परमेश्वरगी ङाला भस्म तोङस्यीत,” सिन सिदुक। थोक सिराईताङराङ कुकुरी क्वाँ सिन छ्योबोङ फोसुङ। 75 थेमे ईन्सीनका पत्रुसला “था ङोमु पाखे छ्योबो फोत फोतसाकला पालो सुम ज्येन मि दोन्दु खुई ङाला ङोरोङ मेस्येओ सिन सिओ,” सिन गोमाका येशूकी साबाते बात ठेम्बा लासुङ। थेमे थेला आउदी मेलेबा लासुङ। थेमे थे थेरूकी गाल्गीन ईमुक खाईन खाईन ङुसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.