यहूदा 1 - जिरेल1 दि चिट्ठी टिक्कान्ते ङा यहूदा ईन। ङा याकूब न्वा ईन। ङा येशू ख्रीष्ट काम खित्कान्ते मि ईन। ङा दि चिट्ठी आबा परमेश्वरगी थे खोरोङ दोन्दु स्योक सिन काताङाते, थेकी ङिङज्ये खिन ओताते थेमे येशू ख्रीष्टकी ताकोरा खिन ओताते मि ख्योकोनला टिगीन ओत। 2 आबा परमेश्वरताङ प्रभु येशू ख्रीष्टकी ख्योकोनला झन झन दया खाला लेमु खिन थेमे ङिङज्ये खिनराङ देत्स्यीत। यहूदेकी मेन्दे बात लोप्कान्ते मिओन बात खाबाते 3 ङिङज्येते आज्यो न्वावे, परमेश्वरगी ङुरूङला पापकी सजायदुकी चुक खाईन टाल्सुङा सिन ख्योकोनला चिट्ठी टिक्पाला ङाला आउदी सेम लाबा ओतान। थे बात मेन्देकी थाचेन ङाला ख्योकोनला दि बात टिक्पाराङ फाप्क्यो सिराच्योक लासुङ। च्यि सासीन ज्येनगी जे सासीनोङ, जति दुक्पा बिन्सीनोङ येशूला विश्वास खाईन ङेन्दाते बात ख्योकोनगी ङेन्दा मातोङ। दि बात परमेश्वरगी थे खोरोङ सन्तान गाङेला ङेन सिन बिन्दाते ईन। 4 ङे च्यिला थे बात ङेन्दा तोङा मेङगो साबाते ईन्दे सासीन कोई कोई मि खाराक्पा ख्योकोन नाङ स्यूकीन सिन्दा ओत। थेबाचेन परमेश्वरगी माकेत साबा साबाते काम खित्कान्ते मि ईन। थेबेकी ङुरूङ परमेश्वरगी मिला दया खाला पापदुकी डेल्च्येते बातला चुक खिका सासीन परमेश्वरगी दाक्पोनला दया खाईन पापदुकी टाला ओतेकी था ङुरूङगी जे खासीनोङ ओङगो सिन रन्डीबाजी थेमे होदि च्योक्ते खिता मेङच्येते काम खिदुक। थेमे ङुरूङ मालिक येशू ख्रीष्टलाङ माने मिक्किदुक। गाङेपा गाङेला राज्य खित्कान्ते थेकामा ईन। होथोक्ते मिओनगी चुकस्यिक सजाय ङेत्कीते सिन परमेश्वर बातला गोमाका टिबा ओत। 5 परमेश्वरगी थे खोरोङ मिओनला मिश्रे लुङबादुकी दुक्पादुकी टाल्गीन खुलाबा ओतान तर थे खोरोङ बात ङेन्दा तोङकान्तेबाला तिरी सजाय बिन्गीन सेता ओतान सिन ख्योकोनला छ्याराङ ओत। ईन्सीनोङ दि बाततेबा ङा ख्योकोनला ठेम्बा लाङस्यीत सिन खिन ओत। 6 थेमे परमेश्वरगी मान बिन्गीन ज्याक्पाते ठाउँदु मेदेता खाला दाक्पोन खुशीला ख्याम्कान्ते थे खोरोङ दूतओनलाङ थेकी नोमुङ ठोला मुथुप्च्या खाईन साङलोकी ठाकीन मि गाङे न्याय खित्च्येते दिन मालेपथुप नरककुण्डमा गाङे भन्दा मुन्दाकते ठाउँनामा लुगीन ज्याक्पा ओत। 7 होथे दूतओनगी च्योकराङ खाईन सदोम, गमोराताङ थे फेरोला ओताते सारगी मिओनगीङ परमेश्वरगी साबाते माङेन्सुङ। थे सारगी मिओनगीचेन रन्डीबाजी थेमे होदि च्योक्ते खिता मेङच्येते आउदी मेलेबा मेलेबा काम खाबा ओतान। थोक खाबेकी खित्सादु परमेश्वरगी गन्धकताङ मे ताङगीन थे सारगी मिओनला सेता ओतान। थे खोरोङगी साबाते माङेन्ला मेलेबा काम खित्कानला चुक खाला नरककुण्डमा सधैँ बारगीन देत्च्येते मे धुनी नाङ लुक्ला सजाय तेरगीते सिन छ्या स्ये ज्युताला थेकी थोक खाईन थे सारगी मिओनला सजाय बिन्दा ओतान। 8 गोमा होथेबेकी खाबा च्योकराङ खाला ख्योकोन नाङ खाराक्पा स्यूबाते खोपरोङ मिलाम स्येत्कान्ते मिओनगीङ गोमा होथेबेकी खाबा च्योकराङ खाला मेलेबा काम खिदुक। च्यि सासीन रन्डीबाजीताङ होदि च्योक्ते खिता मेङच्येते काम खाला थेबेकी खोपरोङला ङ्ये ज्युत्कीदुक, परमेश्वर थेमे ज्येन सुङगीङ अधीनला मेदेत्तुक थेमे परमेश्वर दूतओन विरोध खिदुक। 9 दोक खाला ङा ङाराङ ईन सिराच्योक खित्च्येतेनी परमेश्वर छ्येते दूत मिखाएलगीङ खाबा मेतान। थे खोरोङ थोक छ्ये ईन्सीनोङ शैतानगी मोशे रो ठोक ओङजीन थेकी शैतानला ज्येनतोक मेलेबा छ्याःङ मिसिरा खाईन खालि “खोल्ला परमेश्वरगी सजाय तेरस्यीत,” सिनकामा साबा ओतान। 10 ईन्सीनोङ ख्योकोन नाङ स्यूबाते होथे मिओनगीचेन खोपरोङगी छ्या मास्येबाते बात दोगोङ च्यि बात ईन्ताका सिन ठट्टाला पुरगीदुक। थेमे सो साकान्ते पशुकी च्योकराङ खाला कोई बातकीतेचेन खोपरोङगी जस्तो अर्थ खोकीदुक थोकराङ खाला ओङच्या मेङच्या काम खिदुक। थोक खाबेकी थेबे गोःनामा परमेश्वर सजाय फाप्क्यो। 11 था थेबाला आउदी मेलेबा ओङगो। च्यिला सासीन थेबेकी कयिनगी खाबा च्योकराङ खिदुक। पैसे लोभ खाईन बालामगी खाबा च्योकराङ मेलेबा काम खिदुक। थेमे कोरहेकी च्योक खाला छ्ये छ्ये मि विरोध खिदुक। दोक खाबेकी थेबाङ कोरह च्योकराङ सजाय ङेत्ला स्यिइओ। 12 ख्योकोन संगति खिन भोज सा बेलाला छ्याःङ ङोचा मिक्किता खाला वाला थेबेकी ख्योकोनताङराङ देत्ला सेइओ। ज्येनला ता फाप्कान्ते मि ईन्सीनोङ थेबेकी सुङगीतेङ छ्याःङ वास्ता मिक्किता खाला भक्कुचूर सोला खोपरोङ सुबा गेङच्ये कामकामा खिओ। थेबानी छ्यार्बे थोपोज्यीगोङ मेताते ल्हाबेकी पुरगीन खेराते मुक्पा च्योक्ते ईन। थेमे फलफूल चिमाईओङ मागोन्दाते चाप्रेनराङ खोर लोगीन क्युरगीन स्याप्ते गुनगी बेले दोङबो च्योकराङ ईन। 13 दोस्यिककामा मेन, थेबाचेन जेसुकै फोर मैलो उरला खुलाङकान्ते समुन्द्रे छाल च्योक्ते ईन। समुन्द्रे छालगी उरगीन खुलाकीन समुन्द्रे छेउदु बाम्बाते फोर मैलोतेबा गाङे थोङा च्योकराङ होथेबेकी खाबाते मेलेबाते कामतेबाङ गाङेकी थोङगो। थेबा ग्वाका नामनेकी ङील्ला तोरला डोच्येते कार्मे क्याक्पा च्योक्ते ईन। होथोक्ते मिओनला सधैँभरि सजाय तेराला परमेश्वरगी नरककुण्डमा आउदी मुन्दाकज्यीक ठाउँ ठीक खाईन ज्याक्पा ओत। 14 होथोक्ते मिओनला चुक ओङगीते सिन आदम पुस्ता दुईन तिरी मि हनोककी परमेश्वरगी सिर च्युताते बात खिन “दि बात ङेन। च्यि सासीन था प्रभु परमेश्वर ङोला ङ्वा मुथुप्च्या थे खोरोङ दूततेबा ङ्योम्बु टीला 15 मि गाङे न्याय खिताला ओङगो। वाला थेकी थे खोरोङगी माकेत साबाते काम खित्कान्ते मिओनगी खाबाते गाङे मेलेबा काम ताला दोषी ईन साला थेबाला सजाय तेरग्यो थेमे सिरा मेङच्या आउदी मेलेबा मेलेबा साला थे विरोध खित्कान्ते मि गाङेला थेबा दोषी ईन साला सजाय तेरग्यो,” सिन साबा ओतान। 16 ख्योकोन नाङ स्यूबाते होथे मिओन नोमुङ खुशी मेङा खाला दि काम लेमु मायाङसुङ, थे थोक ओङसुङ सिन जुन बातलाङ खालि गनगनकामा खिन देत्क्यो। थेबे सेम मेलेबा ओतेकी खोपरोङला जे खिता सेम लाङगीदुक थेराङ खिओ। थेबेकी खोपरोङ जे बादोङ छ्या स्येकान ईन सिराच्योक खाला बात खिओ। थेमे खोपरोङ फाइदा ताला खो आउदी लेमु मि ईन, दोक दोक खित्कान्ते ईन सिन मिला तेक्ला बात खिओ। यहूदेकी च्याङबो खाला देत सिन साबाते 17 ङिङज्येते आज्यो न्वावे, ख्योकोनगी ङुरूङ प्रभु येशू ख्रीष्टकी खटे खाबाते मिओनगी खेराङला गोमाबा साबाते बाततेबा ठेम्बा खि। 18 थेबेकीचेन “प्रभु येशू ख्रीष्ट ग्युरला ओङा भन्दा गोमा थेला विश्वास खित्कान्ते मिओनला खिस्यी खित्कान्ते मितेबा ओङगो। खोपरोङ सेम मेलेबा ओतेकी थेबेकी खोपरोङला जे खिता सेम लाङगीदुक थेराङ खिओ,” सिन साबा ओतान, मेन? 19 ख्योकोन नाङ फाटो ओङ ज्युत्कान्ते थेमे दि जुनी बातकामा विचार खाला खोपरोङला जे खिता सेम लाङगीदुक थेराङ खित्कान्ते होथेबाराङ ईन। थेबाताङनी परमेश्वर आत्मा ओतराङ मेत। 20 ङिङज्येते आज्यो न्वावे, ख्योकोनगीचेन येशू ख्रीष्टला विश्वास खाईन खेराङगी ङेन्दाते बातला खि साबा च्योकराङ खिन झन झन लेमु खाला थे बात ङेन। थेमे परमेश्वर आत्मे शक्ति छ्य्वापेई प्रार्थना खिनराङ देत। 21 परमेश्वरगी ख्योकोनला ङिङज्ये खिनराङ देत्क्यो सिन टोक माज्येत। थेमे ङीमाई ङुरूङ प्रभु येशू ख्रीष्ट ग्युरला वाला थेकी दया खाईन तेरग्यो साबाते नोमुङ मिसिन्च्येते जुनी ङेत्क्यो सिन थेला गुलाराङ देत। 22 थेमे ज्येनगी बात ङेन्ला खोपरोङगी ङेन्दा ओताते बातला शंका खित्कान्ते मिओनला ङिङज्ये खिन थोक खिता मेङगो सिन सि। 23 ज्येनलाचेन मे ऊरसादुकी टेप जुम्ला थेन्दाच्योक खाला नरककुण्डमा स्यूक्च्येते सजायदुकी थार छ्युत। ज्येनला दया खाला दोक्ते काम खित्जीन खेराङलाङ थेबे बानी मोलोप्स्यीत सिन ख्योकोन च्याङबो खि याङ। टेक्टेस्यिकराङ ईन्सीनोङ थेबेकी खित्च्येते च्योक्ते मेलेबा काम ख्योकोनगी छ्याःङ खिता माफाप्स्यीत सिन च्याङबो खाला देत। परमेश्वरते जय जय खित्च्येते बात 24 ख्योकोन होथोक्ते मिओन नाङराङ देता ओत्सीनोङ परमेश्वरगी ख्योकोनला मेलेबा काम खित्सादुई जोए खिओ, थेकी ख्योकोनला छ्याःङ गल्ती मेताते मि ईन सिओ थेमे ख्योकोनला आउदी खाला गा खिन झिलिमिली नाम्दाकला थे खोरोङ दोन्दु देत ज्युत्क्यो। 25 परमेश्वर थेकामा ईन। ङुरूङला पापकी सजायदुकी डेल्कान्ते थेराङ ईन। थेते जय जय ओङस्यीत, थे आउदी छ्ये ईन, थेकी गाङेपा गाङेला राज्य खिओ थेमे थेत्ताङ जस्तोङ खित्च्येते अधिकार ओत। ङुरूङ प्रभु येशू ख्रीष्ट छ्य्वापेकी ङुरूङगी जुग जुगनामेई थरिङसाक ओता च्योकराङ थे सधैँभरि दोकराङ ओङला देत्स्यीत सिन सिइ। आमेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.