मत्ती 18 - जिरेलयेशूकी स्वर्गे राज्यदु सु छ्येते ईन्दे सिन साबाते ( मर्कूस ९:३३-३७ ; लूका ९:४६-४८ ) 1 थेमे थे बेले नाङपाराङ चेलातेबेकी येशू खादु वाकीन “गुरू, स्वर्गे राज्यदु देता ङेत्कान्ते मिओन नाङ गाङे भन्दा छ्येते सु ईन्दे?” सिन ठिसुङ। 2 थेमे थेकी फिजाज्यीकला काताङगीन चेलातेबे दोन्दु क्याल्गीन च्याकीन 3 “लो दि फिजाला तो। स्वर्गे राज्यदु छ्ये टेक्टे सिराते बात ख्योकोनगी विचार खाबाच्योक मेङगो। फिजाओनचेन ङा ङाराङ ईन सिराच्योक मिक्किओ। ख्योकोनोङ छ्ये खिता ताङला फिजाओन च्योकराङ ओङा फाप्क्यो। थोक मायाङथुप ख्योकोन नोमुङ स्वर्गे राज्यदु स्यूक्पा मेङेदो। 4 ङा ङाराङ ईन सिराच्योक मिक्किकान्ते होदि फिजा च्योक्ते मिराङ स्वर्गे राज्यदु गाङे भन्दा छ्येते ओङगो। 5 खोपरोङ ङे मि ईन्देकी होदोक्ते फिजाज्यीकला लेमु खित्कान्ते मिकी ङालाराङ मान खाबाते ईन। पाप खिता लेमु मेन ( मर्कूस ९:४२-४८ ; लूका १७:१-२ ) 6 थेमे ङाला विश्वास खित्कान्ते उदि फिजा च्योक्तेबे नाङ दोक्पोईलाकामा सुइँदेकी मेलेबाते काम खित च्युत्कीन ङे छ्य्वापेई टाल्सुङ सासीन थोक खित्कान्ते मिकी आउदी ज्यीबा लाङच्या मेलेबा काम खाबाते ईन। सुइँदाला ङे छ्य्वापेई डेला भन्दा गोमाकाराङ थोक खित्कान्ते मिलानी सुइँदेकी ज्यीङबामा आउदी जोदाई लाकोर दो काल्गीन नुप्ला स्यिरस्यीत सिन समुन्द्रे नाङमा युकीन क्युरा ईन्सीन लेमु ओङच्या ओतान। 7 पापताङ लोभकी खित्सादु दि सा लुङबे मिओनला आउदी मेलेबा ओङगो। मिला पापताङ लोभ खिता सेम मालाङच्येते मेन। थोक ईन्सीनोङ ज्येनला पाप खित च्युत्ला ङे छ्य्वापेई ठाल ज्युत्कान्तेकी आउदी छ्येज्यीक सजाय ङेत्क्यो। 8 ङा ख्योकोनला च्यि सिते सासीन ख्योकोनगी खेराङ लाक्पेकी खित्सादु मेलेबाते काम खासुङ सासीन थे लाक्पा तुप्ला क्युर। काम्बेकी खित्सादु थोक खासीन काम्बाराङ तुप्ला क्युर। दोक माक्यासीन ख्योकोननी नरककुण्डमा मे नाङमा स्यूइओ। थेमा सधैँ बारगीन देत्च्येते मे नाङमा स्यूक्पा भन्दानी ठुटे डुँरे गाल्ला नोमुङ मिसिन्च्येते जुनी ङेत्ला स्वर्गने देता काल्बेई लेमु ईन। 9 थोकराङ खाला मिगी तासादु खेराङगी पाप खासुङ सासीन थे मिकराङ थेन्ला क्युर। मिकज्यीगी खित्सादु नरककुण्डमा मे नाङमा स्यूक्पा भन्दानी बरू ख्योकोन काने गाल्ला नोमुङ मिसिन्च्येते जुनी ङेत्ला स्वर्गने देता काल्बेई लेमु ईन। तोराते लुगी कथा ( लूका १५:३-७ ) 10 थेमे ङाला विश्वास खित्कान्ते उदि फिजा च्योक्तेबा सुङलाङ ख्योकोनगी हेपे माकेत। च्यिला सासीन होदोक्तेबाला ताकोरा खित्कान्ते परमेश्वर दूतओनचेन जहिलेङ स्वर्गने देत्कान्ते ङे आबे दोन्दु ड्वा ङेत्क्यो। 11 परमेश्वर ओत्सादुई वाबाते मि ङाचेन परमेश्वरताङ ठाल्गीन गालाते मिओनला पापदुकी डेलाला वाबाते ईन। 12 थेमे सुइँदा लुई गोठालेते लुक सयज्यीक नाङ दोक्पोई तोरसीन थेकी चुक खिते सिन ख्योकोनला छ्या ओत मेन? थोक ओङसीन थेकी ओतातेबरीला पाङगी नाङलाराङ चरनला ज्याक्ला च्याला तोराते लुक छोल डुइओ मेन? 13 छोल्गीन छोल्गीन डोजीन थे तोराते लुक ङेत्नामेकी थे आउदी गा खिओ। मातोरातेबा ज्येन गाङे लुक भन्दाङ थे तोराते लुकज्यीकका काल्बेई ईन्दाच्योक खाला थे आउदी खाला गा खिओ। 14 स्वर्गने देत्कान्ते आबा परमेश्वरगीङ ङाला विश्वास खित्कान्ते उदि फिजा च्योक्तेबा सुङ थे खोरोङताङ ठाल्ला नरककुण्डमा स्यूक्पा माफाप्स्यीत सिन होथे लुई गोठालेकी खिता च्योकराङ खिओ। दाक्पोन नाङ मेलेबा काम खित्कानला चुक खित्च्ये 15 थेमे खेराङ आज्यो न्वाकी खेराङला खइँदा मेलेबा खासीन ख्योकोनगी दोक खि। च्यि सासीन जसकी खेराङला मेलेबा खिदुक गोमा खेराङ दोक्पोईकामा थे ओत्सादु गाल्ला थेकी थोक खाबाते लेमु मेन सिन थेला सम्झे खाला बिन। खेराङ ङिकामा ओत्जीन थेकी ‘ङे गल्ती खाबाप, स्येदाङ माकेत,’ सिन सासीन ख्योकोन याङराङ आज्यो न्वा च्योकराङ ओङला डिक्ला देता थुप्क्यो। 16 खेराङ दोक्पोईकीकामा सिरजीन थेकी ङे थोक खाबाते ईनराङ मेन सासीन ज्येनोङ मेन्दाज्यीक मेन्दा ङिला टीला खेरला थेकी थोक खाबाते लेमु मेन सिन याङराङ थेला थेबे दोन्दुङ सम्झे खि। च्यिला सासीन सुइँदेकी दिकी दोक दोक खाबाते ङे मिगीराङ थोङाते ईन सिन मेरा ङि सुमगी साबाते बात ङेन्लाकामा थे मि दोषी ईन सिरा ओङगो सिन सिरा ओत। 17 थोक खाला मेरा ङि सुम डिक्ला बात खित्जीनोङ थेकी ङेनराङ माङेन्सुङ सासीन ज्येन आज्यो न्वाओनलाङ गाङेला रूला थेला थोरूमोङ सम्झे खि। गाङे दोन्दु थोक खित्जीनोङ थेकी ङे थोक खाबाते ईनराङ मेन सासीनचेन खेराङ आज्यो न्वा सिरा ताङला ख्योकोनगी थेला कर लिन्कान्तेताङ परमेश्वरला छ्या मेस्येकान्ते मि च्योकराङ ठाने खि। 18 ङा ख्योकोनला च्यि सिते सासीन ख्योकोनगी दुरू मेङगो साबाते बातला परमेश्वरगीङ स्वर्गने मेङगोतराङ सिन सिओ। थेमे ख्योकोनगी दुरू ओङगो साबाते बातलाचेन थेकीङ ओङगोतराङ सिन सिओ। 19 थेमे ङा ख्योकोनला दि बादोङ सिओ। ख्योकोन मेन्दा ङिकामा डिगीन सेमज्यीकराङ खाईन खइँदा बातकी लाईदु प्रार्थना खासीन स्वर्गने देत्कान्ते ङे आबेकी ख्योकोन प्रार्थना ङेन्ला ख्योकोनगी नाङ साबाते तेरग्यो। 20 च्यिला सासीन ङे मि ईन्देकी मेन्दा ङि सुमकामा जम्मा ओङसीनोङ ङा थेरू थेबाताङ ङ्योम्बुराङ ओङगो,” सिन सिदुक। ज्येनला माफ तेरच्येते बात 21 थे तिरी पत्रुसकी येशू खादु वाकीन “प्रभु, ङे आज्यो न्वाकी ङाला बाजि थोईसाक मेलेबा खित खित थेबाला माफ तेरा फाप्कीते? बाजि दुईनसाक माफ बिन्नामेकी ओङगीतासीन आङ?” सिन ठिसुङ। 22 थोक सिरजीन थेकी “मेन मेन, बाजि दुईनसाककामा मेन। खोल्ला मेलेबा खित्कान्तेबाला खुई बाजि सय स्यीताङ खाल स्यीताङ च्युताम्बासाकराङ माफ तेरा फाप्सीनोङ जहिलेङ माफ बिन। 23 लो था दि कथाज्यीक ङेन। स्वर्गे राज्य बादोङ दोकराङ ईन। चुक सासीन बाजिई गेल्बोज्यीगी थे खोरोङ सम्पत्ति ताकान्ते मिओनताङ हर हिसाब लिन्दाला ठीक खादुक्लो। 24 थोक खाला हर हिसाब लिन्जीन थेरू लाख थोई थोई पैसा ज्येला फाप्कान्ते मिज्यीक गेल्बो दोन्दु क्याल्दुक्लो। 25 थे मिकी थे पैसा ज्येला मुथुप्च्या थोङगीन थे गेल्बोकी थे खोरोङ मिओनला ‘लो था दिला च्यि खिसे सासीन दित्ताङ दि फेम्मे थेमे फिजातेबालाङ योक्पो योङमु खिताला छ्वा। थेमे दिते घरबारीङ च्वाला पैसाचेन दुरू खोरच्योक,’ सिन कोत्तुक्लो। 26 थोक सिरजीन थे मिकी गेल्बोला काम्बा तेक्ला से खिनकामा ‘सरकार, ओर्च्ये टिक्पी दिन गुला नाङ। थेमे ङा दि पैसा गाङे ज्येल्ग्यो,’ सिन बिन्ती खादुक्लो। 27 थोक खित्जीन थे गेल्बोला ङिङज्ये लाकीन थे गाङे पैसा लिनराङ मिलिन्च्या खाईन थेला थोकराङ ताङदुक्लो। 28 थोक ओङनामेई थे मि थेरूई गाल्दुक्लो। थेमे डोजीन लामला थेकी थे खोरोङ च्योकराङ गेल्बो काम खित्कान्ते र्वाज्यीकला ठेत्तुक्लो। थेला थेते पैसा टिक्पीस्यिक लिन्च्या ओताक्वालो। थेमे थेकी थे र्वातेला ज्यीर खाप्कीन ज्यीङबाला जुम्गीन ‘लो ङे पैसा थाल्ला दुरूराङ झट्ट खोरच्योक,’ सिन ताङराङ माताङदुक्लो। 29 थोक खित्जीन र्वातेकी थेला काम्बा तेक्ला से खिनकामा ‘टिक्पी दिन गु ओर्च्ये। थेमे ङा खुई पैसा गाङे ज्येल्ग्यो,’ सिन सादुक्लो। 30 र्वातेकी थोक खाला बिन्ती खित्जीनोङ थेकी ङेनराङ माङेन्गीन थे खोरोङ पैसा माच्यालथुप थेला जेलदु लुक्तुक्लो। 31 थेकी थोक खाबाते गेल्बो काम खित्कान ज्येनगीङ थोङदुक्लो। थेकी थोक खाबा थोङजीन थेबाला आउदी मेलेबा लादुक्लो। थेमे गाल्गीन थे गाङे बात गेल्बोला लाःप्तुक्लो। 32 थे बात थोकीन स्येदाङ लाकीन थे गेल्बोकी थे मिला काताङगीन ‘खो चुक दया माया मेताई मेलेबाज्यीक मि ओता ईन्दाका। खुई बिन्ती खाबेकी ङे खुई ज्येला फाप्च्येते पैसा छ्याःङ मिलिन्च्या खाईन ताङा ओतान। 33 खुईङ खोरोङ र्वाला ङे खोल्ला खाबा च्योकराङ खिता फाप्च्या मेतान?’ सिन 34 ङारगीनकामा थेकी ज्येला फाप्च्येते पैसा टाकटुक छ्योल सिन थेला जेलला लुक्तुक्लो। 35 थोगी खेराङला मेलेबा खित्कान्तेबाला ख्योकोनगी सेमदुकीराङ माफ माबिन्सुङ सासीन स्वर्गने देत्कान्ते ङे आबेकीङ थे गेल्बोकी च्योक खाला ख्योकोनला माफ तेरराङ मेतेरो,” सिन सासुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.