मत्ती 24 - जिरेलपरमेश्वर मन्दिर राम्ला डोच्येते बात ( मर्कूस १३:१-२ ; लूका २१:५-६ ) 1 दि गाङे बात खाईन सिन्नामेई येशू परमेश्वर मन्दिरदुकी थेन्गीन ख्याम्सुङ। थे बेलालाराङ चेलातेबा थे खादु वाकीन “तोना गुरू, दि मन्दिर थोई लेमु दुका आङ,” सिन थेला थेङला तेन्दा चाल्सुङ। 2 थेबेकी थोक सिरजीन थेकी “ख्योकोनगी दि मन्दिर दोक लेमु खाईन जोबा ओता थोङसुङ मेन? ङा च्यि सिते सासीन दि मन्दिरनी था तिरी ङीमाई बराङ बुरूङ रोम्ग्यो। थेजीन दिते गारो दोज्यीगोङ बाँकी मोज्योओ,” सिन सिदुक। दि जुग सिन्दे खाला चुक चुक ओङगीते ( मर्कूस १३:३-२३ ; लूका २१:७-२४ ) 3 येशू जैतुन बोमदु देता ओते बेलाला चेलातेबेकी दोन्दु गाल्गीन “गुरू, खुई आनाङ साबाच्योक नाम ओङगीते? थेजीन चुक चुक ओङगीते? थेमे तिरी खो स्वर्गनेकी ग्युरला ओङच्येते थेमे दि जुग सिन्च्येते बेला लेप्तुक सिन चुक खाला छ्या स्येच्ये?” सिन ठिसुङ। 4 थोक सिरजीन थेकी “च्याङबो खाला देत। सुङगीङ ख्योकोनला छक्के खाला ङे छ्य्वापेई मेडेल्स्यीत। 5 परमेश्वरगी तोङगो साबाते ख्रीष्ट ङाराङ ईन सिरकान्ते मिओन था काल्बेई ओङगो। थेबा वाला थोक्ते बात खाला मि काल्बेईला छक्के खिओ। 6 ख्योकोनगी लुङबा लुङबाला लडाइँ ओङाते थेमे दि दि लुङबादु लडाइँ ओङगीन दुक्लो सिरा थोक्यो। थोक्ते बात थोजीन था च्यि ओङोङा, चुक ओङोङा सिन ख्योकोन ज्यीबा माकेत। थोक थोकनी ओङाराङ फाप्क्यो। ईन्सीनोङ थोक थोककामा ओङला दि जुग सिन्च्येते मेन। 7 थेजीन जात जातकी मि जीङगो, लुङबा लुङबे गेल्बोओन नाङदुङ लडाइँ ओङगो थेमे ठाउँ ठाउँला छ्ये छ्ये अनिकाल लाङगो, सेदेर्मु डुइओ। 8 ठाउँ ठाउँला लडाइँ ओङच्येते, अनिकाल लाङच्येते थेमे सेदेर्मु डोच्येतेनी दि जुग सिन्दे खाला ओङच्येते मेलेबाते दुक्पा शुरू ओङातेकामा ईन। 9 ख्योकोनला दुक्पा तेरस्यीत थेमे सेत्स्यीत सिन थेजीन ज्येनगी ख्योकोनला जिन च्युत्ला छ्ये छ्ये मि लाःक्तु सोम्पे खिओ। ङे मि ईन्देकीराङ गाङे लुङबा लुङबाला मिओनगी ख्योकोनला मिगी थोङसार्मु खिओ। 10 थोक थोक दुक्पा ओङजीन मि काल्बेईकी ङाला विश्वास खिता ताङला ङे छ्य्वापेई ठाल्ला डुइओ। थेमे थेबेकी दि दि मि येशूला विश्वास खित्कान्ते ईन सिन रिपोर्ट बिन्ला धोका तेरग्यो, दोक्पोईकी ज्येनज्यीकला मिगी थोङसार्मु खिओ। 11 मि काल्बेईकी खोपरोङ परमेश्वर बात खित्कान्ते मि ईन साला मेन्दे बात लाप्ला काल्बेईला छक्के खिओ। 12 थेमे मि काल्बेईकी परमेश्वरगी खि साबाते ङेन्दा ताङला मेलेबाते कामकामा खिन देत्ला ज्येनला ङिङज्ये खिता तोङगो। 13 थोक थोक दुक्पा ओङजीनोङ सेम मेसेता खाला ङाला विश्वास खिन देत्कान्ते मिलाचेन परमेश्वरगी गाङे दुक्पादुकी डेल्ग्यो। 14 दि जुग सिन्दा गोमा मि गाङेकी छ्या स्येस्यीत सिन स्वर्गे राज्य गा लाङच्येते बात सा लुङबा खाङ गाङेपा लाप्ला तेरग्यो। थोक खानामेईचेन दि जुग सिन्ग्यो। 15 थेमे परमेश्वर बात खित्कान्ते दानिएलगी ‘था परमेश्वर विरोध खिताला ङीमा लेनज्यीक परमेश्वर मन्दिरदु आउदी किक्टो लाङच्याज्यीक खइँदा ज्याक्पा थोङगो,’ साबा ओत। दि बात पढे खित्कान गाङेकी च्यि साबाते ईन्ताका सिन खोबा खि। 16 थेकी साबा च्योकराङ ओङा थोङनामेई यहूदिये अञ्चलदु देत्कान्तेबा खाम्बा ताङला गाङेराङ दाक्पोन ज्यान जोए खिताला बोमगी नाङने छ्योङा फाप्क्यो। 17 थेमे खाम्बे लाकने कौसीदु देता ओताते मिओन सम्पत्ति थेन्दाप सिन खाम्बे नाङ स्यूगीन मेदेता खाला फापे लोङोङ मेङेत्कीनकामा छ्योङा फाप्क्यो। 18 थोकराङ खाला स्यीङदु काम खिन ओताते मिओनोङ खाँपा ज्येन खोलाक लिन मेङा खाला थोकराङ छ्योङा फाप्क्यो। 19 थोक ओङे बेलाला फुज्यीमा खुरा ओताते मिओन थेमे नुमा थुङकान्ते फिजा ओत्कान्तेबाला आउदी दुक्पा ओङगो। 20 थोक खाला छ्योङा फाप्च्येते दिन गुनगी खेबे बेलाला कि सन्चारी छोमु माफाप्स्यीत सिन ख्योकोनगी परमेश्वरला प्रार्थना खि। 21 च्यिला सासीन थे बेलाला ओङच्येते च्योक्ते ज्यीबा लाङच्येते दुक्पानी दि सा नाम जोबा छुरला नोमुङ ओङा मेत, था तिरीङ नोमुङ मेङगो। 22 थे खोरोङ सन्तान सिन छाने खाबाते मिओनगी थे दुक्पा खपे खिन देता माफाप्स्यीत सिन परमेश्वरगी थोक दुक्पा ओङच्येते दिन घटे खाबा ओत। थोक माक्याबा ईन्सीन थेजीन सुङ मि सोन्ला देता मुथुबो। 23 थोक ओङे बेलाला सुइँदेकी ख्योकोनला ख्रीष्टनी वादुक, थे देपा दुक, थेपा दुक सिन सासीन थोक्ते बातला नामज्योकराङ मासेत। 24 थेजीन मिओनला छक्के खित्कान्ते मि काल्बेई ओङगो। थेबा कोईकी खोपरोङला ख्रीष्ट ईन सिओ। थेमे कोईकी परमेश्वर बात खित्कान्ते मि ईन साला मेन्दे बात लोप्क्यो। थेबेकी अचम्ब लाङच्येतेन्दे छ्ये छ्ये काम खाला थुपासम्म परमेश्वरगी छाने खाबाते मिओनलाङ छक्के खिता छोल्ग्यो। 25 च्याङबो खि याङ, ङे थोक्ते मिओन ओङगो सिन ख्योकोनला थरिङराङ लाःपा ओत। 26 थोगी मिओनगी ख्योकोनला लो ख्रीष्टनी वाकीन उ फिपा री नाङपा देत्ला दुक सासीन थेबे बात पत्ते माकेत, थेपा मान्डो। थोकराङ खाईन सुइँदेकी ख्रीष्टनी उ फिपा खाम्बे नाङ ईप्कीनका देत्ला दुक सिन सासीनोङ थेपा छोल मान्डो। 27 चिलाम नाम्दाककी खित्सादु चिलाम खासुङ सिन छ्या स्येबा च्योकराङ परमेश्वर ओत्सादुई वाबाते मि ङा गाङेकी थोङा खाला देमा ग्युरला ओङगो। ङा वाबाते ईन्दा ना मेन्दा सिन सुङगीङ छ्याःङ शंकाराङ खिता माफाबो। 28 बातचेन दिराङ ईन, जहाँ स्यिनु दुक थेरू गिद्ध खिरग्यो। परमेश्वर ओत्सादुई वाबाते मि ग्युरला ओङच्येते बात ( मर्कूस १३:२४-३१ ; लूका २१:२५-३३ ) 29 थेमे थे दुक्पे समय सिन्दाईताङ चुक ओङगीते सासीन ङीमे नाम्दाक तोरला ङीमा नाक्पो डुइओ। दागार मास्यारो, नामगी कार्मातेबा गाङे नामनेकी ङील्ग्यो। दोक खाला नामने ओतातेबरी जेसुकै खराप खुरूप नाश डुइओ। 30 थेमे थे बेलाला नामने ताजीन परमेश्वर ओत्सादुई वाबाते मि ङा ओङा खाबाते थोङगो। थे छोमु ङा छ्येज्यीक शक्ति ङेत्ला मिगी ताराङ मुथुप्च्या नाम्दाककी झिलिमिली गाल्ला मुक्पे लाक्तु देत्ला स्वर्गनेकी देमा ओङा थोङला था सजाय ङेत्क्यो सिन ज्यीबेकी लुङबा लुङबे मि गाङेराङ झ्याउँ झ्याउँ ङुइओ। 31 थेरूई बिकुल फुबाते जोदाज्यीक ङोरो थोक्यो। थेमे ङा ङे दूतओनला गाङेपा ताङला ङाराङगी छाने खाबाते मिओनला पृथ्वी सुर स्यीकारपेकी रूला खुलाङ ज्युत्क्यो। 32 नेभारे दोङबोला च्यूली बुरगीन पालुवा फेरे खिताला स्यूनामेई था यार स्यूक्पा खादुक सिन छ्या स्येक्यो। 33 थोकराङ खाला ङे आनाङका था तिरी चुक चुक ओङगो सिन साबा ओताने थोक थोक ओङाला स्यूनामेकीचेन था परमेश्वर ओत्सादुई वाबाते मि ओङा खाबाक्वा, थे ओङच्ये बेला लेप्तुक सिन ख्योकोनगी छ्या स्येबा खि। 34 दि बात ङेन। च्यि सासीन दि पुस्तालाराङ ङे ओङगो साबाच्योक गाङे ओङगो। 35 दि साताङ नाम नाश गाल्ला तोरला डुइओ। तर ङे साबाते बातचेन फरकराङ परे मिक्किओ। दि जुग थाहाराङ मेङेता खाला सिन्ग्यो ( मर्कूस १३:३२-३३ ; लूका १७:२६-३० , ३४-३६ ) 36 तर ङे ओङगो साबाच्योक ओङच्येते च्यि छोमु, नाम खजो बेलाला ओङगीते सिनचेन परमेश्वर दूतओनला थेमे परमेश्वर फुज्युङलाङ छ्या मेत। दि बात खालि आबालाकामा छ्या ओत। 37 परमेश्वर ओत्सादुई वाबाते मि ङा देमा ग्युरला ओङे बेलाला काल्बा च्योक मि नूहे पालो मि च्योकराङ खिन देता ओङगो। 38 नूह थे खोरोङगी जोबाते पानीजहाज नाङ स्यूक्पे छोमुसाकराङ थे पालो मिचेन गाङेराङ तिरी चुक ओङगीता सिन छ्याःङ वास्ता मिक्किता खाईन सधैँ च्योकराङ सेइन थुङगीन थेमे फाङमा खिन देता ओतान। 39 भल ग्याकीन वाकीन गाङेला खराप खुरूप उरगीन माखेरथुप चुक मेलेबा ओङगीते सिन थेबा सुङगीङ थाहाराङ माछ्येत्सुङ। परमेश्वर ओत्सादुई वाबाते मि ङा दुरू ग्युरला ओङजीनोङ दोकराङ ओङगो। 40 च्यि सासीन थे छोमु स्यीङदु ङ्योम्बुराङ काम खिन ओताते मेरा ङि मि नाङ ङा ओङगो सिन गुकीन देता ओतातेला स्वर्गे राज्यने खेरग्यो, थोक खाईन देता मेताते ज्येनतेलाचेन थेरूराङ क्युरला ज्य्वाक्यो। 41 थोकराङ खाला ङ्योम्बुराङ फे थागीन ओताते फेम्मे मि ङि नाङदुङ दोक्पोईला क्युरला ज्याक्ला ज्येनतेला स्वर्गे राज्यने खेरग्यो। 42 थोक ईन्देकी खेराङ मालिक था तिरी दि छोमुराङ ग्युरला ओङगो सिन ख्योकोनला छ्याःङ छ्या मेतेकी थे ओङगो सिन सधैँ ठीक खाला गुलाराङ देत। 43 दि बात विचार खि। सुइँदा मिकी थरिङ चोर ओङगो सिन छ्या स्येसीन थे छोमु थे च्याङबो खाला जागोराङ देत्क्यो। थेमे थेते छ्याःङ क्वापराङ मुथुबो। 44 परमेश्वर ओत्सादुई वाबाते मि ङाङ चोर च्योकराङ सुङगीङ छ्या मास्येबाते दिनगी छोमु दुरू ग्युरला ओङगो। थोगी थरिङनी मेङतासीन सिराच्योक मिक्किता खाला ख्योकोन ठीक ओङला थेला गुलाराङ देत। मालिकतेकी कोता च्योकराङ खित्कान्ते मि बात ( लूका १२:४१-४८ ) 45 थेजीनसाक ख्योकोन चुक खिन देता फाप्कीते सासीन मालिकतेकी कोत्कीन ज्याक्पाते ङेन्ला लेमु खाला काम खित्कान्ते मि च्योकराङ ओङा फाप्क्यो। थोक्ते मिलाचेन मालिकतेकी थे खोरोङ खइँसापा डोजीन थे खाम्बादुराङ काम खित्कान्ते ज्येनतेबाला लेमु खाला साप थुङा बिना सिन खाम्बे कामओन जिम्मा बिन्ला डुइओ। 46 तिरी मालिकते ग्युरला ओङजीन थेकी साबा साबा काम खिन देता ओत्सीन थेला लेमु ओङगो। 47 थेकी थोक लेमु खाईन काम खाबा थोङला मालिकते खुशी ओङला चुक खिते सासीन ओतातेबरी सम्पत्ति थेलाराङ तो सिन सोम्पे खिओ। 48 तर मालिकते नाम ओङगो नाम ओङगो सिन थे खोरोङला खि साबाते काम खिता ताङगीन 49 थेकी थेरू ज्येन योक्पो योङमुला थाप्सुङ दुसुङ थेमे छ्याङ रक्सी थुङकान्तेबाताङ रूकीन सोकीन थुकीन मनपरी खिन देत्सुङ सासीन 50 मालिक थाल्लाराङका च्यि वाओङा सिन विचार खाबे बेलालाराङ मालिकते लेप्क्यो। 51 थेकी थोक खिन देता ओता थेप्सीन मालिकतेकी थेला च्यि खाओङा? मालिकतेकी थेलानी तुप्ला सेत्ला नरककुण्डमा लुक्यो। थेमा होथे च्योकराङ दाक्पोनगी खिओ सालाङ थोक मिक्किकान्ते मिओन ओङगो। थेमाचेन गाङेराङ स्येदाङगी सा थागीन खोक्पो खाला ङुइन देत्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.