यूहन्ना 10 - जिरेललुई गोठालाताङ लुई बात 1 थोरूमोङ बात खिन येशूकी थेबाला “ङा ख्योकोनला दि बात सिओ। च्यि सासीन सुइँदा मि लुई खोरगी गोदुकी मुस्यूक्पा खाला ज्येननापेकी नाङने स्यूइदुक सासीन थेचेन चोर ईन, डाँका ईन। 2 खोरगी गोनामेकी स्यूक्कान्तेकामा खास लुई गोठाला ईन। 3 थे ओङजीनचेन लुई खोरदु देत्ला लुक स्युङकान्ते मिकी थेला खोरगी गो पेत्ला तेरग्यो। थेमे लुकतेबेकीङ थे खोपरोङ गोठाले ङोरो छ्या स्येक्यो। थेकी थे खोरोङ लुकओनला मिन तेन्ला फोला पाङला टीला खेरग्यो। 4 खोरगी नाङनेकी थे खोरोङ लुकतेबा पाङला तेन्गीन सिन्नामेकी थे खोरोङचेन लुई थोङला थोङला ख्याम्ग्यो। थेमे लुकतेबाङ थे ङोरो छ्या स्येला थे तिङ ङ्याला ख्याम्ग्यो। 5 तर ङो मास्येबाते मि तिरीचेन थे लुकओन नोमुङ तिङ ङ्याला माख्यामो। बरू ख्यारला छ्योङगो। च्यिला सासीन थोक्ते मि ङोरो थेबेकी छ्याराङ मेस्येओ,” सिन सिदुक। 6 येशूकी खाबाते दि लुकताङ लुगी गोठाले बात च्यि साबाते ईन्दे सिन थेबेकी छ्याःङ माखोसुङ। येशूराङ लेमुते गोठाला ईन 7 थोगी येशूकी लोईन “ङा ख्योकोनला दि बात सिओ। च्यि सासीन लुगी खोरगी गोचेन ङाराङ ईन। 8 ङा भन्दा गोमा दुरू वाबातेबा गाङे चोरताङ डाँका ओतान। थेबे ङोरो थोसीनोङ लुकतेबा थेबे तिङ ङ्याकीन माख्याम्सुङ। 9 नाङने स्यूक्च्येते गोचेन ङाराङ ईन। सुइँदा ङे छ्य्वापेकी खाला नाङने स्यूइदुक सासीन ङा थेला मेलेबा ओङसादुकी जोए खिओ। लुई गोठालेकी ङीमे ठाङमा लुक छोर खेराताङ खोरदु खुलाङाच्योक खाला ङाङ ङाराङ मिओनला गोच्येते जति बिन्ला लेमु खाला तेइओ। 10 चोरनी खालि क्वाप सिन, सेताप सिन थेमे जेसुकै ङ्ये ज्युताप सिनकामा ओङगो। ङाचेन मिओनगी नोमुङ मिसिन्च्येते जुनी ङेत्स्यीत थेमे थे जुनी ङे थेबाला तेरा चालाच्योक पूरो खाला ङेत्स्यीत सिन दुरू वाबाते ईन। 11 लेमुते गोठालाचेन ङा ईन। लेमुते गोठालेकी लुई लाईदु थे खोरोङ ज्यानराङ तेरग्यो। 12 तर दारमात बिन्गीन ज्याक्पाते गोठालाचेन दाक्पोन लुक सोकान्ते लेमुते गोठाला च्योक्ते मेन। फारा ओङा थोङसीन दारमात बिन्गीन ज्याक्पाते मिनी लुक ताङला दाक छ्योङगो। थेमे फारेकी वाला लुकतेबा खाप्क्यो थेमे कोईला छरपुट्ट जोइओ। 13 थेचेन दारमात बिन्गीन ज्याक्पाते मिकामा ईन्देकी लुईते छ्याःङ वास्ता मिक्किता खाला थोक खाला लुक ताङला छ्योङगो। 14-15 लेमुते गोठालाचेन ङा ईन, आबेकी ङाला लेमु खाईन छ्या स्येबा च्योकराङ खाला ङाङ ङाराङ लुक जतिला लेमु खाला छ्या स्येक्यो। ङे आबाला लेमु खाईन छ्या स्येबा च्योकराङ खाला ङाराङते जतिकीङ ङाला लेमु खाला छ्या स्येक्यो। लुकओन लाईदु ङा ङाराङ ज्यानराङ बिन्ला स्यिइओ। 16 ङेते ज्येन ज्येन लुगोङ ओत। थे लुकतेबा दि बगालते मेन। ङे थेबालाङ दि बगालदुराङ खुलाङा फाप्क्यो। थेबाला फोत्जीन थेबेकीङ ङे ङोरो थोला ङे साबाते ङेन्ग्यो। दोक खाला थेबाङ बगालज्यीक्तेराङ ओङगो। थेमे थेबा गाङेते गोठालाज्यीकराङ ओङगो। 17 ङा ङाराङ खुशीकी मिओन लाईदु ज्यान बिन्ला स्यिच्येते थेमे लोक्ला सोम्बो लोक्च्येते ईन्देकी आबेकी ङाला ङिङज्ये खिओ। 18 ङा ङाराङगीराङ स्या सेम माक्याबा ईन्सीन ङाला सुङगीङ सेता मुथुबो। ङाराङ खुशीकी ज्यान बिन्ला स्यिच्येते थेमे लोक्ला सोम्बो लोक्च्येते दि गाङे ङे लाःक्तुराङ ओत। ङाला थोक खि सिन आबेकीराङ कोता ओत,” सिन बात खासुङ। 19 थेकी साबाते दि बाततेबा थोनामेकी थेरू ओताते यहूदीओन नाङ याङराङ बात माडिक्सुङ। 20 थेबे नाङ काल्बा च्योक्तेकी “दिचेन ल्हन्डीक खोकीन ङ्योबाते ईन। ख्योकोन दि बात च्यिला ङेन्गीते?” सिन सासुङ। 21 थेमे ज्येनतेबेकीचेन “ल्हन्डीक खोबाते मिकी दोक्ते बात खिता मुथुबो। ल्हन्डीककीङ चुक खाला अन्धे मिक थोङा थुप्च्या जोइते?” सिन सासुङ। यहूदीओनते छ्ये छ्ये मिकी येशू बात पत्ते माक्याबाते 22 गुनगी बेलाला यरूशलेमदु चाडज्यीक माने खिन ओतान। दि चाडचेन थाङबो इस्राएलीओनगी ज्येन जातकी मिओनगी ठ्वाबाते परमेश्वर मन्दिर लोक्ला खोपरोङ लाःक्तु लाकीन थे मन्दिर परमेश्वरतेराङ ईन सिन चोके खाबाते बात सम्झे खिताला माने खिन ओतान। 23 थेमे थे चाडगी बेलाला ङीमाई येशू थे मन्दिर पिंढी नाङला फार छुर ख्याम्गीन ओतान। थे पिंढीलाचेन सोलोमन पिंढी सिन ओतान। 24 थे थेङला ख्याम्गीन ओते बेलालाराङ यहूदीओन थेरू लेप्कीन थे फेरो खाङ जम्मा ओङसुङ। थेमे “खो परमेश्वरगी तोङगो साबाते ख्रीष्ट ईन्दाना मेन्दे? ईन्सीन ङ्योकोनला लेमु खाला ईन सिन लोःप। खो नामसाक ङ्योकोनला दि बात मालाःपा खाला देत्कीते?” सिन सासुङ। 25 थोक सिरजीन थेकी “दि बात ङे ख्योकोनला थोङलाका लाःपा ओत। ईन्सीनोङ ख्योकोन ङे बात पत्ते मिक्किदुक। ङेचेन आबेकी खि साबाते काम खाबा ओत। थे कामतेबा तालाराङ ख्योकोनगी ङा सु ईन्दाका सिन छ्या स्येबा थुप्क्यो। 26 तर ख्योकोन ङे लुक मेन्देकी ङे बात पत्तेराङ मिक्किदुक। 27 ङा ङाराङ लुकओन लेमु खाला छ्या स्येक्यो। थेमे थेबेकीङ ङे ङोरो थोला ङे तिङ ङ्याला ख्याम्ग्यो। 28 ङा थेबाला नोमुङ मिसिन्च्येते जुनी तेरग्यो। थोगी थेबा नरककुण्डमा स्यूक्पा माफाबो। थेमे ङे लाःक्तुकी सुङगीङ थेबाला ठ्वाला खेरा मुथुबो। 29 आबेकी थेबाला ङे लाःक्तु जिम्मा बिन्दाते ईन। गाङे भन्दा छ्येते आबाराङ ईन। थोगी थे लाःक्तुकीङ सुङगीङ थेबाला ठ्वाला खेरा मुथुबो। 30 आबाताङ ङा दोक्पोईराङ ईन,” सिन सिदुक। 31 थेकी दोक सानामेई लोईन यहूदीओनगी थेला सेताप सिन देक्पाला दो तुसुङ। 32 थोक खित्जीन थेकी थेबाला “ङे ख्योकोन मिगी दोन्दुराङ आबेकी ङाला खि साबाते लेमुते काम काल्बेई खाईन तेन्दा ओत। थे कामओन नाङ खाङ काम लेमु मालाबेकी ख्योकोन ङाला दोई ग्याप्ला सेता छोल्गीते?” सिन सिदुक। 33 थोक सिरजीन थे यहूदीओनगीचेन “खुई खाबाते खाङ कामगी खित्सादुङ ङ्योकोनगी खोल्ला दोई ग्याप्ला सेता चालाते मेन। खुई परमेश्वर विरोध खाबेकी खित्सादुका खोल्ला दोक खिता चालाते ईन। च्यिला सासीन मि ईनलाङ खोचेन खोरोङला परमेश्वरराङ ईन खिदुक,” सिन सिदुक। 34 थोक सिरजीन थेकी “च्यि ख्योकोन नियमला ‘ख्योकोन खेराङराङ परमेश्वर फुज्युङ फुमु ईन,’ सिन परमेश्वरगी साबाते बात टिबा मेत? 35 परमेश्वर बातला टिबाते बात फरकराङ परे मिक्किओ। मिओनताङ बात खित्जीन परमेश्वरगी थेबाला ‘परमेश्वर फुज्युङ फुमु ईन,’ सिन साबा ओतान। 36 ङाला आबेकीराङ छाने खाईन दुरू ताङाते ईन। थोगी ङे ङा परमेश्वर फुज्युङ ईन सिन सिरजीन परमेश्वर विरोध खासुङ सिन ख्योकोन चुक खाला सिते? 37 ङे खित्च्येते काम आबेकी खित्च्येते च्योक्ते मेन्सीन ख्योकोनगी ङाला परमेश्वर फुज्युङ दुका सिन पत्ते माक्यासीन ओङगो। 38 तर ङेङ आबेकी खित्च्येते च्योक्ते काम खित्जीनोङ ङा थेराङ दुका सिन ख्योकोन पत्ते मिक्किओ सासीन ङे खाबाते कामतेबा ताला आबाताङ ङा दोक्पोईराङ दुका सिन छ्या स्येबा खि,” सिन सिदुक। 39 थेमे थेबेकी लोईन थेला जिन्दा चाला ओतान। तर थे थेबे दोन्दुई दाक गाल्सुङ। 40 थेरूई येशू यरूशलेम ताङगीन लोईन यर्दन चाङबो फारकेनपा गाल्गीन देत्सुङ। थे ठाउँदुराङ थोङला यूहन्नेकी मिओनला बप्तिस्मा तेरगीन ओतान। 41 थे थेरू देत्जीन थे ओत्सादु मि काल्बेई ख्योल्सुङ। थेमे थेबेकी “यूहन्नेकी अचम्बते काम छ्याःङ खाबा मेतान। थोक ईन्सीनोङ थेकी दि मि विषयला साबाते बातचेन गाङे ईन्दातेराङ दुका,” सिन बात खासुङ। 42 थेमे थेरू मि काल्बेईकी थेला विश्वास खासुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.