मत्ती 23 - जिरेलयेशूकी धर्मे गुरूताङ फरिसी पाटी मिओनगी च्योक माकेत सिन साबाते ( मर्कूस १२:३८-४० ; लूका २०:४५-४७ ) 1 थेमे येशूकी थेरू जम्मा ओङाते मिओनताङ थे खोरोङ चेलाओनला दोक सिन बात खिताला स्यूसुङ। 2 चुक सासीन “धर्मे गुरूओनताङ फरिसी पाटी मिओनगी परमेश्वर नियमला च्यि च्यि खि साबा ओते सिन मोशेकी च्योक खाला मिओनला लोपा ङेत्च्येतेराङ ईन। 3 थोगी थेबेकी लापाते बातचेन ङेन्ला खि साबा च्योकराङ खि। तर थेबेकी खित्च्येते च्योक्ते कामचेन माकेत। च्यिला सासीन थेबेकी ज्येनलाचेन परमेश्वर नियमला दोक दोक खि साबा ओत सिन लोप्कीदुक। ईन्सीनोङ खोपरोङराङ थे नियम मेङेन्दुक। 4 थेबेकी ज्येनलाचेन स्यिच्या खाईन खुर्बु कुरा च्योकराङ खाला दि खि, थे खि सिन परी परी नियम ङेन्दा फाप्क्यो खिदुक। मिओनगी थोक खिता थुप्कीता मुथुप्ता सिन थेबेकी छ्याःङ विचार मिक्किदुक। 5 थेबेकीनी जे खासीनोङ खोपरोङगी खाबाते काम थोङला ज्येनगी खोपरोङ परमेश्वरला आउदी खाला माने खित्कान्ते मि दुका सिरस्यीत सिरच्ये सेमगीकामा खिओ। चुक सासीन थेबेकीचेन परमेश्वर नियम टिला जोदातेन्दे जन्तर च्योक जोला पाखुराताङ टाले लाई नाङला ठाला खोन्ला ख्याम्गीदुक। थोकराङ खाला खोलाकलाङ झुम्का रीम्बुतेन्दे ताप्ला खोन्गीदुक। 6 मिटिङ खित्च्येते खाम्बे नाङला थेमे भोजलाङ थेबाचेन छ्ये छ्ये मि देत्च्येते ठाउँलाकामा देता छोल्गीदुक। 7 थेमे मि छ्वासा रूसाला युक्जीन मिओनगी खोपरोङला मान खिन नमस्ते सिरजीन थेबा आउदी गा खिदुक। मिओनगी खोपरोङला गुरू सिरजीन थेबा झन गा खिदुक। 8 ङा ख्योकोनला च्यि सिते सासीन थेबेकी च्योक खाला ख्योकोनगीचेन सुङलाङ खेराङला गुरू साला मान खित माज्युत। च्यिला सासीन ख्योकोन गाङेते गुरू दोक्पोईकामा ओत। ख्योकोनबरीचेन सुङ छ्ये टेक्टे मेन, गाङेराङ आज्यो न्वा ईन। 9 थेमे दुरू खेराङ नाङ सुङलाङ आबा सिन मान माकेत। च्यिला सासीन स्वर्गने देत्कान्ते परमेश्वरकामा ख्योकोन आबा ईन। 10 थोकराङ खाला सुङलाङ खेराङला मालिक साला मान खित माज्युत। च्यिला सासीन परमेश्वरगी तोङगो साबाते ख्रीष्टकामा ख्योकोन मालिक ईन। 11 ख्योकोन नाङ छ्येतेबेकी ङा ङाराङ ईन सिराच्योक मिक्किता खाला सुइँदे खाम्बादु काम खित्कान्ते मि च्योक ओङला काम खिता फाप्क्यो। 12 बातचेन दिराङ ईन। दाक्पोनराङ छ्ये खित्कान्ते मिओनला परमेश्वरगी छ्ये ईन मिसिरो, छ्ये मिक्किकान्तेलाचेन परमेश्वरगी छ्ये जोइओ। येशूकी धर्मे गुरूताङ फरिसी पाटी मिओन चुक्तेबा ईन्दे सिन साबाते ( लूका ११:३९-४४ ) 13 धर्मे गुरूओनताङ फरिसी पाटी मिवे, ख्योकोन चुक्तेन्दे ईन्दाका। था ख्योकोनला आउदी मेलेबा ओङगो। च्यिला सासीन चुक खाला स्वर्गे राज्यने स्यूक्पा थुप्कीते सिन ख्योकोनगी मिओनला लोपराङ मोलोप्तुक। थोक ईन्देकी मिओन थेने स्यूक्पाराङ मुथुप्तुक। दोक खाला खेराङनी थेने स्यूक्पा माङेत्सुङ माङेत्सुङ थेने स्यूक्पा सेम खित्कान्तेबालाङ ख्योकोनगी स्यूकराङ मुज्युत्तुक। 14 था ख्योकोनला आउदी मेलेबा ओङगो। परमेश्वरला आउदी खाला माने खित्कान्ते ईन सिन तेन्दाला ख्योकोन काल्बासाक प्रार्थना खिन देत्कीदुक। लेमु खाईन तासुङ सासीन नाङ नाङलाचेन ख्योकोनगी ख्योबो स्यिइन सिन्दाते फेम्मे मिओन सम्पत्ति ठगे खाईन सोकीन सिन्दा ओङगो। था तिरी ख्योकोनगी आउदी छ्येज्यीक सजाय ङेत्क्यो। 15 ख्योकोन चुक्तेन्दे ईन्दाका। था ख्योकोनला आउदी मेलेबा ओङगो। ज्येन जातकी मि दोक्पोईलाकामा ईन्सीनोङ दाक्पोन यहूदी धर्मला लै खित ज्युताप सिन ख्योकोन दुक्पा खाला थारी थारीसाक डुइदुक। थेमे थोक्ते मि सुइँदा यहूदी धर्मे छ्य्वापा लै खानामेकी ख्योकोनगी थेला खेराङ भन्दाङ झन मेलेबा खित्कान जोइदुक। दोक खाला ख्योकोनगी थेलानी खेराङ भन्दाङ झन मेलेबा खित्कान जोला खेराङ च्योकराङ नरककुण्डमा स्यूक ज्युत्कीदुक। 16 था ख्योकोनला आउदी मेलेबा ओङगो। ख्योकोन परमेश्वर नियम छ्या मेस्येकान अन्ध च्योक्ते मिओनला थे नियम लोप्कान्ते मि ईन्सीनोङ ख्योकोन खेराङका होथोक्ते अन्ध च्योक्ते ईन। च्यिला सासीन ख्योकोनगी ज्येनला चुक सिन लोप्कीका सासीन सुइँदेकी खइँदा काम खिओ सिन जमान खाला परमेश्वर मन्दिर जुम्गीन ना क्याल्सुङ सासीन थे काम माक्यासीनोङ ना मुसुगो। तर मन्दिरदु ओताते सेर जुम्गीन ना क्याल्गीन खिओ साबाच्योक माक्यासीनचेन ना सुइओ सिन लोप्कीदुक। 17 ए पशुवे, ख्योकोन बुद्धि खापा गाल्सुङा? ख्योकोन चुक खाला मन्दिर जुम्ला ना केल्जीन मेन थे नाङदु ज्याक्पाते सेर जुम्ला ना क्याल्सीनका ना सुइओ सिन सिते? च्यि मन्दिर नाङ ज्याक्नामेकीका सेर चोके खित्च्येते मेनरो? 18 थोकराङ खाला ख्योकोनचेन परमेश्वरला चढे खित्च्येतेबा चढे खित्च्येते थानला जुम्गीन ना क्याल्गीनोङ खिओ साबाते माक्यासुङ सासीन ना मुसुगो। तर परमेश्वरला सिन थानगी लाक्तु चढे खाबाते चीज जुम्गीन ना क्याल्सीनचेन खिओ साबाच्योक माक्यासीन ना सुइओ सिन लोप्कीदुक। 19 ख्योकोनगी चुक खाला थान जुम्ला ना केल्जीन मेन थे लाक्तु चढे खाबाते चीज जुम्गीन ना क्याल्सीनका ना सुइओ सिन सिते? च्यि ख्योकोनगी छ्याःङ मोखोदुक? 20 बात च्यि ईन्दे सासीन सुइँदेकी थे थानला जुम्गीन ना क्याल्सीन थेकी थे लाक चढे खाबाते जेसुकैला जुम्गीन ना क्यालाते ईन। 21 मन्दिर जुम्ला ना केल्कान्तेकीङ थे मन्दिर थेमे थेरू देत्कान्ते परमेश्वर मिन लाकीन ना क्यालाते ईन। 22 थोकराङ खाला स्वर्ग जुम्ला ना केल्कान्तेकीङ स्वर्गेतेकामा मेन्देई परमेश्वर सिंहासनताङ थे लाक देत्कान्ते परमेश्वर मिन समेदोङ लाकीन ना क्यालाते ईन। 23 ख्योकोन चुक्तेन्दे ईन्दाका। था ख्योकोनला आउदी मेलेबा ओङगो। ख्योकोनचेन परमेश्वरगी साबाते लेमु खाला ङेन्च्या सिन बाबरी, सूप थेमे ज्येनतोक मसालेते समेदोङ बो च्युताम्बेते बोज्यीक टाल्ला परमेश्वरला चढे खिदुक। तर परमेश्वर नियमला साबाते छ्ये छ्ये बातचेन ख्योकोनगी ङेनराङ मेङेन्दुक। च्यि सासीन ज्येनला लेमु खिता ठाउँदु ख्योकोनगी थेबाला ठगेका खिदुक। ख्योकोनगी ज्येनला ङिङज्येङ मिक्किदुक थेमे खेराङगी खिओ साबा च्योगोङ मिक्किदुक। थोगी ख्योकोनगी ज्येनला लेमु खि। थेबाला ङिङज्ये खि। थेमे खेराङगी खिओ साबा च्योगोङ खि। बो च्युताम्बेते बोज्यीक परमेश्वर लाईदु डेल्च्येतेङ मातोङ। 24 ज्येनला लोप्कान ईन्सीनोङ ख्योकोन खेराङराङ परमेश्वर नियम छ्या मेस्येकान अन्ध च्योकराङ ईन। ख्योकोननी खेराङ नोतकी नाङ स्यूबाते बु थेन्ला क्युरला ऊँटला मीक तोङकान्तेबा ईन। 25 ख्योकोन चुक्तेन्दे ईन्दाका। था ख्योकोनला आउदी मेलेबा ओङगो। ख्योकोनचेन खेराङ कचौराताङ देर्मातेबा चोके खिता फाप्क्यो सिन माझे खाला टल्के खित्च्या जोइदुक। तर थे नाङ लुक्ला साच्येते सापचेन ख्योकोनगी खेराङगीकामा सा थुङा ङेत्सीन ओङच्या ओतान सिराच्योक खाईन ज्येनगीते ठ्वाकीन, ज्येनला ठगे खाईन खुलाबाते ईन। 26 फरिसी पाटी मिवे, खोइ ख्योकोनगी छ्या स्येबाते? गोमा ख्योकोनगी खेराङगीकामा सा थुङा ङेत्सीन ओङच्या ओतान सिराच्योक खिता थोङ। थेमेका ख्योकोनते सेम थेमे स्यीतेबाङ परमेश्वरगी ताजीन लेमु थोङगो। 27 ख्योकोन चुक्तेन्दे ईन्दाका। था ख्योकोनला आउदी मेलेबा ओङगो। रो ज्याक्पाते फुकला सागार ग्याप्नामेई फिनामानी आउदी लेमु थोङगो। तर नाङदुचेन रूल्गीन सिन्दाते मि रूबाताङ बुकामा ओङगो। ख्योकोनोङ सागार ग्यापाते होथोक्ते फुक च्योकराङ दुक। 28 ख्योकोनगी खिन ओताते काम थोङला ज्येनगी ख्योकोनचेन परमेश्वरगी खि साबाच्योक खित्कान्ते आउदी धर्मती दुका सिन सिओ। ख्योकोन परमेश्वरगी खि साबाच्योक बान्दा मिक्किकान्ते खालि मेलेबा मेलेबा कामकामा खित्कान्ते मि ईन सिन थेबेकी छ्याराङ मेस्येओ। धर्मे गुरूताङ फरिसी पाटी मिओनगी सजाय ङेत्च्येते बात ( लूका ११:४७-५१ ) 29 धर्मे गुरूताङ फरिसी पाटी मिवे, था ख्योकोनगी ज्यीबा लाङच्याई सजाय ङेत्क्यो। ख्योकोनचेन खेराङ ज्युज्यु पुर्खेकी सेताते परमेश्वर बात खित्कान्ते मिओनला आउदी खाला मान खित्च्या ओतान सिन तेन्दाला गोमा थेबा दिसे नाङला थेबे मिनला खाम्बा छेतराङ जोदातेन्दे थुर्सा जोइदुक। थेमे परमेश्वरगी खि साबा च्योकराङ खित्कान्ते मिओन दिसे फेरोला साङ साङ जोला ज्य्वाकीदुक। 30 थेमे ख्योकोन ‘ए, ङ्योकोन थेजीन ओता ईन्सीन ङेराङ ज्युज्यु पुर्खाताङ डिक्ला परमेश्वर बात खित्कान्तेबाला थोक खाला सेत्च्याराङ मेतान,’ सिन छ्ये खिदुक। 31 दोक खिन ख्योकोनोङ होथे परमेश्वर बात खित्कान्ते मिओनला सेत्कान्ते खेराङ ज्युज्यु पुर्खे सन्तानराङ ईन सिन तेन्ला थेबेकी खाबा च्योक्ते कामोङ खिदुक। 32 थोगी ख्योकोनगीङ खेराङ ज्युज्यु पुर्खेकी खाईन मासिन्दाते होथोक्ते मेलेबाते काम गाङे खाला सिन्दा खि। 33 छ्यि ख्योकोन ङोचा क्ये मेतातेबा, था तिरी परमेश्वरगी नरककुण्डमा लुच्येते सजायदुकी चुक खाला उम्के खिता थुबोङ साबे? थे सजायदुकी ख्योकोननी थारराङ माथारो। 34 च्यिला सासीन था ङा ख्योकोन नाङ परमेश्वर बात खित्कान्ते मिओन, आउदी बुद्धि ओताते मिओन थेमे परमेश्वर बात लोप्कान्तेबाला तोङगो। थेबे नाङ ख्योकोनगी कोईला सेत्क्यो, कोईला स्यिङगी थामला टाँए खाला सेत्क्यो, कोईला खेराङ मिटिङ खित्च्येते खाम्बे नाङला खेरला कोर्रा लै खिओ थेमे कोईलाचेन थेबा जुन जुन सारदु डुइदुक थेरू थेरूराङ गाल्ला थेङलेकी उरला तोङगो। 35 ख्योकोनगी थोक खितेकी परमेश्वरगी खि साबाच्योक खित्कान्ते मिओन नाङ सेताते मि गाङे हर हिसाब था परमेश्वरगी ख्योकोनताङ लिन्ग्यो। हाबिलदुकी लाला परमेश्वर मन्दिर नाङदु कोठाताङ थेरू थानगी किल्दुराङ सेताते बरकिये फुज्युङ जकरिये पालोसाक हर हिसाब परमेश्वरगी मालाबाला मोतोङो। 36 दि बात छ्या स्येबा खि। च्यि सासीन थेबेकी खाबातेताङ खेराङगी खित्च्येते होथोक्ते कामगी सजाय परमेश्वरगी ख्योकोन सन्तानला मेन्देकी ख्योकोनलाराङ तेरग्यो। येशूकी यरूशलेम मि लाईदु पीर खाबाते ( लूका १३:३४-३५ ) 37 थेमे यरूशलेम मिओन लाईदु ङे चुक दुक्पा लाङच्ये बात खिता फाप्कीका। ख्योकोनला लेमु खिताला ताङाते परमेश्वर बात खित्कान्ते मिओनला ख्योकोनगी सेत्कीदुक। परमेश्वरगी ताङाते ज्येन ज्येन मिलाङ ख्योकोनगी दोई ग्याप्ला सेत्कीदुक। थेमे दुरू वाकीन ङेङ ख्योकोनला छ्योमुकी छ्यिर्बुकला स्योक्पे चावादु उप्ला ज्य्वाबा च्योकराङ खाईन पालोताङ पालो लेमु खिता चालाप। ईन्सीनोङ ख्योकोनगी माङेन्देईराङ ङे ख्योकोनला छ्याःङ खिता माथुप्सुङ। 38 थोगी था परमेश्वरगी ख्योकोनला ताराङ माताओ। थेमे ख्योकोन थोकराङ बाँझा गाल्ला तोरला डुइओ। 39 ‘थेला प्रभु परमेश्वरगीराङ ताङाते दुका, थेते जय जय ओङस्यीत,’ सिन मासाथुप ख्योकोनगी ङाला था याङराङ थोङाराङ मेङेदो,” सिन सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.