हिब्रू 13 - जिरेलपरमेश्वरला गा लाङच्येते बात च्यि ईन्दे 1 थेमे खेराङ गाङेराङ आज्यो न्वा ईन्देकी दोक्पोईकी ज्येनज्यीकला ङिङज्ये खिन देत। 2 नोमुङ माठेताते ईन्सीनोङ खाम्बादु वाबाते मिला लेमु खि। दोक खित्जीन कोई कोईकी थाङबो परमेश्वर दूतओनलाका लेमु खाबा ओतान। थे मिओनला थेबा परमेश्वर दूत ईन सिन छ्याङ मेतान। 3 थेमे खेराङराङ थेरू स्यूबाते च्योक ठाने खाला जेलदु लुक्पाते मिओनलाङ लेमु खाला तो। ङ्योकोनलाङ मिकी ङीमाई दोकराङ खाला दुक्पा तेरा थुप्क्यो सिन टोक मेज्येता खाला ख्योकोनगी ज्येनगी दुक्पा बिन्दाते मिओनलाङ मद्धत बिन्ला लेमु खि। 4 ख्योकोन दाक्पोन ख्यावा फेम्मेताङकामा देत। सुङगीङ ज्येन मि ख्यावा फेम्मेताङ ङ्याल्ला रन्डीबाजी माकेत। फाङमा खाबातेबा ईन्स्यीत, माक्याबातेबा ईन्स्यीत रन्डीबाजी थेमे होदि च्योक्ते खिता मेङच्येते काम खित्कान्तेबाला जोराङ ईन्सीनोङ परमेश्वरगी न्याय खाला सजाय तेरग्यो। 5 थेमे ख्योकोनगी पैसे लोभ माकेत। खेराङताङ जति दुक थेलाराङ सन्तो खाला देत। च्यिला सासीन परमेश्वरगी “ङा ख्योकोनला सधैँ लेमु खाला तेइओ। नोमुङ ङा ख्योकोनला ताङला मोन्डोओ,” सिन साबा ओत। 6 थोगी ङुरूङ छ्याःङ ज्यीबा मिक्किता खाला “प्रभु परमेश्वर ङाला ताकान्ते ईन्देकी ङा ज्यीबा खिता माफाबो। मिकी ङाला च्यि खितेरो?” सिन सिओ। 7 खेराङला ताकान्ते छ्ये छ्ये मि बात ठेम्बा खि। थेबेकी ख्योकोनला परमेश्वर बात लापा ओतान। दुक्पा किम्मु जस्तो ओङजीनोङ स्यि स्यिसाकराङ थेबेकी चुक खाईन परमेश्वरला विश्वास खाबा ओताने थे ताला ख्योकोनगीङ थेबेकी खाबा च्योकराङ खि। 8 येशू ख्रीष्टचेन थोङला जस्तो ओतान थरिङोलाङ थोकराङ ओत। थेमे सधैँभरि थोकराङ देत्क्यो, थे नोमुङ खुदुक मोन्डोओ। 9 बात दोक ईन्देकी परमेश्वर बात ईन सिन थे बातताङ डिकराङ मिडिक्च्येते खुदुक खुदुकते बात ङेन्ला छक्के माकेत। परमेश्वरगी दया खाबा ओतेकी खित्सादु होथोक्ते बातला नामज्योक मेसेता खाला छ्याःङ शंका मिक्किता खाला थेला विश्वास खिन देता लेमु ईन। दि सा ओङगो, थे सा मेङगो सिरच्येते नियम ङेन्ला सुङलाङ छ्याःङ फाइदा मेत। 10 ङुरूङगी थानज्यीक्तु चढे खाबाते सा ओङगो। थे थानदु चढे खाबातेचेन थाङबो पाल जोनामेकी थे पालगी नाङ जेसुकै चढे खिता फाप्च्येते नियम थोरूमसाक ङेन्कान्ते मिओनगी सा ओङच्येते मेन। 11 मिओनगी खाबाते पाप माफ नाङ सिराला पशु भोग बिन्दाते ठाकचेन गाङे भन्दा छ्येते पूजारीकी पालगी नाङ गाङे भन्दा चङगेते परमेश्वरराङ देत्च्येते ठाउँदु खेरग्यो। भोग बिन्दाते पशुचेन मि देत्सालेकी फिला खेरला स्येला क्युरग्यो। 12 होदोकराङ खाईन थे खोरोङ स्यिजीन थेन्दाते ठागी खित्सादु मि सेम खुदुक डोरस्यीत सिन येशूकीङ सारदुकी फिलाराङ थे खोरोङ ज्यान बिन्गीन स्या फाप्सुङ। 13 थोगी ङुरूङगीङ येशू ओत्सादु फिला गाल्ला मिओनगी थेला खाबाते इज्जत बेइज्जत खपे खिता फाप्क्यो। 14 च्यिला सासीन दि सा लुङबा ङुरूङते सधैँ देत्च्येते ठाउँ मेन, ङुरूङनी था स्वर्गने ओताते सारदु देतालाका गुकीन देता ओत। 15 येशू ख्रीष्टकी थोक थोक खाबा ओतेकी गोमा पशु भोग बिन्दाच्योक खाला थाचेन ङुरूङगी सधैँभरि परमेश्वरते जय जय खिता फाप्क्यो। दोक खित्च्येतेचेन थेराङ दाक्पोन प्रभु परमेश्वर ईन सिन साला थेला धन्यवाद तेरच्येते ईन। 16 थेमे दोक्पोईकी ज्येनज्यीकला लेमु खित्च्येतेताङ ज्येनताङ गोला साच्येते खिन देत। थेला मन परे खित्च्येते भोग बिन्दा च्योक्तेचेन होदोक दोक खित्च्येते ईन। 17 थेमे ज्येन बात खेराङला ताकान्ते छ्ये छ्ये मिकी साबाते ङेन, थेबे अधीनला देत। खेराङला छ्याःङ मेलेबा मेङस्यीत सिन थेबेकी ख्योकोनला तेइनराङ देत्क्यो। थेबेकी चुक चुक खाबे, च्यि खाबे सिन ङीमाई परमेश्वर दोन्दु गाङे हर हिसाब तेरा फाप्क्यो। ख्योकोनगी थेबेकी लाःपा कोताते ङेन्सीन खोपरोङगी खित्च्येते काम थेबाला लेमु लाला गा खिन खिओ। ख्योकोनगी थोक माक्यासीन थेबाला थे काम खिता सेम मालाङो। थेमे ख्योकोनला च्यि फाइदा ओङगीते? प्रार्थना खित्च्येते बात 18 थेमे ङ्योकोन लाईदु परमेश्वरला प्रार्थना खिन देता मातोङ। जे खित्जीनोङ सेमदु पापताङ लोभ सिराते छ्याःङ मोज्योबा खाला खिता छोल्कान ईन्देकी ङे दोक खिता ठीक मेन सिराच्योक लाबाते काम ङेराङगी छ्याःङ खाबा मेत सिन ङ्योकोनला लेमु खाला छ्या ओत। 19 थेमे ङा ख्योकोन ओत्सापा होत्ता ग्युरला ओङा थुप्स्यीत सिनोङ ख्योकोनगी परमेश्वरताङ आउदी खाला प्रार्थना खि। 20 परमेश्वरगी खाबाते नोमुङ खुदुक मोन्डोच्येते जमान येशूकी थे खोरोङ ज्यान बिन्ला स्यिजीन थे जीउदुकी थेन्दाते ठागी खित्सादु पूरो खाबा ओत। येशूचेन लुक लेमु खाला ताकान्ते छ्येते लुई गोठाला च्योक्ते ईन। मि सेम ढुक्क लोङकान्ते परमेश्वरगी ङुरूङ प्रभु येशूला स्यिसादुकी सोम्बो लोक्पा ओत। 21 होदोक खित्कान्ते परमेश्वरगी ख्योकोनगी थेकी खिता चालाच्योक खिताला ख्योकोनला गोच्येते स्येतताङ बुद्धि तेरस्यीत। दोक खाला थेकी ख्योकोनला येशू ख्रीष्ट छ्य्वापेई थे खोरोङला मन परे खित्च्येते काम खित्च्येते सेम तेरस्यीत। थेते सधैँभरि जय जय ओङस्यीत। आमेन। 22 थेमे आज्यो न्वावे, दि चिट्ठीला ङे काल्बा बात टिबा मेत। ईन्सीनोङ खेराङगी चुक खिता फाप्कीते, च्यि खिता फाप्कीते सिन दुरू टिबाते बातबरी ख्योकोनगी स्येदाङ मिक्किता खाला लेमु खाला ङेन सिन ङा बिन्ती खिओ। 23 ज्येन बात च्यि सासीन ङुरूङ न्वा तिमोथी जेलदुकी थेन्गीन सिन्सुङ। था थे होत्ता ङा ओत्सादु वासीन ङ्योकोन ङिकाराङ ख्योकोन ओत्सापा ओङामीन। 24 थेरू खेराङला ताकान्ते छ्ये छ्ये मि थेमे परमेश्वर सन्तान गाङेला ङेते नमस्ते ओत्लो सि। इटाली परमेश्वर सन्तानओनतेङ ख्योकोनला नमस्ते ओत्लो। 25 प्रभु येशू ख्रीष्टकी ख्योकोनला दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.