हिब्रू 6 - जिरेल1 बात दोक ईन्देकी था ङुरूङगी ख्रीष्ट सु ईन्दे, थेकी च्यि खासुङा सिन शुरू शुरूला लोपा फाप्च्येते बातओनकामा लोप्कीन मेदेता खाला होदोक्ते बात लेमु खाला खोबा थुप्कान्ते पाकोते मि च्योक ओङा फाप्क्यो। च्यि सासीन थाचेन ङुरूङगी नरककुण्डमा स्यूक्च्येते काम खिता ताङला परमेश्वर छ्य्वापा लै खाला थेला विश्वास खित्च्येते, 2 छ्युला लुक्ला बप्तिस्मा तेरच्येते, ज्येनगी लाक्तु लाक्पा ज्याक्ला प्रार्थना खित्च्येते, स्यिनामेकी सोम्बो लोक्च्येते थेमे परमेश्वरगी तिरी चुक खाला मि गाङेते न्याय खिते सिरच्येते बातकामा खिन देता मेङगो। 3 दोककामा खिन मेदेता खाला परमेश्वरगी ङुरूङला पाको ज्वाप्ला ज्येन बात लोपा चाल्सीन ङुरूङ थेकी लापा च्योकराङ खिओ। 4 थेमे दि बात टोक माज्येत। च्यि सासीन परमेश्वर सु ईन्दे, चुक्ते ईन्दे सिन छ्या स्येबा ओताते, परमेश्वरगी खोपरोङला ताला जेसुकै लेमु ओङ ज्युत्क्यो सिरच्येते बात खोबा ओताते, परमेश्वर आत्मा ङेता ओताते, 5 परमेश्वर बात सत्यते ईन सिन खोबा ओताते थेमे था ओङच्येते सत्य जुग चुक लेमु ओङगीते सिन छ्या ओताते मिओन 6 परमेश्वर छ्य्वापेई पूरो खाईन ठाल्गीन गाल्सीन थोक्तेबेकी ङानी पापी दुका सिन छ्या स्येला लोक्ला परमेश्वर छ्य्वापा ग्युरला ओङाप सिन नोमुङ चिते माक्यासीनोङ ओङगो। थोक्ते मिओनगीनी ज्येनगी ङोन्दु परमेश्वर फुज्युङला बेइज्जत खाईन लोईन स्यिङगी थामला टाँए खाईन सेता छेतराङ ईन। 7 लो विचार खि। बेला बेलाला छ्यार्बा ग्याप्कीन स्यीङदु लै खाबाते बाली लेसुङ सासीन थोक्ते स्यीङला परमेश्वरगी आशी बिन्गीन लेमु ओङ च्युताते ईन सिन सिओ। 8 लै खाबाते बाली तोरगीन थेरू खालि जेकताङ सादुम चाङकामा केसुङ सासीन थे स्यीङ छ्याःङ काम लै मिक्किओ। थोक्ते स्यीङला परमेश्वरगी सराप तेरग्यो। थेमे थोक्ते स्यीङलाचेन मे कुरग्यो। 9 ङिङज्येते आज्यो न्वावे, ङ्योकोनगी खाबाते दि बातओन थोला ख्योकोन ज्यीबा माकेत। ख्योकोनचेन थे काम लै मिक्किच्येते स्यीङ च्योक्ते मेन। थेमे ख्योकोन परमेश्वर छ्य्वापेई नोमुङ ठाल्ला मोन्डोओ सिन ङ्योकोनला लेमु खाला छ्या ओत। परमेश्वरगी ख्योकोनला पूरो खाला पापदुकी डेल्ग्यो। 10 ख्योकोनगी परमेश्वरला थोई ङिङज्ये खिते सिन परमेश्वर सन्तान ज्येनतेबाला ङिङज्ये खाईन लेमु खाबाते थेमे थोरूमोङ थोकराङ खिन ओताते बातकी छ्य्वापेई लेमु खाला छ्या स्येबा थुप्कीदुक। ख्योकोनगी थोक खाबाते परमेश्वरला गाङे छ्या ओत। थेकी दि बात थाराङ टोक मेज्येदो। 11 स्यि स्यिसाकराङ ख्योकोन गाङेकी दोकराङ खिन देत्स्यीत सिरच्येते ङ्योकोन सेम ओत। दोक खिनराङ देत्सीन परमेश्वरगी खेराङला तेरग्यो सिन साबातेबा पक्काराङ ङेत्क्यो सिन ख्योकोनगी आश खाईन गुकीन देतातेबा गाङे ङेत्क्यो। 12 थोगी ख्योकोनगीङ अल्छी मिक्किता खाला चुक खिसे सासीन परमेश्वरला विश्वास खिन जस्तो ओङसीनोङ सेम मेसेता खाला देत्कान्ते मिओनला ताला होथेबेकी खाबा च्योकराङ खि। होथोक खित्कान्ते मिओनगीचेन परमेश्वरगी तेरग्यो सिन जमान खाबाते गाङे ङेत्क्यो। परमेश्वरगी जमान खानामेई बात खुदुक मोजोओ 13 अब्राहामताङ जमान खित्जीन थे खोरोङ भन्दा ज्येन सुङ छ्ये मेतेकी परमेश्वरगी थे खोरोङ मिनलाराङ दोक सिन ना क्याल्गीन जमान खाबा ओतान। 14 थेकी चुक साबा ओताने सासीन “ङा खोल्ला साँच्चीराङ आउदी खाला आशी तेरग्यो। थेमे खुई सखा सन्तान फेल च्युत्ला काल्बेई जोइओ,” सिन साबा ओतान। 15 थेमे अब्राहामगी परमेश्वरगी थे खोरोङताङ जमान खाबा च्योकराङ खिओ सिन लो काल्बेईसाक सेम मेसेता खाईन गुकीनराङ देतेकी परमेश्वरगी थेला तेरग्यो सिन साबाते गाङे बिन्सुङ। 16 मिओनगीचेन खोपरोङ भन्दा छ्येकी मिन लाला ना केल्ग्यो। मिओनगी साबाते जे बादोङ ना क्याल्नामेईचेन पक्काराङ दुका सिन छ्या स्येक्यो। 17 थे खोरोङगी जमान खाबाच्योक पक्काराङ खिओ थेमे थे बात बान्दा खुदुक मोजोओ सिन सिराला परमेश्वरगीङ ना क्याला ओतान। 18 परमेश्वरगी पालोई खाबाते बात बान्दा फरक परे मिक्किओ सिन छ्या स्येबाला बात ङि ओत। बातज्यीकचेन परमेश्वरगी मिओनला ङा दोक दोक खिओ सिन जमान खाबा ओतान। थेमे ज्येनतेचेन खाबाते जमान पक्काराङ पूरो खिओ सिन ना क्याला ओतान। दि बात ङि नोमुङ खुदुक ड्वा मुथुबो। परमेश्वरगी नोमुङ ढाँर मिक्किओ। दोक ईन्देकी थेकी खिओ साबाच्योक पक्काराङ खिओ सिन दाक्पोनगी आश खाईन देताते बातला ङुरूङ छ्याःङ शंका मिक्किता खाला देता थुप्क्यो। 19-20 दाक्पोनगी आश खाईन देताच्योक पक्काराङ ओङगो सिन छ्या ओतेकी दोक ओङगीता मेङता सिन ङुरूङ नोमुङ छ्याःङ ज्यीबा मिक्किता खाला देता थुप्क्यो। ङुरूङगी आश खाईन देता च्योकराङ खाला ङुरूङला परमेश्वर दोन्दु खेराला येशू गाङे भन्दा छ्येते पूजारी ओङगीन ङुरूङ भन्दा गोमाका पर्दे ल्हाकनापा परमेश्वर दोन्दु गाङे भन्दा छ्येते पूजारीकामा ड्वा ङेत्च्येते ठाउँदु गाल्गीन देता ओत। येशू मल्कीसेदेक च्योकराङ गाङे भन्दा छ्येते पूजारी ओङा ओत। थे सधैँभरि गाङे भन्दा छ्येते पूजारी ओङला देत्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.