यूहन्ना 12 - जिरेलमरियमगी येशूला मोर्गु कुकीन बिन्दाते ( मत्ती २६:६-१३ ; मर्कूस १४:३-९ ) 1 निस्तार चाड लेपा ङीमा ठुक गोमा येशू बेथानीपा लेप्सुङ। थोङला थे खोरोङगी स्यिसादुकी सोम्बो लोक्पाते लाजरस बेथानीदुराङ देत्कीन ओतान। 2 थेमे थेरू ग्वासेला खाम्बाज्यीक्तु येशूला साप साप्ला काताङा ओतान। मार्था साप गोला तेरगीन ओतान। लाजरसोङ थेरू येशूताङ साप साकान्ते मिओनताङ ङ्योम्बुराङ देत्ला साप सेइन ओतान। 3 थेमे मरियमगीचेन माना खाङजो आउदी महँगोते स्यीम्बुज्यीक बास्ना चले खित्च्येते सक्कली जटामसी मोर्गु खुलाकीन येशू काम्बाला कुकीन बिन्सुङ। थेमे थे मोरोङ टेकीराङ काम्बा पिकीन बिन्सुङ। थे मोर्गु बास्नेकी खाम्बाराङ गाङे खाङसुङ। 4 थेरू येशू चेलातेबे नाङ तिरी थेला धोका तेरकान्ते यहूदा इस्करियोतकीचेन 5 “दि मोर्गु च्वाकीन च्याकीन पैसाचेन दुक्पा ङेताते मिओनला गोकीन बिन्दा ईन्सीन लेमु ओङच्या मेतानरो? दिनी चाँदी डबल सय सुमगी मोर्गु ईन,” सिन सिदुक। 6 दुक्पा ङेताते मिओनला ङिङज्ये खितेकी थेकी थोक साबा मेतान। थेचेन चोर ओतान। थेबा गाङे पैसा ज्य्वाकान्ते थेराङ ओतान। थेमे थे खोरोङला गोबे बेलाला थेकी थे पैसाराङ थेन्ला चले खिन ओतान। 7 थेमे येशूकी थेला “दिला छ्याःङ मासेर। दिकीचेन ङाला सासगास खित्जीन कुता फाप्च्येते मोर्गु थरिङराङ कुकीन बिन्दाते ईन। 8 दुक्पा ङेताते मिओननी सधैँ ओत्कीन ओत। ङानी था काल्बासाक ख्योकोनताङ देत्च्येते मेन,” सिन सासुङ। 9 येशू बेथानीदु दुक्लो सिरा थोकीन थेला ठेताला थे बेलालाराङ यहूदी काल्बेई थेरू लेप्सुङ। थेबाचेन येशूला ठेतालाकामा मेन्देकी थेकी स्यिसादुकी सोम्बो लोक्पाते लाजरसला ताप्लाङ थेरू वाबा ओतान। 10 दोक ओङाला स्यूनामेई छ्ये छ्ये पूजारीकी लाजरसलाङ सेत्च्ये ठो खासुङ। 11 च्यिला सासीन थेला सोम्बो लोक्नामेईराङ काल्बा च्योक्ते यहूदीओनगी थेबे बात ङेन्दा ताङगीन येशूला विश्वास खिताला स्यूबा ओतान। येशू यरूशलेमपा गालाते ( मत्ती २१:१-११ ; मर्कूस ११:१-११ ; लूका १९:२८-४० ) 12 थेमे ङारो च्योक्ते च्यि ओङसुङा सासीन यरूशलेमदु चाड माने खिताला वाबाते मिओनगी येशू यरूशलेमपा ओङगीन दुक्लो सिरा थोसुङ। थे मिओन आउदी काल्बेई ओतान। 13 थेमे थेबा खजूर दोङबो हाँगा खुरगीन च्याकीन येशूला ठेता खित गाल्सुङ। थेला ठेत्कीन थेबेकी छेरा खिनकामा “होसन्ना, प्रभु परमेश्वरगी देमा ताङाते इस्राएलीओन गेल्बो काल्बासाक सोन्स्यीत। थेते जय जय ओङस्यीत,” सिन येशूते जय जय खासुङ। 14 गधे कीउज्यीक खुलानामेई येशूचेन थे लाक जेकीन ख्याम्बा ओतान। थे थोक खाला ओङगो सिन थाङबोका परमेश्वर बातला 15 “सियोन सारदु देत्कान्ते मिवे, ख्योकोन ज्यीबा माकेत। ख्योकोन गेल्बोचेन गधे कीउ लाक्तु जेला ख्योकोन ओत्सादु ओङगो,” सिन टिबा ओतान। 16 मिओनगी थोक खाबातेताङ परमेश्वर बातला थोक सिन टिबाते बातओन येशू चेलाओनगी गोमा छ्याःङ खोबा मेतान। परमेश्वरगी थेला स्यिसादुकी सोम्बो लोगीन स्वर्गने खेरनामेकीका मिओनगी थेते थोक खाईन जय जय खाबाते थेमे परमेश्वर बातला थोक सिन टिबाते बात थेबेकी लेमु खाईन छ्या स्येसुङ। 17 येशूकी लाजरसला फुगी नाङनेकी थेन्ला स्योक सिन काताङगीन स्यिसादुकी सोम्बो लोक्पा थोङकान्ते मिओनगी थे बात गाङेपे मिओनला लाःप्कीन फैले खाबा ओतान। 18 थेकी थोक अचम्बते काम खासुङ सिन थोबा ओतेकीराङ थोक काल्बेई मि थेला ठेता खित वाबा ओतान। 19 दोक ओङा थोङनामेई फरिसी पाटी मिओनगी “खोइ ङुरूङगी च्यि खिता थुप्सुङारो? ओताते मि जति गाङे दि छ्य्वापा लै खाईन सिन्सुङ,” सिन खोपरोङ नाङ बात खासुङ। ज्येन जातकी मिओनगी येशूला ठेता चालाते 20 निस्तार चाडगी बेलाला परमेश्वरला माने खिताला यरूशलेमदु वाबाते मि नाङ कोई कोई ग्रीकओनोङ ओतान। 21 थेबेकी येशू चेला फिलिप दोन्दु गाल्गीन “हजूर, ङ्योकोन येशूला ठेता खिता साबाप,” सिन सिदुक। फिलिपचेन गालील अञ्चलते बेथसेदा सिरसादु मि ओतान। 22 थेकी गाल्गीन दि बात अन्द्रियासला लाःप्सुङ। थेमे थेबा ङिकाराङ येशू ओत्सादु गाल्गीन थेबेकी थेला ठेता चाल्ला दुक सिन लाःप्सुङ। 23 थेमे थेकी थेबाला “था परमेश्वर ओत्सादुई वाबाते मि चुक छ्ये ईन्दे सिन परमेश्वरगी मिओनला छ्या स्ये ज्युत्च्ये बेला लेपा खासुङ। 24 ङा ख्योकोनला दि बात सिओ। चुक सासीन ठे गेडा थाराङ ज्याक्सीन थे गेडाईते गेडाईकामा देत्क्यो। तर स्यीङला ताप्सीन थे सबी नाङ रूल्ला ठे झाङ केला ठे गेडा काल्बेई गोन्ग्यो। 25 बात दोक ईन्देकी तिरी बो माताबा खाला सुइँदेकी दाक्पोन ज्यानगी माया खिदुक सासीन थेकी नोमुङ मिसिन्च्येते जुनी मेङेदो। दाक्पोन फाइदा माताबा खाला दि जुनीला दाक्पोन ज्यानगी मायाङ मारे खित्कान्ते मिकीचेन नोमुङ मिसिन्च्येते जुनी ङेत्क्यो। 26 ङाला थे खोरोङ मालिक ईन सिरकान्ते मिकीचेन ङे खाबा च्योकराङ खिता फाप्क्यो। थोक खानामेई ङा जहाँ देत्कीदुक थेङ ङात्ताङराङ देत्क्यो। ङे खि साबाच्योक खित्कान्ते मिलाचेन ङे आबेकी मान तेरग्यो। येशूकी थे खोरोङ स्यिच्येते बात खाबाते 27 थाल्ला ङाला आउदी पीर लाला दुक। थेमे च्यि ङे ‘आबा, ङाला दोक दुक्पा ओङ माज्युत,’ सिन सिरच्या? अहँ, मेन। दोक खाला दुक्पा भोगे खितालाराङ ङा दुरू वाबाते ईन। 28 आबा, खो खोरोङ चुक छ्ये ईन्दे सिन मिओनला तेन्ला बिन,” सिन सिदुक। थेकी थोक सानामेकी परमेश्वरगी स्वर्गनेकी “ङे ङाराङ चुक छ्ये ईन्दे सिन गोमाका तेन्गीन बिन्दा ओत। थेमे था लोक्लाङ ङा तेन्ग्यो,” सिन सिदुक। 29 थेरू लाकीन देता ओताते मि काल्बेईकी स्वर्गनेकी दोक सिन बात खाबाते ङोरो थोकीन “नाम गुरूङ खासुङ,” सिन सासुङ। थेबे नाङ लालेईचेन “मेन मेन, परमेश्वर दूतज्यीगी दित्ताङ बात खासुङ,” सिन सासुङ। 30 थेमे येशूकी थेबाला “थाल्ला ख्योकोनगी थोबाते ङोरो ङे लाईदु मेन। ख्योकोनगी थोस्यीत सिनराङ दोक ओङाते ईन। 31 था परमेश्वरगी दि सा लुङबे मि न्याय खित्च्ये बेला लेप्सुङ। था थेकी दि सा लुङबे गेल्बो शैतान शक्ति ठ्वाला दुरूकी तेन्ला तोङगो। 32 थेमे ङाला स्यिङगी थामला टाँए खानामेई ङा मि गाङेला ङाराङ छ्य्वापा ओङ ज्युत्क्यो,” सिन सिदुक। 33 थे खोरोङ चुक खाला स्यिइते सिन सिराला थेकी दि बात साबा ओतान। 34 दि बात थोकीन थेरू ओताते मिओनगी “परमेश्वरगी तोङगो साबाते ख्रीष्ट नोमुङ मिस्यिओ सिन परमेश्वर नियमला साबा ओताते बात ङ्योकोनगी थोबा ओत। परमेश्वर ओत्सादुई वाबाते मिला स्यिङगी थामला टाँए खिओ सिन खो चुक खाला सिते? थोक ईन्सीन परमेश्वर ओत्सादुई वाबाते मि सु ईन्दे ओना?” सिन सासुङ। 35 थेरूई थेकी थेबाला “था टिक्पी दिनसाककामा स्वर्गे नाम्दाक ख्योकोनताङ देत्क्यो। थोगी ख्योकोन नाम्दाकला ख्योम। स्वर्गे नाम्दाक ख्योकोनताङ देत देतसाक ख्योकोन मुन्दाकला ख्याम्बा माफाबो। मुन्दाकला ख्याम्कान्ते मिला थे खोरोङ खापा डुइन ओते सिन छ्याःङ छ्या मेङगो। 36 स्वर्गे नाम्दाक खेराङताङ ङ्योम्बु ओत्केलाराङ ख्योकोन थे नाम्दाक छ्य्वापा लै खि। दोक खासीन ख्योकोनचेन नाम्दाकला ख्याम्कान्ते मि ओङगो,” सिन सिदुक। दि बाततेबा खाईन सिन्नामेकी येशू थेरूई गाल्सुङ। थेमे मिओनगी मोथोङस्यीत सिन थेङला खापाङ माथेन्सुङ। यहूदीओनगी थोरूमोङ येशूला विश्वास माक्याबाते 37 येशूकी खोपरोङ मिगी दोनगी नाङलाराङ अचम्बते काम काल्बेई खाबा ईन्सीनोङ यहूदीओनगी थेला विश्वास माक्यासुङ। 38 थेबेकी थोक खानामेई परमेश्वर बात खित्कान्ते यशैयेकी “प्रभु परमेश्वर, ङ्योकोनगी साबाते बात गाङेकी थोसीनोङ सुई नामज्योक सेत्सुङारो? थेमे खुई छ्ये छ्ये काम खाईन तेन्सीनोङ प्रभु परमेश्वर खोत्ताङ चुक छ्येज्यीक शक्ति ओता ईन्दाका सिन सुई छ्या स्येसुङारो?” सिन टिबाते बात साबा च्योकराङ ओङसुङ। 39 थेबेकी थेला च्यिला विश्वास मिक्किते सिनोङ यशैयेकी गोमाका दोक सिन साबा ओतान। 40 चुक सासीन “प्रभु परमेश्वरगी थेबे मिक छ्याःङ मोथोङच्या जोला दुक। थेमे थेबे सेमोङ छ्याःङ छ्या मेस्येच्या जोकीन बिन्ला दुक। थोक ईन्देकीराङ थेबा परमेश्वरगी खाबाते काम थोङसीनोङ छ्याःङ खोबा मुथुप्च्या गाल्ला दुक थेमे परमेश्वर बात थोसीनोङ छ्याःङ छ्या मेस्येच्या गाल्ला दुक,” साकीन “थोगीराङ थेबा ङे छ्य्वापा लै मिक्किदुक। थोक खाबा ईन्सीन ङा थेबाला थेबे पापदुकी टाल्ला लेमु खित्च्या ओतान,” सिन प्रभु परमेश्वरगी साबाते बादोङ साबा ओतान। 41 येशूताङ चुक छ्येज्यीक शक्ति ओता ईन्दाका सिन थोङा ओतेकीराङ यशैयेकी थे विषयला थाङबोका थोक सिन साबा ओतान। 42 ईन्दाका येशूकी खाबाते अचम्बते कामतेबा थोङनामेई यहूदीओनते छ्ये छ्ये मि नाङ काल्बेईकी थेला विश्वास खासुङ। ईन्सीनोङ फरिसी पाटी मिओनगी खोपरोङला मिटिङ खित्च्येते खाम्बादु स्यूक्पा मेङेत्च्या खाला तेन्ला तोङगीता सिन ज्यीबेकी खोपरोङगी थेला विश्वास खिताला स्यूबाते बात सुङलाङ मालाःप्सुङ। 43 थेबालानी परमेश्वरगी भन्दाङ मिओनगी मान खाबातेका मन परे खिन ओतान। 44 थेमे येशूकी मि गाङेकी थोच्या खाईन “ङाला विश्वास खित्कान्ते मिकीचेन ङालाकामा मेन्देकी ङाला दुरू तोङकान्तेलाङ विश्वास खाबाते ईन। 45 थोकराङ खाला ङाला थोङकान्ते मिकीचेन ङाला दुरू तोङकान्तेलाङ थोङाते ईन। 46 ङाला विश्वास खित्कान सुङ मुन्दाकला देता माफाप्स्यीत सिन स्वर्गे नाम्दाक ङा दि सा लुङबादु वाबाते ईन। 47 ङे बात थोलाङ ङे खि साबाच्योक मिक्किकान्ते मिला ङा सजाय मेतेरो। च्यिला सासीन ङा दि सा लुङबे मिला सजाय तेराला वाबाते मेन। बरू थेबेकी पापकी सजाय मेङेत्स्यीत सिन वाबाते ईन। 48 सुइँदेकी ङाला परमेश्वरगी ताङाते मेन सिन खिदुक सासीन थेमे ङे साबाते बात मेङेन्दुक सासीन थेला न्याय खित्कान्ते ओत्कीन ओत। थोक्ते मिला था न्याय खिते छोमु थरिङोला ङे लापाते बात ताला थोक्ते मि दोषी ईन सिन सजाय तेरग्यो। 49 च्यिला सासीन ङे खाबाते बाततेबा ङाराङगी जोकीन खाबाते मेन। ङेनी ङाराङला दुरू तोङकान्ते आबेकी कोता कोताते बातकामा खाबाते ईन। 50 आबेकी कोताते बातओन ङेन्कान्ते मिकी नोमुङ मिसिन्च्येते जुनी ङेत्क्यो सिन ङाला छ्या ओत। थोगी आबेकी ङाराङला च्यि च्यि साबा ओताने ङा थे थे बातराङ खिओ,” सिन बात खासुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.