लूका 5 - जिरेलयेशूकी गाङे भन्दा गोमा छाने खाबाते चेलाओन ( मत्ती ४:१८-२२ ; मर्कूस १:१६-२० ) 1 थेमे ङीमाई येशू गनेसरेत सिराते समुन्द्रे छेउदु देत्ला परमेश्वर बात लोप्कीन ओतान। थेकी साबाते बात लेमु खाला ङेन्दाप सिन मिबरीचेन फुलरीङ फुलरीङ खिन थे दोन्दुराङ ड्वा छोल्गीन ओतान। 2 थेरू थोक ओङनामेई दोक ताजीन येशूकी समुन्द्रे छेउदु ताकीन ज्याक्पाते डुङ्गा ङि थोङसुङ। डुङ्गा ताकीन ज्यागीन ङ्या सेत्कान्तेबाचेन ङ्याला देक्च्येते जालतेबा टुला सफा खिन ओतान। 3 थेरू मि गाङेकी थे खोरोङ बात लेमु खाला थोबा थुप्स्यीत सिन येशू थेरू ओताते डुङ्गाज्यीकला जेसुङ। थेचेन शिमोन डुङ्गा ओतान। थोगी येशूकी थेला “दि डुङ्गा दुरूकी फजेकपा छ्युई नाङपा खेर,” सिन सिदुक। दोक खाईन डुङ्गा टिक्पी फजेकपा छ्युई नाङपा खेर च्युत्कीन डुङ्गे नाङ देत्कीन थेकी समुन्द्रे छेउदु देताते मिओनला परमेश्वर बात लेमु खाईन थोच्या खाईन लाप्सुङ। 4 थोक खाईन थेरू बात लाप्कीन सिन्नामेकी थेकी शिमोनला “दि डुङ्गाला फजेकपा छ्यु तीङ ओत्साला खेरला जाल ग्योप,” सिन सिदुक। 5 थेकी थोक सानामेकी शिमोनगी “खोइ गुरू, ङ्योकोनगी नुप खाङराङ दुक्पा खाईन जाल ग्यापाप। तर ङ्याज्यीगोङ माथेप्सुङ। थोगी याङराङ जाल देक्पाकामा फाप्कीतासीन। जे ईन्सीनोङ खुई बात ङेन्ला ङा जालचेन देक्पामीन,” सिनकामा थेत्ताङ थे र्वाओनगी डुङ्गा फजेकपा खेरगीन जाल ग्याप्सुङ। 6 थेरू जाल देक्जीन थेबेकी जालोङ छ्येदोङ सिराच्योक खाईन आउदी काल्बेई ङ्या थेप्सुङ। 7 थे जाल छ्येता छ्येता खाबेकी थेबेकी ज्येनते डुङ्गादु ओताते र्वातेबाला “ए होइबावे, छिटो छिटो थे डुङ्गाला देपा खोरच्योक,” सिन काताङसुङ। थेबा वानामेकी गाङेकी खाईन डुङ्गाला ङ्या लुजीन थे डुङ्गा ङिकाराङ खाङगीन छ्युनामा नुपा नुपा खाबा ओतान। 8 थेरू थोक ओङा थोङगीन शिमोन पत्रुसकी खोबुकला देत्कीन “प्रभु, ओर्च्ये खो ङे दोन्दु मादेत, दुरूकी ग्युक। ङे सेम पापकीकामा खाङा ओत,” सिन सिदुक। 9 च्यिला सासीन खोपरोङगी नुप खाङ जाल देक्जीन ङ्याज्यीगोङ माथेपाते समुन्द्रदुराङ थाल्ला थोक काल्बेई ङ्या थेप्जीन शिमोन पत्रुसताङ थे र्वाओन आते खिन छक्क परे खाबा ओतान। 10 दिबाकामा मेन्देकी थेरू थोक ओङा थोङजीन जब्दी फुज्युङ याकूबताङ यूहन्नाङ छक्क परे खाबा ओतान। दिबाङ शिमोनताङ र्वा खाला ङ्या सेत्कान्ते मि ओतान। शिमोनगी थे खोरोङ पापी ईन सिन थोक सिरजीन येशूकी थेला “खो ज्यीबा माकेत। थानामेई ङा खोल्ला ज्येनला परमेश्वर छ्य्वापा लै खित ज्युत्कान्ते मि जोइओ,” सिन सिदुक। 11 थेकी थोक सानामेकी शिमोनताङ थे र्वाओनगी डुङ्गाला ठुत्कीन समुन्द्रे छेउदु तेन्सुङ। थेमे जेसुकै थेङलाराङ ताङगीन थेबा खोपरोङचेन येशूताङराङ ख्याम्सुङ। येशूकी जेबोला ठाक्पा खाबाते ( मत्ती ८:१-४ ; मर्कूस १:४०-४५ ) 12 बाजिई येशू सारज्यीक्तु ओतान। थेरू जेबोज्यीक ओतान। येशूला थोङगीन थेला मान खिन खोबुकला देत्कीन थेकी “खुई ङाला ठाक्पा खिता चाल्सीन ङा ठाक्च्या ओतान आङ प्रभु,” सिन सासुङ। 13 थेकी थोक खाबा थोङगीन येशूकी लाक्पेकी थेला दोइनकामा “ङा खोल्ला ठाक्पा खिओ। लो खो ठाक्स्यीत,” सिन सिदुक। थोक सिराईताङ थे मिते जे तोरगीन थे दाक ठाक्सुङ। 14 थेमे येशूकी थेला “खुई फार छुर गाल्ला दि बात सुङलाङ मासेर याङ। था खो दुरूकी सरासर पूजारी ओत्सादु खोरोङ ठाक्पाते तेन्दाला ग्युक। थेमे थे ओत्सादु गाल्ला मोशेकी टिबाते परमेश्वर नियमला जे खोबाते मिकी ठाक्नामेई च्यि च्यि चढे खिता फाप्क्यो साबा ओते थे परमेश्वरला चढे खि। थोक खानामेई खुई जे ठाक्तुक सिन ज्येनगी छ्या स्येक्यो,” सिन कोत्कीन थेरूई ताङसुङ। 15 थेकी थेला ठाक्पा खाबाते बात सुङलाङ मासेर सासीनोङ थे बात ज्येन मि काल्बेईकी छ्या स्येकीन झन गाङेपा फैले खासुङ। दोक ओङगीन येशूकी लोप्कीन ओताते परमेश्वर बात ङेन्दाला थेमे खोपरोङला खोबाते रोग ठाक्पा खाला नाङ सिराला झन आउदी काल्बेई मि थे ओत्सादु लेपाला स्यूसुङ। 16 तर थेबाताङकामा रूला देत्जीन परमेश्वरला प्रार्थना खिता माङेतेकी प्रार्थना खिताला येशूचेन बेला बेलाला च्यिकराङ पाङगी नाङपा डुइन ओतान। येशूकी कुज्येला ख्याम्बा थुप्च्या जोबाते ( मत्ती ९:१-८ ; मर्कूस २:१-१२ ) 17 थेमे ङीमाई येशू ठाउँज्यीक्तु मिओनला लोप्कीन ओतान। थेरू बात ङेन्कान्तेबे नाङ गालीलताङ यहूदिये अञ्चल गाङेपेकी थेमे यरूशलेम सारदुकी वाबाते फरिसी पाटी मिओनताङ धर्मे गुरूओनोङ ओतान। प्रभु परमेश्वरगी येशूला नाबाते मिओनला ठाक्पा खित्च्येते शक्ति बिन्दा ओतान। 18 थेमे येशूकी ठाक्पा खाला तेरस्यीत सिन ख्याम्बाराङ मुथुप्कानज्यीक कुज्येज्यीकला मिओनगी डोलीला खुरगीन थेरू येशू ओताते खाम्बादु क्याल्सुङ। 19 थेरू मि घुइँचो ओतेकी थेबेकी थेला खाम्बे नाङने थे दोन्दु केला मुथुप्च्या थोङसुङ। थोगी थेबेकी फिनामेईराङ खाईन टापाक लाकने जेकीन च्याकीन खाम्बे छानु टिक्पीस्यिक स्युकीन स्यूक्च्येते ठाउँ जोसुङ। थेमे होथेरूईराङ खाईन थेला र्वातेबेकी खोले खाईन मालज्यामताङराङ थे दोन्दु पाप्सुङ। 20 थेकी ठाक्पा खिता थुप्क्यो सिन थेबेकी थे खोरोङला थोक विश्वास खाबा थोङगीन येशूकी थे कुज्येला “फुज्यो, ङे खुई खाबाते पाप गाङे माफ खाबान,” सिन सिदुक। 21 थेकी थोक सिरजीन थेरू ओताते धर्मे गुरूओनताङ फरिसी पाटी मिओनगीचेन मिकी खाबाते पाप माफ खाबान सिरकान च्यि दि परमेश्वर ईनरो? दिकीनी परमेश्वर विरोध खासुङ। मिकी खाबाते पापनी परमेश्वरगीकामा माफ तेरा थुप्क्यो सिन विचार खिताला स्यूसुङ। 22 थेबे सेमगी बात छ्या स्येकीन थेकी थेबाला “ख्योकोन च्यिला थोकस्यिक विचार खिते? 23 ङे दि मि पाप माफ खाबान सिरजीन ख्योकोनला ङे खेकीकामा दोक साबाच्योक ओङसुङ मेन? च्यि ङे दिला लाला ख्याम ज्युताचेन मुथुबो साबाप? 24 परमेश्वर ओत्सादुई वाबाते मि ङात्ताङ मिओन पाप माफ खित्च्येते अधिकार ओत सिन था ङा ख्योकोनला कामगीराङ खाला तेन्दामीन,” सिनकामा थेकी थे कुज्येला “लो खोक ल्वा थेमे खोरोङ खोन्च्या दिङच्या खुरला खाँपा ग्युक,” सिन सिदुक। 25 थेकी थोक सिराईताङ थे कुज्ये गाङेकी थोङच्या खाईन खोक लासुङ। थेमे थे खोरोङ खोन्च्या दिङच्या खुरगीन परमेश्वरगी थे खोरोङला चुक अचम्ब खाईन ठाक्पा खासुङा सिन परमेश्वरते जय जय खिनकामा खाम्बापा गाल्सुङ। 26 थोक ओङा थोङनामेई थेकी चुक अचम्बज्यीक काम खासुङा सिन छक्क परे खिन मि गाङेकी परमेश्वरते जय जय खासुङ। थेमे थेबा आते खिनकामा “आबिई ङुरूङगी थरिङ चुक अचम्बज्यीक काम थोङसुङा,” सिन सिराला स्यूसुङ। येशूकी लेवीला थे खोरोङ चेला जोबाते ( मत्ती ९:९-१३ ; मर्कूस २:१३-१७ ) 27 दि तिरी येशू थेरूई ज्येननापा गाल्सुङ। डोजीन थेकी कर लिन्कान्ते लेवी सिराते मिला थे खोरोङ अफिसदु देता ओताते थोङसुङ। थेमे थेकी थेला ठेत्कीन “लो खो ङे चेला ओङला ङात्ताङ ख्योम,” सिन सिदुक। 28 थोक सानामेई अफिसदु जेसुकै थोकराङ ताङगीन लेवी खोक लाकीन येशूताङ ख्याम्सुङ। 29 थे तिरी लेवीकी येशूला काताङगीन छ्येज्यीक भोज लै खासुङ। थे छोमु थेकी कर लिन्कान्ते मिओन थेमे ज्येनोङ मि काल्बेईला निम्तो खाबा ओतान। थेबा गाङेराङ साप सेइनराङ ओतान। 30 येशूताङ थे चेलाओन थोक खाला लेवी खाम्बादु साप सेइन ओता थोङगीन कोई कोई फरिसी पाटी मिताङ थे पाटी नाङ धर्मे गुरूओनगी येशू चेलाओनला “ए ख्योकोन गुरूताङ खेतबरी च्यिला दि कर लिन्कान्तेबा थेमे ज्येन पापीओनताङ ङ्योम्बुराङ देत्ला साप सेइते?” सिन सिराला स्यूसुङ। 31 थेबेकी थोक सिरजीन येशूकी थेबाला “नाबाते मिओनलाका डाक्टर गोक्यो, सन्चाराङ ओत्कानलाका च्यि डाक्टर गोकीतेरो? 32 थोगी ङाङ पापीओनला खोपरोङ पापी दुका सिन छ्या स्येला परमेश्वर छ्य्वापा लै खि सिराला वाबाते ईन। धर्मतीतेबाला दोक खि सिराला वाबाते मेन,” सिन सिदुक। येशूकी लोप्च्येतेताङ फरिसी पाटी मिओन बात मिडिगो ( मत्ती ९:१४-१७ ; मर्कूस २:१८-२२ ) 33 थेमे थे फरिसी पाटी मिओनगी येशूला “यूहन्ने चेलाओनताङ फरिसी पाटी मि चेलाओन बेला बेलाला बर्त देत्च्येते थेमे प्रार्थना खित्च्येते खिदुक। खुई चेलाओनचेन च्यिला बर्त मेदेत्का?” सिन ठिसुङ। 34 थोक सिरजीन थेकी “च्यि बेउला खोपरोङ दोन्दु ओत्कीन ओत्कीन फाङमाला वाबाते मिओनला था ख्योकोन तुक्पाराङ देत सिओतरो? 35 था मिओनगी वाला बेउलाला जबरजस्ती फाङमादुकी जुम्ला खेरग्यो। थोक खानामेईचेन फाङमा सार वाबाते मिओन पीरगी खित्सादु तुक्पाराङ देत्क्यो,” सिन सिदुक। 36 थोरूमोङ बात खिन थेकी थेबाला “ख्योकोनगी दि बादोङ ङेन। च्यि सासीन ङिङबाते खोलाकला टालो देपाप सिन साम्बाते खोलाक सुङगीङ मोरोलो। थोक खासुङ सासीन साम्बाते खोलाक दाक ङ्येक्यो। लोक्ला ङिङबाते खोलाकला साम्बाते टालोकोङ सोई मिक्किओ। 37 थेमे सुङगीङ गोमाका छ्याङ ङ्याल्गीन ङिङबा गाल्गीन सिन्दाते कोक्तेन गीउला छ्याङ मोङ्योलो, मेन ओना? थोक खासीन छ्याङ ङाकीन मासिन्दालाराङ गीउ बोङ फोङला छ्याङ छ्याङ नाश डुइओ, गीउ गीउ ङ्येक्यो। 38 थोगी भर्खर लाबाते छ्याङचेन साम्बाते कोक्तेन गीउला लुक्ला ज्य्वाक्यो। 39 थेमे ङाबाते छ्याङ थुङकान्तेबाला कलिलोते छ्याङ गाराङ मालाङो। थेबेकी लेमु खाईन ङाबाते छ्याङराङ स्यीम्बु दुक सिन सिओ। ना चुक ईन्दे?” सिन सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.