हिब्रू 1 - जिरेलपरमेश्वरगी थे खोरोङ फुज्युङ छ्य्वापेई खाबाते बात 1 परमेश्वरगी थाङबो थाङबोबा ङुरूङ ज्युज्यु पुर्खाताङ पालोताङ पालो थरी थरी खाईन परमेश्वर बात खित्कान्तेबे छ्य्वापेई बात खाबा ओतान। 2 थरिङोला दि जुग सिन्दे खालाचेन थेकी थे खोरोङ फुज्युङ छ्य्वापेई ङुरूङताङ बात खाबा ओत। दि सा नाम थेमे सा नाम खाङ ओताते जति गाङे परमेश्वरगी थे खोरोङ फुज्युङ छ्य्वापेईराङ जोबा ओतान। दोक खाईन जोबाते गाङे ङेत्कान्ते थेराङ ईन सिन परमेश्वरगी साबा ओत। 3 परमेश्वर फुज्युङला ताला परमेश्वरताङ चुक छ्येज्यीक शक्ति ओता ईन्दा सिन छ्या स्येक्यो। परमेश्वरताङ थेला छ्याःङ फरक मेत, परमेश्वर जस्तो दुक थेङ उस्तोराङ ओत। दि सा नाम थेमे सा नाम खाङ ओताते जति गाङेला तेइन दि दोक ओङस्यीत, थे थोक ओङस्यीत साला ओताते जति गाङे चुक चुक ओङा फाप्च्येते ईन्दे थोकराङ ओङ ज्युत्कान्ते थेराङ ईन। मि पापदुकी ठाल्च्येते लाम जोकीन थे स्वर्गने छ्येज्यीक शक्ति ओताते परमेश्वर सामे छ्य्वापा देता ओत। परमेश्वर दूतओन भन्दा परमेश्वर फुज्युङ छ्ये ईन 4 परमेश्वर फुज्युङचेन परमेश्वर दूतओन भन्दा खापान खापान छ्ये ईन। परमेश्वरगी थेला थे खोरोङ दूतओनला भन्दा छ्येज्यीक मान बिन्दा ओत। 5 परमेश्वरगी थेला च्योक खाईन थे खोरोङ दूतओन नाङ सुङलाङ नोमुङ “खो ङे फुज्युङ ईन, थरिङमेई ङा खुई आबा ईन,” सिन साबा मिन्दुक। थेमे “ङा थे आबा ईन, थेचेन ङे फुज्युङ ईन,” सिनोङ साबा मिन्दुक। 6 थे खोरोङ छ्येते फुज्युङतेला दि सा लुङबामा तोङजीन याङराङ परमेश्वरगी “ङे दूत गाङेकी थेते जय जय खित्स्यीत,” सिन साला दुक। 7 थे खोरोङ दूतओन विषयलाचेन थेकी दोक सिन साला दुक। चुक सासीन “परमेश्वरगी थे खोरोङ दूतओनला कहिले ल्हाबा च्योक, कहिले जोदाज्यीक मे च्येला च्योक ओङ च्युत्ला काम खित ज्युत्क्यो,” सिन साला दुक। 8 परमेश्वरगी थे खोरोङ फुज्युङ चुक्ते ईन्दे सिन साबाते बातचेन परमेश्वर बातला “परमेश्वर, खो सधैँभरि राज्य खिनराङ देत्क्यो। खुई सुङलाङ थिचोमिचो मिक्किता खाला लेमु खाला राज्य खिओ। 9 खोल्ला लेमुते काम मन परे खिओ। मेलेबा काम सिरातेचेन खोल्ला गाराङ मालाङो। थोगीराङ खोल्ला खुई परमेश्वरगी खोरोङ र्वाओन भन्दा झन काल्बा गा खिन देताला छाने खाबाते ईन,” सिन साला दुक। 10 परमेश्वरगी थे खोरोङ फुज्युङ चुक्ते ईन्दे सिन साबाते बातलाराङ लोक्ला “प्रभु परमेश्वर, गाङे भन्दा गोमा खुईराङ दि सा लुङबा जोबाते ईन। नामताङ नामगी नाङला ओताते जति जोकान्तेङ खोराङ ईन। 11 खोलाक ङिङबा गाल्ला राल्ला ड्वाप च्योकराङ खुई जोबाते गाङे पालोई दाक तोरला डुइओ। थोक ईन्सीनोङ खोचेन नोमुङ खुदुक मोन्डोओ। 12 खोरोङगी जोबाते गाङे खुई खोलाक थुल्लु खाला थुल्ग्यो। थेमे खोलाक ङिङबा गाल्नामेई साम्बाते खोलाक फेरे खाबा च्योकराङ खुई दिबा गाङेला खुदुक जोइओ। ईन्सीनोङ खोचेन नोमुङ खुदुक मोन्डोओ, खो जस्तो दुक सधैँभरि उस्तोराङ देत्क्यो। खुई आयु नोमुङ मिसिनो,” सिनोङ परमेश्वर बातला साला दुक। 13 थे खोरोङ दूतओन नाङ परमेश्वरगी सुङलाङ नोमुङ “ङे खुई शत्रुओनला ग्याल्गीन खुई तिङबे ओक्तु माज्याकथुप खो दुरू स्योक, ङे सामे छ्य्वापा देत,” सिन साबा मेत। 14 परमेश्वर दूतओननी गाङेराङ परमेश्वरगी कोता कोता खित्कान्तेबाकामा ईन। थेबा दोकस्यिकराङ दुक सिन मिगी थोङा मुथुबो। परमेश्वरगी थेबाला थे खोरोङगी पूरो खाला पापदुकी टाल्ला स्वर्गने देत ज्युत्च्येते मिओनला मद्धत तेराला गाङेपा ताङा ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.