हिब्रू 12 - जिरेलपरमेश्वरगी थे खोरोङ मिओनला ताला लुक्यो 1 परमेश्वरला सु सुकी चुक खाईन विश्वास खासुङा सिन ङोला ङ्वा मुथुप्च्या मि बात छ्या स्येनामेकी था ङुरूङगी परमेश्वरगी दाक्पोनला लेपा फाप्क्यो सासासाक लेपाला जस्तो ओङसीनोङ सेम मेसेता खाला जुनी खाङ थेला विश्वास खिन देता फाप्क्यो। दाक्पोनला दोक खिताला रोके खित्च्येते कामताङ बात खिता ङुरूङगी गाङे तोङा फाप्क्यो। पाप खिता तोङा दुक्पा ओत्सीनोङ पाप खिताङ ङुरूङगी पूरो खाला तोङा फाप्क्यो। 2 दोक दोक खित्जीन येशूकी चुक चुक खासुङा सिन टोक मेज्येता खाला थेलाराङ तेइन देता फाप्क्यो। परमेश्वरला चुक खाला विश्वास खित्च्ये सिन तेन्ला तेरकान्ते थेराङ ईन। थेकी खित्सादुराङ ङुरूङ जुनी खाङराङ परमेश्वरला विश्वास खिन देता थुप्क्यो। स्यिङगी थामला टाँए खाला सेत्च्येते बात मि ङोन्ला आउदी मेलेबा ईन्सीनोङ तिरी आउदी गा खिता ङेत्क्यो सिरच्येते बात सेमला ज्यागीन मिओनगी दुक्पा बिन्दाते गाङे खपे खिन स्यिङगी थामला टाँए खाला स्याप्लाङ थेकी छ्याःङ ङोचा माक्यासुङ। थेमे थे गाल्गीन परमेश्वर देत्च्येते सिंहासन सामे छ्य्वापा देता ओत। 3 पापीओनगी थेला चुक खाईन खितासम्म विरोध खाईन दुक्पा बिन्दा ओताने सिरच्येते बात ठेम्बा खि। थे बात सम्झे खासीन दुक्पा भोगे खिता फाप्जीन ख्योकोन सेम मेसेता खाला देता थुप्क्यो, दि भन्दा ल्हाक्पा दुक्पाचेन ङे खपे खिता मुथुबो सिराच्योक खाला हरेस सा माफाबो। 4 स्यिसीनोङ ङा दोक पाप खितराङ मिक्किओ सिन पाप खित्च्ये छ्य्वापेई ठाला छोल्जीन थोरूमसाक ख्योकोन पापीओन लाःक्तु फाप्कीन स्यापराङचेन फापा मेत। 5 च्यि ख्योकोनगी परमेश्वरगी खेराङला फुज्युङ सिन अर्ती खिन दोक सिन साबाते बाततेबा टोक ज्येत्सुङ? थेकी “फुज्यो, खुई लेमु खित्स्यीत सिन प्रभु परमेश्वरगी थाप्जीन ङारजीन नामज्योक मेसेता खाला मादेत, थेकी खोल्ला ताला लुजीन सेम मासेत। 6 थे खोरोङगी ङिङज्ये खाबाते मिओनगी लेमु खित्स्यीत सिन प्रभु परमेश्वरगी थाप्क्यो ङारग्यो, थे खोरोङ फुज्युङ ईन सिन साबातेबाला थेकी दुला ताला लुक्यो,” सिन साबा ओत। 7 थोगी खेराङला लेमु ओङालाराङ दुक्पा ओङच्येते ईन सिन सम्झे खाला दुक्पा खपे खि। खेराङ थे खोरोङ फुज्युङ ईन्देकी परमेश्वरगी ख्योकोनला फुज्युङला च्योकराङ खाला ताला लुक्यो। च्यि आबातेकी ताला मालुक्पाते फुज्युङ ख्योकोनगी खइँसाला थोङा ओत? 8 परमेश्वरगी थे खोरोङ फुज्युङ फुमु गाङेला ताला लुक्यो। थेकी ताला मालुक्सीन ख्योकोननी परमेश्वर फुज्युङ फुमु ईनराङ मेन, थाराङ सुइँदे फुज्यीमा खुरगीन केबाते फिजा च्योक्तेका ईन। 9 थेमे ङुरूङगी दाक्पोन आबाबाला चुक खाबे सिनोङ ठेम्बा खि। थेबेकी ताला लुजीन ङुरूङगी थेबाला मान खाबा ओतान। थेबालानी थोक खाईन मान खाबा ओतान सासीन स्वर्गने ओताते आबा परमेश्वरगी ताला लुजीन ङुरूङगी थेला झन मान खिता फाप्क्यो। थेचेन ङुरूङला नोमुङ मिसिन्च्येते जुनी तेरकान्ते ईन। 10 ङुरूङगी लेमु मेलेबा डेला थुप्च्या मागालथुप टिक्पी दिनकामा आबाबेकी ङुरूङला ताला लुक्पा ओतान। थेबेकीचेन खोपरोङगी थुपासम्म लेमु खिताला ङुरूङला ताला लुकीन ओतान। परमेश्वरगीचेन ङुरूङ सेम खुदुक जोला थे खोरोङ च्योकराङ मेलेबाते कामताङ बात छ्याःङ मिक्किस्यीत सिन ङुरूङला लेमु ओङाला ताला लुच्येते ईन। 11 परमेश्वरगी ताला लुजीन दुक्पा ओङला ङुरूङला बान्दा गा मालाङो। थेकी ताला लुगीन लुगीन दाक्पोन पाको गाल्नामेकीचेन ङुरूङ थेकी साबा साबा च्योकराङ खित्कान थेमे ज्येनताङ डिक्ला थुन्ला देता थुप्कान ओङगो। 12 थोगी बत्ते खित्जीन लाक्पा काम्बा गले खाबाते मि थोक गाल्सीनोङ छ्योङगीन देताच्योक खाला था छ्याःङ खिता मुथुबो सिराच्योक खाईन लत्ता गत्ता ताङातेबा ख्योकोन हरेस मास्साबा खाला खेराङ लेपा फाप्सासाक लेपाला खिता फापाच्योक लोक्ला खि। 13 बत्ते खित्जीन गले खाबाते मि दाक्पोन मिरिल्स्यीत सिन सोझोते लामला छ्योङाच्योक खाला खेराङ लेपा फाप्सासाक लेपा थुप्स्यीत सिन ख्योकोनगीङ थे छ्य्वापाकामा स्येत खि। च्याङबो खाला देता फाप्च्येते बात 14 थुपासम्म ख्योकोन ज्येन गाङेताङ डिक्ला थुन्ला देत। सेम खुदुक गालाते मिओनगी खिता फापा च्योकराङ परमेश्वरला मन परे खित्च्येते कामताङ बातकामा खि। दोक मिक्किकान्ते सुङगीङ प्रभु परमेश्वरला थोङा मेङेदो। 15 खेराङ सुङ खेराङला दया खित्कान्ते परमेश्वरताङ ठाला माफाप्स्यीत सिन ख्योकोन च्याङबो खाला देत। दोक माक्यासीन मेलेबा मेलेबा काम खिता सेम लाला ख्योकोन परमेश्वर छ्य्वापेई ठाल्ला डुइओ। थोक्ते मिकीचेन परमेश्वरला विश्वास खित्कान काल्बेईला ङ्ये ज्युत्क्यो। 16 ख्योकोन सुङगीङ रन्डीबाजी थेमे होदि च्योक्ते खिता मेङच्येते काम माकेत। थेमे परमेश्वरला छ्याःङ वास्ता मिक्किकान्ते एसावकी च्योकराङ माकेत। थेकीचेन खामज्यीक सापला छ्येते फुज्युङ हक च्वाबा ओतान। 17 थोक खाबेकी खित्सादु तिरी आबातेकी छ्येते फुज्युङतेला तेरच्येते आशी थेकी माङेत्सुङ। आबातेला आशी नाङ सिन ङुला फिरला खित्जीनोङ थेकी गोमा थे खोरोङगी थोक मेलेबा खाबाते बात खुदुक ज्वापराङ माथुप्सुङ। दि बात ख्योकोनला छ्याराङ ओत। 18 थेमे ख्योकोन परमेश्वर दोन्दु ड्वा ङेत्च्येतेचेन थाङबो इस्राएलीओन सीनै बोमदु ख्योला च्योक्ते मेन। सीनै बोमचेन थेबा ख्याम्बा थुप्च्या थेमे लाक्पेकी दोला ता थुप्च्येते ईन। थेजीन थेबेकी थे बोमदु आउदी जोदाज्यीक मे बाराते थेमे मुन्दाक जिङी गालाते थोङा ओतान। थेरू छ्येज्यीक हुन्डी चले खाबातेङ थेबेकी थाहा छ्येता ओतान। 19 आउदी कस्स्ये खाईन बिकुल फुबाते ङोरो थेमे गुरूङ खिताच्योक खाईन परमेश्वरगी बात खाबाते ङोरोङ थेबेकी थोबा ओतान। थेमे थेबेकी “परमेश्वरला ङ्योकोनताङ दोक खाला बात माकेत सिन सि,” सिन मोशाला बिन्ती खाबा ओतान। 20 च्यिला सासीन परमेश्वरगी “दि बोमदु सुङ ओङा मेङगो। रा ठोन्डो समेदोङ देने जेक्पा मेङगो। जेसुङ सासीन दोई ग्याप्ला सेता फाप्क्यो,” सिन साबा ओतेकी ज्यीबेकी मि गाङे थरावरी गाला ओतान। 21 थे बोमदु थोक थोक ओङाते ताजीन मि गाङेला आउदी ज्यीबा लाबा ओतान। मोशेकी समेत “ङा ज्यीबेकी थुरथुर दारगीदुक,” सिन साबा ओतान। 22 तर ख्योकोननी सीनै बोमदु मेन्देकी सियोन बोमदुका लेपा ओत। सोम्बोते परमेश्वर देत्च्येते स्वर्गने ओताते यरूशलेम सारोङ ख्योकोन लेप्सादुराङ ईन। थेरू गा खिन परमेश्वरते जय जय खिन देत्कान्ते ङोला ङ्वा मुथुप्च्या परमेश्वर दूतओन ओत। 23 येशू ख्रीष्ट मिओन ओङेकी छ्येते फुज्युङगी ङेत्च्येते हक ङेत्कान्ते मिओनोङ थेरूराङ ओत। स्वर्गदु थेबा गाङे मिन टिबा ओत। मि गाङेते न्याय खित्कान्ते परमेश्वर थेरूराङ ओत। परमेश्वरगी पूरो खाईन पापदुकी टाल्गीन थेकी खि साबा च्योकराङ खित्कान्ते स्यिइन सिन्दाते मिओनोङ थेरूराङ ओत। 24 येशू देत्सादुराङ ख्योकोन ख्योलाते ईन। थेकी खित्सादुराङ परमेश्वरगी मिओनताङ तिरी खिओ साबाते जमान पूरो ओङाते ईन। येशू स्यिजीन थे जीउदुकी थेन्दाते ठागी खित्सादु परमेश्वरगी मि पाप माफ तेरच्या खाबाते ईन। थोगी येशू स्याप्तेचेन हाबिल स्याप्ते च्योक मेन, दिनी खापान खापान छ्येते बात ईन। 25 थोगी ख्योकोनगी परमेश्वरगी साबाते बातला नामज्योक सेत। थेकी दुरू साबाते बातला नामज्योक मेसेत्कान्ते मिओनगीनी सजाय ङेता ओतान सासीन थेकी स्वर्गनेकी साबाते बात ङुरूङगी ङेन्दा ताङसीन च्यि झन ङुरूङ उम्के खिओतरो? 26 थेजीन थेकी बात खित्जीन सीनै बोमदु सा लीक्पा ओतान। थोक खाला सा लिक्कान्तेकी “था ङीमा लेनज्यीक ङा लोक्ला गाङेपा लिइओ। साकामा मेन, थेजीन ङा स्वर्गनेङ गाङेपा लिइओ,” सिन साबा ओत। 27 “ङीमा लेनज्यीक लोक्ला” साबाते बात च्यि ईन्दे सासीन थोक खिते छोमुचेन ङुरूङ मिगी थोङच्येते थे खोरोङगी जोबातेबरी परमेश्वरगी गाङे तोर ज्युत्क्यो। थेकी तोर माच्युताते जति ज्येनचेन गाङे देत्क्यो। 28 थोगी ङुरूङ नोमुङ तोरला मोन्डोच्येते परमेश्वर राज्यदु देता ङेत्च्या ओङा ओतेकी ङुरूङगी परमेश्वरला धन्यवाद सिरा फाप्क्यो। दोक खिन थेला मन परे मिक्किच्येते छ्याःङ खिता मेङगो सिन ज्यीबा खिन थेकी साबा च्योकराङ खाला थेला माने खिता फाप्क्यो। 29 च्यिला सासीन ङुरूङ परमेश्वर मेकी जेसुकै थाला ज्वापच्योक खाला सजाय तेरकान्ते परमेश्वर ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.