मत्ती 15 - जिरेलपरमेश्वर नियमताङ मि रीतिथिति ( मर्कूस ७:१-१३ ) 1 थेमे यरूशलेमपेकी कोई कोई धर्मे गुरूताङ फरिसी पाटी मिओन वाकीन येशूला 2 “खुई चेलाओन च्यिला ज्युज्यु पुर्खे पालोमेई चले खिन वाबाते रीतिथिति माने मिक्किका? साप सा बेलाला लाक्पा ठुत्जीन थेबा च्यिला थे रीतिथितिला खि साबा च्योकराङ खाला लाक्पा मुठुता खाला साप सेइका?” सिन सिराला स्यूसुङ। 3 थोक सिरजीन थेकीङ “ख्योकोनचेन याङ च्यिला खेराङ रीतिथिति माने खिताला परमेश्वर नियमओन मेङेन्ते? 4 च्यिला सासीन परमेश्वरगी थे खोरोङ नियमला ‘आबा आमाला मान खि। दाक्पोन आबा आमाला मेलेबा वचन लै खित्कान्ते मिला सेता फाप्क्यो,’ सिन साबा ओत। 5 परमेश्वर नियमला आबा आमाला मान खिता फाप्क्यो सिन साबा ओत्सीनोङ ख्योकोनचेन चुक खिका सासीन सुइँदेकी थे खोरोङ सम्पत्ति परमेश्वरला चढे खाबाप सानामेई थे खेराङ आबा आमाला ङे ख्योकोनला बुढेसकालला ता फाप्च्येते सम्पत्ति परमेश्वरला चढे खाबाप। थोगी ङा ख्योकोनला ता मुथुबो सिन सासीनोङ परमेश्वर नियम ङ्ये च्युताते मेन सिन खिदुक। 6 दोक खाला ख्योकोनगी मिओनला दाक्पोन आबा आमाला बुढेसकालला मातासीनोङ ओङगो सिराच्योक खिदुक। खेराङगी जोबाते रीतिथिति माने खित्सादु ख्योकोनगी होदोक खाईन परमेश्वर नियम ङेन्दा ताङला दुक। 7 ख्योकोन चुक्तेन्दे ईन्दाका। यशैयेकी परमेश्वरगी थाङबो ख्योकोन विषयला सिर च्युताते बात खिन दोक सिन साबाते बात ख्योकोनगी खिन ओताते कामताङ लेमु खाला डिइदुक। परमेश्वरगी साबाते बात थेकी दोक सिन साबा ओतान। 8 चुक सासीन ‘दि मिओनगी ङाला खेकीकामा परमेश्वर सिन माने खिदुक। ङाला माने खित्जुमकामा खाला दिबेकी छ्याःङ वास्ता मिक्किदुक। 9 दिबेकी ङे नियमराङ ईन्दाच्योक खाला खोपरोङ बातका ज्येनला लोप्कीदुक। थोगी दिबेकी ङाला माने खिताला सिन खाबाते कामनी छ्याःङ काम लै मिक्किओ,’ सिन साबा ओतान,” सिन सिदुक। च्यिकी मिला पा फोइते ( मर्कूस ७:१४-२३ ) 10 थेरूई येशूकी थेरू जम्मा ओङाते मिओनला थे खोरोङ दोन्दु काताङगीन “लो ख्योकोनबरी ङे साबाते बात ङेन्ला च्यि साबाते ईन्दे सिन खोबा खि। 11 च्यि सासीन ङुरूङगी दि सा ओङच्येते, थे सा मेङच्येते थेमे लाक्पा चोके खालाकामा सा ओङगो सिरच्येते छ्याःङ मेत। साप सोला पा मोफोगो। मि खानामेकी थेन्च्येते बातकीका मिला पा फोइओ,” सिन सिदुक। 12 थेमे चेलातेबेकी दोन्दु वाकीन “गुरू, खुई थाल्ला साबाते बात थोनामेई फरिसी पाटी मिओन स्येदाङ खासुङ सिन च्यि खुई छ्या स्येसुङ?” सिन सिदुक। 13 थोक सिरजीन थेकी “स्वर्गने देत्कान्ते ङे आबेकी माचुबाते बिरूवा जति गाङे फाल्ला क्युरग्यो। 14 दोक ईन्देकी थेबा जेसुकै खित्स्यीत। खेराङ खाराक्पा देत। थेबेकी खोपरोङला परमेश्वर नियम छ्या मेस्येकान अन्ध च्योक्ते मिओनला थे नियम लोप्कान्ते मि ईन खिदुक। ईन्दालाचेन थेबा खोपरोङका होथोक्ते अन्ध च्योक्ते ईन। च्यि अन्धेकी ज्येनज्यीक अन्धला खइँसाला टीला खेरा चाल्सीन ङिकाराङ गाराम गुरूम मिरिलोतरो?” सिन सिदुक। 15 थेमे पत्रुसकी “गुरू, खुई आनाङका साच्या थुङच्येतेकी मेन, खानामेकी थेन्च्येते बातकीका मिला पा फोइओ सिन साबाते बातकी अर्थ च्यि ईन्दे? ङ्योकोनला लाःप्ला नाङना,” सिन सिदुक। 16 थोक सिरजीन थेकी “च्यि थोरूमोङ ख्योकोनगीङ ज्येनगी च्योकराङ छ्याःङ मोखोदुक? 17 थे बातनी ख्योकोनगी खोबा फाप्च्येतेराङ ईन। चुक खाईन माखोसुङा? च्यि सासीन साच्येते जेराङ सोसीनोङ थे सुबे नाङमा गाल्ला तिरी थेरूकीङ थेन्ला डुइओ। 18 दोक ईन्देकी मिला पा फोक्च्येते साच्या थुङच्येतेकी मेन्देकी मि सेमदुकी खानामा थेन्च्येते बातकी ईन। 19 च्यिला सासीन मि सेम मेलेबा ओतेकीराङ मिकी मेलेबा मेलेबा विचार खित्च्येते, मि सेत्च्येते, मि ख्यावा फेम्मेताङ ङ्याल्च्येते, रन्डीबाजी खित्च्येते, कुच्येते, मेन्दे बातला ज्येनला दोष लै खित्च्येते थेमे ज्येनला मोत्च्येते ईन। 20 थोगी होदि कामताङ बातओन खानामेई मिला पा फोइओ। तर रीतिथितिला खि साबाच्योक खाला लाक्पा चोके मिक्किता खाला सोला थुलाचेन मिला पा मोफोगो,” सिन सिदुक। कनानीमाज्यीगी येशूला मद्धत नाङ खाबाते ( मर्कूस ७:२४-३० ) 21 थेमे येशू थेरूई टायरताङ सीदोन सिरसे नाङपा गाल्सुङ। 22 थेमे ठाउँज्यीक्तु चुक ओङसुङा सासीन थेङलाराङ देत्कान्ते कनानीमाज्यीक थे खादु वाकीन ङुइनकामा “ए प्रभु, दाऊद गेल्बो सन्तान, ङे दुक्पा थोङला नाङ। ङे फुमुला ल्हन्डीक खोबेकी थे ल्हन्डीककी आउदी दुक्पा तेरगीदुक। थेदुकी थे ल्हन्डीक तेन्ला नाङ,” सिन सिदुक। 23 थोक सिरजीन थेकी थेला छ्याःङ मासासुङ। थेमे चेलातेबेकी “गुरू, ओर्च्ये, दि फेम्मे मिला दोक खाला ङुरूङ खादु वाला छेरा खित माज्युत,” सिन सिदुक। 24 थेमे थेकी थे फेम्मे मिला “परमेश्वरगी ङालानी तोराते लुक च्योक खाईन थे खोरोङ छ्य्वापेई ठालाते इस्राएलीओनलाका लेमु खिताला ताङाते ईन,” सिन सिदुक। 25 थोक सिरजीनोङ थे फेम्मे मिकीचेन थेला गुर्बु खाला से खिन “थोक ईन्सीनोङ प्रभु, ङालाङ मद्धत नाङ, ओर्च्ये,” सिन सासुङ। 26 थेमे थेकी “फिजाला साबाते साप किला तेरा मेङगो,” सिन सिरजीन 27 थे फेम्मे मिकी “ईन प्रभु, खुई साबाते ठीकराङ ईन। तर सोकीन लूबातेनी किकीङनी सा ङेत्क्यो मेन ओना?” सिन सिदुक। 28 थोक सानामेई थेकी “ङे खोरोङगी साबाच्योक पक्काराङ खिओ सिन ङाला विश्वास खाबेकीराङ ङे खुई खाला नाङ साबाच्योक खाबाप। खुई फुमु नाङदुकी ल्हन्डीक तेन्गीन ताङा ओत,” सिन सिदुक। येशूकी थोक सिरासात्तु थे फेम्मे मिते फुमुते दाक ठाक्पा ओतान। येशूकी नाबाते मि काल्बेईला ठाक्पा खाबाते 29 थेरूई ख्याम्गीन येशू गालील समुन्द्रे छेउदुई खाईन बोमज्यीक्तु गाल्गीन देत्सुङ। 30 थेमे थेरू आउदी काल्बेई मि जम्मा ओङसुङ। थेबेकी थेरू ख्याम्बा मुथुप्कान्तेबा, कुज्येतेबा, अन्धतेबा, लाटातेबा थेमे ज्येनोङ नाबाते मि काल्बेई खुलाकीन येशू दोन्दु ज्याक्सुङ। थेमे थेकी थेबा गाङेला ठाक्पा खासुङ। 31 थोक खानामेई लाटातेबेकी बात खाबाते, कुज्येतेबा ठाक्पाते, ख्याम्बा मुथुप्कान्तेबा लेमु खाईन ख्याम्बाते थेमे अन्धतेबा थोङा थुप्च्या गालाते थोङगीन थेरू जम्मा ओङाते मि गाङे छक्क परे खासुङ। थेमे इस्राएलीओन परमेश्वर चुक अचम्बतेन्दे काम खित ज्युत्कान्ते ईन्दे सिन थेबेकी थेते जय जय खासुङ। येशूकी हजार स्यी मिला साप बिन्दाते ( मर्कूस ८:४-१० ) 32 थे तिरी येशूकी चेलातेबाला दोन्दु काताङगीन “दि मिओन दोक खाईन देताते थोङजीन ङाला आउदी ङिङज्ये लासुङ। दिबा दुरू ङात्ताङराङ देताते ङीमा सुम गाल्गीन सिन्सुङ। दिबाताङ साच्येतेङ छ्याःङ मिन्दुक। था तुक्पाराङ खाँपा ग्युक सिन ताङसीन ख्याम्गीन ख्याम्गीनलाराङ दिबा त्वाबेकी स्याङ थुप्क्यो,” सिन सिदुक। 33 थोक सिरजीन चेलातेबेकी “आबिई गुरू, दि छ्याःङ मेङेत्च्येते ठाउँदुङ दर्गेई दर्गेई मिला साप तेराला च्यि ङेत्कीतेरो?” सिन सासुङ। 34 थेमे थेकी “ख्योकोनताङ स्योबेन थोईजो ओते?” सिन ठिजीन थेबेकी “स्योबेन दुईनताङ ठमीतेन्दे ङ्या ङिचो सुमजो ओत,” सिन सिदुक। 35 थेमे थेकी थे मिओनला साला लेमु खाईन देत च्युत्सुङ। 36 थेरूई थेकी थे स्योबेन दुईनताङ ङ्यातेबा लाःक्तु लाकीन परमेश्वरला धन्यवाद बिन्गीन सिन्नामेकी स्योबेनतेबा च्य्वाकीन थेमे ङ्यातेबा टुक्रा जोइन मिओनला गोला बिन सिन चेलातेबाला तेरगीन खासुङ। चेलातेबेकीङ मि गाङेला गोकीन बिन्सुङ। 37 थेमे मि गाङेकी डाडासाक सोसुङ। थेबेकी सोकीनोङ चेलातेबेकी थेरू लूबाते स्योबेनताङ ङ्ये टुक्राटुक्रीकी तोलुम दुईन काङसुङ। 38 थेरू थोक खाला साप साकान्तेबे नाङ फिजाओनताङ फेम्मे मि मोङोजीनोङ हजार स्यीनी ख्योओ मिकामा ओतान। 39 मि गाङेला थेरूई खाम्बा खाम्बाला ताङगीन सिन्नामेई येशूबा डुङ्गाला जेकीन मगादान सिरसापा गाल्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.