लूका 3 - जिरेलयूहन्नेकी थे खोरोङ काम खिताला स्यूबाते ( मत्ती ३:१-१२ ; मर्कूस १:१-८ ; यूहन्ना १:१९-२८ ) 1 रोमी गेल्बो टाइबेरियसकी राज्य खाबाते लो च्युप्स्यी छाङगीन च्याङाला स्यूबा ओतान। थेजीन पन्तियस पिलातस यहूदिये अञ्चलते रोमी गेल्बो हाकिम ओतान। हेरोद गालील अञ्चलदु थेमे थे न्वा फिलिप इतुरियाताङ त्राखोनितिसदु राज्य खिन ओतान। थोकराङ खाला लुसानियासचेन अबिलेनेदु राज्य खिन ओतान। दिबा गाङे रोमी गेल्बो चावादु देत्ला राज्य खित्कान ओतान। 2 थेजीन हन्नासताङ कैयाफा गाङे भन्दा छ्येते पूजारी ओतान। थेमे थे बेलालाराङ परमेश्वरगी थे खोरोङ बात लोप सिन जकरिये फुज्युङ यूहन्नाला थे कामगी जिम्मा बिन्सुङ। थेजीनसाक यूहन्नाचेन रीलाराङ देता ओतान। 3 परमेश्वरगी थे कामगी जिम्मा बिन्नामेई यूहन्ना यर्दन चाङबो फेरोला ठाउँ ठाउँला गाङेपा गाल्गीन परमेश्वर बात लोपाला स्यूसुङ। थेकी मिओनला “मिवे, ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि। थेमे छ्युला लुक्ला तेरच्येते बप्तिस्मा लोङ। थोक खानामेई परमेश्वरगी ख्योकोनगी खाबाते पाप माफ तेरग्यो,” सिन लोप्कीन ओतान। 4 यूहन्नेकी थोक खित्जीन थाङबो परमेश्वर बात खित्कान्ते यशैयेकी टिबाते बात साबा च्योकराङ ओङसुङ। यशैयेकीचेन परमेश्वर बातला चुक सिन टिबा ओताने सासीन “रीला मिज्यीगी छेरा खिनकामा ‘था प्रभु परमेश्वर ओङे बेला लेप्सुङ। थोगी मिवे, थे ओङगो सिन लेमु खाला लाम जो। थे ख्याम्बाला लाम सम्म जो। 5 डाँराताङ डालुमतेबा पुरे खि। गाङे बोमताङ ठाःकओनोङ राम्ला सम्म जो। अप्ठेरोते लामओनोङ ख्याम्बा थुप्च्या जो। 6 थेमे परमेश्वरगी पापताङ दुक्पादुकी चुक खाला डेल्च्या ईन्दाका सिन सा लुङबा खाङगी मि गाङेकी छ्या स्येक्यो,’ सिन सिओ,” सिन टिबा ओतान। 7 यूहन्नेकी लापाते परमेश्वर बात थोकीन ठाउँ ठाउँलेकी आउदी काल्बेई मि छ्युला लुक्ला बप्तिस्मा नाङ सिन थे ओत्सादु ओङाला स्यूसुङ। थेमे यूहन्नेकी थेबाला “छ्यि ख्योकोन ङोचा क्ये मेतातेबा, छ्युला स्यूला बप्तिस्मा लालाकामा परमेश्वरगी था तिरी स्येदाङगी चूर गाल्ला तेरच्येते सजायदुकी थारग्यो सिन खेल्ला सुईचेन सिका? थोक सजिलो खाला थे सजायदुकी माथारो। 8 ख्योकोनगी खेराङ पापी दुका सिन छ्या स्येकीन परमेश्वर छ्य्वापा लै खाबाते बात थेकी खि साबाते ङेन्ला कामगीराङ खाला तेन्दा फाप्क्यो। ख्योकोनबरीचेन ङ्योकोननी अब्राहाम सन्तान ईन्देकी सजाय भोगेराङ खिता माफाबो सिराच्योक खाला छ्ये खिदुक। दि बात ङेन। परमेश्वरगी खिता चाल्सीन ख्योकोन साटोलानी उदेङला ओताते दोईतेराङ अब्राहाम सन्तान ज्वा थुप्क्यो। 9 बरू च्याङबो खि, फलफूल मोगोन्च्येते दोङबो चाप्रेनपाराङ टिलाला था परमेश्वरगी तरी मच्चे खाईन सिन्दा ओत। होथोक्ते दोङबो था गाङे टिल्ला स्येइओ,” सिन सिदुक। 10 थेकी थोक सानामेई थे मिओनगी “थोक ईन्सीन था ङ्योकोनगी च्यि खिता फाबोङा ओना?” सिन ठिजीन 11 थेकी “ख्योकोनगी दोक खि। च्यि सासीन सुइँदाताङ फेङगाक ङि ओत्सीन दोक्पोई ज्येन मेत्कानला बिन। थोकराङ खाला ओत्कान्तेबेकी छ्याःङ मेतातेबाताङ गोला सो,” सिन सिदुक। 12 कर लिन्कान्ते मिओनोङ बप्तिस्मा लिन्दाला यूहन्ना ओत्सादु वाबा ओतान। थेमे थेबेकीङ “गुरू, था ङ्योकोनगीचेन च्यि खिता फाबोङा?” सिन ठिजीन 13 थेकी “नियमगी तोके खाबा भन्दा ल्हाक्पा पैसा लाला मिला ठगे माकेत,” सिन सासुङ। 14 थोकराङ खाईन मिल्टेरीओनगीङ वाकीन थेला “ङ्योकोनगीचेन चुक खिसे याङ?” सिन ठिजीन थेकी “मिला ज्यीबा लाङला थाराङ पैसा माजो, पैसा ज्वाप लाईदु थाराङ दोष लै खाला सुङलाङ दुक्पा मातेर। खेराङ जागिरला सन्तो खाला देत,” सिन सिदुक। 15 दोक खाला बात खित्कान्ते यूहन्ना सु ईन्ताका ना थेराङ परमेश्वरगी तोङगो साबाते ख्रीष्ट ईन्ताका सिन मि गाङेकी विचार खिताला स्यूसुङ। 16 थे बात छ्या स्येकीन यूहन्नेकी “ङानी ख्रीष्ट मेन। थेनी थाका ओङगीन ओत। थेचेन ङा भन्दा खापान खापान छ्ये ईन। सिइराङ सासीन ङानी थे योक्पो ओङला काचाप टोल्ला तेरालाङ सोई मिक्किओ। ङा खालि ख्योकोनला छ्युलाकामा लुक्ला बप्तिस्मा तेरग्यो। थेकीचेन ख्योकोनला परमेश्वर आत्मा तेरच्येतेताङ मेला लुक्ला न्याय खित्च्येते काम ङिकाराङ खिओ। 17 थेत्ताङ ग्यालोक ओत। था थेकी ठा टाप्ला गेडा जति जोतनामा ज्य्वाक्यो। फुङमाचेन नोमुङ सेता मुथुप्च्येते मे नाङमा लुक्ला स्येइओ,” सिन सिदुक। 18 होदोक्ते बात ज्येनोङ काल्बेई खिन यूहन्नेकी मिओनला परमेश्वर छ्य्वापा लै खि थेमे थेकी ख्योकोनला पापताङ दुक्पादुकी डेल्ग्यो सिन गा लाङच्येते बात लोप्कीन ओतान। 19 थेमे थेकी गालील अञ्चलदु राज्य खित्कान्ते हेरोदला “खुई खिता मेङच्येते काम खाला दुक। दोक खिता थोङ,” सिन सासुङ। च्यिला सासीन हेरोदकी थे खोरोङ न्वाते फेम्मे हेरोदियास खुलाबा ओतान। थेमे ज्येनोङ मेलेबाते काम काल्बेई खिन ओतान। 20 दोस्यिककामा मेन, यूहन्नेकी थोक खाईन ङारनामेई थेकी झन स्येदाङगी थेला जेलला लुक्सुङ। येशूकी बप्तिस्मा लाबाते ( मत्ती ३:१३-१७ ; मर्कूस १:९-११ ) 21 थे खोरोङला जेलला लुबा भन्दा गोमा बप्तिस्मा नाङ सिन ओङकान्ते मि गाङेला यूहन्नेकी छ्युला लुगीन बप्तिस्मा बिन्सुङ। थेमे येशूङ बप्तिस्मा लिन्दाला वानामेई थेकी थेलाङ बप्तिस्मा बिन्सुङ। 22 बप्तिस्मा लानामेई येशूकी परमेश्वरला प्रार्थना खिते बेलाला स्वर्गे गो फेत्सुङ। थेमे थेनेकी परमेश्वर आत्मा गन्दीमा च्य्वाबेई गाल्गीन वाकीन येशू लाक्तु फाप्सुङ। थेमे स्वर्गनेकी “फुज्यो, ङा खोल्ला आउदी ङिङज्ये खिओ। ङा खोत्ताङ आउदी खुशी ओत,” सिन परमेश्वरगी साबाते बात थोसुङ। येशू ज्युज्यु पुर्खे मिन ( मत्ती १:१-१७ ) 23 येशू परमेश्वर बात लोप्च्येते काम खिताला स्यूक्जीन लो खालज्यीकताङ च्युताम्बे नाङपा ओतान। मिओनगीचेन थेला यूसुफ फुज्युङ ईन सिन ओतान। थेमे यूसुफचेन एली फुज्युङ ओतान। 24 थेमे एली आबा मत्तात, मत्तात आबा लेवी, लेवी आबा मल्की, मल्की आबा यान्ना, यान्ने आबा यूसुफ, 25 यूसुफ आबा मत्ताथियास, मत्ताथियास आबा आमोस, आमोस आबा नहूम, नहूम आबा इसली, इसली आबा नग्गै, 26 नग्गै आबा माथ, माथ आबा मत्ताथियास, मत्ताथियास आबा सेमैन, सेमैन आबा योसेख, योसेख आबा योदा, 27 योदे आबा योआनन, योआनन आबा रेसा, रेसे आबा यरुबाबेल, यरुबाबेल आबा शालतिएल, शालतिएल आबा नेरी, 28 नेरी आबा मल्की, मल्की आबा अद्दी, अद्दी आबा कोसाम, कोसाम आबा एलमादम, एलमादम आबा एर् 29 एर्गी आबा यहोशू, यहोशू आबा एलीएजर, एलीएजर आबा योरीम, योरीम आबा मत्तात, मत्तात आबा लेवी, 30 लेवी आबा शिमियोन, शिमियोन आबा यहूदा, यहूदे आबा यूसुफ, यूसुफ आबा योनान, योनान आबा एल्याकीम, 31 एल्याकीम आबा मलेयाह, मलेयाहे आबा मिन्ना, मिन्ने आबा मत्ताथा, मत्ताथे आबा नातान, नातान आबा गेल्बो दाऊद, 32 गेल्बो दाऊद आबा यिशै, यिशै आबा ओबेद, ओबेद आबा बोअज, बोअज आबा सल्मोन, सल्मोन आबा नहशोन, 33 नहशोन आबा अम्मीनादाब, अम्मीनादाब आबा आराम, आराम आबा हेस्रोन, हेस्रोन आबा पेरेस, पेरेस आबा यहूदा, 34 यहूदे आबा याकूब, याकूब आबा इसहाक, इसहाक आबा अब्राहाम, अब्राहाम आबा तेरह, तेरहे आबा नाहोर, 35 नाहोर आबा सरूग, सरूग आबा रऊ, रऊ आबा पेलेग, पेलेग आबा एबेर, एबेर आबा शेलह, 36 शेलहे आबा केनान, केनान आबा अर्पक्षद, अर्पक्षद आबा शेम, शेम आबा नूह, नूहे आबा लेमेख, 37 लेमेख आबा मतूशेलह, मतूशेलहे आबा हनोक, हनोक आबा येरेद, येरेद आबा महलालेल, महलालेल आबा केनान, 38 केनान आबा एनोश, एनोश आबा शेत थेमे शेतकी आबाचेन आदम ओतान। आदमलाचेन परमेश्वरगीराङ जोबा ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.