हिब्रू 10 - जिरेल1 परमेश्वरगी मि नाङ थे खोरोङ नियम छ्य्वापेई खिता चालाते कामताङ तिरी थेबाला लेमु खिओ साबाते काम दोक्पोईराङ मेतान। थे नियमचेन तिरी थेकी लेमु खिओ साबाते कामगी नक्कलकामा ओतान। थोगीराङ थे नियमला साबाच्योक खाईन पूजारीओनगी लोई ठाङमा परमेश्वरला याङ याङ पशुतेबा भोग तेरगीन देत्सीनोङ थेला माने खिताला थे दोन्दु डोकान सुङगीङ नोमुङ था ईन्सीन ङे पाप गाङे माफ ओङसुङ सिन सिरा थुपा मेतान। 2 पशुतेबा भोग बिन्ला मि पाप सधैँभरि लाईदु माफ ओङच्या ईन्दा ईन्सीन थेमे थोक खानामेई था ईन्सीन ङे पाप पूरो खाईन माफ ओङसुङ सिन मि ढुक्क खाईन देता थुपा ईन्सीन च्यि थोक खाला भोग तेरगीनराङ देत्च्या ओतानरो? 3 भोग तेरगीन देत्जीन मिओनला लोई ठाङमा खोपरोङ पापी ईन सिरच्येते बातकामा ठेम्बा लोङगीन ओतान। 4 च्यिला सासीन लाङताङ रोबोतेबे ठाक थोरलानी मि पाप नोमुङ माफ ओङराङ मेङगो। 5 थोक ईन्देकीराङ देमा वाकीन ख्रीष्टकी परमेश्वरताङ बात खिन “मिओनगी भोग बिन्दातेताङ चढे खाबाते परमेश्वर खोल्ला छ्याःङ मोगोओ। खुई ङाला मि जुनी लाकीन दुरू केर च्युताते ईन। 6 मिओनगी पशुतेबा भोग बिन्गीन स्येबाते थेमे खोपरोङ पाप माफ नाङ सिन भोग बिन्दातेबा खोल्ला गाराङ लाबा मेतान। 7 थोगीराङ ङे खोल्ला ‘ए परमेश्वर, ङे च्यि खिते सिन परमेश्वर बातला टिबा ओता च्योकराङ खाला खुई खिता चालाच्योक खिताला ङा देमा वाबाते ईन,’ सिन साबाप,” सिन साला दुक। 8 बात खित्जीन गोमाचेन ख्रीष्टकी “मिओनगी भोग बिन्दातेताङ चढे खाबाते परमेश्वर खोल्ला छ्याःङ मोगोओ। मिओनगी पशुतेबा भोग बिन्गीन स्येबाते थेमे खोपरोङ पाप माफ नाङ सिन भोग बिन्दातेबा खोल्ला गाराङ लाबा मेतान,” सिन साला दुक। ईन्दानी भोग तेरच्येतेताङ चढे खित्च्येते गाङे परमेश्वर नियमला खि साबातेराङ ईन। 9 दि बात साकीन सिन्नामेई तिरीचेन लोक्ला थेकी “परमेश्वर खुई खिता चालाच्योक खिताला ङा देमा वाबाते ईन,” सिन साला दुक। मिओनगी थे गोमे नियम ङेन्ला भोग तेरच्येतेताङ चढे खित्च्येते छ्याःङ खिता माफाप्स्यीत सिन येशू ख्रीष्ट थे खोरोङ ज्यान बिन्गीन स्या ओत। 10 दोक खाईन स्यिइन येशू ख्रीष्टकी परमेश्वरगी खिता चालाच्योक खाबा ओत। था लोक्ला नोमुङ दोक खिता माफाप्च्या खाईन थेकी थे खोरोङ ज्यानराङ बिन्गीन स्यिइन ङुरूङ सेम खुदुक जोबा ओत। 11 ङीमे ठाङमा खोपरोङला खि साबा ओता च्योकराङ खाला पूजारी गाङेकी लाला देत्ला पशुराङ पशु भोग तेरगीन देत्सीनोङ नोमुङ सुङ मि पाप माफ ओङा थुपा मेतान। 12 तर येशू ख्रीष्टकीचेन मि पाप गाङे पूरो खाला माफ तेराला बाजिईकामा थे खोरोङ ज्यान बिन्गीन स्यिसुङ। था थेकी लोक्ला दि काम नोमुङ खिता माफाबो। दोक खाईन स्यिइन थेचेन परमेश्वर सामे छ्य्वापा गाल्गीन देता ओत। 13 परमेश्वरगी येशू ख्रीष्ट शत्रुओनला ग्याल्ला थे तिङबे ओक्तु माज्याकथुप थेचेन थेरूराङ देत्क्यो। 14 थेकी थोक खाईन बाजिईकामा थे खोरोङ ज्यान बिन्गीन स्यिइन सेम खुदुक जोबाते मिओनला पूरो खाईन पापदुकी टाल्गीन सधैँभरि लाईदु परमेश्वर दोन्दु ड्वा ङेत्कान जोसुङ। 15 येशू ख्रीष्टकी थोक खाबातेराङ ईन सिन परमेश्वर आत्मेकीङ ङुरूङला छ्या स्ये ज्युत्क्यो। थेकी गोमा 16 “था ङे मिओनताङ खित्च्येते जमान दिराङ ईन। च्यि सासीन थेबेकी चुक खिता फाप्कीते, च्यि खित्च्ये सिन ङा थेजीन थेबाला लेमु खाला खो ज्युत्क्यो। थेबेकी ङेन्दा फाप्च्येते ङे नियम ङा थेबे सेमगी नाङ टिबा ओता च्योकराङ खाला ज्य्वाक्यो। दि बात ङा प्रभु परमेश्वर सिन ओत,” सिन साला दुक। 17 लोक्ला थेकी “थेबेकी खाबाते पाप थेमे खिता मेङच्येते काम ङा लोक्ला नोमुङ सम्झे मिक्किओ,” सिनोङ साला दुक। 18 परमेश्वरगी थोक खाईन गाङे पाप माफ बिन्दा ओतेकी पाप माफ नाङ सिन था नोमुङ छ्याःङ भोग तेरा माफाबो। दुक्पा ओङजीन हरेस सा मेङगो 19 थोगी आज्यो न्वावे, येशू स्यिजीन थे जीउदुकी थेन्दाते ठागी खित्सादु ङुरूङ परमेश्वर देत्च्येते ठाउँदु ड्वा ङेत्कान्ते मि ओङा ओतेकी ङुरूङ छ्याःङ ज्यीबा मिक्किता खाला थे ठाउँदु ड्वा थुप्क्यो। 20 थोङलाचेन थेरू डोच्येते लामदु पर्दा क्योरगीन ग्वारा खाबा च्योकराङ ओतान। तर थानी थे पर्दा रोलाच्योक खाईन येशूकी थे खोरोङ ज्यान बिन्गीन स्यिइन ङुरूङ नोमुङ मिसिन्च्येते जुनी ङेत्ला थेरू डोच्येते लाम जोबा ओत। 21 थेरू परमेश्वर मि गाङे लाईदु काम खित्कान्ते ङुरूङते छ्येज्यीक पूजारी ओत। 22 बात दोक दोक ईन्देकी छ्याःङ शंका मिक्किता खाला परमेश्वरला विश्वास खिन सेमदु पाप सिराते छ्याःङ मोज्योबा खाला ङुरूङ थे दोन्दु ड्वा फाप्क्यो। च्यिला सासीन येशू ख्रीष्टकी खाबाते कामगी खित्सादु ङुरूङ पाप गाङे माफ ओङेकी था ईन्सीन ङे पाप पूरो खाईन माफ ओङसुङ सिन ङुरूङ ढुक्क खाला देता थुप्च्या ओङा ओत। थेमे चङगेते छ्युईकी ठु खाईन चोके खाबाते मि ओङा ओत। 23 ङुरूङचेन परमेश्वर खिओ साबा च्योकराङ खित्कान्ते ईन्देकी थेकी दाक्पोनला तेरग्यो साबाते जति गाङे ङेत्क्यो सिन सिओ। थोगी थेकी थोक खिओ सिन आश खाईन गुकीन देताते ङेत्क्योतराङ सिन ङुरूङ छ्याःङ शंका मिक्किता खाला देता फाप्क्यो। 24 थोकराङ खाला ङिङज्ये खिताला थेमे लेमु काम खिताला ङुरूङगी चुक खाला दोक्पोईकी ज्येनज्यीकला लोपा थुप्कीका सिरच्ये छ्य्वापा विचार खिता फाप्क्यो। 25 थेमे कोई कोईकी गाङेराङ जम्मा ओङसाला ड्वा ताङला दुक। दोक खिता मेङगो। प्रभु येशू ग्युरला ओङच्येते दिन था काल्बेई बाँकी मेत सिन ङुरूङला छ्या ओतेकी बरू ङुरूङगी गाङेराङ जम्मा ओङला परमेश्वरला विश्वास खिनराङ देताला दोक्पोईकी ज्येनज्यीकला आँट तेरा फाप्क्यो। 26 येशू ख्रीष्टकी थे खोरोङ ज्यानराङ बिन्गीन दाक्पोनला पापकी सजाय छ्य्वापेई टाला ओत सिरच्येते सत्यते बात छ्या स्येनामेकीङ पाप खिता छ्याःङ मेन सिराच्योक खाला ङुरूङगी पाप खिनराङ देत्सीन थोक खाईन खाबाते पाप माफ ओङाला था भोग तेरच्येते छ्याःङ मेत, ख्रीष्टकी खित्च्येतेङ छ्याःङ मेत। 27 दोक खाला पाप खित्कान्ते मिकीनी परमेश्वरगी मि गाङे न्याय खिते छोमु थे खोरोङ शत्रुओनला सजाय तेराला ठीक खाबाते आउदी ज्यीबा लाङच्येते मे नाङमा स्यूक्पा फाप्क्यो सिरच्येते बातकामा ठेम्बा खासीन ओङगो। 28 मोशेकी टिबाते परमेश्वर नियम माङेन्गीन सुइँदेकी गल्ती खासीन थेमे दि मिकी दोक दोक खाबाते ङेराङ थोङाप सिन मेन्दा ङि सुमगी मि रूसादु सानामेई गल्ती खित्कान्ते मिला छ्याःङ दया मिक्किता खाला दाक सेत्क्यो। 29 होथोक्ते मिकीनी थोक ज्यीबा लाङच्याई सजाय ङेत्क्यो सासीन परमेश्वर फुज्युङला काम्बे पुज्या छेदोङ गने मिक्किकान्ते, दाक्पोन सेम खुदुक जोच्येते जमान पूरो खित्कान्ते परमेश्वर फुज्युङ ठाकला छ्याःङ काम लै मिक्किच्येते च्योक ठाने खित्कान्ते थेमे मिओनला दया खित्कान्ते परमेश्वर आत्मे विरोध खित्कान्ते मिकी झन चुक ज्यीबा लाङच्याई सजाय ङेदोङा सिन ख्योकोन खेराङराङ विचार खि। 30 च्यिला सासीन “ङे बात मेङेन्कान्तेबाला चुक खिता फाप्कीते सिन ङाला छ्या ओत, मेलेबा खित्कानला ङा किम्बा ज्येल्ग्यो,” सिन सिरकान्ते प्रभु परमेश्वरला ङुरूङ छ्या स्येक्यो। लोक्ला “प्रभु परमेश्वरगी थे खोरोङ मि गाङेते न्याय खाला तेरग्यो,” सिनोङ साबा ओत। 31 सोम्बोते परमेश्वर लाःक्तु फापा आउदी ज्यीबा लाङच्ये बात ईन। 32 थेमे गा लाङच्येते बात ङेन्दाला स्यूनामेई खेराङगी चुक चुक्तेन्दे दुक्पा भोगे खिता फापा ओताने होथे गोमे बाततेबा ठेम्बा खि। थे बात ङेन्नामेई ङेतासम्म दुक्पा ङेत्जीनोङ ख्योकोनगी थे बात ङेन्दा बान्दा ताङा मेतान। 33 खेराङला मेलेबा खित्कान्तेबेकी कहिले ख्योकोनला मि गाङे ङोन्दु ईन्दा मेन्दा साकीन इज्जत बेइज्जत खाईन दुबा ओतान। कहिलेचेन खेराङला च्योकराङ दुक्पा बिन्दाते मिओनला ख्योकोनगी दुक्पे बेलाला ताबा ओतान। 34 जेलला लुक्पाते मिओनला थुप थुपला ठेत्च्येते थेमे थेबे दुक्पाला ताच्येतेङ ख्योकोनगी खिनराङ ओतान। खेराङगी नोमुङ सिन्ला तोरला मोन्डोच्येते स्वर्गे सम्पत्ति ङेता ओत सिन छ्या ओतेकी खेराङ सम्पत्ति ठ्वाला खेरजीनोङ ख्योकोन सेम मेसेता खाईन देता ओतान। 35 दि बाततेबा सम्झे खाला सेम मेसेता खाला ख्योकोन थोरूमोङ होथोकराङ खिन देत। थोक खिनराङ देत्सीन परमेश्वरगी ख्योकोनला छ्येज्यीक इनाम तेरग्यो। 36 परमेश्वरगी खित ज्युता चाला च्योकराङ खिता थुप्स्यीत सिन जस्तो दुक्पा ओङसीनोङ ख्योकोन सेम मेसेता खाला देता फाप्क्यो। दोक खिन देत्सीनकामा थेकी तेरग्यो सिन साबाते जति ख्योकोनगी ङेत्क्यो। 37 परमेश्वर बातला “था थेमा ग्युरला ओङकान्ते ओङा खाईन सिन्सुङ। रकस्यिकोङ अलमल मिक्किता खाला था थे दाक ओङगो। 38 ङे खि साबा च्योकराङ खिन ङाला विश्वास खित्कान्ते मिकीचेन नोमुङ मिसिन्च्येते जुनी ङेत्क्यो। थोक खिता तोङकान्ते मिचेन ङाला गा मालाङो,” सिन टिला दुक। 39 तर ङुरूङचेन परमेश्वरला विश्वास खिता ताङला नरककुण्डमा स्यूक्कान्ते मि नाङ माफाबो। ङुरूङनी थेला विश्वास खिन देत्कीन थेकी पूरो खाईन पापदुकी टाल्गीन स्वर्गने देत ज्युत्च्येते मि नाङका फाप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.