याकूब 1 - जिरेल1 दि चिट्ठी टिक्कान्ते ङा याकूब ईन। ङा परमेश्वरताङ प्रभु येशू ख्रीष्ट काम खित्कान्ते मि ईन। ङा दि चिट्ठी लुङबा लुङबाला देता ओताते थर च्युन्ङी इस्राएलीओनला टिगीन ओत। ख्योकोनला ङेते नमस्ते ओत। दुक्पा ओङजीन च्यि खिता फाप्कीते 2 आज्यो न्वावे, ख्योकोनला थरी थरी दुक्पा ओङजीन थोकनी लेमु ओङालाका ओङाते ईन सिन गा खि। 3 थोक्ते दुक्पा ओङजीनोङ सेम मेसेता खाला येशू ख्रीष्टला विश्वास खिन देत्नामेई ख्योकोन जस्तो दुक्पाङ खपे खिता थुप्कान डुइओ। 4 सेम मेसेता खाला दुक्पा खपे खिन देता थुप्कान गाल्नामेई ख्योकोन पाको डुइओ। दोक खाला ख्योकोन परमेश्वरगी ज्वा चालाच्योक लेमु ओङला छ्याःङ कुरोलाङ कम्ती मेताते मि ओङगो। 5 थेमे ख्योकोन सुइँदाला च्यि खित्च्ये, चुक खित्च्ये सिन छ्या मेते बेलाला चुक खित्च्ये सिन बुद्धि नाङ सिन परमेश्वरताङ प्रार्थना खि। दोक खानामेई मिओनला लेमु खित्कान्ते ईन्देकी थेकी छ्याःङ दुक्स्यी मिक्किता खाला खेराङला गोबाते बुद्धि तेरग्यो। 6 ईन्दालाचेन परमेश्वरला दोक सिन प्रार्थना खित्कान्ते मिकी थेकी ङे नाङ साबाते तेरगीता मेतेरता सिन छ्याःङ शंका खिता मेङगो। थे खोरोङगी नाङ साबाते परमेश्वरगी पक्काराङ तेरग्यो सिन थेकी थेला विश्वास खिता फाप्क्यो। शंका खित्कान्ते मिनी ल्हाबेकी जता जता हुत्ते खाला खेरगीदुक थेपा थेपाराङ डोच्येते समुन्द्रे छाल च्योकराङ ईन। 7 थोक्ते मिकीचेन प्रभु परमेश्वरगी थे खोरोङला खइँदा बिनोङ सिन छ्याःङ आश खिता माफाबो। 8 थोक्ते मिचेन सेम ङि ओताते मि ईन्देकी थेकी जे खित्जीनोङ नोमुङ ङा दिराङ खितामीन सिन सिरा मुथुबो। छ्याःङ मेत्कानताङ छ्युक्पुतेबे लाईदु बात 9 थेमे छ्याःङ मेताते आज्यो न्वाबा ख्योकोनगी परमेश्वरगी खेराङला मान बिन्गीन चुक छ्ये जोसुङा सिन गा खि। 10 थोकराङ खाला जेसुकै दाङा ख्योपा ओतातेबा ख्योकोनगीङ परमेश्वर दोन्दु खेराङ छ्याःङ मेन्दाक्वा सिन छ्या स्येबा खि। पाङगी नाङला फोङच्येते मेन्दोक येल्ला ड्वा च्योकराङ खाला छ्युक्पुते मिओनोङ ङीमाई दाक स्यिला डुइओ। 11 ङीमा स्यारगीन रापकी छिक्च्या गाल्नामेई ङीमे रापकी होथे पाङगी सो थेमे चातेबा काम्ला मेन्दोकओन ङीम्ग्यो। रकस्यिक गोमा लेमु ओत्सीनोङ थोक ओङनामेई थेबा छ्याःङ लेमु मेदेदो। छ्युक्पुते मि बादोङ होदोकराङ ईन। थेकी जे काम खिन ओत्सीनोङ, थेत्ताङ जे ओत्सीनोङ ङीमाई थे दाक स्यिला थेते ओताते जति गाङे तोरला डुइओ। मिकी चुक खाला पाप खिते 12 थेमे दुक्पा ओङजीन खपे खिन देत्कान्ते मि भाग्यमानी ईन। च्यिला सासीन थोक्ते दुक्पा खपे खाईन सिन्नामेकी थोक्ते मिला परमेश्वरगी थे खोरोङला ङिङज्ये खित्कान्ते मिओनला तेरग्यो साबाते इनाम तेरग्यो। थे इनामचेन नोमुङ मिसिन्च्येते जुनी ईन। 13 थेमे मि सुङगीङ दाक्पोनला खइँदा मेलेबा काम खिइ खिइ सिराच्योक लाङजीन परमेश्वरगी ङाला दोक खित ज्युता चालाते ईन सिरा मेङेदो। सुङगीङ परमेश्वरला मेलेबा काम खित ज्युता मुथुबो। परमेश्वर थे खोरोङगीङ सुङलाङ मेलेबा खित ज्युता मोछोलो। 14 मि सेम मेलेबा ओतेकी जसलाङ गोमा दोक खिइ खिइ सिराच्योक लाङगो। होथोक खाला थेला दाक्पोनला खिइ खिइ सिराच्योक लाबाते माक्याबाला ओङराङ मेङगो सिराच्योक लाङगो। 15 थेमे होथोक खाईन थे खोरोङला खिताराङ फाप्क्यो सिराच्योक लाबाते काम खाला थेकी दाक पाप खिओ। थोक खाईन पाप खानामेई पापकी सजाय ङेत्ला थे स्या फाप्क्यो। 16 ङिङज्येते आज्यो न्वावे, ख्योकोन दाक्पोनगी ठुबाते डालुमला दाक्पोनराङ स्यूक्च्येते काम माकेत। 17 च्यि सासीन लेमुते सिराते जेसुकै ङुरूङला स्वर्गने देत्कान्ते आबा परमेश्वरगी तेरग्यो। मेलेबाते सिराते थेकी ङुरूङला छ्याःङ मेतेरो। दागार, ङीमाताङ कार्मा जोकान्ते थेराङ ईन। दागार ङीमा स्याराताङ गाबाच्योक खाला थे नोमुङ खुदुक मोन्डोओ। 18 परमेश्वरगीराङ ङुरूङला सत्यते बात छ्या स्ये च्युत्कीन थे खोरोङ फुज्युङ फुमु जोसुङ। दोक खाईन थेकी थे खोरोङगी जोबाते गाङे नाङ ङुरूङलाचेन थेला चढे खाबाते साम्बाते बाली च्योक जोसुङ। परमेश्वर बात ङेन्ला साबा च्योकराङ खि 19 थेमे ङिङज्येते आज्यो न्वावे, दि बात टोक माज्येत। च्यि सासीन खेराङला लोप्कान्ते मिओन बातला लेमु खाला नामज्योक सेत, बात खित्जीन लेमु खाला विचार खालाकामा खि थेमे होत्ता स्येदाङ खित्च्येते बान्दा माकेत। 20 स्येदाङ खित्कान्ते मिकी परमेश्वरगी खि साबाच्योक खाला लेमु काम खिता मुथुबो। 21 दोक ईन्देकी ख्योकोनगी मि गाङेकी खिन ओताते खिता मेङच्या मेलेबा मेलेबा खित्च्येते बानी थोङ। थेमे होदोक्ते ज्येनोङ मेलेबाते काम खिता गाङे थोङ। थेमे ङेल्ला दि बात मोगोओ सिराच्योक मिक्किता खाला परमेश्वरगी खेराङला खो च्युताते बात लेमु खाला ङेन। परमेश्वर बात ङेन्गीन साबा च्योकराङ खासीन ख्योकोनगी पापकी सजाय भोगे खिता माफाबो। 22 परमेश्वर बात ङेन्ला थेरू साबा च्योकराङ खि। थोक मिक्किकान्ते मिकीचेन दाक्पोनगी ठुबाते डालुमला दाक्पोनराङ स्यूक्च्येते काम खाबातेकामा ईन। 23 थे बात ङेन्ला थेरू खि साबाच्योक मिक्किकान्ते मिकीचेन ऐनाला छ्येत ताबाच्योक खाबातेकामा ईन। 24 ऐनाला ता तासाककामा मिकी थे खोरोङ चुकस्यिक दुका सिन थोङगो। ऐना ताङगीन ख्याम्नामेकी थेकी थे खोरोङ चुकस्यिक ओताने सिन दाक टोक ज्येत्क्यो। 25 थोक ईन्सीनोङ परमेश्वरगी मि गाङेला लेमु ओङाला ङेन साबाते नियम ङेन्ला थेरू खि साबाते टोक मेज्येता खाला खि साबा च्योकराङ खिन देत्कान्ते मिलाचेन परमेश्वरगी पापताङ दुक्पादुकी डेल्ग्यो। थेमे थेकी जे काम खासीनोङ परमेश्वरगी आशी बिन्ला थेला साबा च्योक ओङ ज्युत्क्यो। 26 सुइँदेकी ङानी परमेश्वरगी खि साबाच्योक खित्कान्ते मि ईन खिदुक तर खोपरोङ खाचेन थाताला मोज्योदुक सासीन थोक्ते मिकीनी दाक्पोनगी ठुबाते डालुमला दाक्पोनराङ स्यूक्च्येते काम खाबाते ईन। थोक्ते मिकी जस्तोराङ लेमु काम खासीनोङ थोक खाबेकी थेला छ्याःङ फाइदा मेङगो। 27 आबा परमेश्वरगी खि साबाच्योक खित्च्या सिरातेनी सुङ मेत्कीन दुक्पा ङेता ओताते ट्वारा टिङग्रेताङ ख्योबो स्याप्ते फेम्मे मिओन दुक्पा थोङला थेबाला लेमु खित्च्येते थेमे परमेश्वरला छ्या मेस्येकान्ते दि सा लुङबे मिओनगी खिताच्योक मेलेबा काम मिक्किच्येते ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.