हिब्रू 4 - जिरेलपरमेश्वरगी ढुक्क खाला देत ज्युत्च्येते बात 1 परमेश्वरगी मिओनला थे खोरोङगी देत ज्युता चालाच्योक खाला ढुक्क खाला देत ज्युत्क्यो सिन जमान खाबाते बात थोरूमोङ खुदुक गाला मेत। थेकी साबा च्योकराङ खाला देता ङेत्सादुई खेराङ सुङ माठाल्स्यीत सिन ङुरूङ च्याङबो खाला देता फाप्क्यो। 2 मोशे पालो मिओनला च्योकराङ ङुरूङलाङ गा लाङच्येते बात लापा ओत। थे बात थोसीनोङ थेबाला थे नोमुङ माथोबा छेतराङ ओङसुङ। च्यिला सासीन थेबेकी परमेश्वरगी जमान खाबा च्योकराङ खाला खोपरोङला ढुक्क खाला देत ज्युत्क्यो सिन पत्ते माक्यासुङ। 3 परमेश्वरगी चुक साला दुका सासीन “ङाला स्येदाङ लाबेकी ङे ‘ङा दिबाला ङाराङगी देत ज्युता चालाच्योक खाला ढुक्क खाला देतराङ मुज्युदो,’ सिन ना क्यालाप,” सिन साला दुक। ईन्सीनोङ थेकी जमान खाबाच्योक पक्काराङ खिओ सिन ङुरूङगी थेला विश्वास खिन देत्सीन थेकी ङुरूङलाचेन थे खोरोङगी साबा च्योकराङ खाला ढुक्क खाला देत ज्युत्क्यो। विचार खित्जीन सा नाम जोला सिन्जीनराङ परमेश्वरगी खिता फाप्च्येते काम जति खाईन सिन्दा ओतान। 4 च्यिला सासीन सन्चारी बात खित्जीन परमेश्वर बातला ठाउँज्यीक्तु “परमेश्वरगी ज्वा फाप्च्येते गाङे जोकीन सिन्नामेकी ङीमा दुईनगी छोमुचेन थेकी दोक्ते जोच्येते छ्याःङ काम माक्यासुङ,” सिन टिला दुक। 5 ईन्सीनोङ परमेश्वरगी ढुक्क खाला देत ज्युत्च्येते बात खित्जीन आनाङका साबाते ठाउँदुराङ “ङा दिबाला ङाराङगी देत ज्युता चालाच्योक खाला ढुक्क खाला देतराङ मुज्युदो,” सिन परमेश्वरगी साबाते बादोङ परमेश्वर बातला टिला दुक। 6 थाङबो खोपरोङला लापाते गा लाङच्येते बात थोकान्तेबेकी थे बातला नामज्योक मासेतेकीराङ थेबा परमेश्वरगी देत ज्युता चालाच्योक खाईन ढुक्क खाईन देता माङेत्सुङ। थेबाला थोक ओङा ईन्सीनोङ ज्येनलाचेन थोरूमोङ परमेश्वरगी थे खोरोङगी देत ज्युता चालाच्योक खाला ढुक्क खाला देत ज्युत्क्यो। 7 थोक खिओ सिन परमेश्वरगी याङराङ समयज्यीक तोके खाईन थे समयला “थरिङ दिन” सिन सासुङ। होदि समय बात खिन गेल्बो दाऊदकी “थरिङ परमेश्वरगी खेराङला च्यि सिका थे थोनामेई ख्योकोन अटेरी खाला मादेत,” सिन साबाते बात परमेश्वर बातला टिला दुक। 8 यहोशूकी इस्राएलीओनला कनान लुङबादु क्याल्नामेईराङ परमेश्वरगी देत ज्युता चालाच्योक खाला ढुक्क खाला देत ज्युत्क्यो साबाते जमान पूरो ओङाते ईन्दा ईन्सीन परमेश्वरगी याङराङ “थरिङ दिन” सिन लोक्ला ज्येन समय तोके खित्च्या मेतान। 9 थोगी बात च्यिन्दे सासीन परमेश्वरगी थे खोरोङ मिओनला देत ज्युता चालाच्योक खाला ढुक्क खाला देत ज्युत्क्यो साबाते कामनी थाका पूरो खिओ। 10 थे खोरोङगी ज्वा फाप्च्येते गाङे जोकीन सिन्नामेई ङीमा दुईनगी छोमुचेन परमेश्वर दोक्ते जोच्येते छ्याःङ काम मिक्किता खाईन देता ओतान। थेकी देत ज्युता चालाच्योक खाईन ढुक्क खाईन देत च्युताते मिकीङ था थे खोरोङगी खिता फाप्च्येते काम जति खाईन सिन्गीन ङा सोबाच्योक खाला देता ङेत्क्यो। 11 ङुरूङ पुर्खेकी परमेश्वर बातला नामज्योक मासेतेकी परमेश्वरगी देत ज्युता चालाच्योक खाईन ढुक्क खाईन देता ङेता मेतान। थोगी थेबाला च्योक मेङस्यीत सिन ङुरूङगीचेन परमेश्वरगी साबा च्योकराङ खाला दाक्पोनला ढुक्क खाला देत ज्युत्स्यीत सिन थे बात ङेन्च्ये छ्य्वापाकामा स्येत खिता फाप्क्यो। 12 च्यिला सासीन परमेश्वर बातकी छ्य्वापेई मिओनगी जुनी ङेत्क्यो। दि बातकी छ्य्वापेकी परमेश्वरगी मि नाङ काम खिओ। ठाउँ ङिकारपा धार खाबाते आउदी नोम्बोते तरवारगी मिला रोपे खासीन दोन्नापेई ल्हाकनापासाकराङ फोत तोला थुप्क्यो थेमे रूबाताङ जोर्नीतेबा टाल्ला नाङदु ओताते काङ समेत देन्दा थुप्क्यो। होदोक्ते तरवार भन्दाङ परमेश्वर बातकी छ्य्वापेई परमेश्वरगी खित्च्येते काम खापान खापान छ्ये ईन। दि बातकी छ्य्वापेईराङ सुइँदेकी खाबाते कामताङ बात मिकी दाक्पोनगी खाबाते ईन्दाना परमेश्वर आत्मेकी खित च्युताते ईन्दे सिन डेला थुप्क्यो थेमे सुई च्यि विचार खिन दुका, मि सेमगी नाङ लेमु मेलेबा चुक दुका सिनोङ गाङे लेमु खाला डेला थुप्क्यो। 13 परमेश्वरताङ छ्याक्ला ईप्ला सुङगीङ छ्याःङ खिता मुथुबो। सा नाम खाङ नाम खापा च्यि ओङगीन दुका, सुई च्यि खिका सिन थेकी गाङे थोङला छ्या स्येक्यो। थेमे ङीमा लेनज्यीक मि गाङेकी दाक्पोनगी खाबाते लेमु मेलेबा गाङे कामताङ बातकी हर हिसाब थेला तेरा फाप्क्यो। येशू गाङे भन्दा छ्येते पूजारी ईन 14 स्वर्गने गाल्गीन परमेश्वर दोन्दु देताते परमेश्वर फुज्युङ येशू ङुरूङते गाङे भन्दा छ्येते पूजारी ईन्देकी ङुरूङगी थेला विश्वास खाईन ङेन्दाते बात ङेन्दा मोतोङा खाला देता फाप्क्यो। 15 ङुरूङगी चुक सजिलो खाला दाक पाप खिता थुप्कीते सिन थेला छ्या मेताते मेन। दि बात थेला लेमु खाला छ्या ओतेकी लो था ईन्सीनचेन ङा ख्योकोनताङ डासुङ सिन नोमुङ मिसिरो। शैतानगी ङुरूङला चुक खाला पाप खित ज्युता छोल्गीते सिनोङ थेला छ्या ओत। च्यिला सासीन थेलाङ शैतानगी परी परी खाईन लुकीन पाप खित ज्युता चाला ओतान। शैतानगी थोक खित्जीनोङ थेकी नोमुङ छ्याःङ पाप खाबा मेतान। 16 थोगी शैतानगी दुक्पा तेरा छोल्जीन ङुरूङ छ्याःङ ज्यीबा मिक्किता खाला मद्धत नाङ सिन परमेश्वर दोन्दु ड्वा फाप्क्यो। परमेश्वर ङुरूङला दया खित्कान्ते ईन्देकी जहिलेङ थेकी ङुरूङला ङिङज्ये खाला मद्धत तेरग्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.