हिब्रू 9 - जिरेलपरमेश्वरला पालगी नाङ माने खाबाते बात 1 परमेश्वरगी गोमा खाबाते जमानलाङ च्यि खिता फाप्कीते, चुक खाला थेला माने खिता फाप्कीते सिरच्येते नियमओन ओतान। थेमे थेरू खि साबाच्योक खाला परमेश्वरला माने खिताला मिओनगी पालज्यीक जोबा ओतान। 2 थे पालला ठाउँ ङिदु पर्देकी क्योरगीन कोठा ङि जोबा ओतान। गोमे कोठे नाङ बत्ती पारला ज्य्वाच्येते सामदान सिराते थेमे स्योबेन चढे खित्च्येते टेबल ओतान। दि कोठालाचेन परमेश्वरला चढे खित्च्येतेबा चढे खित्च्येते चङगेते ठाउँ सिन ओतान। 3 थे फारनापे कोठालाचेन गोमे कोठा भन्दाङ आउदी चङगेते परमेश्वरराङ देत्च्येते ठाउँ सिरच्येते खिन ओतान। 4 थे कोठे नाङचेन ठाउँज्यीक्तु धूप पोराला जोबाते थान ओतान। थे थान सेरगी जोबा ओतान। परमेश्वर इस्राएलीओनताङ ङ्योम्बु ओत सिन सम्झे खिताला जोबाते जमान बाकसोङ थेरूराङ ओतान। थे बाकसचेन लाक नाङ सेरगी मोरे खाईन जोबा ओतान। थेमे थे नाङ मन्न लुगीन ज्याक्पाते सेरगी नोत, हारूनगी गोमा खुराते च्यूली बुराते फेर्का थेमे परमेश्वर नियम टिबाते दोई पाटी ङि ज्याक्पा ओतान। 5 मिगी तापराङ मुथुप्च्या झिलिमिली नाम्दाकला देत्कान्ते परमेश्वर थेरू ओत सिन तेन्दाला थे बाकस लाक्तुचेन स्योक्पा खाबातेन्दे करूब सिराते परमेश्वर दूत ङि जोबा ओतान। थे बाकस लाक्तु परमेश्वरगी मिओन पाप माफ तेरच्येते ठाउँलाचेन थे दूत ङिबो स्योक्पेकी उपा ओतान। दोक्ते बात था दि भन्दा ल्हाक्पा ख्योकोनला सिन देता माफाबो। 6 थोक खाईन पाल जोकीन सिन्नामेकी पूजारीओन ङीमे ठाङमा थोङगी कोठादु स्यूला खोपरोङगी खिता फाप्च्येते काम खिन ओतान। 7 ईन्सीनोङ थे फारनापे कोठे नाङचेन गाङे भन्दा छ्येते पूजारीकामा लोईते बाजिई स्यूक्पा ङेत्कीन ओतान। थे लाक्तुङ भोग बिन्दाते ठाक माखुराला थेङ थे कोठे नाङ स्यूगीन मेतान। थे कोठे नाङ स्यूला थेकी थे खोरोङ पाप थेमे ज्येनगी दोक खाबातेनी पाप खाबातेका ईन सिन छ्या मेस्येबा खाईन खाबाते पाप माफ नाङ सिराला थे ठाक परमेश्वरला चढे खिन ओतान। 8 दि बातकी छ्य्वापेई परमेश्वर आत्मेकी मिओनला लेमु खाईन दि बात छ्या स्ये ज्युता चाला ओतान। च्यि सासीन थे पालगी नाङ गोमे कोठा ओत ओतसाक थे कोठा भन्दाङ आउदी चङगेते परमेश्वरराङ देत्च्येते ठाउँ सासादु डोच्येते लाम थोरूमसाक खुले खाबा मेत सिरच्येते बात थेकी छ्या स्ये ज्युता चाला ओतान। 9 थे गोमे कोठाताङ थे नाङ खित्च्येते गाङे कामगी विचार खित्जीन ङुरूङगी थरिङोला दि बातज्यीक लेमु खाला खोबा थुप्कीदुक। च्यि सासीन परमेश्वरला जे चढे खासीनोङ, भोग बिन्सीनोङ सुङ मि था ईन्सीन ङे पाप पूरो खाईन पाप ओङसुङ सिराच्योक खाईन ढुक्क खाईन देता थुपा मेतान। 10 च्यिला सासीन थे नियमलाचेन खालि दि सो थे मासा, दि थुङ थे माथुङ सिरच्येते बातताङ ठु खाला चोके खित्च्येते बातओनकामा ओतान। थे खोरोङगी खिता चालाच्योक खित्च्येते समय मालेपथुपकामा परमेश्वरगी थे नियम चले खित्च्या खाबा ओतान। ख्रीष्ट स्याप्की खित्सादु चुक ओङा ओते 11 तर ख्रीष्टचेन मिला पूरो खाला पापदुकी टाल्ला लेमु खिताला वाबा ओतान। दि काम खित्कान्ते थे गाङे भन्दा छ्येते पूजारी ईन्देकी था थे गाल्गीन मि लाईदु पूजारी काम खित्च्येते ठाउँचेन मिकी जोबाते ठाउँ मेन। थोगी थे ठाउँ दि सा लुङबादु मेत। थे ठाउँनी थाङबो मिओनगी जोबाते पाल भन्दा खापान खापान लेमुते ठाउँ ईन। 12 थे ठाउँदु स्यूक्जीन थेचेन ज्येन पूजारी च्योक रोबोताङ फौकी ठाक खुरगीन स्यूबाते मेन। था नोमुङ थोक खिता माफाप्च्या खाईन थेनी थे खोरोङ स्यिजीन थे खोरोङ जीउदुकी थेन्दाते ठागी खित्सादु मि पूरो खाला पापदुकी ठाल्च्येते लाम जोकीन परमेश्वर देत्सादु स्यूबा ओत। 13 रोबोताङ लाङतेबे ठाक थेमे कोरली भोग बिन्गीन स्येबाते थालाला छ्यु स्येकीन थोरनामेई बिटुले खाबाते मि चोके खिओ। 14 थोक खानामेईनी बिटुले खाबाते मि चोके खिओ सासीन ख्रीष्ट स्यिजीन थे जीउदुकी थेन्दाते ठागी खित्सादु था ईन्सीन मेलेबाते कामगी सजाय ङेत्ला ङा नरककुण्डमा स्यूक्पा माफाबो सिन ख्योकोन ढुक्क खाला देता थुप्क्यो। दोक ओङला ख्योकोनगी सोम्बोते परमेश्वरगी खि साबा साबाते खिन थेला माने खिता थुप्क्यो। च्यिला सासीन छ्याःङ गल्ती खाबा मेताते ख्रीष्ट परमेश्वर आत्मे शक्ति ङेत्कीन परमेश्वरला थे खोरोङ ज्यानराङ बिन्गीन स्या ओत। 15 थोक खाईन स्यिइन ख्रीष्टचेन परमेश्वरगी तिरी खाबाते जमान पूरो खाला तेरकान्ते ओङा ओत। थे थोक खित्कान्ते ओङेकी खित्सादु परमेश्वरगी थे खोरोङ दोन्दु स्योक सिन काताङाते मिओनला नोमुङ मोतोरच्या खाला तेरग्यो सिन साबाते जति था थेबेकी गाङे ङेत्च्या ओङा ओत। परमेश्वरगी गोमे जमान खानामेई तिरी जमान खित खितसाक मिओनगी खाबाते गाङे पाप माफ तेराला थेबे पापकी सजाय ख्रीष्टकी भोगे खाईन स्याप्की खित्सादु थेबेकी ङेत्च्येते जति ङेत्च्या ओङाते ईन। 16 सुइँदा मिकी ङा स्यिनामेई ङे सम्पत्ति दि दि मिकी ङेत्स्यीत सिन स्यिउ टिकीन बिन्दा ओत्सीनोङ थे मि सोम्बो ओत ओतसाक थे स्यिउला टिबाते बात छ्याःङ काम लै मिक्किओ। 17 थे मि स्यिनामेईकामा सम्पत्ति ङेत्कान्ते मिओनते खोपरोङ मिनला ओताते सम्पत्तिला हक लै खिओ। 18 बात दोक ईन्देकीराङ परमेश्वरगी गोमा खाबाते जमान बादोङ ठाक माथोराला पक्का ओङा मेतान। 19 चुक सासीन परमेश्वरगी बिन्दाते नियमओन मोशेकी मि गाङेकी थोच्या खाईन पढे खाबा ओतान। थेमे रोबोताङ फौकी ठाकला छ्यु स्येकीन फाल मोर्मुते म्वाबा ओतान। थेमे थे फाल हिसप सिराते दोङबो हाँगाला ठील्गीन थे ठाकनामा नोगीन परमेश्वर नियम टिबाते किताबताङ मिओनला 20 थोरगीनकामा थेकी “परमेश्वरगी ख्योकोनताङ जमान खाबा च्योकराङ खिओ सिराला ङे ख्योकोनला दि ठाक थोरा ओत। परमेश्वरगी जमान खिन ख्योकोनला खि साबाते था ख्योकोनगी ङेन,” सिन साबा ओतान। 21 थोक खाईन सिन्नामेई थेकी पाल थेमे थे पालदु परमेश्वरला पूजा खित्जीन चले खित्च्येते सामानतेबालाङ गाङेला थे ठाकराङ थोरा ओतान। 22 परमेश्वरगी बिन्दाते नियम तासीन ठाक थोरनामेई काल्बा च्योक जे कुरोङ चोके खिन ओतान। थेमे खइँदा भोग माबिन्दालानी मिकी खाबाते पाप माफ ओङराङ मेङगो। मि पापकी लाईदु ख्रीष्ट स्याप्ते ईन 23 थोगीराङ परमेश्वरला देताला सिन जोबाते पालचेन स्वर्गने ओतातेते नक्कलकामा ईन्देकी होथोक खाला ठाक थोरला चोके खिता फाप्कीन ओतान। तर स्वर्गने बात दोक मेन। दुरू पाल चोके खाबाच्योक मेन्देकी थेने चोके खितालाचेन दुरू जोबाते पालदु तेरच्येते भन्दा खुदुकराङ छ्येज्यीक भोग तेरा फाप्च्या ओतान। 24 च्यिला सासीन ख्रीष्ट गाल्गीन स्यूबाते ठाउँचेन स्वर्गने ओतातेते नक्कल खाईन परमेश्वर देताला सिन मिओनगी जोबाते पाल च्योक्ते मेन। ख्रीष्टनी स्वर्गने परमेश्वर दोन्दुराङ गाला ओत। थे दोन्दुराङ देत्ला थरिङोला थेकी ङुरूङ लाईदु परमेश्वरताङ बात खिओ। 25 मिओनगी पालगी नाङ जोबाते गाङे भन्दा चङगेते परमेश्वरराङ देत्च्येते कोठादु लोई ठाङमा स्यूक्जीन गाङे भन्दा छ्येते पूजारीचेन भोग बिन्दाते ठाक खुरला स्यूइओ। दुरू गाङे भन्दा छ्येते पूजारी लोई ठाङमा भोग बिन्दाते ठाक खुरगीन थे कोठे नाङ स्यूबाच्योक मेन्देकी ख्रीष्टचेन बाजिईकामा थे खोरोङ ज्यान बिन्गीन स्यिइन स्वर्गने परमेश्वर दोन्दुराङ गाला ओत। 26 दुरू पूजारीकी खिता च्योकराङ खिता फाप्च्या ईन्दा ईन्सीन दि सा नाम जोबा छुरला बाजि थोई थोई ख्रीष्टकी थे खोरोङ ज्यान तेरा फाप्च्या ओतान। तर मिकी खाबाते गाङे पापदुकी थेबाला डेलाला थे दि जुग सिन्दे खाला दुरू वाकीन बाजिईकामा थे खोरोङ ज्यान बिन्गीन स्याप्ते ईन। 27 मि गाङेराङ पालोई स्या फाप्क्यो थेमे स्यिनामेई ङीमाई मि गाङेते परमेश्वरगी न्याय खिओ। 28 थोक ईन्देकी मि काल्बेईला थेबेकी खाबाते गाङे पापदुकी डेलाला ख्रीष्टोङ बाजिईकामा थे खोरोङ ज्यान बिन्गीन स्याप्ते ईन। था थे लोक्ला देमा ग्युरला ओङगो। थोक खाला ओङच्येते लोक्ला गोमा च्योकराङ मि पापकी सजाय भोगे खाला स्याप्ला मेन। थानी ङीमाई थे ग्युरला ओङगो सिन गुकीन देताते मिओनला पूरो खाला पापदुकी टाल्ला स्वर्गने देत खेराला लिन्दालाका ओङच्येते ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.