याकूब 4 - जिरेलपरमेश्वरगी खि साबा च्योकराङ खि 1 ख्योकोन नाङ थोम्मु जीङगा च्यिला स्योरगीका? च्यि खेराङला खिता सेम लाबा लाबा खिता छोल्सादुराङ दोक ओङच्येते मेनरो? 2 ख्योकोन ङाला दि ओत्सीन ओङच्या ओतान, थे ओत्सीन ओङच्या ओतान खिदुक। तर ख्योकोनगी ओङसीन ओङच्या ओतान सिराच्योक खाबाते छ्याःङ मेङेत्तुक। ख्योकोन मि जाला लोभ खिदुक थेमे खेराङगी साबाते माङेत्सीन मिङ सेता छोल्गीदुक। दोक खाला ख्योकोन थोम्मु जीङगा खिदुक। ईन्सीनोङ ख्योकोनगी छ्याःङ मेङेत्तुक। च्यिला सासीन ख्योकोनगी परमेश्वरला नाङराङ मिसिरदुक। 3 नाङ सासीनोङ ख्योकोनगी छ्याःङ मेङेत्तुक। च्यिला सासीन ख्योकोन खेराङला खिता सेम लाबा लाबा खिताला खालि खेराङला च्यि लेमु लाङगीका होथोक्ते नाङ खिदुक। 4 ख्योकोनचेन परमेश्वरला माने खिता ताङाते मि ईन। दि सा लुङबे मि च्योकराङ सम्पत्ति छ्य्वापा सेम लै खित्कानताङ दाक्पोन विचारकामा खित्कान्ते मि परमेश्वरताङ डिक्पा मुथुबो सिन च्यि ख्योकोनला छ्या मेत? सम्पत्ति छ्य्वापा सेम लै खित्कानताङ दाक्पोन विचारकामा खित्कान्ते मिनी परमेश्वरताङ डिक्पाराङ मुथुबो। 5 थेमे परमेश्वर बातला परमेश्वरगी ङुरूङला बिन्दाते आत्मेकीचेन ङुरूङगी परमेश्वरगी साबातेकामा ङेन्स्यीत सिन आउदी सेम खिओ सिन साबाते च्यि ख्योकोनला थाराङ साबाते ईन्दासीन सिराच्योक लाङगीदुक? 6 परमेश्वरलाकामा माने खित्कान्ते मिओनला परमेश्वरगी झन झन दया खिओ। दोक खिओ सिन परमेश्वर बातला “ङा ङाराङ ईन सिराच्योक खित्कान्ते मिला परमेश्वरगी मनराङ परे मिक्किओ। छ्ये मिक्किकान्ते मिलाचेन थेकी दया खिओ,” सिन साबा ओत। 7 थोक ईन्देकी था ख्योकोनगी परमेश्वर अधीनला देत्ला थेकी खि साबा च्योकराङ खि। शैतानगी जे सासीनोङ थे बात ङेनराङ माङेन। दोक खानामेई ख्योकोनला दुक्पा तेरा ताङला शैतान दाक छ्योङगो। 8 ख्योकोन परमेश्वर दोन्दु ग्युक। थेमे थे ख्योकोन दोन्दु ओङगो। ख्योकोन पापीओनगी था पाप खिता थोङ। परमेश्वरगी खि साबातेङ ङेन्दा छोल्च्या, दाक्पोन खुशीङ खिता छोल्कान्ते सेम ङि ओताते मिओनगीङ था थोक्ते बानी थोङ। 9 खेराङगी गोमाबा खाबाते काम मेलेबा दुका सिन आउदी खाला पीर खिन ङु। गोता साटोला था ङु। गा खिता साटोला सुर्ता खिन देत। 10 दोक खाईन ख्योकोनगी प्रभु परमेश्वर दोन्दु ङा ङाराङ ईन सिराच्योक माक्यासीन थेकी ख्योकोनला मान बिन्ला लेमु खिओ। ज्येनगी गल्ती तेन्दा मेङगो 11 आज्यो न्वावे, ख्योकोनगी फलाना दोक्तेताङ थोक्ते सिन दोक्पोईकी ज्येनज्यीक बात माकेत। दाक्पोन आज्यो न्वाकी बात खिन ख्याम्कान्ते कि खो दोषी ईन सिन सिरकान्ते मिकीचेन परमेश्वर नियमला साबाते दि दि बात लेमु मेन सिन थे नियमराङ ठीक मेन साबाते ईन। थोक खित्कान्ते मिकीनी थे नियम ङेन्दा साटोला थे लेमु मेन सिनका साबाते ईन। 12 थे नियम जोकान्तेताङ मि न्याय खित्कान्ते खालि परमेश्वरकामा ईन। थेकीकामा मिओनला दोषी ईन साला नरककुण्डमा लुबाङ थुप्क्यो, थेमा लुच्येते सजायदुकी डेलाङ थुप्क्यो। ज्येनला खो दोक्तेताङ थोक्ते सिन सिरकान्ते खो सु ईन्देरो? तिरी बात सुङलाङ छ्या मेङगो 13 थेमे “ङारोबा नाबा थे सारदु ड्वा फाप्सुङ। थेमे थेरू लोज्यीकजो पसल चुला देत्ला आउदी काल्बेई पैसा ज्वा फाप्सुङ,” सिन सिरकान्तेबा ख्योकोनगी दि बातज्यीक ङेन। 14 ङारो च्यि ओङगीते सिन ख्योकोनला छ्याःङ छ्या मेत। छ्यु कोल्जीन थेन्दाते ला रकस्यिकला तोरला डुइओ। ख्योकोन आयुङ होथे ला छेतराङ ईन। 15 दाक्पोनगी ङा दोक दोक खितामीन सिरा साटोला बरू ख्योकोनगी “प्रभु परमेश्वरगी ङाला थोकराङ खि सिन सासीन थेमे ङा सोन्गीन देत्सुङ सासीन दोक दोक खिता फाबोङ,” सिनका सिरा फाप्च्येते ईन। 16 ख्योकोन ङा दोक खितामीन, थोक खितामीन सिन छ्ये खिन बात खिदुक। थोक खाला छ्ये खित्च्येते लेमु मेन। 17 सुइँदेकी दाक्पोनगी चुक खिता फाप्कीते, च्यि खिता फाप्कीते सिन छ्या स्येकीन स्येकीनोङ थोक माक्यासीन थेकी पाप खाबाते ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.