यूहन्ना 11 - जिरेललाजरस स्याप्ते बात 1 थेमे बेथानीदु देत्कान्ते लाजरस आउदी खाईन नाबा ओतान। थेत्ताङ मरियम थेमे थेबे आज्यी मार्थाङ थे युलदुराङ देत्कीन ओतान। 2 बाजिई प्रभु येशू काम्बाला बास्ना चले खित्च्येते मोर्गु कुला थे मोरोङ टेकी पिला तेरकान्ते मरियम दिराङ ओतान। थेमे होदिते न्वाते नाबा ओतान। 3 लाजरस थोक खाईन नाबेकी आज्यीतेबा ङिबोकी “प्रभु, खुई ङिङज्ये खित्च्येते खोरोङ र्वा आउदी खाईन नाबा ओत,” सिन येशूला लोन ताङसुङ। 4 थे लोन थोनामेकी थेकी चेलातेबाला “थे थोक खाईन नाबाते स्यिला ड्वाप्ला मेन। बरू परमेश्वरगी चुक छ्येज्यीक काम खिता थुप्कीते थेमे परमेश्वर फुज्युङताङ चुक छ्येज्यीक शक्ति ओते सिन मिओनगी छ्या स्येस्यीत सिनराङ दोक ओङाते ईन,” सिन सिदुक। 5 येशूकी थेबा पुन सुमकारला ङिङज्ये खिन ओतान। 6 थे लोन थोनामेकीङ थे ङीमा ङिसाक थे खोरोङ देत्कीन ओत्सादुराङ देत्सुङ। 7 थेमे थे तिरी थेकी चेलातेबाला “लो था ङुरूङ यहूदियापाराङ ग्युरला डुइ,” सिन सिदुक। 8 थेमे थेबेकी “आबिई गुरू, खरचिङ भर्खरकामा यहूदीओनगी खोल्ला दोई ग्याप्ला सेता चाला ओतान। थोक ईन्सीनोङ च्यि खो थेपाराङ ग्युरला डोच्या?” सिन सासुङ। 9 थोक सिरजीन थेकी “च्यि ङीमाईला घण्टा च्युन्ङी ङीन मेङगोतरो? थेमे ङीमे कार्बोला ख्याम्कान्ते मिला नार्दोक मेदेगो। नाम्दाक ओतेकी थेकी लेमु खाला थोङा थुप्क्यो। 10 तर नुपला ख्याम्कान्ते मिचेन मुन्दाककी खित्सादु नार्दोक ग्याप्ला रिल्ग्यो,” सिन सिदुक। 11 दोस्यिक साकीन सिन्नामेकीङ थेकी “ङुरूङ र्वा लाजरस ङिक गाल्दुक। तर ङा थेपा गाल्ला ङिक गाल्सादुकी थेला लोङगो,” सिन सिदुक। 12 थोक सिरजीन चेलातेबेकीचेन “थोक खाईन ङिक गाला ओत्सीनका थे ठाइतासीन प्रभु,” सिन सिदुक। 13 येशूकी लाजरस स्यिदुक सिरा चाला ओतान। लाजरस ङिक गाल्दुक सिरजीन थेबेकीचेन साँच्चीराङ थे ङिक गालातेकामा ईन्दासीन सिन खोसुङ। 14 थोगी थेकी थेबेकी लेमुराङ खाला खोच्या खाईन “ङेनी लाजरस स्यिदुक सिन साबाते ईन। 15 थेमे ख्योकोनला लेमु ओङस्यीत सिन ङाला दि बातला गा लाबा ओत। चुक सासीन थे स्यिजीन ङा थे दोन्दु मेतान। था ख्योकोनगी झन ङाला विश्वास खिता थुप्क्यो। लो थाचेन ङुरूङ थे ओत्सापा डुइ,” सिन सिदुक। 16 थेरूई थे दिदिमस सिराते थोमेकीचेन ज्येन चेलातेबाला “लो थोक ईन्सीन ङुरूङोङ गाङेराङ डुइ, स्या फाप्सीनोङ गुरूताङराङ स्यिइ,” सिन सिदुक। मिला सोम्बो लोक्कान्ते येशूराङ ईन 17 बेथानीदु लेप्नामेकी लाजरसचेन स्यिइनोङ ङीमा स्यी गोमाका फुकदु ज्याक्पाते बात येशूकी छ्या स्येसुङ। 18 बेथानी यरूशलेमदुकी झन्दै कोसज्यीकजो थारीला फाप्कीन ओतान। 19 थेमे मार्थाताङ मरियमला न्वाते स्याप्तेला पीर माकेत, माङु सिन सम्झे खाला तेराला थेरू ज्येन यहूदीओन काल्बेई ख्योला ओतान। 20 येशू ओङगीन दुक्लो सिरा थोकीन मार्था थेला ठेता खित गाल्सुङ। मरियमचेन खाम्बादुराङ देत्सुङ। 21 येशूला ठेत्कीन थेकी “प्रभु, खो दुरू ओता ईन्सीन ङे न्वा स्यिच्या मेतान। 22 थोक ईन्सीनोङ खुई नाङ सासीन परमेश्वरगी खोल्ला थोरूमोङ जेङ तेरग्यो सिन ङाला छ्या ओत,” सिन सिदुक। 23 थेमे येशूकी “खुई न्वा लोक्ला सोम्बो लोइओ,” सिन सिदुक। 24 थोक सिरजीन मार्थेकी “ईन स्याप्ते मिओन सोम्बो लोक्जीन था तिरी थेङ सोम्बो लोइओ सिन ङाला छ्या ओत,” सिन सिदुक। 25 थेमे येशूकी थेला “मिओनला स्यिसादुकी सोम्बो लोक्कान्ते ङाराङ ईन। थेमे नोमुङ मिसिन्च्येते जुनी तेरकान्तेङ ङाराङ ईन। ङाला विश्वास खित्कान्ते मिचेन नोमुङ मिसिन्च्येते जुनी ङेतेकी स्यिसीनोङ लोक्ला सोम्बो लोइओ। 26 ङाला विश्वास खाला नोमुङ मिसिन्च्येते जुनी ङेता ओताते मिला कालगी छ्याःङ खिता मुथुबो। च्यि खो दि बात पत्ते खिओ?” सिन सिदुक। 27 थेमे थेकी “ईन प्रभु, खो परमेश्वरगी दि सा लुङबादु तोङगो साबाते ख्रीष्ट ईन, खो परमेश्वर फुज्युङ ईन सिन ङा विश्वास खिओ,” सिन सिदुक। 28 दि बात खाईन सिन्नामेकी थे खाम्बापा ग्युरगीन गाल्सुङ। थेमे नुमुतेला थे मोरोङ खादु काताङगीन खोले खाईन “गुरू वादुक। थेकी खोल्ला ठेता खित स्योक्लो,” सिन सिदुक। 29 दि बात थोबासात्तु मरियम खोक लाकीन येशूला ठेता खित ख्याम्सुङ। 30 येशू थेजीनसाकोङ थेरू युलदु लेपा मेतान। थे थोङला मार्थाताङ बात खासादुराङ ओतान। 31 मरियम थोक खाईन खोक लाकीन ड्वा थोङगीन थेबाला पीर माकेत, माङु सिन सम्झे खाला तेराला खाम्बादु वाबाते यहूदीओनोङ था थे न्वाते रो ज्याक्पाते फुकनापा गाल्ला ङ्वाप्लाका ख्याम्बाते ईन्दासीन सिन थे तिरी तिरी गाल्सुङ। 32 थेमे मरियमगी येशू ओत्सादु ख्योलाज्यीकताङ थे काम्बाला से खिन “प्रभु, खो दुरू ओता ईन्सीन ङे न्वा स्यिच्या मेतान,” सिन सिदुक। 33 मरियम ङुबाते थेमे थेत्ताङ वाबाते यहूदीओनोङ ङुबा थोङजीन येशूलाङ खपेराङ खिता मुथुप्च्या आउदी मेलेबा लासुङ। 34 थेमे थेकी “ख्योकोनगी थेला खापा ज्याक्पा ओते?” सिरजीन थेबेकी “स्योक प्रभु ङ्योकोन खोल्ला तेन्ला तेरग्यो,” सिन सिदुक। 35 थेमे येशू ङुसुङ। 36 थोक खाईन थे ङ्वा थोङजीन थे यहूदीओनगी “उ थोङसुङ, थेकी लाजरसला चुक ङिङज्ये खित्च्या ईन्दाका,” सिन सिदुक। 37 थेबे नाङ लालेकीचेन “दिकी अन्धे मिकनी थोङा थुप्च्या जोबा ओतान सासीन च्यि लाजरसलाङ स्यिर मुज्युता खाला थार ज्युत्च्या मेतानरो?” सिन सासुङ। येशूकी लाजरसला सोम्बो लोक्पाते 38 येशूला याङराङ खपेराङ खिता मुथुप्च्या आउदी मेलेबा लासुङ। थेमे थे लाजरस रो ज्याक्पाते फुकनापा लेप्सुङ। थे फुकचेन रो ज्य्वाबाला ठाःक ठुकीन जोबा ओतान। थेमे थे फुगी गोनापा दोज्यीक क्योरगीन ज्याक्पा ओतान। 39 येशूकी मिओनला “थे दो थेरूकी थेन,” सिन सिदुक। थेमे थे स्यिकान्ते लाजरस आज्यी मार्थेकीचेन “प्रभु, थेला दुरू ज्याक्पातेराङ ङीमा स्यी गाल्गीन सिन्सुङ। थानी रूँरीङ खाकीन सिन्दाप,” सिन सिदुक। 40 थेमे येशूकी “च्यि खोल्ला ङे आनाङका ङे बात पत्ते खासीन परमेश्वरगी चुक छ्येज्यीक काम खिता थुप्च्या ईन्दाका सिन छ्या स्येक्यो सिन साबाते मेनरो?” सिन सिदुक। 41 थेमे थेबेकी थे फुगी गोदु ओताते दो थेन्सुङ। थेमे थेकी नामने ताकीन “आबा, ङा खोल्ला धन्यवाद सिओ। खुई ङे खाबाते बिन्ती ङेन्सुङ। 42 आबा खुई सधैँ ङे बिन्ती ङेन्ग्यो सिन ङाला छ्या ओत। ईन्सीनोङ थाल्ला दुरू ङे फेरोला ओताते मिओनगी ङाला आबा खुईराङ ताङाते दुका सिन छ्या स्येला ङाला विश्वास खित्स्यीत सिन दोक साबाते ईन,” सिन सिदुक। 43 दोस्यिक साकीन सिन्नामेकी थेकी कस्स्ये खाईन “ए लाजरस, फिनामा थेन्ला स्योक,” सिन थेला काताङसुङ। 44 थेमे थे स्याप्ते लाजरस दाक फिनामा थेन्गीन लिच्युङ। थेला फुकदु ज्य्वाजीन लाक्पा काम्बा ठीलाते कार्मुते खोलाक थोरूमोङ ठीलाते ठीलाराङ ओतान। छ्येतनापा ठीलाते खोलाकोङ थोगी थोकराङ ओतान। थेमे येशूकी थेबाला “लो दिला फुकदु ज्य्वाजीन ठीलाते गाङे टोल्ला बिन, दि ख्याम्बा थुप्स्यीत,” सिन सिदुक। येशूला सेताला ठो खाबाते ( मत्ती २६:१-५ ; मर्कूस १४:१-२ ; लूका २२:१-२ ) 45 मरियम खाम्बादु वाबाते काल्बा च्योक्ते यहूदीओनगी येशूकी खाबाते दि काम थोङगीन थेला विश्वास खासुङ। 46 तर थेबे नाङ लालेकीचेन फरिसी पाटी मिओन ओत्सादु गाल्गीन येशूकी दोक दोक खासुङ सिन गाङे थेबाला लाःप्सुङ। 47 थेमे छ्ये छ्ये पूजारीताङ फरिसी पाटी मिओनगी यहूदीओन छ्ये छ्ये मि ज्येनलाङ काताङगीन च्याकीन “था ङुरूङगी चुक खित्च्ये? दि मिकीनी अचम्बते काम काल्बेई खिदुक। 48 ङुरूङगी दिला छ्याःङ मिक्किता खाईन दोकराङ खिन देत च्युत्सीन मि गाङेराङ थे छ्य्वापा लै खिओ। थोक ओङनामेकी रोमीओन दुरू वाला ङुरूङते मन्दिर ठोइओ। थेमे ङुरूङ जातकी मिङ सेत्क्यो,” सिन बात खासुङ। 49 थेबे नाङ थे लोईते गाङे भन्दा छ्येते पूजारी कैयाफा सिरातेङ ओतान। थेकी थेरू ज्येनतेबाला “ख्योकोनला छ्याःङ छ्या मिन्दुक। 50 ङुरूङ जातकी मि गाङेला मेलेबा ओङा भन्दा मिज्यीककामा स्या लेमु ईन सिन ख्योकोन विचारराङ मिक्किदुक,” सिन सिदुक। 51 दि बात कैयाफेकी थे खोरोङ सेमला नोकीन खाबा मेतान। थे लोईते गाङे भन्दा छ्येते पूजारी ईन्देकी येशू यहूदी गाङे लाईदु स्यिइओ सिन थेकी थोक खाईन तिरी ओङच्येते बात खाबा ओतान। 52 थेबे लाईदुकामा मेन, लुङबा लुङबाला देता ओताते परमेश्वर फुज्युङ फुमु गाङेला डिक्पा खाला सेमज्यीकराङ खाला देत ज्युताला थे थोक खाला स्यिइओ सिन कैयाफेकी थोक साबा ओतान। 53 थे छोमुमेई थेबाबरीकी येशूला सेताराङ फाप्क्यो सिन ठो खासुङ। 54 थोगी येशू गाङेकी थोङच्या खाईन यहूदिये अञ्चल नाङला माख्याम्सुङ। थे थेरूकी एफ्राइम सिराज्यीक युलनापा गाल्गीन चेलातेबाताङ थेरूराङ देत्सुङ। थे युलचेन री खादुराङ फाप्कीन ओतान। 55 थेजीन यहूदीओनते निस्तार चाड लेपा खाबा ओतान। थेमे युल युललेकी काल्बा च्योक मि खोपरोङ चोके खिताला थे चाडगी गोमाराङ यरूशलेमने लेपा ओतान। 56 थेबेकी थेङला येशू दुकाना मिन्दुका सिन चाल्सुङ। थेमे परमेश्वर मन्दिरदु जम्मा ओङनामेई “ख्योकोनला चुक लाङगीका? च्यि थे दुरू चाड माने खिताला वाओङरो?” सिन बात खासुङ। 57 छ्ये छ्ये पूजारीताङ फरिसी पाटी मिओनगी सुइँदेकी येशूला खइँसाला ओता थोङसीन वाला थेबाला लोबा सिन कोता ओतान। थेबा खोपरोङगी थेला जिन्दा थुप्स्यीत सिन थेबेकी मिओनला थोक साबा ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.