याकूब 5 - जिरेलछ्युक्पुतेबाला साबाते बात 1 थेमे ख्योकोन छ्युक्पुते मिओनगी दि बात ङेन। था खेराङला चुक मेलेबा ओङगीते सिन सम्झे खाला आउदी पीर खिन खोउरा खिन ङु। 2 ख्योकोन सम्पत्ति गाङे तोरला डुइओ। थेमे खोलाकतेबाङ गाङे बुईकी सेइओ। 3 थोकराङ खाला ख्योकोनताङ ओताते सेरताङ चाँदीङ खिये खाला डुइओ। था परमेश्वरगी मि गाङे न्याय खिते छोमु ख्योकोन सेर चाँदी थोक खाईन खिये खाबाते थोङजीन ख्योकोनगी खेराङला लेमु ओङच्येते कामकामा खादुक सिन परमेश्वरगी छ्या स्येक्यो। ख्योकोन सेर चाँदी थोक डोच्या खाईन ज्याक्पेकी ख्योकोन मेकी छिक्ला सोला डुइओ। ख्योकोनगी था परमेश्वरगी मि गाङे न्याय खिते छोमु सजाय ङेताला सम्पत्ति साकीन ज्याक्ला दुक। 4 च्यि सासीन ख्योकोनगी खेराङ स्यीङदु काम खित्कानताङ बाली थोक्कान रूक्कान खेतालाओनला बनी माबिन्देकी थेबा ङुबाते छ्येज्यीक शक्ति ओताते प्रभु परमेश्वरगी थोबा ओत। 5 ख्योकोन स्यीम्बु स्यीम्बु सेइन थुङगीन किम्मु खाईन देत्ला दुक। दोक खाईन ख्योकोनगी था परमेश्वरगी मि गाङे न्याय खित्च्येते दिनगी लाईदु खेराङला पोस्ये खाईन ज्याक्ला दुक। 6 ख्योकोनगी छ्याःङ खिता मुथुप्कान्ते सुधोते मिओनला थाराङ दोष लै खाईन सेत्सुङ। थेबेकी ख्योकोनला छ्याःङ मेलेबा खाबा मेतान। दुक्पा आइ परे खित्जीन चुक खित्च्ये 7 थेमे आज्यो न्वावे, प्रभु येशू ग्युरला ओङ ओङसाक ख्योकोन सेम मेसेता खाला गुलाराङ देत। खेती खित्कान्ते मिङनी बाली लेस्यीत सिन समय समयला देक्च्येते छ्यार्बा देक देकसाक गुलाराङ देत्क्यो। 8 होथोकराङ खाला ख्योकोनोङ था प्रभु येशू ग्युरला ओङच्ये बेला लेपा खासुङ सिन टोक मेज्येता खाला जस्तोराङ ओङजीनोङ सेम मेसेता खाला देत। 9 थेमे आज्यो न्वावे, परमेश्वरगी खेराङला दोषी ईन सिन मिसिरस्यीत सिन खुई दि लेमु माक्यासुङ, थे लेमु माक्यासुङ सिन दोक्पोईकी ज्येनज्यीक बात माकेत। मि गाङे न्याय खित्कान्ते परमेश्वर खेराङ दोन्दुराङ ओत सिरच्येते बात टोक माज्येत। 10 आज्यो न्वावे, प्रभु परमेश्वरगी सिर च्युताते बात खित्कान्ते मिओनला ताला दुक्पा ओङजीन खेराङगी चुक खिता फाप्च्या ईन्दाका सिन छ्या स्येबा खि। 11 जतिराङ दुक्पा ओङजीनोङ खपे खिन देत्कान्ते मि भाग्यमानी ईन सिन ङुरूङला छ्या ओत। थाङबो अय्यूबकी चुक दुक्पा खपे खाबा ओताने थेमे थे दुक्पा खपे खाईन सिन्नामेकी प्रभु परमेश्वरगी थेला चुक लेमु खाबा ओताने सिन ख्योकोनला छ्याराङ ओत। प्रभु परमेश्वरचेन मिओनला आउदी ङिङज्ये खित्कान्ते ईन। थे आउदी दया खित्कान्ते ईन। 12 आज्यो न्वावे, था ज्येन बातज्यीक च्यि सासीन ख्योकोनगी स्वर्ग जुम्ला ईन्स्यीत, पृथ्वी जुम्ला ईन्स्यीत थेमे ज्येनतोक खइँदाराङ ईन्स्यीत छ्याःङलाङ जुम्ला ना माकेल। ख्योकोनगी खालि ईन्दाते बातला ईन सि, मेन्दाते बातला मेन सि। होदोक खासीन परमेश्वरगी ख्योकोनला सजाय मेतेरो। च्यि बेलाला चुक खित्च्ये 13 ख्योकोन सुइँदाला दुक्पा ओङे बेलाला परमेश्वरला प्रार्थना खि। थेमे जेसुकै साबा च्योक ओङे बेलाला परमेश्वरते जय जय खिन लु लोङ। 14 थोकराङ खाला सुइँदा नासीन येशू ख्रीष्ट मिओनला ताकान्ते मिओनला कातोङ। थेमे थेबेकी थे मिला प्रभु परमेश्वर मिनगी छ्य्वापेई मोर्गु कुला थे ठाक्स्यीत सिन प्रार्थना खिता फाप्क्यो। 15 थे मि ठाइओतराङ सिन थेला विश्वास खाईन प्रार्थना खानामेई प्रभु परमेश्वरगी थे मिला ठाक ज्युत्क्यो। थे मिकी खइँदा पापराङ खाबा ओत्सीनोङ थेकी थेला माफ तेरग्यो। 16 दोक ईन्देकी ख्योकोनगी ङे दि पाप खाबाप, थे पाप खाबाप सिन दाक्पोन नाङ दोक्पोईकी ज्येनज्यीकला लोःप। थेमे खेराङ ठाक्स्यीत सिन दोक्पोईकी ज्येनज्यीक लाईदु प्रार्थना खि। परमेश्वरगी खि साबाते ङेन्कान्ते मिकी प्रार्थना खानामेकी छ्ये छ्ये काम ओङा थुप्क्यो। 17 परमेश्वर बात खित्कान्ते एलियाङनी ङुरूङ च्योकराङ दुक्पा किम्मु भोगे खाईन देताते मिराङ ओतान। थेकी छ्यार्बा मेदेक्स्यीत सिन परमेश्वरला आउदी खाईन प्रार्थना खाबेकी लो सुमताङ दावा ठुकसाक छ्यार्बे थिबाईओङ माथिक्सुङ। 18 लोक्ला थेकी थाचेन छ्यार्बा देक्स्यीत सिन परमेश्वरला प्रार्थना खानामेकी छ्यार्बा ग्याप्कीन स्यीङला बालीनाली ओङसुङ। 19 थेमे आज्यो न्वावे, ख्योकोन नाङ सुइँदेकी सत्यते बात ङेन्दा ताङसुङ थेमे ख्योकोन ज्येनज्यीगी थेला लोक्ला परमेश्वर छ्य्वापाराङ लै खित च्युत्सुङ सासीन 20 थोक खित ज्युत्कान्ते मिकी दि बात लेमु खाला छ्या स्येबा खि। च्यि सासीन थेकी होथोक्ते मिला मेन्दे बात ङेन्गीन देत मुज्युदो। दोक खाला थेकी थे मिला स्यिला नरककुण्डमा स्यूक्पा फाप्च्येते सजायदुकी थार ज्युत्क्यो। थोक खित्कान्ते मिलाचेन थेकी जतिराङ पाप खाबा ओत्सीनोङ परमेश्वरगी माफ तेरग्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.