हिब्रू 11 - जिरेलपरमेश्वरला सु सुकी चुक खाईन विश्वास खाबा ओताने 1 परमेश्वरला विश्वास खित्च्या सिरातेचेन थेकी तेरग्यो साबाते जति गाङे ङेत्क्यो सिन आश खाईन गुकीन देताते पक्काराङ ङेत्क्यो थेमे खइँदा दोकस्यिकराङ ओताक्वा सिन दाक्पोनगी नोमुङ थोङा मेत्सीनोङ परमेश्वरगी साबा ओता च्योकराङ ओत सिन पत्ते खित्च्येते ईन। 2 ङुरूङ ज्युज्यु पुर्खेकीङ थेला होदोकराङ खाईन विश्वास खाबा ओतान। थेबेकी थे खोरोङला थोक खाईन विश्वास खाबा थोङगीन परमेश्वरगी थेबेकी थोक खाबाते लेमु ईन सिन साबा ओतान। 3 परमेश्वरला विश्वास खितेकी खित्सादु थेकी दुरू दोक ओङस्यीत, थेरू थोक ओङस्यीत सिन सानामेई साबा च्योकराङ खाईन दि सा नाम थेमे सा नाम खाङ ओताते जति गाङे उत्पन्न ओङा ओतान सिन ङुरूङ पत्ते खिओ। दोक खाईन जोबाते थरिङोला मि मिगी थोङच्येते जति गोमा ओतराङ मेत्सीनोङ परमेश्वरगी दुरू दोक ओङस्यीत, थेरू थोक ओङस्यीत साकीन जोबा ओतान। 4 हाबिलगी परमेश्वरला विश्वास खाईन कयिनगी खाबाच्योक मेन्देकी परमेश्वरला चढे खिता फाप्च्येतेराङ भोग बिन्गीन चढे खाबा ओतान। थेकी भोग बिन्गीन चढे खाबाते मन परे खाईन परमेश्वरगी हाबिलचेन थे खोरोङगी खि साबा च्योकराङ खित्कान्ते ईन सिन साबा ओतान। थोगी हाबिल थाङबो जुगलाराङ स्यिइन गाल्सीनोङ थेकी खाबाते काम ताला परमेश्वरला चुक खाला विश्वास खिता फाप्च्या ईन्दाका सिन ङुरूङगी थोरूमसाक लोपा थुप्क्यो। 5 थे खोरोङला विश्वास खित्कान्ते ईन्देकी परमेश्वरगी हनोकला मास्यिबालाराङ स्वर्गने खेरा ओतान। परमेश्वरगी स्वर्गने खेराते ईन्देकी थे खापा गाल्ताका सिन गाङेपा चाल्सीनोङ मिओनगी थेला थेपा मेतान। थेला थोक खाला स्वर्गने खेरा भन्दा गोमा परमेश्वरगी हनोकचेन थे खोरोङला मन परे खित्च्येते काम खित्कान्ते मि ईन सिन साबा ओतान। 6 परमेश्वरला छ्या स्येबा छोल्कान्ते मिकी परमेश्वर पक्काराङ ओत थेमे थे सु ईन्दे, चुक खिते सिन पक्काराङ खाला छ्या स्येबा छोल्कानला थेकी लेमु खिओ सिन थेला विश्वास खिताराङ फाप्क्यो। होदोकराङ खाला थेला विश्वास खित्कान्ते मि थेला मन परे खिओ। होदोक खाला थेला विश्वास मिक्किकान्ते मिचेन थेला मन परे मिक्किओ। 7 नूहे बात विचार खि। छ्यार्बा ग्याप्ला भल ग्याक्यो सिरच्येते बात थे बेलासाक थेला छ्याःङ छ्या मेत्सीनोङ परमेश्वरगी साबाच्योक पक्काराङ खिओ सिन थेला विश्वास खाईन थेकी परमेश्वरगी कोताते ङेन्सुङ। थे खोरोङ थेमे थे खाम्बे मि सुङ भलगी नुप्ला स्या माफाप्स्यीत सिन थेकी पानीजहाजज्यीक जोसुङ। दोक खाईन परमेश्वरगी साबाते ङेन्गीन थेकी दि सा लुङबे मि ज्येनचेन दोषी ईन सिन तेन्गीन बिन्सुङ। थेमे थे खोरोङला विश्वास खाबेकी खित्सादु परमेश्वरगी थेला दोषी मेन सिन सासुङ। 8 अब्राहामोङ परमेश्वरगी थे खोरोङला ज्येनज्यीक लुङबा तेरग्यो, थेपा ग्युक सिन सानामेई थेला विश्वास खाईन थे खोरोङ लुङबा ताङगीन ख्याम्सुङ। थोक खाला ख्याम्जीन ङा दि ठाउँदुराङ डुइन ओत सिन थेला छ्याःङ छ्या मेतान। 9 परमेश्वरगी तेरग्यो साबाते लुङबादु लेप्नामेकीङ अब्राहामचेन थे लुङबे मि च्योक खाईन मेन्देकी पालकामा टाँए खाईन देत्सुङ। थोक ईन्सीनोङ ङीमाई थे लुङबा परमेश्वरगी दाक थे खोरोङला तेरग्यो सिन थेकी थेला विश्वास खिनराङ देत्सुङ। थे फुज्युङ इसहाकताङ नातिते याकूबोङ थोकराङ खाईन पालकामा टाँए खाईन देत्सुङ। थेबा ङिबोलाङ परमेश्वरगी अब्राहामला च्योकराङ खाईन थे लुङबा तेरग्यो सिन साबा ओतान। 10 अब्राहामनी नोमुङ राम्ला तोरला मोन्डोच्येते सारदु देता ङेत्क्यो सिरच्येते बातका पत्ते खाईन होथे सारदु देता ङेत्क्यो सिन गुकीन देता ओतान। थे सारचेन परमेश्वर थे खोरोङगी दोक खाला ज्वामीन साकीन थेकीराङ जोबाते ईन। 11 परमेश्वरगी साबा च्योकराङ खिओ सिन अब्राहामगी थेला विश्वास खाबेकीराङ थे खोरोङ थेमे फेम्मेते सारा थोक गान्दा गाम्मा गाला ओत्सीनोङ थेबेते फिजा केसुङ। सारा नोमुङ फिजा क्या मुथुप्च्या ओत्सीनोङ परमेश्वरगी जमान खाबा च्योकराङ खिओ सिन अब्राहामगी थेला विश्वास खाबेकी थेबेते फिजा केसुङ। 12 थोक खाईन अब्राहाम गान्दा गाल्गीन स्यिच्ये बेला ख्योला ख्योला खाबा ओत्सीनोङ थेते नामगी कार्माताङ मुन्तीसरी ङोला ङ्वा मुथुप्च्या सन्तान ओङसुङ। 13 परमेश्वरगी तेरग्यो सिन साबाते लुङबा अब्राहाम, इसहाक थेमे याकूबकी खोपरोङ स्या बेलासाकोङ ङेता मेतान। ईन्सीनोङ थे खोरोङगी जमान खाबाच्योक परमेश्वरगी ङीमाई दाक खिओ सिन थेला विश्वास खाबेकी थेबेकी थे ङेता छेतराङ ठाने खाईन स्यिसुङ। थेबा खोपरोङ दि सा लुङबादु खालि लामला ख्याम्कान्ते मि लुङबे मि च्योकराङ ईन सिन थेबाला छ्या ओतान। 14 थेबेकी दि सा लुङबादु खोपरोङला खालि लामला ख्याम्कान्ते मि लुङबे मि च्योककामा ठाने खाबाते बात विचार खित्जीन थेबेते खइँसाला खोपरोङ लुङबा ओत थेमे थेबा थे लुङबाला देताला ख्याम्बाते ईन सिरच्येते बात लेमु खाला छ्या स्येकीदुक। 15 थेबेकी गोमा खोपरोङ थेन्गीन वाबाते लुङबालाराङ खोपरोङ ड्वा चालाते लुङबा ठाने खाबा ईन्सीन थेबा ग्युरला गाल्ला थेरूराङ देता थुप्च्या ओतान। 16 तर था थेबा देताला डुइन ओताते लुङबानी खोपरोङगी ताङगीन वाबाते लुङबा भन्दाङ खापान खापान लेमुते ईन। थेचेन स्वर्गने ओत। थोगीराङ खोचेन अब्राहाम, इसहाक थेमे याकूबकी माने खाबाते परमेश्वर ईन सिरजीन थेला छ्याःङ ङोचा मालाङो। थेबे परमेश्वर ईन्देकीराङ थेकी स्वर्गने थेबा देत्च्येते सारोङ जोबा ओत। 17 परमेश्वरगी जे खासीनोङ लेमुराङ खिओ सिन थेला विश्वास खाबा ओतेकीराङ थेकी थे सेम ताप्ला इसहाकला भोग बिन सिरजीन अब्राहामगी थोक खिताला ठीक खासुङ। थेकी अब्राहामला थे सखा सन्तान काल्बेई फेल ज्युत्क्यो सिन जमान खाबा ओतान। थे खोरोङ सन्तान मिनला दोक्पोईराङ ओताते फुज्युङला अब्राहामगी भोग तेराला ठीक खाबा ओतान। 18 परमेश्वरगी “इसहाक छ्य्वापेईराङ ङा खुई सखा सन्तान काल्बेई फेल ज्युत्क्यो,” सिन साबा ओताते इसहाकलाराङ अब्राहामगी भोग तेराला ठीक खाबा ओतान। 19 इसहाक विषयला परमेश्वरगी साबाते बात थे खोरोङ सेमगी नाङ ओतेकी इसहाकला भोग बिन्सीनोङ परमेश्वरगी थेला दाक सोम्बो लोक्पा थुप्क्यो सिन अब्राहामगी विचार खाबा ओतान। थोगी भोग तेराला ठीक खाबे छोमु परमेश्वरगी थोक खित माच्युतेकी इसहाकला परमेश्वरगी सोम्बो लोक्पा च्योकराङ ओङसुङ। 20 परमेश्वरगी आशी तेरग्यो सिन थेला विश्वास खाबा ओतेकीराङ इसहाककीङ फुज्युङतेबा याकूबताङ एसावला साबा च्योक ओङस्यीत सिन आशी बिन्दा ओतान। 21 परमेश्वरगी आशी तेरग्यो सिन थेला विश्वास खाबा ओतेकी याकूबकीङ थे खोरोङ स्या बेलाला फेर्का चुकीन लाकीन देत्कीन परमेश्वरते जय जय ओङस्यीत सिन साबा ओतान थेमे यूसुफ फुज्युङ ङिबोला आशी बिन्दा ओतान। 22 थेमे परमेश्वरगी ङीमाई इस्राएलीओनला मिश्रे लुङबादुई तेन्ला खेरग्यो सिन थेला विश्वास खाबा ओतेकी यूसुफकीङ थे खोरोङ स्या बेलाला “परमेश्वरगी ख्योकोनला दि लुङबादुई तेन्ला खेरजीन ख्योकोनगी ङे रूबाङ ङ्योम्बुराङ खेरा,” सिन साबा ओतान। 23 परमेश्वरगी मोशाला लेमु खाला तेइओ सिन थेला विश्वास खाबा ओतेकीराङ आबातेताङ आमातेकी गेल्बो हुकुम मेङेन्दा खाईन मोशाला केनामेई दावा सुमसाक ब्वाकीन ज्याक्सुङ। मोशा केजीनमेईराङ आउदी लेमुई ओता थेबेकी थोङा ओतान। थे बेलाला मिश्रे लुङबे गेल्बोकी इस्राएलीओन फिजा केजीन फुज्युङ ईन्सीन क्यासात्तु सेत्ला क्युर सिन हुकुम बिन्दा ओतान। गेल्बोकी थोक हुकुम बिन्दा ओत्सीनोङ मोशे आबा आमा छ्याःङ ज्यीबा माक्यासुङ। 24 थेमे तिरी स्यारा गाल्नामेकी ज्येनगी थे खोरोङला फारो गेल्बो फुमु फुज्युङ साबाते मोशाला गा मालासुङ। परमेश्वरला विश्वास खाबेकी मोशेकी “ङा फारो गेल्बो फुमु फुज्युङ मेन,” सिन सासुङ। 25 परमेश्वरला विश्वास मिक्किकान्ते मिओनताङ टिक्पी दिन किम्मु खाला ङ्योम्बु देत्ला पाप खिता भन्दा थेलाचेन परमेश्वरगी छाने खाबाते मिओनताङ दुक्पा खपे खिताराङ लेमु लासुङ। 26 मिश्रे लुङबे सम्पत्ति धनी ओङनामेई ङेत्च्येते मान भन्दा ख्रीष्टला विश्वास खानामेई ज्येनगी मिगी थोङसार्मु खित्च्येते बातराङ थेला लेमु लासुङ। च्यिला सासीन ज्येनतोक्ते मेन्देकी थेकी परमेश्वरगी तिरी थे खोरोङला तेरच्येते मानगी विचारकामा खाबा ओतान। 27 थे खोरोङला मिश्रे गेल्बो लाःक्तुकी जोए खिओ सिन परमेश्वरला विश्वास खाईन थे मिश्रे गेल्बोताङ छ्याःङ ज्यीबा मिक्किता खाईन मिश्रे लुङबादुई थेन्गीन ख्याम्सुङ। मि मिगी थोङा मुथुप्च्येते परमेश्वरला थेकी थे खोरोङ मिगी दोन्दुराङ थोङाच्योक खाईन थे लुङबादुई थेन्गीन ख्याम्सुङ। 28 थेमे मिश्री गाङेते छ्येते फुज्युङ सेत ओङकान्ते परमेश्वर दूतकी खोपरोङ इस्राएली सुङगीतेङ छ्येते फुज्युङतेबा सुङलाङ छ्याःङ मिक्किओ सिन मोशेकी परमेश्वरला विश्वास खासुङ। थेकी इस्राएलीओन गोई ठेलाला लुई रीउकी ठाक कु सिन ठाक कुत च्युता ओतान। थोक खाईन थेकी निस्तार चाड माने खित च्युता ओतान। 29 थेमे इस्राएलीओन सा कोम्बोलाराङ ख्याम्गीन लाल समुन्द्र थेन्दा ओतान। परमेश्वरगी खोपरोङला थे समुन्द्रदु नुप मुज्युता खाला फारकेनपा देन्ग्यो सिन थेला विश्वास खाबेकी थेबा ख्याम्च्ये लामदु छ्यु काम्बा ओतान। तर थेपा थेन्दा छोल्कान्ते मिश्रीओनलाचेन समुन्द्रे छ्यु वाकीन गाङेला उरगीन खेरा ओतान। 30 परमेश्वरगी साबाच्योक खिओ सिन थेला विश्वास खाईन इस्राएलीओनगी ङीमा दुईनसाक यरीहो सारगी फेरो खिरसुङ। थेमे ङीमा दुईनगी छोमु थे सारगी फेरोला चिबाते गारो गाङे बराङ बुरूङ राम्सुङ। 31 थे सारदुराङ ओताते राहाब रन्डीकी परमेश्वरगी थे सार इस्राएलीओनला तेरग्यो सिन परमेश्वरला विश्वास खाबा ओतान। थेमे थे लुङबा चुक दुका सिन चिवा खित डोकान्ते इस्राएलीओनला थेकी लेमु खाबा ओतान। थोगीराङ परमेश्वर बातला नामज्योक मेसेत्कान्ते थे सारगी मि गाङेला सेत्जीन इस्राएलीओनगी थेलाचेन मासेत्सुङ। 32 परमेश्वरला विश्वास खाईन सु सुकी चुक चुक खासुङा सिन बात खिइ सासीन दोक्ते बात काल्बेई ओत। थोक्ते मि नाङ गिदोन, बाराक, सामसन, यिप्ता, गेल्बो दाऊद, शमूएल थेमे परमेश्वर बात खित्कान्ते मिओन थोई ईन थोई। थेबा गाङे बात दुरू टिला मिसिनो। 33 थेबे नाङ कोईकी परमेश्वरगी खोपरोङला ग्याल ज्युत्क्यो सिन थेला विश्वास खाईन लडाइँ खाईन लुङबा लुङबाला ग्याला ओतान, न्याय निसाफ खित्कान्तेबेकी सुङलाङ काका पाका मिक्किता खाईन न्याय खाबा ओतान, परमेश्वरगी तेरग्यो साबातेबा ङेता ओतान। थेला विश्वास खाईन कोईचेन च्येनगी खादुकी समेत थारा ओतान। 34 थेला विश्वास खाबा ओतेकी कोईला मे धुनी नाङ लुजीन मेकी समेत छ्याःङ खाबा मेतान, कोईचेन खोपरोङला तरवारगी तुप्ला सेता छोल्कान्ते मिओन लाःक्तुकी याङ याङ उम्के खाबा ओतान। थेबा खोपरोङ छ्याःङ खिता मुथुप्कान्ते ईन्सीनोङ परमेश्वरगी शक्ति बिन्गीन थेबाला छ्ये छ्ये काम खित च्युता ओतान। थोक खाईन शक्ति ङेत्कीन थेबेकी खोपरोङताङ लडाइँ खित ओङकान्ते ज्येन ज्येन लुङबे फौजला ज्यीबाराङ मिक्किता खाईन उरगीन ताङा ओतान। 35 थोकराङ खाईन कोई कोई फेम्मे मिकी स्याप्ते मिओनला परमेश्वरगी सोम्बो लोइओ सिन थेला विश्वास खाबेकी थेकी थेबे मिओनला सोम्बो लोक्पा ओतान। लोक्ला कोई कोईला जेलला लुक्नामेई परमेश्वरला विश्वास खिता ताङसीन तेन्ला तोङगो सिरजीन थेबेकी ङ्योकोन थोक मिक्किओ सिन साबा ओतान। थोगी थेबाला बिजोग तेन्गीन तेन्गीन सेता ओतान। परमेश्वरगी था तिरी सोम्बो लोक्ला थे खोरोङताङराङ ज्य्वाक्यो सिन थेबेकी थेला विश्वास खाबा ओतेकीराङ थेबेकी थेला विश्वास खिता तोङराङ मोतोङो सिन साबा ओतान। 36 थोकराङ खाईन कोईला मेन्दा मेन्दे दोष लै खाईन मि ङोन्दु इज्जत बेइज्जत खाबा ओतान, कोईला कोर्रा लै खाबा ओतान, कोईला नेल कोन्गीन जेलदु लुक्पा ओतान, 37 कोईला दोईकी ग्याप्कीन सेता ओतान, कोईला आरेकी काकीन फेक ङि जोकीन सेता ओतान थेमे कोईला तरवारगी तुप्कीन सेता ओतान। थोक खाईन ज्येनगी थेबाला खेदा खाईन तेरासम्म दुक्पा बिन्दा ओतान। थोक खाबेकी दुक्पा ङेत्कीन थेबा रा लुगी कोक्तेन खोलाक खोन्गीन युगीन देता फापा ओतान। 38 थोक खाला युगीन थेबा कहिले ठाःकताङ बालुवा बाई छ्याःङ मेत्से नाङला, कहिले ले नाङला, कहिले फुगी नाङला थेमे कहिले डालुम नाङला देता फापा ओतान। दोक्तेबाला दुरू सोम्बो ज्य्वाबा मेङगो सिराच्योक खाईन दि सा लुङबे मिओनगी थेबाला खेदापानी खाबा ओतान। सिइराङ सासीन दि सा लुङबे मिओन थेबाताङ ङ्योम्बु देता सोई खित्च्येतेराङ मेन। 39 परमेश्वरगी थे खोरोङला होथोक खाला विश्वास खित्कान गाङेकी थोक खाबाते लेमु ईन सिन साबा ओतान। ईन्दानी परमेश्वरगी जमान खाबा च्योकराङ खाबाते थेबेकी खोपरोङ सोम्बो ओत्केलाराङ थोङा माङेत्सुङ। 40 थेबे पालोलाराङ थे पूरो माक्याबातेचेन थेकी ङुरूङ लाईदु झन लेमुज्यीक काम खिताला ठीक खाबा ओतान। च्यिला सासीन ङुरूङ लाईदु खिताला ठीक खाबाते कामगी छ्य्वापेईराङ थेकी थेबालाङ ङुरूङलाङ पालोईला पूरो खाला पापदुकी टाल्ला थे खोरोङ दोन्दु ड्वा ङेत्कान ज्वा चाला ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.