हिब्रू 2 - जिरेलदाक्पोनगी थोबाते परमेश्वर बात ङेन्दा तोङा मेङगो 1 बात दोक दोक ईन्देकी ङुरूङगी दाक्पोनगी थोबाते बातओन लेमु खाला ङेन्गीन देता फाप्क्यो। दोक खिन मादेत्सीन ङुरूङ दाक्पोनगी थोबाते बातला खि साबा च्योकराङ खिन देता मुथुबो। 2 परमेश्वरगी थे खोरोङ दूतओन छ्य्वापेकी ङुरूङ ज्युज्यु पुर्खेकी ङेन्दा फाप्च्येते नियम बिन्दा ओतान। थेमे थे नियम मेङेन्कानगी सजाय ङेत्क्यो सिन साबा ओतान। थे नियमला माकेत साबाते कामज्यीककामा खासीनोङ थेमे थेरू खि साबाते बातज्यीककामा माङेन्सीनोङ थोक खित्कान्ते मिओनगी परमेश्वरगी साबा च्योकराङ खाईन सजाय ङेता ओतान। 3 थे नियम मेङेन्कान्तेबेकीनी सजाय ङेता ओतान सासीन परमेश्वरगी मिओनला पापकी सजायदुकी डेल्ग्यो सिरच्येते दोक लेमुते बात माङेन्सीन ङुरूङ चुक खाला सजाय छ्य्वापेई थारगीतेरो? परमेश्वरगी मिला पापकी सजायदुकी डेल्च्येते बात गोमा प्रभु येशूकी लापाते ईन। थेमे थेकी लापाते बात थोकान्तेबेकी थे बात सत्यते ईन सिन ङुरूङला लाप्कीन बिन्दा ओत। 4 थेबेकी लापाते बात सत्यतेराङ ईन सिन तेन्दाला परमेश्वरगीङ दि बात लोप्कान्तेबाला खुदुक खुदुकतेन्दे छ्ये छ्येताङ अचम्बतेन्दे काम खित च्युत्सुङ। थेमे थे खोरोङगी सेम खाबा च्योकराङ खाईन परमेश्वर आत्मा बिन्गीन खुदुक खुदुक काम खित्च्येते सीपताङ शक्तिङ बिन्सुङ। मिला पापदुकी डेल्कान्ते येशू ईन 5 थाल्लासाक बात खिन वाबाते था तिरी ओङच्येते परमेश्वर राज्यदुचेन परमेश्वर दूतओनगी राज्य खित्च्येते मेन। 6 बरू मि बात खित्जीन सुइँदेकी परमेश्वर बातला ठाउँज्यीक्तु च्यि साला दुका सासीन “मि जाबाङ परमेश्वर खुई दोन्दु सु ईन्देरो? दोक ईन्सीनोङ खुई थेला रकस्यिकोङ टोक मेज्येदो। 7 टिक्पी दिनगी लाईदु खुई थेला खोरोङ दूतओनला छेदोङ मान बिन्दा मेतान। खुई थेला छ्येज्यीक शक्तिताङ मान बिन्दा ओत। 8 जो ईन्सीनोङ, जे ईन्सीनोङ गाङेला खुई थे अधीनलाराङ ज्याक्पा ओत,” सिन साला दुक। थे अधीनला मेताते सिराते छ्याःङ बाँकी मोज्योबा खाईन परमेश्वरगी ओताते जति गाङे थे अधीनलाराङ ज्याक्पा ओत। ईन्सीनोङ थोरूमसाक गाङे थे अधीनला ओङगीन सिन्दाते ङुरूङगी थोङा ङेता मेत। 9 तर ङुरूङगी येशू बात विचार खिइ। परमेश्वरगी मिला दया खाईन मि गाङे लाईदु स्याप्ला थेकी येशूला टिक्पी दिनगी लाईदु थे खोरोङ दूतओनला छेदोङ मान बिन्दा मेतान। मि गाङे लाईदु दुक्पा भोगे खाईन स्याप्की खित्सादु थाचेन परमेश्वरगी थेला छ्येज्यीक शक्तिताङ मान बिन्दा ओत। 10 ओताते जति जोकान्ते परमेश्वरराङ ईन। जोबाते जति गाङे थेतेराङ ईन। मि काल्बेई थे खोरोङ फुज्युङ फुमु ओङला थे खोरोङताङ देता ङेत्स्यीत सिन थेकीराङ होथेबाला पापदुकी डेल्कान्ते येशूला थे खोरोङगी तेरा चालाते मान बिन्सुङ। मि पापकी लाईदु येशूकी दुक्पा भोगे खाईन स्याप्की खित्सादु थेकी थेला थोक खाला मान तेरा डिक्च्याराङ ओतान। 11 मि सेम खुदुक जोकान्ते येशूताङ थेकी सेम खुदुक जोबाते मि गाङेते आबाज्यीकराङ ईन। थोगीराङ थेबाला थे खोरोङ न्वा ईन सिराला येशू छ्याःङ ङोचा मिक्किओ। 12 परमेश्वरताङ बात खिन थेकी “खो सु ईन्दे, च्यि खिते सिन ङा ङाराङ न्वाओनला लेमु खाला लोप्क्यो। खोल्ला छ्ये ज्वाप्ला थेबा गाङेराङ जम्मा ओङा ओते बेलाला ङा खुईते जय जय ओङस्यीत सिन सिओ,” सिन साला दुक। 13 थेकी “परमेश्वर खिओ साबा च्योकराङ खित्कान्ते ईन्देकी ङा थेला भर परे खिओ,” सिनोङ साला दुक। लोक्लाङ थेकी “ङा थेमे परमेश्वर खुई ङे जिम्माला बिन्दाते खुई फुज्युङ फुमु गाङे खुई दोन्दुराङ ओत,” सिनोङ साला दुक। 14 थे खोरोङगी परमेश्वर फुज्युङ फुमु साबाते मिओन च्योकराङ खाईन येशूङ मि स्या ठाक खुराते जुनी लाकीन केसुङ। मिला स्यिर ज्युत्कान्तेला ग्यालालाराङ थे दोक खाईन मि जुनी लाकीन केकीन स्या फापाते ईन। मिला स्यिर ज्युत्कान्तेचेन शैतान ईन। 15 था ङीमाई दाक स्यिइओ सिन मिओनगी जुनी खाङ कालगी ज्यीबा खुरगीन देता फापा ओतान। येशूकी थोक खाईन शैतानला ग्याला ओतेकी था मिओनगी कालताङ ज्यीबा खिता माफाबो। 16 थेकी कालगी ज्यीबादुकी टालाते परमेश्वर दूतओनला मेन, अब्राहाम सखा सन्तानला ईन। 17 थोगीराङ थेला थे खोरोङ न्वाओन च्योकराङ ओङा फाप्सुङ। थोक खाईन मि पाप माफ ओङस्यीत सिन थेचेन परमेश्वर दोन्दु मिओनगी खाबाते पाप माफ नाङ सिरकान्ते गाङे भन्दा छ्येते पूजारी ओङा ओत। थेकी मिओनला दया खिओ। थे थे खोरोङगी खिओ साबा च्योकराङ खित्कान्ते ईन। 18 शैतानगी परी परी खाला लुला पाप खित ज्युता छोल्जीन थे खोरोङगी आउदी दुक्पा भोगे खाबा ओतान। थोगी खित्सादु शैतानगी मिला लुला पाप खित ज्युता छोल्जीन थोक्ते मिला येशूकी पाप खिता माफाप्च्येते शक्ति तेरग्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.