हिब्रू 7 - जिरेलमल्कीसेदेक पूजारी बात 1 मल्कीसेदेकचेन शालेम सारगी गेल्बो थेमे गाङे भन्दा छ्येते परमेश्वर पूजारी ओतान। बाजिई अब्राहाम गेल्बो स्यीला ग्याल्ला लडाइँलेई ग्युरला ओङजीन थेला ठेत्कीन थेकी अब्राहामला आशी बिन्दा ओतान। 2 थेमे अब्राहामगीचेन थे खोरोङगी लडाइँला ग्याल्गीन ठ्वाकीन खुलाबाते जेसुकैते बो च्युताम्बे नाङ बोज्यीक टाल्गीन थेला बिन्दा ओतान। मल्कीसेदेक साबाते काका पाका मिक्किता खाला राज्य खित्कान्ते गेल्बो साबाते ईन। थेकी राज्य खाबाते शालेम सारगी अर्थचेन आनन्दे सार साबाते ईन। थोक ईन्देकी मल्कीसेदेकचेन आनन्दे सारगी गेल्बोङ ओतान। 3 थेते आबा आमाताङ ज्युज्यु पुर्खा सु ओताने, थे नाम केकीन नाम स्या ओताने सिरच्येते बात सुङलाङ छ्या मेत। थेचेन परमेश्वर फुज्युङ च्योकराङ सधैँभरि पूजारी ओङगीन देता ओत। 4 ङुरूङ ज्युज्यु अब्राहामगी थे खोरोङगी लडाइँला ग्याल्गीन ठ्वाकीन खुलाबाते जेसुकै नाङ बो च्युताम्बेते बोज्यीक टाल्गीन थेला बिन्दा ओतान। थोगी थे अब्राहाम भन्दाङ छ्ये ईन सिन लेमु खाला छ्या स्येकीदुक। 5 परमेश्वर नियमला च्यि साबा ओते सासीन पूजारी ओङकान्ते लेवी सन्तानगी ज्येन ज्येन थरगीते खोपरोङ आज्यो न्वाकी छ्य्वापेई जेसुकैते बो च्युताम्बे नाङ बोज्यीक ङेत्क्यो सिन साबा ओत। ईन्दानी दोक खाला तेरकान्तेताङ लेवी सन्तान गाङेराङ अब्राहाम सन्तानराङ ईन। 6 मल्कीसेदेकनी लेवी थरगी नाङ केबाते मिङ मेन। ईन्सीनोङ थेकीचेन अब्राहाम छ्य्वापेई बो च्युताम्बे नाङ बोज्यीक ङेता ओतान। थेमे थेकी परमेश्वरगी जमान खाईन तेरग्यो साबाते जति गाङे ङेत्कान्ते अब्राहामलाङ आशी बिन्दा ओतान। 7 आशी ङेत्कान्ते भन्दा आशी तेरकान्तेराङ छ्ये ईन सिन ङुरूङ गाङेला छ्या ओत मेन? 8 लोक्ला ज्येनतेबे छ्य्वापेई बो च्युताम्बे नाङ बोज्यीक ङेत्कान्ते लेवी थरगी पूजारीओननी दाक स्यिइओ, मल्कीसेदेक स्या ओतान सिनचेन परमेश्वर बातला खापाङ मिन्दुक। 9 सिइराङ सासीन अब्राहामगी मल्कीसेदेकला बो च्युताम्बे नाङ बोज्यीक तेरजीन खोपरोङ ज्येन ज्येन थरगी आज्यो न्वाकी छ्य्वापेई बो च्युताम्बे नाङ बोज्यीक ङेत्कान्ते लेवीकीङ बिन्दा छेतराङ ओङसुङ। 10 च्यिला सासीन अब्राहाम सन्तान ईन्सीनोङ थेजीन लेवी केबाराङ मेतान। 11 लेवी थरगी पूजारीओनगी ङेन्ला काम खिता फाप्च्येते नियम विचार खाईन परमेश्वरगी इस्राएलीओनला थे खोरोङ नियम बिन्दा ओतान। पूजारीओनगी थे नियमला साबाच्योक खाईन काम खासीनोङ थेबेकी थोक खाबेकी मिओन पूरो खाला पापदुकी ठाला थुप्च्या ईन्सीन पूजारी हारून च्योकराङ मेन्देकी मल्कीसेदेक च्योकराङ ओङला लोक्ला ज्येनज्यीक पूजारी ओङा फाप्च्येते छ्याःङ खाँचो मेतान। 12 लेवी थरगी पूजारी ठाउँदु ज्येनज्यीक पूजारी ओङा फापेकी नियमोङ खुदुक ओङसुङ। 13 थाल्लासाक ङुरूङगी बात खाबाते पूजारीचेन पूजारी थरदु केबाते मेन। दिकामा मेन्दाला थे थरगीते सुङ नोमुङ पूजारी ओङा मेतान, पूजारी कामोङ खाबा मेतान। 14 ङुरूङगी बात खाबाते पूजारीचेन प्रभु येशूराङ ईन। थेचेन यहूदे थरदु केबाते ईन। दि थरगी नाङदुई पूजारी ओङच्येते बात मोशेकी छ्याःङ टिबा मेतान। येशू मल्कीसेदेक च्योक्ते पूजारी ईन 15 थेमे मल्कीसेदेक च्योक्ते पूजारी ओङगीन ज्येनज्यीक पूजारी वाबेकी लेवी थरगी पूजारी नियम था काम लै मिक्किओ सिरच्येते बात झन लेमु खाला छ्या स्येकीदुक। 16 दि पूजारीचेन ज्येन च्योक पूजारी सन्तान नाङ केकीन पूजारी ओङाते मेन। दि पूजारी स्याप्ते स्यापराङ मेङा खाला स्यिसादुकी सोम्बो लोक्ला सधैँभरि देत्क्यो। थोगीराङ थे पूजारी ओङाते ईन। 17 बात दोक ईन सिन परमेश्वर बातला “खो मल्कीसेदेक च्योक्ते पूजारी ईन, खोचेन सधैँभरि पूजारी ओङला देत्क्यो,” सिन साला दुक। 18 थोगी दोक दोक खि सिन गोमा परमेश्वरगी बिन्दाते नियम छ्य्वापेई मिओनला छ्याःङ लेमु मायाङेकी दि नियम काम लै माक्यासुङ। 19 च्यिला सासीन थे नियमला खि साबाच्योक खासीनोङ मि सुङ पूरो खाईन पापकी छ्य्वापेई ठाला माथुप्सुङ। तर नियम साटोला थानी परमेश्वरगी पूरो खाला पापदुकी ठाल्च्येते ज्येन लाम जोबा ओतेकी ङुरूङते आश ओत। थेकी दोक खाबा ओतेकी थाचेन ङुरूङ थे दोन्दु ड्वा थुप्क्यो। 20 येशूला परमेश्वरगीराङ पूजारी जोइओ सिन ना क्याल्गीन पूजारी जोबा ओतान। ज्येन मि पूजारी ओङजीन ना केल्च्येते बात छ्याःङ मेतान। 21 परमेश्वरगी ना क्याल्गीन थेला पूजारी जोबाते बात परमेश्वर बातला “ङा प्रभु परमेश्वर खोत्ताङ दि बात नोमुङ खुदुक मोजोओ सिन ना केल्ग्यो। च्यि सासीन खोचेन सधैँभरि पूजारी ओङला देत्क्यो,” सिन टिला दुक। 22 थेकी ना क्याल्गीन येशूला पूजारी जोबा ओतेकी मोशे पालोला खाबाते जमान भन्दा तिरी खाबाते दि जमान छ्ये ईन सिन दाक छ्या स्येकीदुक। दि जमान पूरो खित ज्युत्कान्ते येशूराङ ईन। 23 थेमे ज्येनोङ बात च्यि सासीन ज्येन ज्येन पूजारीचेन ङीमाई दाक स्यिला डोकान्ते ईन्देकी मेराज्यीगीराङ पूजारी काम खिन देता थुपा मेतान। 24 तर येशूचेन सधैँ देत्कान्ते ईन्देकी थे ठाउँदु ज्येन पूजारी ओङा माफाबो। थेकी थे खोरोङ काम सधैँ खिनराङ देत्क्यो। 25 थोक ईन्देकीराङ खोपरोङला परमेश्वर दोन्दु खेरकान्ते थेराङ ईन सिन थे छ्य्वापा लै खित्कान्तेबाला थेकी पूरो खाला पापदुकी टाल्ला स्वर्गने देत ज्युत्क्यो। च्यिला सासीन थे सधैँभरि परमेश्वर दोन्दुराङ देत्ला थेबे लाईदु थेत्ताङ बात खिनराङ देत्क्यो। 26 ङुरूङला गोबाते गाङे भन्दा छ्येते पूजारीङ येशू च्योक्तेराङ ईन। थे सेमला पाप सिराते छ्याःङ मेत, सुङगीङ थेला दिकी दि दि गल्ती खासुङ सिन सिरा मुथुबो, थेकी मेलेबा सिराते छ्याःङ खाबा मेत। पापी मि च्योकराङ थे मेन, मि भन्दा खुदुकराङ ईन। थे छ्येज्यीक मान ङेत्कीन स्वर्गने देता ओत। 27 गाङे भन्दा छ्येते पूजारीओन ज्येनगी ङीमे ठाङमा गोमा खोपरोङ पाप माफ नाङ सिराला थेमेकामा ज्येन मि पाप माफ नाङ सिराला भोग तेरा फापाच्योक खाला येशूकीचेन दोक खिता माफाबो। मि पाप माफ ओङाला भोग तेराच्योक खाईन थेचेन थे खोरोङ ज्यानराङ बिन्गीन स्यिसुङ। दोक खाईन मि पाप माफ ओङच्येते काम बाजिईला खाईन सिन्देकी था थेकी नोमुङ दोक खिता माफाबो। 28 परमेश्वरगी बिन्दाते नियम अनुसार छाने खित्च्येते गाङे भन्दा छ्येते पूजारीचेन परमेश्वरगी खि साबा च्योकराङ खिता मुथुप्कान दाक पाप खिता थुप्कान्ते मि ओङगो। तर थे नियम बिन्नामेई तिरीचेन परमेश्वरगी ना क्याल्गीन थे खोरोङ फुज्युङला गाङे भन्दा छ्येते पूजारी छाने खाबा ओत। थेकीचेन परमेश्वरगी खि साबाते जति गाङे सधैँभरि लाईदु पूरो खाबा ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.