लूका 22 - जिरेलयेशूला सेताला ठो खाबाते ( मत्ती २६:१-५ ; मर्कूस १४:१-२ ; यूहन्ना ११:४५-५३ ) 1 थेमे सोडा मुलुबा खाला स्योबेन स्येला साच्येते चाड लेपा खाबा ओतान। थे चाडलाचेन निस्तार चाड सिनोङ सिरच्येते खिन ओतान। 2 थे बेलालाराङ छ्ये छ्ये पूजारीताङ धर्मे गुरूओनचेन चुक खाला मि सुङगीङ थाहा मेङेता खाला येशूला जुम्ला सेता थुबोङा सिन मौका तेइन ओतान। मिओन ज्यीबेकी थेबेकी थेला थोक खाला खाराक्पा सेता छोल्गीन ओतान। यहूदा इस्करियोतकी चुक खासुङा ( मत्ती २६:१४-१६ ; मर्कूस १४:१०-११ ) 3 थेमे येशू चेला च्युन्ङी नाङ यहूदा इस्करियोत सिराते सेमगी नाङ शैतान स्यूसुङ। 4 थोगी थे छ्ये छ्ये पूजारी थेमे परमेश्वर मन्दिरदु देत्कान्ते पुलिसते छ्ये छ्ये मि ओत्सादु ठो खित गाल्सुङ। थेकी येशूला थेबे लाःक्तु सोम्पे खिता थुप्क्यो सिन बात खासुङ। 5 थे बात थोकीन थेबाला आउदी गा लासुङ। थोक खासीन थेला थेबेकी पैसा तेरग्यो सिन सासुङ। 6 थेबाताङ ठो खाईन गाल्नामेई थेकी था च्यि छोमु सुङ मिकी थाहा मेङेता खाला येशूला जिन ज्युता थुप्कीका सिन मौका तेइनराङ देत्सुङ। निस्तार चाडगी भोज ठीकठाक खाबाते ( मत्ती २६:१७-१९ ; मर्कूस १४:१२-१६ ) 7 थेमे सोडा मुलुबा खाला स्योबेन स्येला साच्येते चाड ख्योला ओतान। थे चाडगीते गोमे छोमु निस्तार चाड माने खिताला लुई रीउ सेता फाप्कीन ओतान। 8 थेमे येशूकी पत्रुसताङ यूहन्नाला “लो ख्योकोन ङिबो गोमा गोमा ग्युक। थेमे दाक्पोनला निस्तार चाडगी भोज ठीक खि,” सिन सिदुक। 9 थोक सिरजीन थेबा ङिबोकी “ङ्योकोनगी खापा गाल्ला भोज ठीक खिसे गुरू?” सिन ठिसुङ। 10 थेमे थेकी थेबाला “दुरूकी सारनापा ग्युक। सारदु लेप्नामेई ख्योकोन ङिबोकी गरीला छ्यु खुरला डुइन ओताते ख्योओ मिज्यीकला ठेत्क्यो। ख्योकोन थे मि तिरी तिरी गाल्ला थे खाङ खाम्बादु स्यूइका थेरूराङ स्यू। 11 थेमे थे खाम्बे धनीला ‘गुरूताङ ङ्योकोन देत्ला निस्तार चाडगी भोज साच्येते कोठा खाङ ईन्देलो सिन गुरूकी खोल्ला ठिलो,’ सिन सि। 12 थेमे ख्योकोनला थेकी देताला जेसुकै ठिक्क ओताते ताले लाकने जोदाज्यीक कोठा तेन्ला तेरग्यो। भोज साप्ला जेसुकै ख्योकोनगी थेरूराङ ठीक खि,” सिन थेरूकी ताङसुङ। 13 डोजीन थेबा ङिबोकी येशूकी साबा च्योकराङ खाईन मिओन ठेत्कीन गाङे बात थेकी साबा च्योकराङ ओङसुङ। थोक खाईन थेबेकी भोज साप्ला जेसुकै ठीकठाक खासुङ। येशूकी प्रभु भोज साच्येते शुरू खाबाते ( मत्ती २६:२०-३० ; मर्कूस १४:१७-२६ ; १ कोरिन्थी ११:२३-२५ ) 14 थेमे साप साच्ये बेला लेप्नामेकी येशू थे खोरोङगी खटे खाबाते चेलाओन गाङेताङ साप साप्ला देत्सुङ। 15 थेमे थेकी थेबाला “दुक्पा भोगे खाला स्याप भन्दा गोमा ख्योकोनताङ ङ्योम्बुराङ देत्ला दि निस्तार चाडगी भोज साप्ला ङे आउदी सेम खाबा ओतान। 16 ङा ख्योकोनला दि बात सिओ। च्यि सासीन तिरी परमेश्वर राज्यदुकामा ङा याङराङ दि भोज सेइओ। दि भोज साबाच्योक खाला साच्येतेचेन थेजीनकामा ईन,” सिन सिदुक। 17 थेमे अंगूर छ्याङ लुक्पाते कचौराज्यीक लाःक्तु लाकीन थेकी थे लाईदु परमेश्वरला धन्यवाद बिन्सुङ। थेमे “लो या, दि अंगूर छ्याङ पालो खाला थुङ। 18 परमेश्वर राज्य पूरो मायाङथुप ङाचेन याङराङ अंगूर छ्याङ मुथुङो,” सिनकामा चेलातेबाला थे थुङा बिन्सुङ। 19 थोकराङ खाईन थेकी स्योबेनज्यीक लाःक्तु लासुङ। थेमे थे स्योबेन लाईदु परमेश्वरला धन्यवाद बिन्गीन सिन्नामेई थे च्याक्ला थेबाला तेरगीनकामा “दि ङे जीउ ईन। ङा ख्योकोन लाईदु ङाराङ ज्यानराङ बिन्ला स्यिइओ। ङा ख्योकोन लाईदु स्याप्ते बात सम्झे खिताला ख्योकोनगीङ बेला बेलाला दोक खाला स्योबेन च्याक्ला साच्येते खि,” सिन सिदुक। 20 थेमे साप सोनामेकी गोमा स्योबेन च्योकराङ खाईन अंगूर छ्याङ लुक्पाते कचौरा लाःक्तु लाकीन “दिचेन परमेश्वरगी मिओनताङ तिरी खिओ साबाते जमान ईन। ख्योकोन लाईदु स्यिजीन ङे जीउदुकी थेन्दाते ठागीराङ दि जमान पूरो खित्च्येते ईन। 21 थेमे बातज्यीक च्यि सासीन ङाला धोका तेरकान्ते मिकीङ दुरू थाल्ला ङात्ताङराङ ङ्योम्बु देत्कीन साप सोबा ओत। 22 परमेश्वर ओत्सादुई वाबाते मि ङानी ङाराङला ओङगो साबा ओता च्योकराङ खाला स्यापराङ फाप्क्यो। थोक ईन्सीनोङ ङाला धोका तेरकान्ते मिकी ज्यीबा लाङच्याई सजाय ङेत्क्यो,” सिन सिदुक। 23 थेकी थोक सानामेई चेलातेबाचेन “गुरूला थोक खित्कान्ते सु ईन्ताका? ङुरूङ नाङ सुई थोक खाओङा?” सिन खोपरोङ नाङ बात खिताला स्यूसुङ। येशू चेलातेबे नाङ थोम्मु स्योराते ( मत्ती २०:२५-२८ ; मर्कूस १०:४२-४५ ) 24 थेमे चेलातेबेते खोपरोङ नाङ सु छ्ये ईन्दे सिरच्येते बातला थोम्मु स्योरसुङ। 25 थेबा थोक खिता थोङजीन येशूकी थेबाला “लुङबा लुङबे गेल्बोओनगी जनताला लेमु मेलेबा चुक ओङगीते सिन विचार मिक्किता खाला खोपरोङ खुशीकीकामा राज्य खिओ। गेल्बो चावादु छ्ये छ्ये मिकीङ गेल्बोओनगी खाबा च्योकराङ खिओ। थेबेकी जस्तो खासीनोङ जनतेकीचेन थेबेकी लेमुराङ खिदुक सिन सिरा फाप्क्यो मेन? 26 तर ख्योकोनगीचेन थे गेल्बोओनगी खिताच्योक माकेत। ख्योकोन नाङ छ्येतेकी ज्येनला दुक्पा मेतेरा खाला थे खोरोङराङ ज्येनगी कोताते ङेन्कान्ते मि च्योक ओङा फाप्क्यो। थेमे ख्योकोन नाङ ज्येनला कोत्कान्ते मिकीङ सुइँदे खाम्बादु काम खित्कान्ते मि च्योक ओङला काम खिता फाप्क्यो। 27 लो ख्योकोन सिते। डोम्बो छ्ये ईन्दाना डोम्बोला साप थुङा जोला तेरकान्ते मि छ्ये ईन्दे? च्यि डोम्बोराङ छ्ये मेनरो? बात दोक ईन्सीनोङ ङानी ख्योकोन नाङ ख्योकोन काम खित्कान्ते च्योक ओङलाका काम खिन ओत। 28 थेमे ख्योकोनचेन सधैँ ङात्ताङ ङ्योम्बुराङ देत्सुङ। ङे दुक्पा भोगे खिता फाप्जीन ख्योकोन ङाला ताङगीन मागाल्सुङ। 29 आबेकी ङाला राज्य खित्च्येते अधिकार बिन्दा च्योकराङ था ङाङ ख्योकोनला राज्य खित्च्येते अधिकार तेरग्यो। 30 थोगी ङा गेल्बो ओङगीन राज्य खिताला स्यूनामेई ख्योकोनचेन ङे राज्यदु देत्ला भोज सा ङेत्क्यो। थेमे गेल्बो देत्च्येते सिंहासन लाक्तु देत्ला ख्योकोनगी इस्राएलीओन थर च्युन्ङीला राज्य खाला न्याय खिओ,” सिन सिदुक। येशूकी पत्रुसकी थे खोरोङला चुक खिते सिन साबाते ( मत्ती २६:३१-३५ ; मर्कूस १४:२७-३१ ; यूहन्ना १३:३६-३८ ) 31 थेमे येशूकी शिमोन पत्रुसला “शिमोन, खो च्याङबो खाला देत। ङे छ्य्वापेई डेलाला शैतानगी ख्योकोन गाङेला ल्वा छोल्ग्यो। थेकी दोक खित्च्येतेनी टाप्ला ठाताङ फुङमा डेल्च्येते च्योक ईन। ख्योकोनगी ङाला खित्च्येते विश्वास खजो पक्का दुका सिन ताप्ला परमेश्वरगी शैतानला थोक खासीन ओङगो सिन सिदुक। 32 तर ज्यीबा माकेत शिमोन। शैतानगी लुजीन खुई ङाला विश्वास खिता मोतोङस्यीत सिन ङे परमेश्वरला प्रार्थना खाबाप। था खोरोङ याङराङ ङे छ्य्वापा लै खानामेई दुरू खोरोङताङ ओताते आज्यो न्वाओनला ङाला विश्वास खिन देताला आँट बिन,” सिन सिदुक। 33 थेकी थोक सिरजीन पत्रुसकीचेन “प्रभु, च्यि ङे थोक खाओङ साबाप? ङानी खोत्ताङ जेलला ड्वाप्लानी च्यि स्याप्ला समेदोङ ज्यीबा मिक्किओ,” सिनकामा फिरसुङ। 34 थोक खित्जीन येशूकी थेला “पत्रुस, खो दोक खाला छ्ये माकेत। थरिङ ग्वाका था ङोमु पाखे छ्योबो फोत फोतसाकला पालो सुम ज्येन मि दोन्दु खुई ङाला ङोराङ मेस्येओ सिन सिओ,” सिन सिदुक। येशूकी चेलातेबाला च्याङबो खाला देत साबाते 35 थेमे थेकी चेलातेबाला “परमेश्वर बात लोप तोङजीन ङे ख्योकोनला पैसे थैली, साच्या थुङच्या लुबाप सिन झोला थेमे काचापोङ मुखुरा खाला ग्युक सिन ताङा ओतान। दोक खाला डोजीन च्यि ख्योकोनला साप थुङा मादाङगीन खइँदा दुक्पा ओङा ओतान?” सिन ठिसुङ। थेमे चेलातेबेकी “ङ्योकोनला छ्याःङगीङ दुक्पा ओङा मेतान,” सिन सिदुक। 36 थेमे थेकी “थाचेन बात गोमा च्योकराङ मेन। ख्योकोनगी खेराङ पैसे थैलीताङ साच्या थुङच्या लुच्येते झोलातेबा गाङे खुर। थेमे खेराङताङ तरवार मेत्सुङ सासीन खेराङते लाक्तु खोन्दाते खोलाकराङ च्वाला ईन्सीनोङ तरवार रेरे ङ्योला खुर। 37 च्यिला सासीन परमेश्वर बातला गोमाका चुक सिन टिबा ओते सासीन ‘थेलाचेन मिओनगी डाँकाओनला च्योकराङ खिओ,’ सिन टिबा ओत। दि बात ङेन। च्यि सासीन ङाला चुक खिते सिन ङे विषयला परमेश्वर बातला टिबाते बात गाङे साबा च्योकराङ ओङा फाप्क्यो,” सिन सिदुक। 38 थेमे चेलातेबेकीचेन “प्रभु, उ तोते ङ्योकोनताङ तरवार ङिनी ओत,” सिन सिरजीन थेकी “लो ओत्स्यीत, था थे बात थोङ,” सिन सिदुक। येशूकी जैतुन बोमदु खाबाते प्रार्थना ( मत्ती २६:३६-४६ ; मर्कूस १४:३२-४२ ) 39 थेरूई फिला थेन्गीन येशू सधैँ च्योकराङ खाईन जैतुन बोमनापाला ख्याम्सुङ। चेलातेबाङ थे तिरी तिरी गाल्सुङ। 40 थे बोमदु लेप्नामेकी थेकी थेबाला “था दि दुक्पे बेलाला खेराङगी ङाला विश्वास खिनराङ देता थुप्स्यीत सिन परमेश्वरला प्रार्थना खि,” सिन सिदुक। 41 थेमे थेबाला ठाउँज्यीक्तु ज्यागीन थे खोरोङचेन टिक्पी फजेकपा गाल्सुङ। 42 थेमे खोबुकला देत्कीन “आबा, खुई ओङगो सासीन ङे दि दुक्पा भोगे खिता माफाप्सीन ओङच्या ओतान। ईन्सीनोङ ङे थोक माक्याबाला मेङगो सासीन ङे साबाच्योक मेन्दाला आबा खुई साबा च्योकराङ ओङस्यीत,” सिन प्रार्थना खासुङ। 43 थेमे स्वर्गनेकी परमेश्वर दूतज्यीक वाकीन थेला आँट बिन्सुङ। 44 था भोगे खिता फाप्च्येते दुक्पे पीरगी खित्सादु थे सेम छोकीन सिन्दा ओतान। थेमे थेकी झन झन परमेश्वरला प्रार्थना खासुङ। थोक खाला प्रार्थना खित्जीन थे जीउदुकी ठागी थोपो थिक्पा च्योकराङ खाला ठोतकी थोपो थिगीन ओतान। 45 प्रार्थना खाईन सिन्नामेकी थे लाकीन चेलातेबा ओत्सादु लेप्सुङ। तर पीर खिताई खिताई थाङ छ्येत्कीन चेलातेबा टोले टोले ङिक गाला ओता थोङसुङ। 46 थेमे थेकी थेबाला “माङ्यालना माङ्याल ल्वा। थेमे दि दुक्पे बेलाला खेराङगी ङाला विश्वास खिनराङ देता थुप्स्यीत सिन परमेश्वरला प्रार्थना खि,” सिन सिदुक। येशूला पक्रे खाबाते ( मत्ती २६:४७-५६ ; मर्कूस १४:४३-५० ; यूहन्ना १८:३-११ ) 47 दि बात खिन खिनलाराङ थेरू हूलज्यीक मि ख्योल्सुङ। थे खोरोङ चेला च्युन्ङी नाङ यहूदा सिराते थेबे गोमा गोमा ओतान। थेकीराङ थे मिओनला थेरू टीकीन खुलाबा ओतान। थेचेन थेबे गोमा गोमा ख्याम्बा ओतान। येशूला पुक खिताप सिन थे थे खादु गाल्सुङ। 48 थेमे येशूकी थेला “यहूदा, परमेश्वर ओत्सादुई वाबाते मि ङाराङ ईन सिन छ्या स्ये ज्युताला खो च्यिला ङाला पुक खिता छोल्गीते?” सिन सिदुक। 49 थेमे थेत्ताङ ङ्योम्बुराङ ओताते चेलातेबेकी था थेला पक्काराङ जुम्ला खेरच्या दुका सिन छ्या स्येकीन “प्रभु, च्यि था ङ्योकोन तरवार चले खि?” सिनकामा 50 दोक्पोईकीनी थेरू वाबाते छ्येते पूजारी योक्पोला तरवारगी ग्याप्कीन थेते सामे नामज्योकराङ बेत च्येत्कीन ताङसुङ। 51 थेमे येशूकी थेला “दोक माकेत, थे तरवार स्योक,” साकीन थे नामज्योक छ्येताते मि नामज्योक दोकीन लोक्ला जस्तो तस्तो जोकीन बिन्सुङ। 52 थेमे थे खोरोङला जिन वाबाते छ्ये छ्ये पूजारी, मन्दिरदु देत्कान्ते पुलिसते छ्ये छ्ये मि थेमे यहूदीओनते ज्येनोङ छ्ये छ्ये मि गाङेला थेकी “ङाला जिन्दाला च्यिला तरवार जेरगीन थेमे फेर्का खुरगीन ओङा फाप्सुङारो? च्यि ङा डाँका ईनरो? 53 ङीमे ठाङमा ङानी ख्योकोनताङराङ परमेश्वर मन्दिर नाङला देता ओतान। थेजीनराङ ख्योकोनगी ङाला जिन्दा थुप्च्या ओतान तर माजुम्सुङ। थाचेन ख्योकोनते ङाला जुम्ला दुक्पा तेरच्येते बेला लेप्सुङ। च्यिला सासीन मुन्दाक राज्य गेल्बो शैतानगी थे खोरोङते ओतातेबरी शक्ति चले खित्च्येते बेला दिराङ ईन,” सिन सिदुक। पत्रुसकी येशूला ङो मेस्येओ सिन साबाते ( मत्ती २६:५७-५८ , ६९-७५ ; मर्कूस १४:५३-५४ , ६६-७२ ; यूहन्ना १८:१५-१८ , २५-२७ ) 54 थेमे थेबेकी येशूला जुम्गीन गाङे भन्दा छ्येते पूजारी खाम्बादु क्याल्सुङ। थोक खाला थेला थेपा खेरजीन पत्रुसोङ थेबेकी मोथोङा खाईन थेबे तिङ ङ्याकीन गाल्सुङ। 55 थे पूजारी खाम्बे स्याङकादु मिओन मे फुकीन देइन देता ओतान। पत्रुसोङ लेप्कीन थे मिओनताङराङ देत्कीन मे दाप्ला स्यूसुङ। 56 थे थोक खाला मे देइन ओते बेलालाराङ थेरूराङ काम खित्कान्ते फेम्मे मिज्यीगी थेला थोङसुङ। थेमे मे नाम्दाकला थेला लेमु खाईन ताकीन थेकी “दि मिङ थे मित्ताङराङ ओतान,” सिन सिदुक। 57 थेकी थोक सिरजीन पत्रुसकी “खो सुई बात खिन ओते? ङेनी थे मिला ङोराङ मेस्येओ,” सिन सिदुक। 58 टिक्पी तिरी ज्येनज्यीगीङ पत्रुसला थोङगीन “थेत्ताङ ख्याम्कान्तेबे नाङ दोक्पोई खोङ ईन, मेन?” सिन सासुङ। थेकी थेलाङ “खो दोक्ते बात माकेत। ङानी मेन,” सिन सासुङ। 59 घण्टाज्यीकजो तिरी याङराङ मिज्यीगीङ पत्रुसला तेन्गीन “दिकी मेन्दे बात खासुङ। थेत्ताङ ख्याम्कान्तेबे नाङ पक्काराङ दोक्पोई दिङ ईन। च्यिला सासीन दिङ गालीलपे मिराङ ईन,” सिन सासुङ। 60 लोक्ला थेकी थेलाङ “ए खो च्यिला थोकस्यिक बात खिते? खुई सुई बात खाबाते ईन्दे सिन ङेनी छ्याःङ माखोसुङ,” सिन सासुङ। थेकी दोक साकीन सिन मासिन्लाराङ कुकुरी क्वाँ सिनकामा छ्योबोङ फोसुङ। 61 थेमे प्रभु येशूकी खइँदा बात सिरा फाप्च्येते च्योक खाईन नाङनेकी पत्रुसला तासुङ। थेमे ईन्सीनका “थरिङ ग्वाका था ङोमु पाखे छ्योबो फोत फोतसाकला पालो सुम ज्येन मि दोन्दु खुई ङाला ङोराङ मेस्येओ सिन सिओ,” सिन गोमाका प्रभु येशूकी साबाते बात थेला ठेम्बा लासुङ। 62 थेमे थेला आउदी मेलेबा लासुङ। थोगी थेरूकी गाल्गीन थे ईमुक खाईन खाईन ङुसुङ। येशूला खिस्यी खाईन खाईन दुबाते ( मत्ती २६:६७-६८ ; मर्कूस १४:६५ ) 63 थेमे येशू मोछ्योङस्यीत सिन थेरू ताप्ला देत्कान्ते मिओनगी थेला खाला थेन्दा जति मनपरी सासुङ। थेमे दुङा जति दुसुङ। 64 थे मिक उप्कीन थेला देगीन “थाल्ला खोल्ला देक्कान्ते सु ईन्दे ओना, सिते?” सिन सासुङ। 65 दोस्यिककामा मेन, थेबेकी थेला नाना-भाँती साकीन खितासम्म बेइज्जत खासुङ। येशूला यहूदीओन छ्ये छ्ये मि दोन्दु क्यालाते ( मत्ती २६:५७-६८ ; मर्कूस १४:५३-६५ ; यूहन्ना १८:१९-२४ ) 66 थेमे नाम लानामेई यहूदीओन छ्ये छ्ये मि, छ्ये छ्ये पूजारी थेमे धर्मे गुरूओन गाङेराङ जम्मा ओङसुङ। थेमे येशूलाङ थेरू क्याल्सुङ। 67 थेमे थेबेकी येशूला “दि बात सि। च्यि खो परमेश्वरगी तोङगो साबाते ख्रीष्ट ईन?” सिन ठिसुङ। ठिजीन थेकी “ङे ईन सासुङ सासीन ख्योकोनगी पत्ते मिक्किओ। 68 लोक्ला ङे खइँदा बात ठिसीन ख्योकोनगी सिरराङ मिसिरो। 69 ङा ख्योकोनला च्यि सिते सासीन थानामेकीचेन परमेश्वर ओत्सादुई वाबाते मि ङा छ्येज्यीक शक्ति ओताते परमेश्वर सामे छ्य्वापा देत्क्यो,” सिन सिदुक। 70 थोक सिरजीन थेबा गाङेकी “थोक ईन्सीन च्यि खो परमेश्वर फुज्युङ ईन ओना?” सिन सिरजीन थेकी “ङा थेराङ ईन सिन ख्योकोनगीराङ सिदुक,” सिन सिदुक। 71 थेकी थोक सिराईताङ थेबेकी “मि ईन्गीनोङ दिकी थे खोरोङला परमेश्वर फुज्युङ ईन सिन साबेकी दि दाक दोषी ओङसुङ। थोगी दि दोषीराङ ईन सिरच्येते ज्येन बयानका था च्यिला गोसुङारो?” सिन ज्येन बात माक्यासुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.