याकूब 2 - जिरेलकाका पाका खिता मेङगो 1 आज्यो न्वावे, ख्योकोनचेन छ्येज्यीक शक्ति ओताते प्रभु येशू ख्रीष्टला विश्वास खित्कान्ते मि ईन। थोगी ख्योकोनगी मि छ्येत ताला काका पाका खिता मेङगो। 2 था सिइना, ख्योकोन जम्मा ओङसादु सेरगी औंठीताङ लेमु लेमु खोलाक खोन्कान्ते मिज्यीक वाओङ। थेमे थे बेलालाराङ डिकस्यिकज्यीक खोलाक खोन्दाई छ्याःङ मेताते मिङ वाओङ। 3 थेजीन ख्योकोनगी थे लेमुते खोलाक खोन्कान्ते मिलाचेन मान खिन हजूर खो देने वाला देत्ना स्योक साला ज्येनतेलाचेन खो उथेमा साला देत कि उदुरू ङे काम्बे खादुराङ देत सासीन 4 च्यि ख्योकोनगी काका पाका खाबाते मेनरो? ख्योकोनगीनी थेबे छ्येत ताकीन काम खाबातेका ईन। 5 ङिङज्येते आज्यो न्वावे, दि बात लेमु खाला ङेन। येशू ख्रीष्टला विश्वास खित्कान्ते मि ओङला थे खोरोङ राज्यदु देताला च्यि परमेश्वरगी ज्येनगी छ्याःङज्यीक खाङज्यीक मेताते मि ईन सिरच्येते मिओनलाराङ छाने खाबाते मेनरो? था थेबा परमेश्वरगी थे खोरोङला ङिङज्ये खित्कान्ते मिओनला तेरग्यो साबाते राज्यदु देता ङेत्क्यो। 6 ख्योकोनचेन होथोक्ते मिओनलाराङ हेला खिदुक। च्यि ख्योकोनला दुक्पा तेरकान्ते थेमे मुद्धा लाङला अड्डादु केल्कान्ते छ्युक्पुते मिओनराङ मेनरो? 7 थेमे ख्योकोनगी मान खित्च्येते प्रभु येशू ख्रीष्टला मनपरी सिन विरोध खित्कान्तेबाङ होथेबाराङनी ईन। ख्योकोनचेन येशू ख्रीष्ट मिओनराङ ईन। 8 थेमे परमेश्वर बातला “ख्योकोनगी दाक्पोन ज्यानला माया खिता च्योकराङ खाला ज्येनलाङ ङिङज्ये खि,” सिन साबा ओत। परमेश्वर राज्यदु ङेन्दा फाप्च्येते दि नियमला साबाच्योक खाईन कामोङ खासीन ख्योकोनगी लेमुराङ खाबाते ईन। 9 दि नियमला खि साबाच्योक मिक्किता खाईन मि छ्येत ताकीन काका पाका खासीनचेन ख्योकोनगी परमेश्वर नियम माङेन्गीन पाप खाबाते ईन। 10 सुइँदेकी परमेश्वर नियम नाङ ज्येन जति गाङे ङेन्गीन दोक्पोईकामा माङेन्सुङ सासीन थे नियम गाङे माङेन्दा छेतराङ ईन। 11 चुक सासीन परमेश्वरगी “रन्डीबाजी खिता मेङगो,” सिन साबा ओत। थेकी “मि सेता मेङगो,” सिनोङ साबा ओत। रन्डीबाजी माक्यासीनोङ सुइँदेकी मि सेत्सुङ सासीन थेकी परमेश्वर नियम माङेन्दाते ईन। 12 बात दोक ईन्देकी पापताङ दुक्पादुकी डेल्कान्ते परमेश्वरगी ङेन साबाते नियमला खि साबा ओता च्योकराङ खासुङाना माक्यासुङा थे ताला तिरी न्याय खिओ सिरच्येते बात टोक मेज्येता खाला काम बात जे खासीनोङ ख्योकोनगी परमेश्वरगी खि साबाच्योक खाला खि। 13 च्यिला सासीन ज्येनला ङिङज्ये मिक्किकान्ते मिला तिरी न्याय खिते छोमु परमेश्वरगी दया मिक्किओ। ज्येनला ङिङज्ये खित्कान्तेलाचेन न्याय खित्जीन परमेश्वरगी दया खिओ। विश्वास खिओ सिन खेकीकामा साला मेङगो 14 आज्यो न्वावे, सुइँदा मिकी ङा येशू ख्रीष्टला विश्वास खित्कान्ते मि ईन खिदुक तर थेकी खि साबाते काम मिक्किदुक सासीन थे मिला च्यि लेमु ओङगीतेरो? च्यि थोक्ते मि पापकी सजायदुकी थारा थुप्क्योतरो? 15 था सिइना, सुइँदा आज्यो न्वा कि आज्यी नुमुकी खोलाकोङ डिकस्यिकज्यीक खोन्ला दुक थेमे थेते खाम्बादु साच्येतेङ छ्याःङ मिन्दुक सासीन 16 थेला गोच्येते छ्याःङ मेतेरा खाईन ख्योकोन सुइँदेकी “लो लेमु खाला ग्युक थेमे खाँपा गाल्ला सुबा खाङ सोला ठोम्मु खाला ङ्योल,” सालाकामा च्यि होथे मिला खइँदा लेमु ओङगो? 17 दोक ईन्देकी सुइँदेकी ङा येशू ख्रीष्टला विश्वास खित्कान्ते मि ईन साला थेकी खि साबाते कामचेन मिक्किदुक सासीन थे मिकी थेला विश्वास खिओ साबाते छ्याःङ काम लै मिक्किओ। 18 थेमे कोईकी चुक सिते सासीन ङा येशू ख्रीष्टला विश्वास खिओ, ज्येनगीचेन थेकी खि साबाच्योक खाला काम खिदुक सिन सिओ। दोक सिरकान्ते मिला ङा च्यि सिते सासीन छ्याःङ काम मिक्किता खाला येशू ख्रीष्टला विश्वास खिओ सिन लो खो ङाला तेन। थेला विश्वास खिओ सिन ङानी खोल्ला कामराङ खाला तेन्ग्यो सिन सिओ। 19 परमेश्वर दोक्पोईकामा ओत सिन खुई साबाते बात पक्काराङ ईन। परमेश्वर दोक्पोईकामा ओत सिरच्येते बातनी ल्हन्डीक स्यिन्डीपकीङ ईन सिन सिओ। थेमे परमेश्वर ज्यीबेकी थेबाङ थुरथुर दारग्यो। 20 खो चुक लेम्बा ईन्दाका। येशू ख्रीष्टला विश्वास खिओ सिन खेकीकामा साला थेकी साबाच्योक खाईन काम माक्यासीन खुई थेला विश्वास खिओ सिन साबातेनी छ्याःङ कामराङ लै मिक्किओ। 21 ङुरूङ ज्युज्यु अब्राहाम बातराङ विचार खि। च्यि थेकी खाबाते कामगी खित्सादुराङ परमेश्वरगी थेला दोषी मेन सिन साबाते मेनरो? चुक सासीन थेकी परमेश्वरगी कोताच्योक खाईन थान जोकीन थे खोरोङ फुज्युङ इसहाकला थे लाक ज्यागीन भोग तेरालाङ ठीक खाबा ओतान। 22 थेकी थोक खाबेकी थे खोरोङगी परमेश्वरला विश्वास खिओ साबाते बात थेकी कामगीराङ खाईन तेन्दाते बात लेमु खाला छ्या स्येबा थुप्कीदुक। 23 अब्राहामगी थोक थोक खाईन परमेश्वर बातला टिबाते दि बात साबा च्योकराङ ओङसुङ। थेरूचेन “परमेश्वरगी खिओ साबा च्योकराङ खिओ सिन अब्राहामगी थेला विश्वास खासुङ। थोक खाबेकी खित्सादु परमेश्वरगी थेला दोषी मेन सिन सिदुक,” सिन टिबा ओत। थेमे परमेश्वरगी थेला थे खोरोङ र्वा ईन सिन साबा ओतान। 24 थोक ईन्देकी थेला विश्वास खिओ सालाकामा मेन्देकी थेकी खि साबाते काम खालाराङ परमेश्वरगी मिला दोषी मेन सिरच्येते दुका सिन लेमु खाला छ्या स्येकीदुक। 25 थोकराङ खाईन राहाब रन्डीलाङ थेकी खाबाते कामगी खित्सादुराङ परमेश्वरगी दोषी मेन सिन साबा ओतान। थेकीचेन खोपरोङ सारगी चिवा खिताला वाबाते मिओनला स्यासा बिन्गीन थेबाला ज्येन लामलेई खाला ग्युक सिन ताङा ओतान। 26 बातचेन दिराङ ईन, ङेपाक छ्येताते मिकी छ्याःङ खिता माथुपा च्योकराङ सुइँदेकी येशू ख्रीष्टकी खि साबाच्योक खाला काम मिक्किता खाला खेकीकामा थेला विश्वास खिओ साला छ्याःङ काम लै मिक्किओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.