लूका 2 - जिरेलयेशू केबाते बात 1 दोक दोक ओङे बेले नाङपाराङ रोमी गेल्बो अगस्टसकी थे खोरोङ लुङबा गाङेते जनसंख्या लिन च्युत्सुङ। 2 दोक खाला जनसंख्या लिन्जीन क्युरिनियस सिराते मि सिरिये लुङबादु रोमी गेल्बो हाकिम ओतान। थे भन्दा गोमा नोमुङ जनसंख्या लाबा मेतान। 3 जनसंख्या लिन्च्या ओङेकी मि गाङेराङ दाक्पोन दाक्पोन गोप्पो गोम्मु केबाते ठाउँला मिन टिक्पाला गाल्सुङ। 4 यूसुफोङ गालील अञ्चल नासरत सारदुकी मिन टिक्पाला यहूदिये अञ्चल बेथलेहेम सारनापा गाल्सुङ। थाङबो गेल्बो दाऊद बेथलेहेमदुराङ केबा ओतान। यूसुफोङ गेल्बो दाऊद सन्तान ईन्देकी थेपा ड्वा फापा ओतान। 5 थे खोरोङला नाङ खाबाते मरियमलाङ थेकी थेपा टीकीन खेरसुङ। थेजीन मरियमगी फुज्यीमा खुरा ओतान। 6 बेथलेहेमपा ओत्जीनराङ दावा छाङगीन मरियमला फिजे सुक ग्याप्सुङ। 7 थेमे थेकी थेरूराङ फुज्युङज्यीक केसुङ। थेते छ्येते फिजाराङ थेराङ ओतान। थेकी थे फिजाला खोलाककी तुम्गीन च्याकीन ठोन्डोला सो तेरच्येते डूँरगी नाङराङ ङ्याल्सुङ। च्यिला सासीन हुटेलदु स्यासा देत्च्येते ठाउँ माङेतेई थेबा गोटेज्यीक्तु स्यासा देता फापा ओतान। लुई गोठालाओनताङ परमेश्वर दूतकी बात 8 बेथलेहेम छेउकी नाङला लुई गोठालाओन नुपला पाङलाराङ देत्ला लुक स्युङगीन ओतान। 9 थेमे थे फिजा क्या छोमु ग्वाका च्यि ओङसुङा सासीन थे गोठालाओनगी प्रभु परमेश्वर दूतज्यीक थेबे दोन्दु ओङा थोङसुङ। थेमे प्रभु परमेश्वरते मिगी ताराङ मुथुप्च्या झिलिमिली नाम्दाक फोक्पेकी थेबे फेरोला नाम्दाक छ्याङे गाल्सुङ। थोक ओङजीन गोठालाओन च्यि ईन्ताका सिन ज्यीबेकी थरावरी गाल्सुङ। 10 थेमे प्रभु परमेश्वर दूतकी थेबाला “ख्योकोन ज्यीबा माकेत। ङा दुरू ख्योकोनला आउदी गा लाङच्येते लोनज्यीक लाःपाला वाबाते ईन। ख्योकोन लाईदुकामा मेन, दि बात मि गाङे लाईदु गा लाङच्येते बात ईन। 11 च्यि सासीन ख्योकोनला पापताङ दुक्पादुकी डेल्कान्तेचेन थाङबो दाऊद गेल्बो केबाते बेथलेहेमदु थरिङ ग्वाका केबा ओत। परमेश्वरगी तोङगो साबाते ख्रीष्ट थेराङ ईन, छ्येतेङ थेराङ ईन। 12 था ख्योकोन बेथलेहेमपा तार ग्युक। थेपा ख्योकोनगी च्यि थोङगीते सासीन थे फिजाला खोलाककी तुम्गीन च्याकीन ठोन्डोला सो तेरच्येते डूँरगी नाङ ङ्याल्गीन ज्याक्पा ओता थेप्क्यो,” सिन सिदुक। 13 थे दूतकी थोक साला सिन्दाईताङराङ थे गोठालाओनगी थेत्ताङ ज्येनोङ ङोला ङ्वा मुथुप्च्या परमेश्वर दूत थोङसुङ। 14 थेमे थे दूतओनगी “स्वर्गने देत्कान्ते परमेश्वरते जय जय ओङस्यीत। दि सा लुङबे मिओन नाङ थे खोरोङगी दया खाबाते मिओनला था थेकी लेमु खिओ,” सिन परमेश्वरते जय जय खासुङ। 15 परमेश्वर दूतओन थेरूई स्वर्गने ग्युरगीन गाल्नामेई थे लुई गोठालाओनगी “लो था ङुरूङ बेथलेहेमपा डुइ। थेपा गाल्ला च्याला प्रभु परमेश्वरगी दूतला सिर च्युताते दि बात च्यि ईन्दाका तेइ,” सिन बात खाईन 16 होत्ताराङ थेपा ख्याम्सुङ। थेपा लेप्ला ताजीन थेबेकी यूसुफताङ मरियम थेमे थेबे छेउदुराङ डूँरगी नाङ ङ्याल्गीन ज्याक्पाते फिजाला थोङसुङ। 17 थे फिजाला थोङनामेई थे गोठालाओनगी थे फिजे आबा आमाताङ थेरू ओताते मिबरी गाङेला थे फिजा चुक्ते ईन्दे, थेकी च्यि च्यि खिते सिन गोमा परमेश्वर दूतकी खोपरोङला साबाते बात गाङे लाःप्सुङ। 18 थेबे बात थोकान्ते मिबरी गाङेला आउदी अचम्ब लासुङ। 19 मरियमगीचेन थेबेकी साबाते बातबरी गाङे सेमगी नाङ ज्यागीन गुने खिन देत्सुङ। 20 तिरी थेबाबरी खोपरोङ लुक ओत्सापा ग्युरगीन लिच्युङ। खोपरोङगी थोबातेताङ थोङाते गाङे बातकी लाईदु थेबेकी परमेश्वरते जय जय खासुङ। परमेश्वर दूतकी खोपरोङला जस्तो साबा ओतान गाङे बात उस्तोराङ ओङा ओतान। येशूला परमेश्वर मन्दिरपा खेराते 21 थेमे ङीमा गेतकी छोमु थेला ज्वा फाप्च्येते खतकी चिनु जोकीन च्याकीन आबा आमातेबेकी थे मिन येशू सिन ज्याक्सुङ। परमेश्वर दूतकी मरियमला फुज्यीमा खुरग्यो सिन सिरा छोमुराङ थे मिन थोक सिन स्योक सिन साबा ओतान। 22 मोशेकी टिबाते परमेश्वर नियमला फिजा केनामेई फुज्युङ ईन्सीन ङीमा खाल ङिकी छोमु आमातेकी चोके खिता फाप्क्यो सिन साबा ओतान। थेमे चोके खित्च्येते बेला लेप्नामेई यूसुफताङ मरियमगी फुज्युङतेला यरूशलेमपा खेरसुङ। 23 परमेश्वर नियमला गाङेते छ्येते फुज्युङ प्रभु परमेश्वरतेराङ ईन सिन तेन्दाला थे दोन्दु खेरा फाप्क्यो सिन टिबा ओतान। थोगी थे फिजा परमेश्वरतेराङ ईन सिन तेन्दाला थेबा मन्दिर नाङ स्यूसुङ। 24 थेमे परमेश्वर नियमला थाङबो मोशेकी फिजा केनामेकी आमाते चोके खिताला कि गन्दीमा जोरज्यीक कि परेवे टुक्पा जोरज्यीक पूजा खिता फाप्क्यो सिनोङ टिबा ओतेकी थेबेकी थे छोमुराङ थेबाङ पूजा खाईन चोके खासुङ। शिमियोनताङ हन्नेकी येशू सु ईन्दे सिन छ्या स्येबाते 25 यरूशलेमदु शिमियोन सिराज्यीक मि ओतान। थे परमेश्वरगी खि साबा साबा च्योकराङ खाला थेला आउदी खाला माने खित्कान्ते मि ओतान। इस्राएलीओनला पापताङ दुक्पादुकी डेल्कान्ते नाम ओङगीताका सिन थे गुकीन देता ओतान। थेकी परमेश्वर आत्मा ङेता ओतान। 26 प्रभु परमेश्वरगी तोङगो साबाते ख्रीष्टला थोङनामेईकामा थे स्यिइओ सिन परमेश्वर आत्मेकी थेला छ्या स्ये च्युता ओतान। 27 परमेश्वर नियमला खि साबा च्योकराङ खिताला येशूला मन्दिरपा खेरे छोमु परमेश्वर आत्मेकी शिमियोनलाङ गोमाका थेपा डोर च्युता ओतान। येशूला खुरला आबातेताङ आमाते मन्दिर नाङ स्यूक्जीन शिमियोनगी थेबाला थोङसुङ। 28 थे फिजा थोङासात्तु थेकी थेला फाङदु लासुङ। 29 थेमे परमेश्वरते जय जय खिन “प्रभु परमेश्वर, खुई ङाला गोमा छ्या स्ये च्युताते बात साबा च्योकराङ खासुङ। थानी ङा स्यिसीनोङ ङाला छ्याःङ दुक्पा मेत। 30 च्यिला सासीन पापताङ दुक्पादुकी डेल्कान्तेला थरिङ ङे ङाराङ मिगीराङ थोङा ङेत्सुङ। 31 परमेश्वर खुई लुङबा लुङबे मि लाईदु छाने खाईन ताङाते ख्रीष्ट दिराङ ईन। 32 दि वाबेकी खित्सादु था ज्येन ज्येन जातकी मिकी परमेश्वर खुई दया खाला पापताङ दुक्पादुकी डेल्ग्यो सिन छ्या स्येक्यो। थेमे खुई छाने खाबाते इस्राएली ङ्योकोनगी मान ङेत्क्यो,” सिन बात खासुङ। 33 शिमियोनगी थोक सिन थे फिजे बात खित्जीन आबातेताङ आमातेलाचेन दि च्यि साबाते ईन्ताका सिन अचम्ब लासुङ। 34 थेमे थेकी आबातेताङ आमातेलाङ आशी बिन्गीन च्याकीन थे फिजे आमा मरियमला “परमेश्वरगी खटे खाबाते दि फिजाला ङुरूङ इस्राएली नाङ कोईकी दिला परमेश्वरगी ताङाते ईनराङ मेन सिन विरोध खिओ। थोक खित्कान्तेबाला परमेश्वरगी सजाय तेरग्यो। कोईकीचेन दिला परमेश्वरगी ताङाते ईन सिन पत्ते खिओ। थोक खित्कानलाचेन परमेश्वरगी आशी बिन्ला लेमु खिओ। 35 दोक ओङजीन दाक्पोन सेमगी नाङ ओताते बात मि सुङगीङ खाराक्पा ब्वाला ज्य्वाबा मुथुबो सिन छ्या स्येक्यो। दि फिजेकी ङेताते दुक्पा थोङजीन खोल्लाङ ङिङला ठीउ रोपे खाला स्यिइ सिराच्योक लाङगो,” सिन सिदुक। 36 यरूशलेमदुराङ हन्ना सिराज्यीक परमेश्वर बात खित्कान्ते फेम्मे मिङ ओतान। थे आबे मिन फनुएल ओतान। हन्नाचेन आशेर थरगी मि ओतान। थे आउदी गाम्मा गाला ओतान। फाङमा खाबाते लो दुईनलाराङ थेते ख्योबोते स्या ओतान। 37 ख्योबोते स्यिनामेकी थोजोराङ देत्कीन था थे लो खाल स्यीताङ स्यी गाला ओतान। थेचेन ङीन नुप परमेश्वर मन्दिरदु परमेश्वरला प्रार्थना खिन देत्कीन ओतान। परमेश्वरला झन छ्ये ज्वा थुप्स्यीत सिन थे बेला बेलाला बर्तङ देत्कीन ओतान। 38 शिमियोनगी यूसुफताङ मरियमला थे फिजे बात खिन ओत्जीनराङ थे फेम्मे मिङ थेबा ओत्सादु ख्योल्सुङ। थेमे थेकी येशूला थोङगीन परमेश्वरगी तोङगो साबाते ख्रीष्ट ताङदुक सिन परमेश्वरला धन्यवाद बिन्सुङ। थेमे यरूशलेम मिओनला दुक्पादुकी डेल्कान्ते नाम वाओङा सिन थे मोरोङ च्योकराङ खाईन गुकीन देताते मिओनला थानी थे वादुक सिन थे फिजे बात लाःप्कीन बिन्सुङ। 39 परमेश्वर नियमला खि साबाते कामबरी खाईन सिन्नामेकी यूसुफताङ मरियम फिजा खुरगीन यरूशलेमदुकी गालील अञ्चल नासरत सारनापा ग्युरगीन गाल्सुङ। थेबे खाम्बा नासरतदुराङ ओतान। 40 थेरूराङ देत्कीन येशू स्यारा गाल्सुङ। थेमे थेला स्येतताङ बुद्धिङ काल्बेई स्यूसुङ। परमेश्वरगी थेला आशी तेरगीन लेमु खिन गाल्सुङ। येशू परमेश्वर मन्दिरपा गालाते 41 येशू आबा आमाबा लोई ठाङमा निस्तार चाड माने खिताला यरूशलेमपा डुइन ओतान। 42 येशू लो च्युन्ङी छाङनामेई खोपरोङ चलनला ओता च्योकराङ खाईन थेबा थेलाङ टीकीन थे चाड माने खिताला थेपा गाल्सुङ। 43 थेमे चाड सिन्नामेकी थेते आबा आमातेबा खाम्बापा ग्युरसुङ। थेजीन येशू ठाल्गीन यरूशलेमदुराङ देताते बात थेबाला छ्या मेतान। 44 थेबेकीचेन चाड माने खाईन ग्युराते मि हूलगी नाङला येशू खोपरोङ युल्बाओनताङ ख्याम्बा ओतासीन सिन विचार खासुङ। ङीमाज्यीक लाम ख्याम्ला सिन्जीनोङ थेबेकी येशूला माथोङनामेई युल्बाओनताङ र्वातेबे नाङ दुकाना मिन्दुका सिन तासुङ। तर येशू थेबाताङोङ मेतान। 45 थोक ओङनामेई थेला छोलाला आबातेताङ आमाते याङराङ यरूशलेमपाराङ ग्युरगीन गाल्सुङ। 46 थेमे छोल्गीन छोल्गीन डोजीन ङीमा सुमगी छोमु थेबेकी येशूला परमेश्वर मन्दिरदु थेप्सुङ। थेरू थे यहूदी धर्मे गुरूओनताङ देता ओतान। थेबेकी लोप्कीन ओताते बात ङेन्गीन थेमे थेबालाङ बात ठिइनकामा येशू थेरू देता ओतान। 47 थेरू थेकी थे धर्मे गुरूओनगी साबाते बात आउदी लेमु खाईन खोबाते थेमे थेबेकी ठिबाते बातओनोङ आउदी लेमु खाईन लाःपाते थोङजीन थेरू ओताते मिबरी दि चुक अचम्बज्यीक फिजा ईन्दाका सिन छक्क परे खासुङ। 48 थे थोक खाईन धर्मे गुरूओनताङ देत्ला बात खिन ओता थोङजीन आबातेताङ आमातेङ छकदाङ परे खासुङ। थेमे थेला आमातेकी “फुज्यो, खो च्यिला दुरू देते? खेराङ आबाताङ ङा सुर्तेकी खोल्ला छोलाई छोलाई झन्दै स्यिसुङ,” सिन सिरजीन 49 थेकी थेबाला “आबा आमाबा ख्योकोनगी ङाला च्यिला थोक दुक्पा खाईन गाङेपा चाले? ङा ङे आबा ओत्सादु देता फाप्क्यो सिन ख्योकोनगी छ्या स्येबा फाप्च्या ओतान,” सिन सिदुक। 50 थेकी थोक च्यि साबाते ईन्दे सिन आबातेताङ आमातेकी छ्याःङ माखोसुङ। 51 ईन्सीनोङ आमातेकीचेन दि बाततेबा सेमगी नाङराङ ज्याक्सुङ। थेरूई येशू थे खोरोङ आबा आमाताङ नासरतपाराङ ग्युरगीन गाल्गीन देत्सुङ। थेकी थेबेकी लाःपा कोताते लेमु खाला ङेन्गीन ओतान। 52 थोक खिन खिन थे छारगीन गाल्सुङ। थेला झन झन बुद्धि स्यूइन गाल्सुङ। थेला परमेश्वरताङ मि गाङेकी मन परे खिन ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.