गलाती 6 - जिरेलदोक्पोईकी ज्येनज्यीकला मद्धत खिता फाप्च्येते बात 1 आज्यो न्वावे, ख्योकोन नाङ सुइँदेकी गल्ती खासीन परमेश्वर आत्मेकी खि साबाच्योक खित्कान ख्योकोनगीचेन खेराङगीङ दाक गल्ती खिता थुप्क्यो सिन टोक मेज्येता खाला थेकी थोक खाबाते लेमु मेन, थानामेकी थोक माकेत सिन खा छ्येत लेमुकीराङ सम्झे खाला बिन। 2 दोक्पोईकी ज्येनज्यीक ख्याल ज्याक्ला ख्योकोन गाङेकी खेराङ नाङ सुला नाम च्यि मद्धत खिता फाप्कीका मद्धत बिन। दोक खानामेई ख्योकोनगी ख्रीष्टकी खि साबाते नियम ङेन्दाते ईन। 3 दोक खाला दोक्पोईकी ज्येनज्यीकला मद्धत खिता साटोला सुइँदा मि ङानी ज्येन च्योक मेन सिराच्योक खाला छ्ये खिदुक सासीन थोक्ते मि लेम्बा ईन। थेचेन थे खोरोङगी विचार खाबा च्योक्ते मि मेन। 4 मि सुङगीङ फलानेकी भन्दानी ङेका लेमु खाबाते ईन सिराच्योक खाला छ्ये खिता मेङगो। बरू दाक्पोनगी खिता फापा च्योकराङ खाताकाना माक्याताका सिन विचार खाला ता फाप्क्यो। दोक खाला ताजीन दाक्पोनगी खिता फापा च्योकराङ खाबा ओताते मिकीचेन गा खिता ङेत्क्यो। 5 दाक्पोन दाक्पोन जिम्माचेन मि गाङेकी दाक्पोनगीराङ खुरा फाप्क्यो। 6 थेमे दाक्पोनला परमेश्वर बात लोप्कान्ते मिओनला गोच्येते जति तेरा थुपासम्म तेरा फाप्क्यो। 7 जे खासीनोङ ओङगो, च्यि च्यि खाला दुका सिन परमेश्वरगी थोङराङ मोथोङो सिराच्योक खित्कान्ते मिचेन लेम्बा ईन। मिकी जे सोन देप्कीदुक तिरी बाली रूक्जीनोङ थेराङ रूइओ मेनरो? 8 होदोकराङ खाला दाक्पोन खुशीला ख्याम्गीनराङ देत्कान्ते मिचेन थोक खाबेकी खित्सादु ङ्येला स्यिला नरककुण्डमा डुइओ। परमेश्वर आत्मेकी खित ज्युता च्योकराङ खित्कान्ते मिकीचेन नोमुङ मिसिन्च्येते जुनी ङेत्क्यो। 9 थोगी आ लेमु खालाङ च्यि ओङगीतेरो सिराच्योक खाला ङुरूङगी लेमु खिन देता तोङा मेङगो। सेम मेसेता खाईन लेमु खिनराङ देत्सीनचेन बाली लै खानामेई तिरी बाली रूक्पा ङेता च्योकराङ खाला लेमु खाबेकी खित्सादु ङीमाई ङुरूङगीङ इनाम ङेत्क्यो। 10 बात दोक ईन्देकी ज्येनला लेमु खित्च्येते मौका ओत्केलाराङ ङुरूङगी मि गाङेला लेमु खिता फाप्क्यो। थोरूम काल्बा च्योक्तेचेन ङुरूङगी येशू ख्रीष्टला विश्वास खाईन खाम्बाज्यीक मि च्योकराङ ओङा ओताते मिओन नाङ दोक खिता फाप्क्यो। मिकी साम्बाते जुनी ङेताते बातकामा छ्येते बात ईन 11 था दि बातओन ङा ङाराङराङ टिगीन ओत। ङे दुरू दोक जोदातेन्दे अक्षरला टिबा थोङनामेई दि बातओन पक्काराङ ङेराङ टिबाते दुका सिन ख्योकोनगी छ्या स्येबा खि। 12 बात च्यि सासीन ख्योकोनला कर लै खाला खाला जीउला खतकी चिनु ज्वा फाप्क्यो सिन सिरकान्ते मिओनगीनी खोपरोङ फाइदा ताला मिला खुशी ज्वाप्लाकामा थोक खि सिरच्येते ईन। येशू ख्रीष्टला स्यिङगी थामला टाँए खाईन सेताते बातकामा लाप्सीन ज्येन यहूदीओनगी खोपरोङ विरोध खाला खेदापानी खिओ सिनकामा थेबेकी थोक सिरच्येते ईन। 13 थेबा खोपरोङगी खतकी चिनु जोबा ओत्सीनोङ परमेश्वर नियमला खि साबाते ज्येन ज्येन नियमचेन थेबेकी मेङेनो। खोपरोङगी साबाते ङेन्गीन ख्योकोन थेबे छ्य्वापा लै खाबा ओत सिन नोउ छ्ये खिता ङेत्स्यीत सिनका थेबेकी ख्योकोनला खतकी चिनु ज्वा फाप्क्यो सिरच्येते ईन। 14 ङे नोमुङ होथेबेकी च्योक खाला दाक्पोनगी खाबाते खइँदा कामगी छ्य्वापेई छ्ये खिता माफाप्स्यीत। ङेनी स्यिङगी थामला टाँए खाईन सेताते ङुरूङ प्रभु येशू ख्रीष्टलाकामा छ्ये जोइओ सिन टुङ्गो खाईन सिन्दा ओत। प्रभु येशू ख्रीष्ट थोक खाईन स्याप्की खित्सादु ङाङ स्यिङगी थामला टाँए खाईन स्याप्ते च्योक ओङगीन दि सा लुङबे मिओनगी ङेन्दा फाप्क्यो सिरच्येते नियम थेमे थेबेकी माने खित्च्येते रीतिथितिओन ङे लाईदु छ्याःङ काम लै मिक्किच्या गाला ओत। थेमे ङाराङचेन होथोक्ते नियमताङ रीतिथिति लाईदु स्याप छेतराङ ओङा ओत। 15 च्यिला सासीन खतकी चिनु जोला फाइदा ओङच्येतेताङ थे चिनु माजोला घटी ओङच्येते बात छ्याःङ मेत। साम्बाते जुनी ङेत्कीन थोक्ते मिकी खित्च्येते च्योक्ते काम खिकाना मिक्किका सिरच्येते बातकामा छ्येते बात ईन। 16 होदि बातकामा ङेन्कान मि गाङेला थेकी ढुक्क खाला देत ज्युत्स्यीत, ङिङज्ये खिनराङ देत्स्यीत। होदि बातकामा ङेन्कान्ते मिओनराङ परमेश्वरगी थे खोरोङ मि ईन सिन छाने खाबाते पक्काते इस्राएली ईन। 17 थोरूमोङ बातज्यीक च्यि सासीन थानामेकी सुङगीङ ङाला दुक्पा बिन्ला ङे काम ङ्ये ज्युता मोछोल्स्यीत। येशूकी खि साबाते काम खित्जीन मिओनगी दुबेकी खित्सादुराङ ङे जीउ खाङ मे डाम थोताते ईन सिन ख्योकोनगी छ्या स्येबा खि। 18 लो आज्यो न्वावे, ङुरूङ प्रभु येशू ख्रीष्ट ख्योकोनला दया खिन ख्योकोनताङ ङ्योम्बुराङ देत्स्यीत। आमेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.