यूहन्ना 18 - जिरेलयेशूला पक्रे खाबाते ( मत्ती २६:४७-५६ ; मर्कूस १४:४३-५० ; लूका २२:४७-५३ ) 1 दोक खाईन दि प्रार्थना खाईन सिन्नामेकी येशू चेलातेबाताङ फिनामा थेन्गीन किद्रोन ठाङके फारकेनपा गाल्सुङ। थेपा बगैंचाज्यीक ओतान। थेमे थेबा गाङेराङ थे नाङ स्यूसुङ। 2 थेला धोका तेरकान्ते यहूदालाङ थे ठाउँ छ्या ओतान। च्यिला सासीन थे बेला बेलाला चेलातेबाताङ थेरू डोच्येते खिन ओतान। 3 थोगी छ्ये छ्ये पूजारीताङ फरिसी पाटी मिओनगी ताङाते मन्दिरदु देत्कान्ते पुलिसओन थेमे रोमी मिल्टेरीओनला टीकीन यहूदा थेरू लेप्सुङ। थेबा लालटिनताङ बास्यिङतेबा पारगीन हात हतियारतेबा खुरगीन वाबा ओतान। 4 था थे खोरोङला च्यि ओङगीते सिन गाङे बात छ्या स्येकीन येशूकी थेबे दोन्दु गाल्गीन “ख्योकोनगी सुला चाले?” सिन सासुङ। 5 थेमे थेबेकी “नासरतपे येशूला चालाप,” सिन सिरजीन थेकी “थे मि ङाराङ ईन,” सिन सिदुक। थेला धोका तेरकान्ते यहूदाङ थेरू थे मिओनताङराङ ओतान। 6 थेकी थोक खाईन “थे मि ङाराङ ईन,” सिन सिरजीन थेबाबरी फजेक सरे खिन गाल्गीन साला रिल्सुङ। 7 लोईनराङ थेकी “ख्योकोनगी सुला चाले?” सिन सिरजीन थेबेकी “नासरतपे येशूला चालाप,” सिन सिदुक। 8 थेरूई थेकी “थे मि ङाराङ ईन सिन ङे ख्योकोनला आनाङका साबाप। ख्योकोनगी ङालाराङ चालाते ईन्सीन दुरू ङात्ताङ ओताते दि मिओनलाचेन छ्याःङ माकेत,” सिन सिदुक। 9 थेकी थोक सानामेई थेकी गोमाका पालोई “आबा, खुई ङे लाःक्तु जिम्मा बिन्दाते जति सुङलाङ ङे ङाराङ छ्य्वापेई ठाल माच्युत,” साबाते बात साबा च्योकराङ ओङसुङ। 10 थेमे शिमोन पत्रुसकीचेन थे खोरोङताङ ओताते तरवार ओक थेन्गीन गाङे भन्दा छ्येते पूजारी योक्पोला ग्याप्कीन थेते सामे नामज्योकराङ बेत च्येत्कीन ताङसुङ। थे योक्पो मिनचेन माल्खस ओतान। 11 थेमे येशूकी पत्रुसला “खो दोक खाला तरवार चले माकेत, थे खोलगी नाङ स्योक। च्यि ङे आबेकी ङाला भोगे खि साबाते दुक्पा खपे खिता माफाबो?” सिन सिदुक। येशूला हन्नास ओत्सादु खेराते 12 थेरूई थे रोमी मिल्टेरी छ्येते मिताङ थे मिल्टेरीओन थेमे मन्दिरदु देत्कान्ते पुलिसओनगी येशूला जुम्गीन ठासुङ। 13 थेमे थेबेकी थेला थोङला हन्नास ओत्सादु क्याल्सुङ। हन्नासचेन कैयाफे मेमे ओतान। कैयाफाचेन थे लोईते गाङे भन्दा छ्येते पूजारी ओतान। 14 कैयाफेकीचेन खोपरोङ यहूदीओन छ्ये छ्ये मि रूबे बेलाला बात खित्जीन गोमाका यहूदी गाङेला मेलेबा ओङा भन्दा बरू मिज्यीककामा स्या लेमु ईन सिन सल्लाह बिन्दा ओतान। पत्रुसकी येशूला छ्या मेस्येओ साबाते ( मत्ती २६:६९-७० ; मर्कूस १४:६६-६८ ; लूका २२:५५-५७ ) 15 येशूला थोक खाला जुम्ला खेरजीन शिमोन पत्रुसताङ ज्येन चेलाज्यीगोङ थे तिङ ङ्योगीन गाल्सुङ। थे ज्येनते चेलेकी गाङे भन्दा छ्येते पूजारीला छ्या स्येबा ओतेकी थेचेन येशूताङ सरासर थे पूजारी खाम्बे स्याङकानेराङ स्यूसुङ। 16 पत्रुसचेन फिनामा गोई खादुराङ लाकीन देत्सुङ। थेमे थे ज्येनते चेलेकी ग्युरगीन वाकीन गोदु पालो देत्कान्ते फेम्मे मिला साकीन थेलाङ नाङने खेरसुङ। 17 थेमे थे फेम्मे मिकी पत्रुसला “च्यि खोङ थे मि चेलाराङ मेनरो?” सिन ठिजीन थेकी “मेन मेन, ङानी मेन,” सिन सिदुक। 18 थेजीन खेबा ओतेकी खित्सादु थे खाम्बादु काम खित्कान्ते मिओन थेमे मन्दिरदु देत्कान्ते पुलिसओन स्याङकादु मे फुकीन फेरो खाङ लाकीन देत्कीन मे देइन ओतान। थेमे पत्रुसोङ थेबे खादुराङ लाकीन देत्कीन मे दाप्ला स्यूसुङ। गाङे भन्दा छ्येते पूजारीकी येशूला बात ठिबाते ( मत्ती २६:५९-६६ ; मर्कूस १४:५५-६४ ; लूका २२:६६-७१ ) 19 थे बेलालाराङ गाङे भन्दा छ्येते पूजारीकी येशूला थे चेलाओन चुक्ते मि ईन्दे थेमे थेकी लोप्च्येते बात च्यि ईन्दे सिन ठिसुङ। 20 ठिजीन थेकी “ङे लोप्च्येते बात ङे ओताते जति मि गाङेकी थोच्या खाईन साबा ओत। यहूदीओन रूसा रूसाला मिटिङ खित्च्येते खाम्बे नाङला ईन्स्यीत थेमे परमेश्वर मन्दिरदु ईन्स्यीत ङे दि बातओन लापा ओत। ङे खाराक्पा सुङलाङ बातज्यीगोङ साबा मेत। 21 थोगी ङाला च्यिला ठिइते? ङे बात थोकान्ते मिओनला ङे साबाते बातओन लेमु खाला छ्या ओत। थेबालाराङ ठि,” सिन सिदुक। 22 थेकी थोक सिरजीन थे दोन्दु ओताते मन्दिरदु देत्कान्ते पुलिसज्यीगी “गाङे भन्दा छ्येते पूजारीताङ बात खाबे ढंग खुईते दिराङ ईन?” सिन थेला छ्येतनापाराङ ग्याप्सुङ। 23 थोक खित्जीन येशूकी “ङे खइँदा गल्ती बात खासीन दि गल्ती खासुङ सिन सि। ङे साबाते बात ठीकराङ ईन्सीन खो च्यिला ङाला दुङगीते?” सिन सिदुक। 24 थेरूई हन्नासकी थेला ठाबाते ठाबालाराङ गाङे भन्दा छ्येते पूजारी कैयाफा ओत्सादु ताङसुङ। पत्रुसकी येशूला छ्या मेस्येओ सिन याङराङ साबाते ( मत्ती २६:७१-७५ ; मर्कूस १४:६९-७२ ; लूका २२:५८-६२ ) 25 शिमोन पत्रुसचेन थोरूमसाकोङ लाला थेरू मे देइनराङ ओतान। थेमे थेरू ओताते मिओनगी थेला “च्यि खोङ थे मि चेलाराङ मेनरो?” सिन ठिसुङ। ठिजीन थेकी “मेन मेन, ङानी ईनराङ मेन,” सिन सिदुक। 26 थेमे थे खाम्बादुराङ काम खित्कान्ते मिओन नाङ दोक्पोईकी थेला “ङेनी खोल्लाङ थे मित्ताङराङ बगैंचादु थोङा ओतान, मेनरो?” सिन ठिसुङ। दि मिचेन गोमाका पत्रुसकी तरवारगी ग्याप्कीन नामज्योक च्येताते मिते दाक्पोन मि फाप्कीन ओतान। 27 थेकी थोक सिन ठिजीन पत्रुसकी लोईनराङ “ङानी मेन,” सिन सिदुक। थेकी थोक सिराईताङराङ कुकुरी क्वाँ सिन छ्योबोङ दाक फोसुङ। येशूला पिलातस दोन्दु क्यालाते ( मत्ती २७:१-२ , ११-१४ ; मर्कूस १५:१-५ ; लूका २३:१-५ ) 28 थेमे थेबेकी येशूला कैयाफे खाम्बादुकी रोमी गेल्बो हाकिम खाम्बापा खेरसुङ। थेजीन नाम लाङा लाङा खाबा ओतान। निस्तार चाड लेपा ओतेकी थे भोज साप्ला खोपरोङ बिटुले मिक्किस्यीत सिन थे खाम्बे नाङने मुस्यूक्पा खाईन यहूदीओन स्याङकामाराङ देत्सुङ। 29 थोगी हाकिम पिलातसकी नाङनेकी फिनामा थेन्गीन च्याकीन “दि मिकी च्यि मेलेबा काम खाबेकी ख्योकोनगी दिला दुरू खुलाबे?” सिन ठिसुङ। 30 थेमे थेबेकी “दि मेलेबा मि मेन्दा ईन्सीन ङ्योकोन दिला खो ओत्सादु खुलाङच्याराङ मेतान,” सिन सिदुक। 31 थोक सिरजीन थेकी “दि मिला ख्योकोन खेराङगीराङ खेरला खेराङ धर्मे नियम ताला न्याय खि,” सिन सिदुक। थोक सानामेकी थेबेकी “ङ्योकोनगी सुइँदा मि सेता रोमी गेल्बो नियमताङ मिडिगो,” सिन सिदुक। 32 थेबेकी थोक सानामेई येशूकी थे खोरोङ चुक खाला स्या फाप्कीते सिन गोमाका साबाते बात साबा च्योकराङ ओङसुङ। 33 थेमे पिलातस लोईन नाङने स्यूसुङ। थेमे येशूला थे खोरोङ दोन्दु कातोङ ताङगीन “यहूदीओन गेल्बो खोराङ ईनना?” सिन सासुङ। 34 थोक सिरजीन येशूकी “दि बात खो खोरोङराङ सिन ओताना सुइँदेकी खोल्ला लाःप्सुङा?” सिन सिदुक। 35 थोक सिरजीन थेकी “च्यि खुई ङा यहूदी दुका साबाप? खेराङ जातकी मित्ताङ खेराङ छ्ये छ्ये पूजारीकीराङ खोल्ला खुलाकीन ङे लाःक्तु सोम्पे खाबाते ईन। खुई च्यि खाबे?” सिन सासुङ। 36 थोक सिरजीन येशूकी “ङे राज्य दि सा लुङबेते मेन। थोक ईन्दा ईन्सीन ङा यहूदीओन छ्ये छ्ये मि लाःक्तु माफाप्स्यीत सिन ङे काम खित्कान्ते मिओन थेबाताङ जीङच्या ओतान। ङे राज्य दि सा लुङबेते ईनराङ मेन,” सिन सिदुक। 37 थेमे थेकी “थोक ईन्सीनका खो गेल्बोराङ दुका ओना, मेन?” सिन सिरजीन येशूकी “ङा गेल्बो दुका सिन खुई साबाते ठीकराङ ईन। सत्यते बात च्यि ईन्दे सिन लोपालाराङ ङा देमा वाकीन क्या फापाते ईन। सत्यते बात थोला दि पक्काराङ ईन्दाते बात ईन सिन पत्ते खित्कान्ते मिकी ङे बात ङेन्ग्यो,” सिन सिदुक। 38 थेमे पिलातसकी “सत्यते बात च्यि ईन्दे ओना?” सिन ठिसुङ। थेरूई लोईनराङ फिनामा थेन्गीन पिलातसकी यहूदीओनला “दिला च्यि सजाय तेरच्ये? ङेनी दिकी छ्याःङ गल्ती खाबा माथोङसुङ। 39 जेलदु ज्याक्पाते मिज्यीकला लोई ठाङमा निस्तार चाडगी बेलाला ङे तोङा फाप्च्येते ख्योकोनते चलन ओत। च्यि दि पालोला ङे दि यहूदीओन गेल्बोला ताङसीन ओङगो?” सिन सिदुक। 40 थेकी थोक सिरासात्तु यहूदीओनगी “मेन मेन, दिला मेन, बरू बारब्बाला थोङ,” सिन नामज्योक बुराङ साच्या खाईन छेरा खासुङ। थेबेकी थोङ साबाते बारब्बाचेन डाँका ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.