हिब्रू 3 - जिरेलमोशा भन्दा येशू छ्ये ईन 1 बात दोक दोक ईन्देकी आज्यो न्वावे, ख्योकोनचेन स्वर्गने देताला परमेश्वरगी थे खोरोङ दोन्दु स्योक सिन काताङाते मि ईन्देकी येशू चुक छ्ये ईन्दे सिरच्येते बातकीतेकामा ध्यान खिन देत। थेचेन परमेश्वरगीराङ खटे खाईन ताङाते थेमे गाङे भन्दा छ्येते पूजारी ईन। थे पक्काराङ होदोक छ्ये ईन सिन ङुरूङ थेला विश्वास खिओ। 2 परमेश्वरगी थे खोरोङ मि ईन सिन साबाते इस्राएलीओन नाङ काम खित्जीन थे खोरोङला खि साबाते काम मोशेकी लेमु खाईन खाबा ओतान। थेकी च्योकराङ येशूकीङ थे खोरोङला छाने खाला तोङकान्ते परमेश्वरगी खि साबा साबा च्योकराङ खासुङ। 3 ईन्सीनोङ खाम्बे बात खित्जीन मिओनगी खाम्बेते भन्दा फलानेकी चुक लेमु खाईन खाम्बा जोका सिन थे खाम्बा जोकान्ते मि बात खाबा च्योकराङ मोशाला भन्दा काल्बा मान खिता फाप्च्येते येशूलाराङ ईन। 4 सुइँदा जोकान मेताला थाराङ खाम्बा मेङगो। ओताते जति जोकान्ते परमेश्वरराङ ईन। 5 ईन्दानी ईन। च्यि सासीन मोशेकी थे खोरोङ काम लेमु खाईन खाबा ओतान। ईन्सीनोङ थेचेन सुइँदे खाम्बादु काम खित्कान्ते मि च्योक ओतान। थे कामचेन परमेश्वरगी तिरी चुक चुक खिते सिन ज्येनला लाःप्च्येते ओतान। 6 ख्रीष्टकीङ थे खोरोङ काम लेमु खाईन खाबा ओतान। तर थेचेन मोशा च्योक्ते मेन। मोशा सुइँदे खाम्बादु काम खित्कान्ते मि च्योक ओतान सासीन ख्रीष्टचेन होथे खाम्बे धनी फुज्युङ च्योकराङ ईन। थेमे ङुरूङचेन थे खाम्बे मि ईन। थोक ईन्सीनोङ जस्तो ओङजीनोङ ज्यीबा मिक्किता खाईन थेमे सेम मेसेता खाईन परमेश्वरगी था तिरी दाक्पोनला तेरग्यो साबाते गाङे ङेत्क्यो सिन थेला विश्वास खिन देत्सीनकामा ङुरूङ थे खाम्बे मि ईन। च्याङबो खाला देता फाप्च्येते बात 7 थोक ईन्देकी परमेश्वर आत्मेकी दोक दोक सिन साबाते बात ङुरूङगी ङेन्दा फाप्क्यो। थेकी चुक साला दुका सासीन “थरिङ परमेश्वरगी खेराङला च्यि सिका थे थोनामेई 8 ख्योकोनगी खेराङ पुर्खेकी खाबाच्योक माकेत। थेबेकीचेन परमेश्वर बातला नामज्योकराङ मेसेता खाईन अटेरी खाबा ओतान। ठाःकताङ बालुवा बाई छ्याःङ मेत्से नाङला ओते बेलाला परमेश्वरगी पक्काराङ खिओ साबाच्योक खित्च्या ईन्दाकाना मेन्दाका सिन थेबेकी थे सेम ता चाला ओतान,” सिन साला दुक। 9 परमेश्वर बातलाराङ “ङे लो खाल ङिसाक खोपरोङला चुक लेमु खाईन तासुङा सिन छ्या ओत्कीन ओत्कीनोङ छ्या मास्येबा च्योकराङ खाईन थेबेकी याङ याङ ङे सेम ता चाल्सुङ। 10 ङे जति लाःप्जीन कोत्जीनोङ थेबेकी ङे लाःपा कोताते माङेन्गीन ङाला स्येदाङ लाबेकी ‘थेबा जहिलेङ खोपरोङ खुशीलाकामा ख्याम्गीदुक, ङे खि सिन साबाते थेबेकी ङेनराङ मेङेन्दुक,’ सिन साबान। 11 थेमे ङाला स्येदाङ लाबेकी ङे ‘ङा दिबाला ङाराङगी देत ज्युता चालाच्योक खाला ढुक्क खाला देतराङ मुज्युदो,’ सिन ना क्यालाप,” सिन साबाते बादोङ टिला दुक। 12 थोगी आज्यो न्वावे, दि बातओन सम्झे खाला ख्योकोन च्याङबो खाला देत। दोक माक्यासीन परमेश्वर बात मेङेन्दा खाला सोम्बोते परमेश्वर छ्य्वापेई ख्योकोन ठाल्ला डुइओ। 13 थोगी परमेश्वर बात ङेन्दा ताङला पाप खाला परमेश्वर छ्य्वापेई ठाला माफाप्स्यीत सिन परमेश्वर बात ङेन्दा फाप्क्यो सिन ख्योकोनगी दोक्पोईकी ज्येनज्यीकला ङीमे ठाङमा सिन देत। खेराङगी “थरिङ दिन” सिरा ङेत ङेतसाकराङ ख्योकोनगी दोक खिनराङ देत। 14 च्यिला सासीन स्याप छोमुसाकराङ ङुरूङगी परमेश्वरगी खिओ साबाच्योक पक्काराङ खिओ सिरच्येते बातला गोमा खाबा च्योकराङ छ्याःङ शंका मिक्किता खाला देता फाप्क्यो। दोक खाईन देत्सीन ख्रीष्टताङ डिक्ला ङुरूङगी थेकी ङेत्च्येते आशी ङेत्क्यो। 15 आनाङ भर्खरकामा ङे ख्योकोनला परमेश्वर बातला “थरिङ परमेश्वरगी खेराङला च्यि सिका थे थोनामेई ख्योकोनगी खेराङ पुर्खेकी खाबाच्योक माकेत। थेबेकीचेन परमेश्वर बातला नामज्योकराङ मेसेता खाईन अटेरी खाबा ओतान,” सिन टिबा ओताते बात साबा ओतान। 16 सु सुकी परमेश्वर बात थोकीनोङ थे बातला नामज्योक सेता मेताने? थोक खित्कान्तेबा च्यि मोशेकी मिश्रे लुङबामेकी टीकीन खुलाबाते मि गाङेराङ मेनरो? 17 थेमे लो खाल ङि ङिसाक परमेश्वरला स्येदाङ लोङगीनराङ देत्कान्तेबा सु ओताने याङ? च्यि थे बातला टेरे मिक्किता खाला पाप खित्कान्ते मिओनराङ मेनरो? थोक खित्कान्तेबानी गाङेराङ ठाःकताङ बालुवा बाई छ्याःङ मेत्से नाङलाराङ स्यिइन थेङलाराङ रूल्गीन गाला ओतान। 18 थेमे परमेश्वरगी “ङा ख्योकोनला ढुक्क खाला देता ङेत्च्येते ङे खेरग्यो साबाते लुङबादु खेरराङ मेखेरो,” सिन ना क्यालाते च्यि थे खोरोङगी लाःपाते मेङेन्कान्ते होथे मिओनलाराङ मेनरो? 19 परमेश्वर बातला नामज्योक मासेतेकी थेमे परमेश्वरगी खोपरोङला तेरग्यो साबाते लुङबा ङेत्क्यो सिन पत्ते माक्याबेकीराङ थेबा थे लुङबादु स्यूक्पा ङेता मेतान सिन ङुरूङगी लेमु खाला छ्या स्येबा थुप्कीदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.