मत्ती 14 - जिरेलबप्तिस्मा तेरकान्ते यूहन्नाला सेताते ( मर्कूस ६:१४-२९ ; लूका ९:७-९ ) 1 थेमे थे बेले नाङपाराङ गेल्बो हेरोदकीङ येशूकी खाबाते अचम्बते कामगी बात गाङे थोसुङ। 2 थेमे थेकी थे खोरोङ दरवारदु काम खित्कान्ते मिओनताङ “थे येशू सिरातेनी बप्तिस्मा तेरकान्ते यूहन्नाराङ सोम्बो लोगीन वाबाते दुका। थेमेका थेकी थोक अचम्बते कामओन खित्च्येते ईन्दासीन,” सिन बात खासुङ। 3 बात च्यि ओङा ओताने सासीन हेरोदकी यूहन्नाला जुम्गीन नेल कोन्गीन जेलदु लु च्युता ओतान। च्यिला सासीन हेरोदकी थे खोरोङ न्वाते फिलिप फेम्मे हेरोदियास खुलाबा ओतान। 4 थेकी नामाते खुलाबेकी यूहन्नेकी थेला “खुई खोरोङ नामाला च्यिला खुलाबे? दोक खिता मेङगो सिन खोल्ला छ्याराङ ओत,” सिन साबा ओतान। 5 ईन्दानी हेरोदकी थेला सेताङ चाला ओतान। तर मिओनगी यूहन्नाला परमेश्वर बात खित्कान्ते सिन माने खाबा ओतेकी थेबे ज्यीबेकीङ थेकी थोक खिता थुपा मेतान। 6 तर तिरी चुक ओङसुङा सासीन हेरोद गेल्बो केबाते दिनगी छोमु लै खाबाते भोज साप्ला वाबाते डोम्बो गाङे ङोन्दु हेरोदियास फुमुकी बाक चेसुङ। थेकी बाक चेबाते हेरोदला आउदी लेमु लासुङ। 7 थेमे खुशी ओङगीन हेरोदकी थेला “खो च्यि नाङ सिते, खुई जे नाङ सासीनोङ ङा तेरग्यो,” सिन ना क्याल्सुङ। 8 थोक सिरजीन आमातेकी लाप्कीन बिन्दाते बात ङेन्गीन थे फुमुतेकी हेरोदला “बप्तिस्मा तेरकान्ते यूहन्ने गोः तुप्ला ङाला देर्माला लुक्ला नाङ,” सिन सिदुक। 9 थेकी थोक सिरजीन था यूहन्नाला चुक खाला सेत्च्ये सिन हेरोदला आउदी पीर लासुङ। तर जे नाङ खासीनोङ तेरग्यो सिन गोमाका गाङे ङोन्दु जमान खाईन ना क्याला ओतेकी थेकी यूहन्ने गोःचेन तेरा मुथुबो सिन सिरा माथुप्सुङ। 10 थोगी थेकी यूहन्ने गोः तुप्ला खोरच्योक सिन मि ताङगीन जेलदु यूहन्ने गोः थुप च्युत्सुङ। 11 थेमे साबा च्योकराङ खाईन थे गोः देर्माला लुगीन थे फेम्मे फिजाला बिन्नामेकी थेकी थे गोः आमातेला खेरगीन बिन्सुङ। 12 यूहन्ना सेताते बात थोनामेकी थे चेलाओनगी वाकीन थे रो खेरगीन दिसुङ। थेमे थोक थोक ओङाते गाङे बात गाल्गीन येशूला लाःप्सुङ। येशूकी हजार ङा मिला साप बिन्दाते ( मर्कूस ६:३०-४४ ; लूका ९:१०-१७ ; यूहन्ना ६:१-१३ ) 13 यूहन्नाला सेताते बात थोनामेकी येशूबा खोपरोङकामा देताप सिन मिओनताङ ठाल्गीन डुङ्गाला जेकीन थेरूई गाल्सुङ। थे थेरूकी गालाते बात छ्या स्येनामेई ठाउँ ठाउँकी मिचेन समुन्द्रे छेउताङ छेउ ख्याम्गीन थेला तिङ ङ्योगीन गाल्सुङ। 14 थे खोरोङ थेपा लेप्ला डुङ्गादुकी फाप्जीन थेकी गोमाका थेपा लेपाते होथे ङोला ङ्वा मुथुप्च्ये मि थोङसुङ। थेबाला थोङजीन थेला आउदी ङिङज्ये लासुङ। थेमे थेकी थेबे नाङ नाबा ओतातेबाला ठाक्पा खाईन बिन्सुङ। 15 थोक थोक खित्केलाराङ नामोङ स्योबा खाबा ओतान। थेमे चेलातेबेकी दोन्दु वाकीन “गुरू, था नाम स्योबा खासुङ। दि छ्याःङ मेङेत्च्येते ठाउँ ईन। थोगी दिबाला खइँसाला युल युलला गाल्ला साप थुङा ङ्योला सो सिन थोङ,” सिन सिदुक। 16 तर थेकीचेन “मेन मेन, दिबाला च्यिला दुरूकी तोङच्ये? दिबाला ख्योकोनगीराङ साप थुङा बिन,” सिन सिरजीन 17 थेबेकी “आबिई गुरू, ङ्योकोनताङनी दुरू स्योबेन ङाताङ ङ्या ङिकामा ओत। दिकीङ दर्गेई मिला च्यि पत्ता लै खितेरो?” सिन सिदुक। 18 थेमे थेकी “लो थे स्योबेनताङ ङ्या ङाला नाङ,” सिन सिदुक। 19 थेमे थे मिओनला साला पाङगी सो लाई नाङला देत च्युत्कीन थेकी थे स्योबेन ङाताङ ङ्या ङि लाःक्तु लाकीन नामने ताकीन थे सापकी लाईदु परमेश्वरला धन्यवाद बिन्सुङ। थेमे थेकी थे स्योबेन च्य्वाकीन गाङेला गोला बिन सिन चेलातेबाला तेरगीन खानामेई थेबेकीङ साबा च्योकराङ खाईन गोकीन बिन्सुङ। 20 थेमे मि गाङेकी डाडासाक सोसुङ। थेबेकी सोकीनोङ चेलातेबेकी थेरू लूबाते स्योबेनताङ ङ्ये टुक्राटुक्रीकी तोलुम च्युन्ङी काङसुङ। 21 थेरू थोक खाला साप साकान्तेबे नाङ फिजाओनताङ फेम्मे मि मोङोजीनोङ हजार ङाजोनी ख्योओ मिकामा ओतान। येशू छ्युई लाकताङ लाक ख्याम्बाते ( मर्कूस ६:४५-५२ ; यूहन्ना ६:१६-२१ ) 22 मिओनला थोक खाईन साप बिन्गीन सिन्नामेई येशूकी चेलातेबाला “ङाचेन था टिक्पी तिरी ओङामीन, ख्योकोन डुङ्गाला जेला समुन्द्रे फारकेनपा ग्युक,” सिन थेरूई ताङसुङ। थेरू ओताते मिओनलाङ थेकी थेरूई ताङसुङ। 23 थोक खाईन गाङेला ताङनामेकी थे खोरोङचेन च्यिकराङ परमेश्वरताङ प्रार्थना खिताला बोमज्यीकने गाल्सुङ। नाम स्योला सिन्जीनोङ येशू बोमनेराङ ओतान। 24 चेलातेबाचेन डुङ्गाला जेकीन समुन्द्रे छेउदुकी आदोराङ थारीला ख्योल्गीन सिन्दा ओतान। तर डुङ्गा खेरा फाप्से छ्य्वापेई आउदी कस्स्ये खाईन ल्हाबा खाईन समुन्द्रदु छाल लाबेकी डुङ्गा चले खिताला थेबाला आउदी दुक्पा ओङा ओतान। 25 थेमे ङोमु पाखाला येशू छ्युई लाकताङ लाक ख्याम्ला चेलातेबा ओत्सापा ओङगीन ओतान। 26 थोक खाला थे छ्युई लाकताङ लाक ख्याम्ला ओङा थोङजीन थेला ङो मास्येकीन चेलातेबेकीचेन आते खिनकामा ज्यीबेकी “आबिई उ ल्हन्डीक लिच्युङो,” सिन छेरा खासुङ। 27 थेबा ज्यीबा खाबाते छ्या स्येकीन थेकी “ज्यीबा माकेत, ङाका ईन। छ्याःङ ज्यीबा खिता माफाबो,” सिन बात खासुङ। 28 थे येशू दुका सिन छ्या स्येनामेई पत्रुसकी “प्रभु, खोराङ ईन्सुङ सासीन ङालाङ खो च्योकराङ छ्युई लाकताङ लाक ख्याम्ला खो ओत्सापा स्योक सिना,” सिन सिरजीन 29 थेकी “स्योकना ओना,” सासुङ। थेमे पत्रुस डुङ्गादुकी फाप्कीन छ्युई लाकताङ लाक ख्याम्गीन थे ओत्सापाला ड्वाप्ला स्यूसुङ। 30 ल्हाबेकी खित्सादु थे खोरोङ फेरोला समुन्द्रे छाल लाबा ओताते थोङजीन नुप्ला स्यिइता सिन ज्यीबा खिन खिनला थे नुपाला स्यूसुङ। थेमे आते खिनकामा थेकी “ए प्रभु, ङाला जोए खि,” सिन छेरा खासुङ। 31 थोक सिराईताङ टेप जुम्गीन थेकी “खुई ङे बात पत्ते खाबाते खोइ ओना? ङे स्योक सानामेकीङ छ्युई लाक ख्याम्बा मुथुप्ता सिन खुई च्यिला शंका खाबे?” सिन थेला नुपचेन माच्युत्सुङ। 32 थेमे थे पत्रुसताङराङ डुङ्गाला जेनामेकी ल्हाबा चले खिताङ ताङसुङ। 33 थोक थोक ओङनामेई डुङ्गाला ओताते चेलातेबेकी थेला मान खिन “प्रभु, खो परमेश्वर फुज्युङराङ दुका,” सिन से खासुङ। येशूकी गनेसरेतदु मिओनला ठाक्पा खाबाते ( मर्कूस ६:५३-५६ ) 34 थेमे येशूताङ चेलातेबा फारकेनपा गनेसरेत सिरसापा लेप्कीन डुङ्गादुई फाप्सुङ। 35 थेरू मिओनगी थेला येशू दुका सिन छ्या स्येकीन थे थेरू वाबाते बात गाङेपा फैले खासुङ। थेमे मिओनगी फार छुर गाङेपेकी नाबाते मिओनला थे ओत्सादु खुला लिच्युङ। 36 थेमे थेबेकी “हजूर, खुई खोन्दाते खोलाक छेउलाकामा ईन्सीनोङ दिबाला द्वाप बिन,” सिन बिन्ती खित्जीन थेकीङ थोकराङ खित च्युत्सुङ। थेमे थे खोलाकला दोकान जति गाङेराङ ठाक्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.