लूका 23 - जिरेलयेशूला पिलातस दोन्दु क्यालाते ( मत्ती २७:१-२ , ११-१४ ; मर्कूस १५:१-५ ; यूहन्ना १८:२८-३८ ) 1 थोक ओङगीन सिन्नामेई थेरू जम्मा ओङाते छ्ये छ्ये मि गाङेराङ लासुङ। थेमे थेबेकी येशूला रोमी गेल्बो हाकिम पिलातस ओत्सादु क्याल्सुङ। 2 थेरू क्याल्नामेकी थेबेकी येशूला ईनराङ मेन्दाते दोष लै खिनकामा पिलातसला “दिकी ङ्योकोन जातकी मिला लुकीन थे खोरोङ छ्य्वापा लै खित च्युत्सुङ। रोमी गेल्बोला ज्येला फाप्च्येते तिरोङ ज्येला माफाबोत्लो। दोस्यिककामा मेन, दिकी दि खोरोङराङ परमेश्वरगी तोङगो साबाते ख्रीष्ट ईनलो। थोगी दिराङ गेल्बो ईनलो,” सिन सासुङ। 3 थेबेकी थोक सानामेई पिलातसकी येशूला “यहूदीओन गेल्बो खोराङ ईनना?” सिन ठिसुङ। थोक सिरजीन येशूकी “ङा थेराङ ईन सिन खुईराङ सासुङ” सिन सिदुक। 4 थेमे छ्ये छ्ये पूजारीताङ थेरू जम्मा ओङाते ज्येन ज्येन मिला पिलातसकी “दिला च्यि सजाय तेरच्ये? ङेनी दिकी छ्याःङ गल्ती खाबा माथोङसुङ,” सिन सिदुक। 5 थेकी येशूकी छ्याःङ गल्ती खाबा माथोङसुङ सिन सिरजीन थेबेकी “च्यिला मेन्दे? दिकीनी ङ्योकोन जातकी मि गाङेला दि खोरोङ बात लाप्कीन उल्के खाईन सिन्सुङ। गालील अञ्चलदुकी दि खोरोङ बात लोपाला शुरू खाईन यहूदिये अञ्चल खाङ युगीन दि दिस्साक ख्योल्गीन सिन्सुङ,” सिनकामा छेरा खिताला स्यूसुङ। येशूला हेरोद गेल्बो ओत्सापा ताङाते 6 येशूकी गालील अञ्चलदुकी थे खोरोङ बात लोपाला स्यूबाते ईन सिरा थोकीन पिलातसकी थेबाला “दि मि गालीलपेते ईनना?” सिन ठिजीन थेबेकी ईन सिन सिदुक। 7 येशू हेरोदकी राज्य खित्च्येते अञ्चलदुते दुका सिन छ्या स्येनामेई था हेरोदकी च्यि सिरच्या ईन्दाका सिन पिलातसकी येशूला थे ओत्सापा केल ताङसुङ। थे बेलाला हेरोदोङ यरूशलेमदुराङ ओतान। 8 येशूला थे खोरोङ ओत्सादु क्याल्नामेकी हेरोद आउदी खाईन गा खासुङ। च्यिला सासीन थेकी खाबाते कामताङ बातओन गोमामेईराङ थोबा ओतेकी थेला पालोई येशूला ठेता ङेत्सीन ओङच्या ओतान सिराच्योक लाबा ओतान। थेमे थेकी थेरू खइँदा अचम्बते काम खिता सिन आश खाबा ओतान। 9 थेमे थेकी येशूला बात काल्बेई ठिसुङ। तर येशूकीचेन थेला बातज्यीगोङ माक्यासुङ। 10 छ्ये छ्ये पूजारीताङ धर्मे गुरूओनोङ थेरू लेपा ओतान। थेमे थेबेकी थेरूङ दिकी दोक दोक मेलेबा खासुङ सिन येशूला दोष लै खितासम्म खासुङ। 11 थेमे हेरोदताङ थे मिल्टेरीओनगीङ थेला खाला थेन्दा जति मनपरी साकीन सिन्नामेई गेल्बो सिन खिस्यी खिताला आउदी लेमुते लाक्तु खोन्च्येते खोलाक कोन्गीन याङराङ पिलातस ओत्सापाराङ ताङसुङ। 12 थे छोमुमेईराङ हेरोदताङ पिलातस ङिकाराङ डिक्सुङ। थेस्साक थेबा ङिबो बान्दा डिगीन मेतान। पिलातसकी येशूला सेत्च्येते हुकुम बिन्दाते ( मत्ती २७:१५-२६ ; मर्कूस १५:६-१५ ; यूहन्ना १८:३९-१९:१६ ) 13 येशूला थे खोरोङ ओत्सादु क्याल्नामेकी पिलातसकी छ्ये छ्ये पूजारी, यहूदीओन छ्ये छ्ये मि थेमे ज्येन ज्येनोङ यहूदीला रूसुङ। 14 थेमे थेकी थेबा गाङेला “ख्योकोनगी दि मिकी दि खोरोङ बात लाप्कीन खेराङ जातकी मिला उल्के खित च्युत्सुङ सिन ङा ओत्सादु खुलाबा ओतान। ख्योकोनगी साबाच्योक दिकी खाबाते ईन्दाकाना मेन्दाका सिन ख्योकोन दोन्दुराङ ङे दिला ठिबाप। ठिजीन ङेनी दिकी छ्याःङ गल्ती खाबा माथोङसुङ। 15 हेरोद ओत्सापा तोङजीन थेकीङ दिते छ्याःङ गल्ती माथेप्तुक। दिते खइँदा गल्ती थेपा ईन्सीन छ्याःङ मिसिरा खाला दिला याङराङ ङा ओत्सापा ग्युरला तोङच्या मेतान। थोगी दिला सेता फाप्च्येते दिकी छ्याःङ गल्ती खाबा मिन्दुक। 16 ईन्सीनोङ ङा दिला कोर्रा लै खित च्युत्ला तोङामीन,” सिन सासुङ। 17 थेमे बातज्यीक च्यि सासीन जेलदु ज्याक्पाते मिज्यीकला लोई ठाङमा निस्तार चाडगी बेलाला तोङच्ये चलन ओतान। थोगी दि पालोङ पिलातसकी मिज्यीकला तोङा फाप्च्या ओतान। 18 थेमे पिलातसकी येशूला तोङच्ये बात खित्जीन थेरू ओताते मिबरीकी “नाइँ ओङराङ मेङगो। दिलानी सेताराङ फाप्क्यो। बरू जेलदुकी बारब्बाला थोङ,” सिनकामा छेरा खासुङ। 19 बारब्बेकीचेन सारदु गोलमाल लाङगीन मि सेता ओतान। थोगी थेला जेलदु लुक्पा ओतान। 20 थेबेकी थोक खाईन छेरा खासीनोङ पिलातसकीचेन येशूला तोङा चाल्गीन “दि मिकी छ्याःङ गल्ती खाबा मिन्दुक। बरू ङा दिलाराङ तोङामीन,” सिन थे मिओनला ल्वा चाल्सुङ। 21 तर थे बात ङेनराङ मेङेन्दा खाईन थेबेकी “दिला सेताराङ फाप्क्यो। दिला स्यिङगी थामला टाँए खाला सेत,” सिन झन कस्स्ये खाईन छेरा खासुङ। 22 थोक खित्जीन पिलातसकी “ख्योकोन च्यिला दोक खाला छेरा खिते? दि मिकी च्यि मेलेबा काम खाला दुकारो? ङेनी दिला सेता फाप्च्येते दिकी छ्याःङ गल्ती खाबा माथोङसुङ। ङा दिला कोर्रा लै खित च्युत्ला तोङामीन,” सिन लोक्लाङ ल्वा चाल्सुङ। 23 तर थेबेकी थे बातला नामज्योकराङ मेसेता खाईन “दि बात ओङराङ मेङगो। दिला स्यिङगी थामला टाँए खाला सेत,” सिनकामा झन मिताराङ खाच्या खाला छेरा खिन फिराला स्यूसुङ। थोक खाईन पिलातसते छ्याःङ लै माक्यासुङ। 24 थेमे थेकी था दि मिओनगी साबाच्योक माक्याबाला मेङच्याक्वा सिन छ्या स्येकीन येशूला सेत्च्याराङ खासुङ। 25 थोगी थेकी थे मिओनगी थोङ साबाते सारदु गोलमाल लाङला मि सेत्कान्ते बारब्बाला जेलदुकी ताङसुङ। थेमे थेबेकी खि साबा च्योकराङ खाईन येशूलाचेन स्यिङगी थामला टाँए खाला सेत्च्येते हुकुम बिन्सुङ। येशूला स्यिङगी थामला टाँए खाबाते ( मत्ती २७:३२-४४ ; मर्कूस १५:२१-३२ ; यूहन्ना १९:१७-२७ ) 26 थेमे मिल्टेरीओनगी येशूला सेताला खेरसुङ। लामला डुइन डुइनला थेबेकी युलनापेई सारनापा ओङगीन ओताते शिमोन सिराते मिला ठेत्सुङ। थेचेन साइरेनीपे मि ओतान। थेमे मिल्टेरीओनगी थेलाराङ जुम्गीन येशूला टाँए खाला सेत्च्येते स्यिङगी थाम कुरगीन येशू तिरी तिरी ख्याम च्युत्सुङ। 27 मि आउदी काल्बेई येशू तिरी तिरी ख्याम्बा ओतान। थेकी थोक दुक्पा भोगे खाला स्या फाप्च्या थोङगीन थोक खाईन ख्याम्बाते मिओन नाङ फेम्मे मि काल्बेई झ्याउँ झ्याउँ ङुइन ओतान। 28 थेबेकी थोक खित्जीन थेबा ओत्सापाला ग्युरगीन येशूकी “यरूशलेम फेम्मे मिवे, ख्योकोन ङे लाईदु दोक खाला माङु। बरू खेराङ लाईदु थेमे खेराङ फिजाओन लाईदु पीर खि। 29 च्यिला सासीन था आउदी दुक्पा भोगे खिता फाप्च्येते समय ओङगो। थेजीन मिओनगी ‘र्वाकोन थारीमाओन चुक भाग्यमानी ईन्दाका। नोमुङ फिजा माकेला नुमा तेरा माफाप्कान्तेबा र्वाकोनला साँच्चीराङ चुक लेमु ईन्दाका,’ सिन सिओ। 30 थे बेलाला मिओनला आउदी दुक्पा ओङला थेबेकी ‘बरू दि ठाःकताङ बोमओनराङ राम्गीन वाकीन ङ्योकोनला उप्कीन सेत्सीनोङ ओङच्या ओतान,’ सिओ। 31 थोगी सोम्बोते दोङबोलानी टिल्नामेकी च्यि काम्गीन सिन्दाते दोङबो झन मिटिलोतरो? दाक टिल्ला स्येइओ,” सिन सिदुक। 32 मिल्टेरीओनगी डाँका मेन्दा ङिलाङ सेताला येशूताङराङ टीबा ओतान। 33 थेबाबरी खप्पर सिरसादु ख्योल्नामेई मिल्टेरीओनगी येशूला लाक्पा काम्बाला काँटी ग्याप्कीन स्यिङगी थामला टाँए खाईन लाङसुङ। थेमे डाँका ङिबोलाङ येशूला च्योकराङ खाईन थे फारताङ छुरला स्यिङगी थाम रेरेला टाँए खासुङ। 34 थोक खानामेई येशूकी “आबा, ङाला दोक खित्कान गाङेला माफ बिन। ङाला दोक खाबाते च्यि खाबाते ईन्दे सिन दिबेकी खोबा मिन्दुक,” सिन प्रार्थना खासुङ। येशू खोलाकचेन थे मिल्टेरीओनगी सु सुला खाङ खाङ फाप्च्या ईन्दाका सिन चिट्ठा ग्याप्कीन गोकीन खासुङ। 35 थेरू ताप्ला वाबाते मिओनचेन थोक थोक ओङाते गाङे तेइनराङ ओतान। यहूदीओन छ्ये छ्ये मिकीचेन खोल्ला ठोकस्यिङ सिराच्योक खिन “दिला तोना, दिकी ज्येन ज्येनलानी सोन्दा खासुङ। लो था दि परमेश्वरगी छाने खाईन तोङगो साबाते ख्रीष्टराङ दुका सासीन थे खोरोङला चुक खाला सोन ज्युत्च्या ईन्दाका, तेइना ओना,” सिन सासुङ। 36 थेमे मिल्टेरीओनगीङ खिस्यी खिन थे खानापा किर्बुते छ्याङ केल्गीन 37 “या या थुङ। खो पक्काराङ यहूदीओन गेल्बो ईन्सीन स्यिङगी थामदुकी साला फाप्ला स्योक,” सिन सासुङ। 38 स्यिङगी पाटीज्यीकला “दि यहूदीओन गेल्बो ईन” सिन टिकीन थे गोःकी तेङने ठोके खाईन ज्याक्पा ओतान। 39 थे दोन्दुराङ टाँए खाबा ओताते डाँकाज्यीगीङ “परमेश्वरगी तोङगो साबाते ख्रीष्ट च्यि खोराङ मेनरो? लो था खो स्यिङगी थामदुकी साला फाप्ला खोरोङला सोन्दा खि। थेमे ङ्योकोनलाङ सोन्दा खि,” सिन खाला थेन्दा जति मनपरी सासुङ। 40 थेकी थोक खित्जीन थे र्वातेकीचेन थेला “ए खो थोक मासेर। था स्या बेलाला च्यि खोल्ला थोरूमोङ परमेश्वरताङ ज्यीबा मालाङदुक? खोल्ला च्योकराङ दिलाङ स्यिङगी थामला टाँए खाईन सजाय बिन्ला दुक। 41 दोक ईन्सीनोङ ङुरूङला दोक खाबातेनी ठीकराङ ओत। च्यिला सासीन दि सजाय ङेत्च्येते गल्ती ङुरूङगी खाबा ओत। तर दिकीनी छ्याःङ गल्ती खाबा मेत,” सिन ङारसुङ। 42 र्वातेला थोक साकीन च्याकीन थेकी येशूला “ए येशू, खो गेल्बो ओङगीन राज्य खिताला स्यूनामेई ङालाङ सम्झे खि,” सिन सासुङ। 43 येशूकीचेन थेला “खो ज्यीबा माकेत। खो थरिङमेईराङ ङात्ताङ स्वर्गने देता ङेत्क्यो,” सिन सिदुक। येशू स्याप्ते बात ( मत्ती २७:४५-५६ ; मर्कूस १५:३३-४१ ; यूहन्ना १९:२८-३० ) 44-45 थेजीनसाकला ङीम्मु बाह्र बजे खिता खाबा ओतान। थेमे होथोजो बेलामेकी ङीमे नाम्दाक तोरगीन तीन बजेसाक लुङबा खाङ मुन्दाक जिङी गाल्सुङ। थेमे परमेश्वर मन्दिर नाङदु क्योराते पर्दा ईनेकी मिमासाकराङ टुक्रा ङि गाल्गीन राल्सुङ। 46 थेमे येशूकी कस्स्ये खाईन “आबा, ङा ङे आत्मा खुई लाःक्तुराङ सोम्पे खिओ,” सिन साकीन ग्याङ स्यिसुङ। 47 थे स्यिजीन थेरू चुक चुक ओङसुङा सिन थे मिल्टेरी क्याप्टेनगीङ थोङसुङ। थेमे थेकी “दि मि साँच्चीराङ मेलेबा मि मेन्दाक्वा,” सिन परमेश्वरला छ्ये जोसुङ। 48 थेरू तार ओङकान्ते मि गाङेकी थेरू चुक चुक ओङसुङा, येशू चुक खाईन स्यिसुङा सिन गाङे थोङसुङ। थेमे थेबा गाङेराङ ज्यीबा खिन आबिई थरिङ च्यि ज्यीबा लाङच्या ओङसुङा सिन बात खिन खाम्बा खाम्बाला ग्युरगीन गाल्सुङ। 49 थेमे गालीलपेकी येशूताङ ङ्योम्बुराङ वाबाते फेम्मे मिओन थेमे ज्येनोङ थेला लेमु खाला ङो स्येकान्ते मिओनचेन थेला च्यि च्यि ओङच्या ईन्दाका सिन आदो थारीला देत्ला तेइन ओतान। येशूला सासगास खाबाते ( मत्ती २७:५७-६१ ; मर्कूस १५:४२-४७ ; यूहन्ना १९:३८-४२ ) 50-51 थेजीन यरूशलेमदु यूसुफ सिराज्यीक मि ओतान। थेचेन यहूदिये अञ्चलदु फाप्च्येते अरिमाथिया सिराते सारगी मि ओतान। यहूदीओन छ्ये छ्ये मि नाङ थेङ दोक्पोई ओतान। परमेश्वरगी खि साबाते ङेन्कानज्यीक थे लेमु मि ओतान। ज्येन छ्ये छ्ये मि गाङेकी येशूला सेता फाप्क्यो सिन पिलातस ओत्सापा खेरजीन थेचेन थेबाताङ बान्दा माडिक्सुङ। था परमेश्वर राज्य नाम ओङगीताका सिन थे गुकीनराङ देता ओतान। 52 येशू स्याप्ते थाहा छ्येत्नामेई थेकी पिलातस ओत्सादु गाल्गीन थे रो खेरा नाङ सिन बिन्ती खासुङ। 53 थेमे थेकी येशू रोला स्यिङगी थामदुकी थेन्गीन कार्मुते खोलाककी ठील्गीन फुकज्यीक्तु खेरगीन ज्याक्सुङ। स्याप्ते मि ज्य्वाबाला सिन ठाःक ठुकीन थे फुक जोबा ओतान। थे नाङ गोमा सुङगीङ रो ज्याक्पा मेतान। 54 दि बात गाङे स्वारी छोमु ओङाते ईन। येशूला सासगास खाला सिन्केसाकला नामोङ स्योबा स्योबा खाबा ओतान। 55 गालीलपेकी येशूताङ ङ्योम्बु वाबाते फेम्मे मिओनगीङ यूसुफताङ गाल्गीन येशू रो फुकदु ज्याक्पाते थोङा ओतान। 56 थे तिरी थे फेम्मे मिओन सारनापा ग्युरगीन गाल्सुङ। थेमे थे रोला कुताला सिन स्यीम्बुई बास्ना चले खित्च्येते पाउडरताङ मोर्गु ठीकठाक खासुङ। सन्चारी छोमुचेन थेबेकी परमेश्वर नियमला साबा च्योकराङ फार छुर छ्याःङ मिक्किता खाईन देत्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.