याकूब 3 - जिरेल

खा थाताला ज्‍य्‌वाच्‍येते बात

¹ आज्‍यो न्‍वावे, ज्‍येनला परमेश्‍वर बात लोप्‍कान्‍ते मि ओङाला ख्‍योकोन थोप्‍सुम माकेत। ज्‍येनला परमेश्‍वर बात लोप्‍कान ङ्योकोनला परमेश्‍वरगी झन कडा खाला न्‍याय खिओ सिन ख्‍योकोनला छ्याराङ ओत।

² ङुरूङ गाङेकी थोकज्‍यीक मेन्‍सीनोङ थोकज्‍यीक दाक गल्‍ती खिओ। दाक्‍पोन खा थाताला ज्‍याक्‍ला बात खित्‍कान्‍ते मिकीचेन गल्‍ती मिक्‍किओ। थोक्‍ते मिकी दाक्‍पोनला पूरो खाला काबूला ज्‍य्‌वाबा थुप्‍क्‍यो।

³ घोडाला दाक्‍पोनगी खेरा चाल्‍साला डोरस्‍यीत सिन लगाम लै खानामेई ङुरूङगी थेला खापा खापा खेरा सेम लाङगीका थेपा थेपाराङ खेरा थुप्‍क्‍यो।

⁴ थोकराङ खाला समुन्‍द्रला चले खित्‍च्‍येते जोदा जोदातेन्‍दे पानीजहाज बातराङ विचार खि। समुन्‍द्रदु छ्येज्‍यीक हुन्‍डी चले खाईन थे जहाजला जतासुकैपा खेरा चाल्‍सीनोङ थे चले खित्‍कान्‍ते मिकी जहाज चले खित्‍च्‍येते टेक्‍टेस्‍यिक मिशीनला जुम्‍गीन चले खानामेकी पानीजहाजला खापा खेरा सेम लाङगीका थेपाराङ खेरा थुप्‍क्‍यो।

⁵ ङुरूङ खे बादोङ होदोकराङ ईन। टेक्‍टेस्‍यिककामा ओत्‍सीनोङ खेकीराङ मिओनगी ङा दोक खिता थुप्‍क्‍योताङ थोक खिता थुप्‍क्‍यो सिन छ्ये छ्ये बात खिओ। थेमे मे झिल्‍काज्‍यीगी खित्‍सादु चुक खाला जोदा जोदातेन्‍दे छ्याङमाङ ऊरगीते सिन विचार खि।

⁶ मि खाङ होथे मे झिल्‍का च्‍योकराङ ईन। लाक्‍पा, काम्‍बा, मिक थेमे होदोक्‍ते जेसुकै नाङ मेलेबातेचेन मि खाराङ ईन। मेकी छ्याङमा थाला ज्‍वा च्‍योकराङ खाला दाक्‍पोन खेकी खित्‍सादु जुनी खाङराङ मिला मेलेबा ओङगो। ङुरूङ खानी नरककुण्‍डमे मे च्‍योकराङ ईन।

⁷ ओताते जति जन्‍तुताङ पशुओन, छ्योज्‍युङमा, साला ख्‍याम्‍कान्‍तेबा थेमे छ्युई नाङला देत्‍कान्‍ते ङ्या ईन्‍स्‍यीत, जे ईन्‍स्‍यीत गाङेला मिकी दुला थुपा ओत, दुल्‍गीनोङ ओत।

⁸ दोक ईन्‍सीनोङ थोरूमसाक सुङ मिकीङ दाक्‍पोन खा थाताला ज्‍यागीन खिता फाप्‍च्‍या फाप्‍च्‍येते बातकामा खिता थुपा मेत। मेलेबा बात मिक्‍किता खाला मि देताराङ मुथुबो। मिकी खित्‍च्‍येते मेलेबाते बात आउदी मेलेबाते विष च्‍योकराङ ईन।

⁹ ङुरूङचेन आबा परमेश्‍वरला मान खिन थेते जय जय ओङस्‍यीत सिन सिओ। थेचेन ङुरूङ प्रभु ईन। लोक्‍ला परमेश्‍वरगी थे खोरोङ च्‍योकराङ ओङच्‍या खाईन जोबाते मिओनला ङुरूङ मोता सराप खिओ।

¹⁰ आज्‍यो न्‍वावे, ङुरूङचेन परमेश्‍वरला मान खिन थेते जय जय ओङस्‍यीत सिनोङ सिओ, मिला मोता सरापोङ खिओ। दोक खितानी पटक्‍क सोई मिक्‍किच्‍येते बात ईन।

¹¹ च्‍यि मोनज्‍यीकदुकीराङ थुङा ओङच्‍येतेताङ थुङा मेङच्‍येते थरी ङि छ्यु दोल्‍ग्‍यो?

¹² आज्‍यो न्‍वावे, च्‍यि नेभारे दोङबोला जैतुन फल थेमे अंगूर दोङबोला नेभारे फल गोन्‍ग्‍योतरो? थोकराङ खाला छाप्‍टोते छ्युई मोनदुकीङ मिकी थुङा थुप्‍च्‍येते छ्यु दोलराङ मोदोलो।

परमेश्‍वरगी तेरच्‍येते बुद्धि बात

¹³ थेमे च्‍यि ख्‍योकोन सुइँदाला खेराङ आउदी बुद्धि ओताते थेमे जे बादोङ लेमु खाला छ्या स्‍येकान्‍ते मि ईन सिराच्‍योक लाङगीदुक? खोपरोङ थोक्‍ते मि ईन सिरकानगी खोपरोङताङ पक्‍काराङ बुद्धि ओत सिरच्‍येते बात छ्ये मिक्‍किता खाला काम बात जे खित्‍जीनोङ लेमु खाला खिता फाप्‍क्‍यो।

¹⁴ तर ख्‍योकोनगी ज्‍येनला आउदी खाला डार खित्‍च्‍येते थेमे दाक्‍पोनकामा छ्ये ओङा छोल्‍च्‍येते खासुङ सासीन खेराङ आउदी बुद्धि ओताते मि ईन सिन छ्ये माकेत। खेराङताङ बुद्धि ओत सिन ख्‍योकोनगी साँचोते बात खाबाते मेन।

¹⁵ ख्‍योकोनगी बात खाबा च्‍योक्‍ते बुद्धिनी परमेश्‍वरगी बिन्‍दाते ईनराङ मेन। दिनी दि सा लुङबे मिओनगी बात खित्‍च्‍येते च्‍योक्‍ते बुद्धि बात ईन। दोक्‍ते बुद्धिनी दाक्‍पोन खुशी खित्‍कान्‍ते मित्ताङ ओङच्‍येते बुद्धि ईन। थेमे शैतानगी कोता कोता ङेन्‍कान्‍ते मिओनताङ ओङच्‍येते बुद्धि ईन।

¹⁶ ज्‍येनला डार खित्‍कान्‍ते थेमे दाक्‍पोनकामा छ्ये ओङा छोल्‍कान्‍ते मि ओत्‍नामेकीराङ दाक्‍पोन दाक्‍पोन नाङ माडिक्‍ला फाटो ओङच्‍येते थेमे मिकी मेलेबाते कामताङ बात खित्‍च्‍येते ईन।

¹⁷ तर परमेश्‍वरगी बिन्‍दाते बुद्धि ङेता ओताते मिओनगीचेन काम बात जे खित्‍जीनोङ लेमुतेकामा खिओ, थेबा ज्‍येनताङ डिक्‍ला थुन्‍ला देता छोल्‍ग्‍यो, गाङेताङ खा छ्येत लेमु खिओ, दाक्‍पोन भन्‍दा छ्येकी साबाते ङेन्‍ग्‍यो, ज्‍येनला ङिङज्‍ये खाला लेमु लेमु काम खिओ, सुङलाङ काका पाका मिक्‍किओ थेमे सेमला मेलेबा विचार मोज्‍योओ।

¹⁸ थोरूम च्‍यि सासीन परमेश्‍वरगी बिन्‍दाते बुद्धि ङेता ओताते मिओनगीचेन ज्‍येनला डिक्‍ला थुन्‍ला देत ज्‍युत्‍क्‍यो। दोक खाला थेबेकी काम बात जे खासीनोङ परमेश्‍वरला मन परे खित्‍च्‍येते खिओ।