मत्ती 10 - जिरेलयेशूकी छाने खाबाते मेरा च्युन्ङी चेलाओन ( मर्कूस ३:१३-१९ ; लूका ६:१२-१६ ) 1 थेमे येशूकी थे खोरोङ चेला च्युन्ङीला दोन्दु काताङगीन च्याकीन ल्हन्डीक खोबाते मिओनदुकी ल्हन्डीक तेन्ला तोङच्येते अधिकार थेबाला बिन्सुङ। थरी थरीतेन्दे रोग लै खाबाते थेमे नाबाते मिओनला ठाक्पा खित्च्येते शक्तिङ बिन्सुङ। 2 थोक खाईन थेकी खटे खाबाते मेन्दा च्युन्ङी नाङ दोक्पोईचेन शिमोन ओतान। थेला पत्रुस सिनोङ मिन ज्याक्पा ओतान। ज्येन मेरा च्युच्यीकचेन शिमोन आज्यो अन्द्रियास, जब्दी फुज्युङ ङिबो याकूबताङ थे न्वा यूहन्ना, 3 फिलिप, बारथोलोमाइ, थोमा, कर लिन्कान्ते मत्ती, अल्फयस फुज्युङ याकूब, थेदियस, 4 देशभक्त सिराते पाटी मि शिमोन थेमे तिरी थे खोरोङला धोका तेरकान्ते यहूदा इस्करियोत ओतान। येशूकी चेला च्युन्ङीला काम खित ताङाते ( मर्कूस ६:७-१३ ; लूका ९:१-६ ) 5 थेमे काम खिताला तोङा भन्दा गोमा येशूकी थेबेकी चुक चुक खिता फाप्कीते सिन थेबा मेन्दा च्युन्ङीला “लो था ख्योकोनबरी ग्युक। ज्येन ज्येन जातकी मि देत्साला थेमे सामरीओन देत्से सार सारलाचेन मान्डो। 6 खालि तोराते लुक च्योक खाईन परमेश्वर छ्य्वापेई ठालाते दाक्पोन इस्राएलीओन ओत्सालाकामा गाल्ला दि कामओन खि। 7 चुक सासीन थेबाला स्वर्गे राज्य दुरू ओङा खाबा ओत सिन लोप। 8 थेमे नाबाते मिओनला ठाक्पा खि, स्याप्तेबाला सोम्बो लोक, जे खोबातेबाला ठाक्पा खि थेमे ल्हन्डीक खोबाते मिओनदुकी ल्हन्डीकओन तेन्ला थोङ। दोक खित्च्येते शक्ति खेराङगीङ छ्याःङ मेतेरा खाईन थाराङ ङेताते ईन। थोगी ज्येनला लोप्जीनताङ ठाक्पा खित्जीनोङ छ्याःङ मालिन। 9 थेमे लामला गोक्यो सिन सेर नोर थेमे पैसा खुरला माखेर। 10 थोकराङ खाला साच्या थुङच्येते लुबाप सिन झोला माखुर, फेङगाकोङ दोक्पोईकामा खेर। थेमे काचापताङ फेर्काङ माखेर। च्यिला सासीन खेतालेकी खोपरोङ निमेक ङेता च्योकराङ ख्योकोनोङ ज्येनतेबे लाईदु काम खित्कान्ते मि ईन्देकी ख्योकोनला गोच्येते जति थेबेकीराङ तेरा फाप्क्यो। 11 दोक खाला सार सारताङ युल युलला डोजीन खेराङ लेप्सादु खाङ खाम्बे मिकी खेराङला लेमु खाला च्याला स्वर्गे राज्य बात ङेन्दा छोल्गीका सिन छ्या स्येबा खि। थेमे थेरूराङ देत। थेरू देत देतसाक थे खाम्बादुराङ देत, खाम्बा खाम्बा युला स्यासा मादेत। 12 थेमे जुन जुन खाम्बाला स्यूइदुक थे खाम्बे मिओनला ‘परमेश्वरगी ख्योकोनला आशी तेरस्यीत,’ सिन सि। 13 थेबेकी ख्योकोन बात ङेन्दा चाल्गीन ख्योकोनला लेमु खासीन ख्योकोनगी साबा च्योकराङ थेबाला परमेश्वरगी आशी तेरग्यो। थेबेकी थोक खिता सेम माक्यासीनचेन थेबाला ख्योकोनगी बिन्दाते आशी लै मिक्किओ। 14 खेराङ लेप्सादु मिओनगी ख्योकोनला लेमु माक्यासीन थोक्ते मि ओत्सालाचेन देतराङ मादेत। थोक्ते खाम्बाताङ ठाउँदुई ख्याम्जीन ख्योकोनगी काम्बे थाला समेदोङ थेङलाराङ टकटक खाला ख्योम। 15 ङा ख्योकोनला च्यि सिते सासीन थाङबो सदोमताङ गमोरा सारगी मिओनगी आउदी मेलेबा मेलेबा काम खाबा ओत्सीनोङ था तिरी परमेश्वरगी न्याय खिते छोमु थेबाला भन्दाङ छ्येज्यीक सजायनी होथोक्ते ठाउँकी मिओनलाका तेरग्यो। येशूकी चेलातेबेकी दुक्पाङ ङेत्क्यो सिन साबाते ( मर्कूस १३:९-१३ ; लूका २१:१२-१७ ) 16 थेमे ज्येन बात च्यि सासीन फारे हूलगी लुई बगालला थेप्सुङ सासीन चुक खिते सिन ङुरूङला छ्या ओत मेन? ङे दुरूकी ताङनामेई फारेकी लुकला खिता च्योकराङ मिओनगी ख्योकोनला मेलेबा खिओ। थोगी ख्योकोन रूल च्योकराङ च्याङबो खाला देत। थेमे थेबा सुङलाङ छ्याःङ मेलेबा मिक्किता खाला गन्दीमा च्योकराङ सुधो ओङला काम खि। 17 मिओनताङ ख्योकोन च्याङबो खाला देत। थेबेकी ख्योकोनला जुम्ला मिटिङ खित्च्येते अड्डे छ्ये छ्ये मि दोन्दु केल्ग्यो। थेरू क्याल्ला ख्योकोनला दुङगो। 18 दोस्यिककामा मेन, ख्योकोनला छ्ये छ्ये मि थेमे गेल्बोओन दोन्दुङ केल्ग्यो। ङे मि ईन्देकीराङ ख्योकोनला दोक दोक खिओ। थेजीन ख्योकोनगी होथेबाला थेमे ज्येन ज्येन जातकी मिलाङ खेराङ च्यिला ङाला विश्वास खिते सिन लाःपा ङेत्क्यो। 19 थोक खाला खेराङला थेबे दोन्दु क्याल्नामेकी बात ठिजीन च्यि सिरच्ये, चुक सिरच्ये सिन ज्यीबा माकेत। थे बेलाला च्यि सिरा फाप्कीते सिन थेजीनराङ परमेश्वरगी ख्योकोनला छ्या स्ये ज्युत्क्यो। 20 च्यिला सासीन खेराङगी मेन्दाला थेजीन ख्योकोन आबा परमेश्वर आत्मा थे खोरोङगीराङ ख्योकोन खानापेई बात खिओ। 21 थेमे मिओनगी दिङ येशूला विश्वास खित्कान्ते ईन सिन छ्ये छ्ये मिला लाःप्ला दाक्पोन आज्यो न्वालाराङ सेत ज्युत्क्यो। आज्यो न्वाकी नाङदुकामा मेन, आबातेकी फुज्युङ फुमुला सेत ज्युत्क्यो। थोकराङ खाला फुज्युङ फुमुतेबेकीङ आबा आमातेबाला विरोध खाला सेत ज्युत्क्यो। 22 ङे मि ईन्देकीराङ मि गाङेकी ख्योकोनला मिगी थोङसार्मु खिओ। थोक थोक दुक्पा ओङजीनोङ सेम मेसेता खाला ङाला विश्वास खिन देत्कान्ते मिलाचेन परमेश्वरगी गाङे दुक्पादुकी डेल्ग्यो। 23 थोक खाला मिओनगी ख्योकोनला सारज्यीक्तु दुक्पा तेरजीन थेरू मादेत, ज्येनज्यीक सारनापा फ्रोला ग्युक। ङा दि बात सिओ, ख्योकोनगी दाक्पोन इस्राएल लुङबे सार सारगी मिला स्वर्गे राज्य बात लाप्कीन मासिन्दालाराङ परमेश्वर ओत्सादुई वाबाते मि ङा दुरू ग्युरला ओङगो। 24 ङे च्यिला दि बात खाबाते ईन्दे सासीन गुरूतेला छेतकामा मिओनगी थे चेलातेबालाङ मान खिओ। मालिकतेताङ योक्पो फारगी नाङगी बादोङ दोकराङ ईन। 25 जे ईन्सीनोङ गुरूतेला जस्तो ओङगीदुक चेलातेबालाङ थोकराङ ओङगो। थेमे मालिकतेला ओङा च्योकराङ योक्पोतेलाङ ओङगो। खाम्बे धनीलानी विरोध खिन बालजिबुल सिन शैतान मिन्तोक तासीन थे खाम्बे मिओनलानी झन चुकका साओङा। सुत्ताङ ज्यीबा खिता फाप्कीते ( लूका १२:४-९ ) 26 थोक ईन्सीनोङ खेराङला मेलेबा खित्कान्तेबाताङ ज्यीबा माकेत। च्यिला सासीन ज्येनताङ छ्यागीन ईप्कीन खाबाते कामताङ बादोङ ङीमा लेनज्यीक गाङेकी छ्या स्येक्यो। थोकराङ खाला ब्वाकीन ज्याक्पाते बादोङ तिरी दाक छ्या स्येक्यो। 27 थेमे ङे नुप्ला खेराङकामा ओत्जीन लोप्कीन ओताते बात ज्येनलाङ लाप्ला बिन। थोकराङ खाला ङे खेराङलाकामा साबाते बातओन गाङेकी छ्या स्येस्यीत सिन थोच्या खाला लोप। 28 दोक खित्जीन ख्योकोनला सेता छोल्कान्ते मिओनताङ ज्यीबा माकेत। थेबेकीनी ख्योकोन ज्यानकामा लिन्दा थुप्क्यो, आत्मालाचेन छ्याःङ खिता मुथुबो। बरू परमेश्वरताङचेन ज्यीबा खि। च्यिला सासीन थेकीनी सेता थुप्च्येतेकामा मेन, सेत्ला मिला नरककुण्डमाङ लुबा थुप्क्यो। 29 थेमे दि बात विचार खि। छ्यिल्बाक ङिचो सेत्कीन च्वासीन पैसा थोई ङेत्कीतेरो? पैसाज्यीकजोका ङेदोङ। मि लाईदु छ्यिल्बाक छ्याःङ च्योक मेन्सीनोङ थे छ्यिल्बाकज्यीक सेतातेङ आबा परमेश्वरगी छ्या स्येक्यो। 30 झन ख्योकोनतेनी गोःला दोस्यिक दोस्यिक टे केस्रा ओत सिरच्येते बात समेदोङ थेला छ्या ओत। 31 थोगी थेकी माताता सिन ख्योकोन ज्यीबा माकेत। छ्यिल्बाक भन्दानी परमेश्वर लाईदु ख्योकोन खापान खापान छ्ये ईन। 32 दि बात ङेन। च्यि सासीन ज्येनगी दोन्दु ङा येशूला विश्वास खित्कान्ते मि ईन सिन सिरकान्तेला स्वर्गने ओताते आबे दोन्दु ङाङ था तिरी दि ङे मि ईन सिन सिओ। 33 मि दोन्दु ज्यीबेकी ङानी येशूला विश्वास खित्कान्ते मेन सिरकान्तेलाचेन आबे दोन्दु थेजीन ङाङ दि ङे मिराङ मेन सिन सिओ। येशूकी थे खोरोङ चुक खित वाबाते ईन्दे साबाते ( लूका १२:४९-५३ ) 34 थेमे ख्योकोन ङा मिओनला डिक च्युत्ला किम्मु लोङाला दुरू वाबाते ईन्दासीन सिन मासेर। अहँ, ङानी थोक खिताला मेनगी ठाल ज्युतालाका वाबाते ईन। 35 च्यि सासीन ङे खित्सादु थाचेन फुज्युङतेबा आबातेबाताङ मिडिक्पा खाला छ्य्वाज्यीकपा लै खिओ। थोकराङ खाला फुमुतेबा आमातेबाताङ थेमे नामातेबाङ आबीतेबाताङ मिडिगो। 36 दोक ओङला थेबे शत्रुनी खोपरोङ खाम्बे मिराङका ओङगो। 37 थेमे ङाला भन्दाङ काल्बा आबा आमाला ङिङज्ये खित्कान्ते मिचेन ङे चेला ओङा मुथुबो। थोकराङ खाला दाक्पोन फुज्युङ फुमुलाका काल्बा ङिङज्ये खित्कान्ते मिलाङ ङे चेला ईन सिरा सोई मिक्किओ। 38 जस्तो दुक्पा ओङसीनोङ ओङस्यीत सिन दाक्पोन टाँए खाला स्या फाप्च्येते स्यिङगी थाम खुरला ङे तिरी ख्याम्कान्ते मिकामा ङे चेला ओङा सोई खिओ। 39 च्यि सासीन तिरी बो माताबा खाला दाक्पोन ज्यानगी माया खित्कान्ते मिकीचेन नोमुङ मिसिन्च्येते जुनी मेङेदो। दाक्पोन फाइदा माताबा खाला ङे लाईदु दाक्पोन ज्यानगी मायाङ मारे खित्कान्ते मिकीचेन नोमुङ मिसिन्च्येते जुनी ङेत्क्यो। परमेश्वरगी सु सुला इनाम तेरगीते 40 थेमे ख्योकोनला लेमु खित्कान्ते मिकी ङालाराङ मान खाबाते ईन। ङाला मान खित्कान्तेकी ङाला दुरू तोङकान्तेलाङ मान खाबाते ईन। 41 थेमे दि मि परमेश्वर बात खित्कान्ते दुका सिन छ्या स्येला थेला लेमु खित्कान्ते मिला परमेश्वरगी थे खोरोङ बात खित्कान्ते मिला जे तेरगीदुक थेलाङ थेराङ तेरग्यो। थोकराङ खाला परमेश्वरगी खि साबा साबाच्योक खित्कान्ते मिला लेमु खित्कान्ते मिकीङ परमेश्वरगी खि साबा साबाच्योक खित्कान्ते मिकी च्यि ङेत्कीका थेराङ ङेत्क्यो। 42 थेमे ङाला विश्वास खित्कान्तेबे नाङ दिङ सु ईन्देरो सिराच्योक खाईन ज्येनगी हेपे खाबाते मिला दि येशू चेला दुका सिन छ्यु मुठी खाङकामा थुङा बिन्सुङ सासीन होथोस्यिक खित्कान्ते मिलाङ परमेश्वरगी इनाम तेरग्यो,” सिन सिदुक। दि बाततेबा खाईन सिन्नामेई थेकी थेबाला थेरूकी ताङसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.