लूका 11 - जिरेलप्रार्थना चुक खाला खिता फाप्कीते ( मत्ती ६:५-१३ ; ७:७-११ ) 1 ङीमाई येशू ठाउँज्यीक्तु देत्ला प्रार्थना खिन ओतान। प्रार्थना खाईन सिन्नामेकी चेलातेबे नाङ दोक्पोईकी “प्रभु, यूहन्नेकी परमेश्वरताङ चुक खाला प्रार्थना खित्च्ये सिन चेलातेबाला लाप्कीन बिन्दा ओतान। प्रार्थना खित्जीन चुक सिरच्ये सिन खुई ङ्योकोनलाङ लाप्ला नाङना,” सिन सिदुक। 2 थेमे थेकी “ख्योकोनगी परमेश्वरला प्रार्थना खित्जीन दोक सि। चुक सासीन ‘आबा परमेश्वर, मि गाङेकी खोल्ला मान खित्स्यीत। सा लुङबा खाङ पूरो खाला खुई राज्य ओङस्यीत। 3 ङीमे ठाङमा ङ्योकोनला गोच्येते साप थुङा नाङ। 4 ङ्योकोनगी खाबाते पाप माफ नाङ। ङ्योकोनोङ ङेराङला मेलेबा खित्कान गाङेला माफ तेरग्यो। थेमे मेलेबा काम खित्से छ्य्वापेई ङ्योकोनला जोए खाला नाङ,’ सि,” सिन सिदुक। 5 थोरूमोङ बात खिन थेकी “लो था दोक सिइना। च्यि सासीन ख्योकोन नाङ दोक्पोईकी नुप फेतला र्वाते खाम्बादु गाल्ला ‘ए होइ ल्वाना, गो पेत्ला ङाला माना सुम फे किन। 6 ङा ओत्सादु आउदी थारीलेई थाल्ला भर्खर र्वाज्यीक वादुक। थेला साप तेराला ङात्ताङ छ्याःङ मेत,’ सिन सिरजीन 7 थेकी ‘नुपकी नाङला ङाला ज्यिजार मालोङ। ङ्योकोननी लास्यिङ ग्याप्कीन ङ्याल्गीन सिन्दान। फिजाओनोङ ङात्ताङराङ ङ्याला ओत। ङा लासीन थेबेते ङिक ठोक्यो। थोगी ङा थाल्ला छ्याःङ तेरा मुथुबो। स्येदाङ माकेत,’ सिन सिओ। 8 तर ङा ख्योकोनला दि बात सिओ। च्यि सासीन र्वा ईन्सीनोङ थेकी ख्योकोनला लाला छ्याःङ मेतेरो। ईन्सीनोङ ख्योकोनगी ङोचाराङ मिक्किता खाईन नाङ सिनराङ देत्सीन थेकी लाला च्याला गोबा जति तेरग्यो। 9 थेमे ङा ख्योकोनला च्यि सिते सासीन खेराङला च्यि च्यि गोकीका आबा परमेश्वरला नाङ सि। थेमे थेकी तेरग्यो। ख्योकोनगी चाल्सीन पक्काराङ ङेत्क्यो। गो पेत्ला नाङ सि। थेमे परमेश्वरगी गो पेत्ला ख्योकोनला नाङने स्योक सिओ। 10 च्यिला सासीन नाङ खित्कान गाङेला थेकी तेरग्यो। छोल्कान गाङेकी ङेत्क्यो। थोकराङ खाला गो पेत्ला नाङ सिरकान्तेबालाङ परमेश्वरगी नाङने स्योक सिओ। 11 मिओनगी चुक खिते सिरच्येते बातराङ विचार खाला तोना। ख्योकोन नाङ सुईचेन फुज्युङतेकी स्योबेन नाङ सिरजीन लो या सो सिन दो तुला तेरगीते। थेमे ङ्या नाङ सिरजीन रूल जुम्ला याक सिते? 12 थोकराङ खाला फुज्युङतेकी छ्ये गोङा नाङ सिरजीन च्यि बिच्छी जुम्ला तेरग्योतरो? 13 ख्योकोन पापी मिकीनी खेराङ फिजाओनला जे तेरा फाप्च्येते ईन थेराङ तेरगीदुक सासीन स्वर्गने देत्कान्ते ख्योकोन आबा परमेश्वरगी झन च्यिला मेतेरतेरो? परमेश्वर आत्मा नाङ सिरकान्तेबाला थेकी गा खिन तेरग्यो,” सिन सिदुक। येशूकी शैतानताङ डिक्ला काम खित्च्येते मेन ( मत्ती १२:२२-३२ ; मर्कूस ३:२०-३० ) 14 बाजिई येशूकी मिज्यीकदुकी ल्हन्डीक तेन्गीन ताङसुङ। ल्हन्डीक खोबेकी खित्सादु थे मि बात खिता मुथुप्च्या गाला ओतान। थेकी ल्हन्डीक तेन्गीन ताङनामेकी थे मि बात खिता थुप्च्या गाल्सुङ। थोक अचम्ब ओङा थोङगीन थेरू ओताते मिओन छक्क परे खासुङ। 15 तर थेबे नाङ कोई कोईकी “दि छ्याःङ अचम्बते बात मेन। ल्हन्डीक गेल्बो बालजिबुलताङ डिक्लाका दिकी थे शक्तिदुकीराङ ल्हन्डीक तेन्ला तोङच्येते ईन,” सिन सासुङ। 16 लोक्ला कोईकीचेन येशू सेम ता चाल्गीन “लो खोत्ताङ परमेश्वर शक्ति ओत सासीन ङ्योकोनला खइँदा अचम्बते कामज्यीक खाला तेन्ते,” सिन सासुङ। 17 थेरू मिओनगी थोक थोक खित्जीन थेबेकी च्यि सिरा चालाते ईन्दे सिन छ्या स्येकीन येशूकी थेबाला “लुङबाज्यीगी मि माडिगीन खुदुक खुदुक पाटी ओङगीन जीसुङ सासीन थे लुङबा तोरला डुइओ। थेमे खाम्बाज्यीगी मिओनोङ माडिगीन खोपरोङ खोपरोङ नाङ थोम्मु खासीन थेबाबरीङ ठाल्ला याङराङ नोमुङ मिडिगो। 18 थोकराङ खाला ल्हन्डीक गेल्बो शैतानोङ ल्हन्डीकओनताङराङ माडिक्सीन चुक खाला थे राज्य देत्कीते ओना? च्यिला सासीन ख्योकोननी ल्हन्डीक गेल्बो बालजिबुलताङ डिक्लाका ङे ल्हन्डीक तेन्ला तोङच्येते ईन खिदुक। 19 ख्योकोनगी साबा च्योकराङ ङे बालजिबुल शक्तिदुकी ल्हन्डीक तेन्ला तोङच्येते ईन्सीन खेराङ मिओनगीचेन सुई शक्तिदुकी थोक खिका याङ? थेबेकी परमेश्वर शक्तिदुकीराङ ल्हन्डीक तेन्ला तोङच्येते ईन सिन ख्योकोन सिओ, मेनरो? थोगी होथे खेराङ मिओन बात विचार खालाराङ ख्योकोनगी ङे बालजिबुल शक्तिदुकी ल्हन्डीक तेन्ला तोङच्येते ईन साबाते बात ईनराङ मेन सिन छ्या स्येक्यो। 20 परमेश्वर शक्तिदुकीराङ ङे ल्हन्डीक तेन्ला तोङच्येते ईन। थोगी था शैतान राज्यला ग्यालाला परमेश्वर राज्य दुरू वाकीन सिन्दाक्वा सिन ख्योकोनगी छ्या स्येबा खि। 21 सुइँदा ङार्माते मि थे खोरोङ खाम्बा स्युङाला हात हतियार खुरगीन देत्सुङ सासीन सुङगीङ थे सम्पत्ति क्वा मुथुबो। 22 तर थे भन्दाङ ङार्माते मि वासीन थेत्ताङ ओताते हात हतियार ठोइओ। थेमे थेते ओताते सम्पत्तिबरी थेन्ला खेरला र्वातेबाला गोला तेरग्यो। 23 बात च्यि ईन्दे सासीन ङात्ताङ मिडिक्कान्ते मिचेन ङे विरोध खित्कान्ते ईन। थोकराङ खाला ङे र्वा च्योक ओङला मिओनला परमेश्वर छ्य्वापा लै खित मुज्युत्कान्ते मिङ ङे काम ङ्ये ज्युत्कान्ते ईन। परमेश्वर छ्य्वापा लै माक्यासीन चुक ओङगीते ( मत्ती १२:४३-४५ ) 24 थेमे सुइँदा मिला खोबाते ल्हन्डीकचेन तेन्गीन ताङनामेकी देत्च्येते ठाउँ छोलाला छ्यु सिराते थोपोई मेङेत्च्येते खालि ठाःकताङ बालुवाकामा ओत्साला डुइओ। थेला देत्की सिराच्योक लाबाते ठाउँ माङेत्सीनचेन था मायाङसुङ, याङराङ ङा थे मि नाङराङ गाल्ला देता फाप्सुङ सिन ग्युरला ओङगो। 25 वाला ताजीन थेकी थे गोमा देताते ठाउँ लेमु गाला ओता थोङगो। 26 थोक थोङनामेई था याङराङ देता ङेत्च्याक्वा सिन थे ग्युरला गाल्ला थे खोरोङ भन्दाङ मेलेबातेन्दे ल्हन्डीक दुईनटीकला टीला खुलाङगो। थेमे थेबाबरी थे मिलाराङ खोक्यो। थोक ओङनामेई थे मि ल्हन्डीकज्यीककामा खोबा ओत्जीन भन्दाङ झन मेलेबा डुइओ,” सिन सिदुक। 27 थे दोक खाला बात खिन ओते बेलालाराङ थे मिओन नाङ फेम्मे मिज्यीगी गाङेकी थोच्या खाईन “ओहो, खोल्ला केला सोकान्ते आमा थोई भाग्यमानीज्यीक ओता ईन्दाका,” सिन सिदुक। 28 थेकीचेन थे फेम्मे मिला “परमेश्वर बात ङेन्ला थेकी खि साबा साबा खित्कान्ते मिओन झन भाग्यमानी ईन,” सिन सिदुक। मिओनगी येशूला परमेश्वरगी ताङाते ईन सिन पत्ते माक्याबाते ( मत्ती १२:३८-४२ ) 29 थेरू झन काल्बेई मि येशू खादु जम्मा ओङाला स्यूसुङ। थेमे थेकी थेबाला “ख्योकोन था समय मिओननी खालि मेलेबा मेलेबा काम खित्कान ईन। ख्योकोन ङाला परमेश्वर शक्तिदुकी अचम्बते कामज्यीक खाला तेन खिदुक। अहँ ङा ख्योकोनगी साबाच्योक खितराङ मिक्किओ। था ख्योकोनगी परमेश्वर बात खित्कान्ते योनाला ओङा च्योक्ते कामज्यीककामा थोङा ङेत्क्यो। 30 योनाला ओङाते काम थोङगीन निनवे सारगी मिओनगी थे परमेश्वर बात खित्कान्ते मि दुका सिन छ्या स्येसुङ। थेला ओङा च्योक्ते काम था परमेश्वर ओत्सादुई वाबाते मि ङाला ओङनामेईचेन ख्योकोनगीङ दिला परमेश्वरगीराङ ताङाते दुका सिन छ्या स्येक्यो। 31 था परमेश्वरगी न्याय खिते छोमु थाङबो दक्षिण छ्य्वामा ओताते लुङबे गेल्मुकी परमेश्वर दोन्दु ख्योकोन दोषी ईन सिन सिओ। च्यिला सासीन थेचेन सोलोमन गेल्बो आउदी बुद्धि खाबाज्यीक ओत्लो सिरा थोकीन थे बात ङेन्दाला आउदी थारीलेई थे ओत्सादु वाबा ओतान। तर ख्योकोनचेन सोलोमन भन्दाङ छ्येज्यीक थरिङोला खेराङताङ ङ्योम्बुराङ ओताते मिकी साबाते बादोङ मेङेन्दुक। 32 थोकराङ खाला थे छोमु निनवे सारगी मिओनगीङ ख्योकोन दोषी ईन सिन सिओ। च्यिला सासीन योनेकी साबाते परमेश्वर बात ङेन्गीन खोपरोङ पापी दुका सिन छ्या स्येकीन थेबा परमेश्वर छ्य्वापा लै खाबा ओतान। तर ख्योकोननी योना भन्दाङ छ्येज्यीक खेराङताङ ङ्योम्बुराङ ओताते मिकी साबाते बात ङेनराङ मेङेन्दुक। नाम्दाकताङ मुन्दाक बात ( मत्ती ६:२२-२३ ) 33 थोरूमोङ बात च्यि सासीन बत्ती पारला च्याला सुङगीङ खइँसाला मोबोङो, फामगी उप्लाङ मोज्योओ। बरू नाङने स्यूक्कान गाङेकी नाम्दाक थोङस्यीत सिन खइँसाला थोम्बोला ज्य्वाक्यो। 34 ख्योकोन मिक खेराङ लाईदु बत्ती च्योकराङ ईन। च्यि सासीन मिक लेमु ओत्सीन नाम्दाकलाराङ देत्ला ख्योकोनगी जे कामोङ लेमु खिता थुप्क्यो। तर मिक लेमु मेत्सीन मुन्दाकलाकामा देत्ला ख्योकोनगी छ्याःङ लेमु खिता मुथुबो। 35 थोगी मिक लेमु मेत्ला नाम्दाकला मेन्देकी मुन्दाकला देता माफाप्स्यीत सिन ख्योकोन च्याङबो खाला देत। 36 च्याङबो खाईन देत्कीन मुन्दाकला मेन्देकी नाम्दाकलाकामा देत्सीन ख्योकोनगी खालि लेमुकामा खिता थुप्क्यो। दोक लेमु खिता थुप्च्येतेचेन ख्योकोनला बत्ती नाम्दाक फोक्पा च्योक्ते ईन,” सिन सिदुक। धर्मे गुरूताङ फरिसीओनला चुक मेलेबा ओङगीते ( मत्ती २३:१-३६ ) 37 येशूकी दि बात खाईन सिन्नामेई फरिसी पाटी मिज्यीगी थेला साप सार डुइ सिन सासुङ। थेमे येशू थेत्ताङ गाल्गीन साप साप्ला देत्सुङ। 38 थेकी लाक्पा ठुत्जीन फरिसी पाटी मिओनगी खिता च्योकराङ खाईन चोके मिक्किता खाईन साप साप्ला देत्सुङ। थेकी थोक खाबा थोङजीन थे फरिसी पाटी मिला अचम्ब लासुङ। 39 थे छक्क परे खाबा थोङगीन प्रभु येशूकी थेला “ख्योकोन फरिसी पाटी मिओन खेराङ कचौराताङ देर्मातेबाचेन चोके खिता फाप्क्यो सिन माझे खाला टल्के खित्च्या जोइदुक। तर थे नाङ लुक्ला साच्येते सापचेन ख्योकोनगी खेराङगीकामा सा थुङा ङेत्सीन ओङच्या ओतान सिराच्योक खाईन ज्येनगीते ठ्वाकीन, ज्येनला ठगे खाईन खुलाबाते ईन। 40 दि सा लुङबा खाङ ओताते जति गाङे जोकान्ते परमेश्वरगीराङ मि सेमोङ जोबाते ईन। दि बात ख्योकोनगी च्यिला मोखोका? 41 दि बात खोला बरू ख्योकोनगी खेराङताङ ओताते साच्या थुङच्येतेबा छ्याःङ मेताते मिओनलाङ गोला बिन। थेमेका ख्योकोनते सेम थेमे स्यीतेबाङ परमेश्वरगी ताजीन लेमु थोङगो। 42 था ख्योकोनला आउदी मेलेबा ओङगो। ख्योकोनचेन परमेश्वरगी साबाते आउदी खाला ङेन्च्या सिन बाबरी, आरूद थेमे ज्येनतोक मसालेते समेदोङ बो च्युताम्बेते बोज्यीक टाल्ला परमेश्वरला चढे खिदुक। तर ज्येनला लेमु खिता ठाउँदु ख्योकोननी थेबाला ठगेका खिदुक। थेमे परमेश्वरला ङिङज्येङ मिक्किदुक। थोगी ख्योकोनगी परमेश्वरला ङिङज्ये खि, ज्येनला लेमु खि। बो च्युताम्बे नाङ बोज्यीक परमेश्वर लाईदु डेल्च्येतेङ मातोङ। 43 ख्योकोनला आउदी मेलेबा ओङगो। च्यिला सासीन ख्योकोननी मिटिङ खित्च्येते खाम्बे नाङला छ्ये छ्ये मि देत्च्येते ठाउँलाकामा देता छोल्गीदुक। थेमे मि छ्वासा रूसाला युक्जीन ख्योकोन ज्येनगी खेराङला नमस्ते गुरू सिन मान खासीन आउदी गा खिदुक। 44 थुर्सा ओत्साला थुर्सा ईन सिन छ्या मास्येसीन मिओन थे लाक्तु ख्याम्ला बिटुले खिओ। ख्योकोन होथोक्ते थुर्सा च्योक्तेराङ ईन। ख्योकोनताङ साङ खानामेई ज्येन ज्येन मिङ मेलेबा डुइदुक। थोगी ख्योकोनला था आउदी मेलेबा ओङगो,” सिन सिदुक। 45 थेकी दोक दोक सिरजीन धर्मे गुरूज्यीगी “गुरू, खुईनी ङ्योकोनते छ्येत तेन्च्ये लामराङ माज्याक्सुङ,” सिन सिदुक। 46 थोक सिरजीन येशूकी “ख्योकोन धर्मे गुरूओनलाङ आउदी मेलेबा ओङगो। ज्येनलाचेन ख्योकोन स्यिच्या खाईन खुर्बु कुरा च्योकराङ खाला दि खि, थे खि सिन परी परी नियम ङेन्दा फाप्क्यो खिदुक। मिओनगी थोक खिता थुप्कीता मुथुप्ता सिन ख्योकोन छ्याःङ विचार मिक्किदुक। 47 था ख्योकोनला आउदी मेलेबा ओङगो। ख्योकोनचेन खेराङ ज्युज्यु पुर्खेकी सेताते परमेश्वर बात खित्कान्ते मिओनला आउदी खाला मान खित्च्या ओतान सिन तेन्दाला गोमा थेबा दिसे नाङला थेबे मिनला खाम्बा छेतराङ जोदातेन्दे थुर्सा जोइदुक। 48 ख्योकोनगी दोक खाबातेनी खेराङ ज्युज्यु पुर्खेकी ठीकराङ खाबा ओतान सिन साबातेका ईन। ख्योकोन ज्युज्यु पुर्खेकी थेबाला सेत्सुङ। ख्योकोनचेन थेबेकी सेतातेबे थुर्सा जोइदुक। 49 खेराङ ज्युज्यु पुर्खाताङ ख्योकोनगी होदोक्ते काम खिओ सिन थे खोरोङ बुद्धिकी परमेश्वरगी गोमाका छ्या स्येबा ओतान। थेमे थेकी ‘ङा ङे बात खित्कान्तेबा थेमे ज्येनोङ ङाराङगी खटे खाबाते मिओन मि नाङ तोङगो। तर मिओनगीचेन ङे ताङाते मिओन नाङ कोईला सेत्क्यो, कोईला आउदी दुक्पा बिन्ला उरला तोङगो,’ सिन साबा ओतान। 50 दि सा लुङबा जोबा छुरनामेई परमेश्वर बात खित्कान्ते मिओनला होथोक खाईन सेताते गाङेते हर हिसाब था परमेश्वरगी ख्योकोन गाङेताङ लिन्ग्यो। 51 च्यि सासीन हाबिलदुकी लाला परमेश्वर मन्दिर नाङदु कोठाताङ थेरू थानगी किल्दुराङ सेताते जकरिये पालोसाक हर हिसाब परमेश्वरगी मालाबाला मोतोङो। दि हर हिसाबचेन परमेश्वरगी ख्योकोन सन्तानला मेन्देकी ख्योकोनताङराङ लिन्ग्यो। 52 परमेश्वर राज्यने चुक खाला स्यूक्पा थुप्कीते सिरच्येते बात छ्या ओत्सीनोङ थेमे दि बात ज्येनला लोप्कान ईन्सीनोङ ख्योकोनगी सुङलाङ मोलोप्तुक। दोक खाला खेराङनी परमेश्वर राज्यने स्यूक्पा माङेत्सुङ माङेत्सुङ थेने स्यूक्पा छोल्कानलाङ स्यूकराङ मुज्युत्तुक। थोगी ख्योकोनला था आउदी मेलेबा ओङगो,” सिन सिदुक। 53-54 दि बाततेबा खाईन सिन्नामेई येशू थे खाम्बादुकी थेन्गीन गाल्सुङ। दि बातओन थोनामेई धर्मे गुरूओनताङ फरिसी पाटी मिओनला स्येदाङगी मे बारसुङ। थेमे होथेजीनमेईराङ थेबेकी येशूला च्यि बातला दोष लै खिताबे सिन मौका छोल्गीनराङ देत्सुङ। थेकी खइँदा गल्तीते बात खिता सिन थेला काल्बेई बात ठाप्ला स्यूसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.