हिब्रू 8 - जिरेलयेशूराङ ङुरूङते गाङे भन्दा छ्येते पूजारी ईन 1 था छ्येते बातचेन दिराङ ईन। च्यि सासीन ङुरूङते गाङे भन्दा छ्येते पूजारी चुक छ्ये ईन्दे सासीन थेनी स्वर्गने छ्येज्यीक शक्ति ओताते परमेश्वर देत्च्येते सिंहासन सामे छ्य्वापा देता ओत। 2 थेमे थेकी थेरू गाङे भन्दा छ्येते पूजारी काम खिन ओत। थेकी काम खित्च्येते ठाउँचेन थाङबो मोशे पालोला परमेश्वरला देताला सिन जोबाते पाल च्योक्ते मेन। थे पालचेन मिओनगी जोबा ओतान। थाल्ला साबाते ठाउँचेन प्रभु परमेश्वर थे खोरोङगीराङ जोबाते ईन। 3 परमेश्वरला चढे खिता फाप्च्येतेबा चढे खिताला थेमे भोग तेरालाराङ गाङे भन्दा छ्येते पूजारी छाने खाबा ओङगो। थोगी ङुरूङते गाङे भन्दा छ्येते पूजारीकीङ परमेश्वरला खइँदा चढे खिता थेमे भोग तेरा फाप्क्यो। 4 स्वर्गने मेन्गीन थेङ दुरू ओता ईन्सीन थेकी पूजारी काम खिता ङेत्च्या मेतान। मोशेकी टिबाते परमेश्वर नियमला साबा ओताच्योक खाला दुरू काम खित्कान्ते पूजारीओननी ओत्कीन ओत। 5 दुरू पूजारीओनगी काम खित्च्येते ठाउँनी स्वर्गने ओताते ठाउँकी नक्कलकामा ईन। थोगीराङ मोशेकी परमेश्वरला देताला सिन पाल जोजीन परमेश्वरगी थेला “खुई ङा देत्च्येते पाल जोजीन गाङे ङे खोल्ला सीनै बोमदु तेन्गीन बिन्दा ओता च्योकराङ खाला जो,” सिन साबा ओतान। 6 थोक ईन्देकी परमेश्वरगी मोशे पालोला खाबाते जमान भन्दाङ येशूकी खित्सादु पूरो ओङाते जमान छ्ये ईन। थोकराङ खाला दुरू पूजारीओनगी खित्च्येते काम भन्दा परमेश्वरगी येशूला सोम्पे खाबाते पूजारी काम छ्ये ईन। च्यिला सासीन येशूकी खित्सादु पूरो ओङाते जमानलाचेन झन छ्ये छ्ये बात ओत। 7 थे खोरोङगी खिता चालाते काम परमेश्वरगी मोशे पालोला खाबाते जमान छ्य्वापेईराङ खिता चालाते ईन्सीन तिरी लोक्ला थेकी ज्येन जमान खित्च्याराङ मेतान। 8 थे खोरोङ मि ईन सिन छाने खाबाते मिओनगी गल्ती खाबेकीराङ थेकी थेबा दोषी ईन सिन साबाते बात परमेश्वर बातला दोक सिन टिला दुक। च्यि सासीन “था समयज्यीक ओङगो। थेजीन ङा प्रभु परमेश्वर इस्राएलीओन थेमे यहूदिये मिओनताङ ज्येनज्यीक जमान खिओ। 9 दिचेन थेबे ज्युज्यु पुर्खाताङ खाबाते जमान च्योक्ते मेन। मिश्रे लुङबादुई तेन्ला खुलाङजीन ङे थेबाला ङा ख्योकोनला लेमु खिओ सिन जमान खाबा ओतान। थोक ईन्सीनोङ थेबेकी ङे खोपरोङताङ जमान खाबाते बातला नामज्योकराङ मासेतेकी थेबेकी खिता चाला च्योकराङ खित्स्यीत सिन ङे थेबाला ताराङ ताङाप। 10 था ङे इस्राएलीओनताङ खित्च्येते जमान दिराङ ईन। च्यि सासीन थेबेकी चुक खिता फाप्कीते, च्यि खित्च्ये सिन ङा थेबाला लेमु खाला खो ज्युत्क्यो। थेबेकी ङेन्दा फाप्च्येते ङे नियम ङा थेबे सेमगी नाङ टिबा ओता च्योकराङ खाला ज्य्वाक्यो। थोक खानामेई थेबेकी ङाला खोपरोङ परमेश्वर ईन सिन माने खिओ। थेमे ङा थेबाला ङाराङ मिओन ईन सिन सिओ। 11 ङे थोक खानामेई थेबेकी युल्बाला ईन्स्यीत, दाक्पोन आज्यो न्वाला ईन्स्यीत, सुङलाङ ङे बात लोपा माफाबो। परमेश्वर सु ईन्दे, चुक्ते ईन्दे सिनोङ लोपा माफाबो। च्यिला सासीन छ्ये टेक्टे गाङेकी ङा सु ईन्दे, चुक्ते ईन्दे सिन लेमु खाला छ्या स्येक्यो। 12 ङा थेबेकी खाबाते मेलेबाते कामताङ बात गाङे माफ खिओ। दिकी दोक दोक पाप खाबा ओतान सिन ङा लोक्ला थेबा सुङगीङ पाप नोमुङ सम्झे मिक्किओ,” सिन साला दुक। 13 दोक खाईन परमेश्वरगी ज्येनज्यीक जमान खिओ सिन साकीन गोमे जमान छ्याःङ काम लै मिक्किच्या जोसुङ। ङिङबा गाल्गीन काम लै मिक्किच्या गालाते जे कुरोङ ङीमाई दाक तोरला डुइओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.